Nu̍-dɛ̍ᵻ 28 - Ku̍o̍ Delee 1999

Pɔɔ bei nɛ Mɔota

¹ À jǎ-a gbuǔh wɛ̀ pɛlɛpɛ-ɛ, wɛ̀ à dǔ tbǒ-a chɛ̀ i̍ juo ɛ̍-ɛ, ɛ̍ nynɛ̌ bo Mɔota.

² Blǔh nyɔ̍ nɛ-a doǒ-ɛ, u̍h nmɔ-a gblɛ̍n-ɛ dǒ àɔ̀ we̍ sǔh-ɛ, ɛ̍ se̍ dɛ̍ka nɛ. Nǐ-a dba̍-aɛ, sɔ seɔn-a ji̍-i. Wɛ̀ u̍h tbà nɛ̍ gbà, iě u̍h dǎ àɔ̀ kli̍hgbɛ̍ à iě wěla.

³ Wɛ̀ Pɔɔ gbò kea̍ɛ̍n bu̍hᵻá pǔn iě ɔ̍ po̍ i̍h jlǐh. Dě i̍h nynɛ̌ bo nɛ̍-a fuun sà sɛ̍, wɛ̀ ɛ̍ nmu̍ Pɔɔ-a kɔba gba̍i̍ngba̍i̍n.

⁴ Jɛ blǔh nyɔ̍ jě-a sɛ̍ ɛ̍ pèle-a Pɔɔ-a kɔba we̍-ɛ, iě u̍h la̍a̍ dě u̍h-a sǔh nynɛ̌, “Jɔ̍gbau la ɔ̍ nɛ nyɔ̍ gbe̍ja̍a̍ poe nyɔ̍ nu̍ ka̍. Ɔ̍ pǔh jbǒ nɔ̀ɔ̍ i̍ wɛ̀, jɛ à nyɔsoa-a mu̍ ɔ̍ gba̍a̍ sàɛ̀.”

⁵ Wɛ̀ Pɔɔ fùn ɛ̍-ɛ dě jlǐh, iě ɛ̍ se̍ ɔ̍ dɛ̍ nui.

⁶ Sɔ u̍h gbàɛ̀ ɔ̍ sɔ̍n-a pùn-u tìh de àe̍e̍ ɔ̍ iě mɛ̌ wla. Jɛ u̍h chlì-o i̍ chlì-i wɛ̀ dɛ̍ se̍ ɔ̍ nu̍. Wɛ̀ u̍h bǐi wlùh i̍ dode̍, iě u̍h la̍a̍, “Ɔ̀ la à nyɔsoa due bo.”

⁷ Nɛ̀ jɔ̍gbau kɔn-a tbǒ laa̍ wlu̍ i̍-ɛ, ɔ̍ klè se̍ we̍ tɛ̀n, ɔ̍ nynɛ̌ bo Pɔbliɔ. Wɛ̀ ɔ̍ gba̍ àɔ̀ gbò we̍, iě à koe ɔ̍ blǐ dǒ wǐh ta̍a̍n di̍i̍. Wɛ̀ ɔ̍ wɔ̌n à dɛ̍i̍ nu̍ tìh nɔ̌ kmɔ̌.

⁸ Ɛ̍ ti̍ laa̍ nɛ̀ gbèwè gbɛ̍n Pɔbliɔ baa iě klaɛ̍-ɛa nu̍ ɔ̍, nɛ̀ ɔ̍ pɛ̌n i̍. Wɛ̀ Pɔɔ pa̍ dě ɔ̍ we̍ gbò iě ɔ̍ tè ɔ̍ sɔ̍n dlǔ, ɔ̍ ba̍le, iě ɔ̍ pǔh.

⁹ Ɛ̀ la ɛ̍ nɛ-aɛ, wɛ̀ poa-nyɔ̍ kli̍hgbɛ̍ nɛ-a dǒ tbǒ laa̍ kɛ̍n-ɛ, iě u̍h ji̍ wɛ̀ u̍h pǔh.

¹⁰ Nyɔ̍ laa̍ iě u̍h nyǐ àɔ̀ nyǐ-dɛ̍ᵻ dɔu. À mu̍-a la̍ mu̍-ɛ, wɛ̀ u̍h po̍ à pɔ̀n-dɛ̍ᵻ kli̍hgbɛ̍ dě mɛɛ̍ dɛɛ di̍i̍ à iě gba̍.

Pɔɔ bei-a mu̍ Wlom

¹¹ À sì-o chǔhᵻ ta̍a̍n iě à dǔ mɛɛ̍ dɛɛ di̍i̍ gbǎ-a. Ɛ̍ sɔ dǒ Ɛlesandlea wlɔ̀ di̍i̍ wɛ̀ ɛ̍ wlè wìla̍ dǒ tbǒ laa̍ kɛ̍n. Ɛ̍ nynɛ̌ bo Gbànynuu̍ mɛɛ̍.

¹² À nyni̍-a Siwlakiu-ɛ, wɛ̀ à sì-o wǐh ta̍a̍n.

¹³ À sɔ-a doǒ-ɛ, iě à nyni̍ dǒ Wlɛkeɔn. Sɔ̀n sɛ̀n-aɛ, wɛ̀ poɔ sɔ dě di̍na̍ we̍ ɛ̍ ji̍. Ɛ̀ po̍-a wǐh ta̍a̍n-ɛ, iě à nyni̍ dǒ Potioli.

¹⁴ Dǒ à jɛɛ de̍di̍i̍ᵻ, wɛ̀ u̍h sà à wìè-i à iě dɔɔ̌dlǔ chlà dǒ u̍h we̍. Dǒ à sɔ-ɔ wɛ̀ à nyni̍ dǒ Wlom.

¹⁵ De̍di̍i̍ᵻ nɛ-a Wlom-ɛ, wɛ̀ u̍h wɔ̌n à nynɛ̌ iě u̍h ji̍ à i̍ jǎɛ la̍. Duuh nyni̍ Apiɔ wlɔ̀gbàɛ̀, iě duuh nyni̍ dǒ tà u̍h-a dǎɛ-a Dihwi̍h Gbòᵻ Ta̍a̍n-ɛ. Pɔɔ jě-a u̍h-ɛ, sɔ ɛ̍ bɛ̌-ɛ ɔ̍ wlì i̍ iě ɔ̍ po̍ Nyɔsoa tlɔ̌.

Pɔɔ nɛ Wlom

¹⁶ À sǐ-a dǒ tùgbàwlɔ̀ ɛ̀ kɔn nynɛ̌ nu̍-a Wlom-ɛ di̍i̍ i̍-ɛ, iě kɔ̀mla̍ sà Pɔɔ sɔ̍n kɛ̍n ɔ̍ iě ɔ̍ naɛ blǐ nɛ, wɛ̀ fledlǔ iě ɔ̍ jlǐhɛ̍ we̍ tù.

¹⁷ Wǐh ta̍a̍n sì-aɛ, wɛ̀ Pɔɔ po̍ Juu-a wlu̍ kwa̍ blě nyɔ̍ nɛ-a doǒ-ɛ tàdùè. Wɛ̀ ɔ̍ la̍a̍ dě u̍h we̍, “De̍di̍i̍ᵻ, ǐn se̍ dɛ̍ sɔ̀n nu̍ dǒ à blǐ nyɔ̍ ke à baaᵻá nu̍-dɛ̍ᵻ we̍, wɛ̀ u̍h gbɛ̍n m̍ dǒ Juluslɛn wlɔ̀ di̍i̍. Iě u̍h sà-ɛ ǐn Wloma nyɔ̍ kwlǎ.

¹⁸ Wɛ̀ u̍h chlɛ̌ m̌, jɛ u̍h gbɛ̀n-a dě ɛ̍ di̍i̍ ǐn se̍-a dɛ̍ nu̍ ɛ̀ iě-a ǐn dbǎ-aɛ, sɔ u̍h-a pɔ̀n ǐn sɔ̍n kɛ̍n sà-a i̍ de.

¹⁹ Jɛ Juu nyɔ̍ la̍ u̍h se̍ ɛ̍-ɛ wɔ̌ɛn, ɛ̍ kɔn ǎn kloǒ kàn nɔ̌ Bloa̍ Joi we̍. Jɛ ɛ̍ se̍ nɛ̀ ǐn blě tìh iě ǎn chɛ̀-a nyɔ̍ i̍ blaɛ kai.

²⁰ Ɛ̍ kɔn ǐn tèle mɔ̀-a tìh i̍ iě mɔ̀ jě, wɛ̀ iě wlu dě mɔ̀ we̍. Dɛ̍nu̍ɛ, ɔ̀ kɔn tìh Eslɔɛ nyɔ̍ tè-a wlùh kɛ̍n-ɛ, ɛ̍ kɔn mɔ̍ u̍h sa̍n-ɛ jɔɔdbǔ la.”

²¹ Wɛ̀ u̍h la̍a̍ dě ɔ̍ we̍, “À-a se̍a Judia nyɔ̍-a chlǐh-dɛ̍ wɛ-a chɛ̀ jě dǒ àn dɛ we̍. Iě à de̍di̍i̍ᵻ juh-a sɔ-ae ke-ɛ, u̍h-u se̍a kunǎ ke dɛ̍-o-dɛ̍ sɔ̀n bla̍ dǒ ìn pùn.

²² Jɛ à pɔ̀n à iě nàɛ̀ flɔ̍nwlùh juo, dɛ̍nu̍ɛ, à juo ɛ̍-ɛ gbɔ̀ù la ìn nɛ-a dě di̍i̍-ɛ, u̍h-a bla̍ ɛ̍ tìh pùn i̍ tà kli̍hgbɛ̍.”

²³ Wɛ̀ u̍h po̍ wǐh ja̍i̍ u̍h ke Pɔɔ iě gbèɛ̀ɛn. Iě nyɔ̍ tlùgbei̍ wɛ̀ de̍ dǒ tà Pɔɔ tè-a i̍-ɛ dǒ weɛ̍ laa̍ di̍i̍. Wɛ̀ ɔ̍ sà dɛ̍ we̍ i̍ sèàɛ̍-ɛ dě klàɛ̍we̍ blǐ iě ɛ̍ jɛɛ flìwe̍. Ɔ̍ bla̍ Nyɔsoa-a kmɔ̌ wlu̍ i̍ kɔn tìh dě u̍h we̍. Nɛ̀ ɔ̍ fɔ̀n dɛ̍ we̍ ɔ̍ iě u̍h-a dlǔ jli̍-i Jusu-a tìh dǒ Mose-a telě ke wlu̍ Nyɔsoa-a tu̍owli po̍ nyɔ̍ bla̍-aɛ we̍.

²⁴ Dɛ̍ ɔ̍ bla̍-aɛ, ɛ̍ jli̍-i duuh-a dlǔ. Jɛ duuh se̍ ɛ̍ tìh dǎɛ.

²⁵ Wlu̍ due bo Pɔɔ bla̍ iě u̍h dǔ mu̍-ɛɛ. Jɛ u̍h-a mu̍-aɛ, nɛ̀ u̍h-a wlùh se̍ due nɛ. Ɔ̍ la̍a̍, “Nyɔsoa-a Sùù blaɛ i̍ iě ɛ̍ dǎ ka dě mɔ̀ baaᵻ we̍, dě Nyɔsoa-a tu̍owli po̍ nyɔ̍ Asaia ja̍a̍. Ɛ̍ la̍a̍,

²⁶ ‘Mu̍ dě nyɔ̍ la we̍, nɛ̀ nàa̍, Mɔ̀-a mu̍ dounᵻ i̍ pu̍e̍e pu̍e̍e-e, jɛ mɔ̀ se̍ dɛ̍ɛ̍ i̍ wɔ̌n mu̍. Mɔ̀-a mu̍ i̍ gbèɛ̀ɛ̍n gbèɛ̀ɛ̍n-ɛ, jɛ mɔ̀ se̍ i̍ jě mu̍.

²⁷ Dɛ̍nu̍ɛ, nyɔ̍ la u̍h-a wlùh gbǎ gbǎ i̍. Iě u̍h-a sà nyɔ̍ dounᵻ i̍, iě u̍h ka̍n u̍h-a jlǐh. Ɛ̍ se̍ la̍a̍n nɛ de-ɛ, nɛ̀ u̍h-a jlǐh-a mu̍ i̍ jě, iě u̍h-a dounᵻ iě i̍ wɔ̌n, iě u̍h-a wlùh iě dɛ̍ɛ̍ i̍ wɔ̌n. Nɛ̀ u̍h-a mu̍ nɔ̌ ǐn we̍ i̍ bǐi de wɛ̀ iě u̍h pǔh-i.’

²⁸ “Ɛ̍ tìh-ɛ, mɔ̀ juo ɛ̍ ka Nyɔsoa dbo̍-a ɔ̍ nyɔ̍ sèìe-ɛ la wɛ̀ dě ùh se̍-a Juu nyɔ̍-ɛ we̍-ɛ. U̍h-a mu̍ ɛ̍ dounᵻ we̍ po̍.” [

²⁹ Pɔɔ chlà-a ɔ̍ wlu-ɛ, sɔ Juu nyɔ̍ laa̍ u̍h-a mu̍ la̍-ɛ sǔh. Jɛ nɛ̀ u̍h-a wɔ̍ɔ̍n i̍ sà slɛ̀-a tu̍ngbe̍e̍ dǒ u̍h-a chɛ̀ nynɛ̌.]

³⁰ Sɔ̀nᵻ sɔɔ̌n gblàà bo Pɔɔ sì dě ɔ̍ chɛ̀-a i̍ gbɛ̍n gbò di̍i̍. Nɛ̀ nyɔ̍ kli̍hgbɛ̍ ùh-a ji̍-a i̍ nala dǒ ɔ̍ we̍-ɛ, ɔ̍ gbà u̍h wlì.

³¹ Iě ɔ̍ bla̍ Nyɔsoa-a kmɔ̌ wlu̍ i̍ kɔn tìh, wɛ̀ ɔ̍ po̍ nyɔ̍gbei nǎ Joi Jusu Klai-a tìh. Nɛ̀ ɔ̍ wlu-i gbài̍gbài̍ iě nyɔ̍ se̍ ɔ̍ bɔ̌ i̍ po̍.