Nu̍-dɛ̍ᵻ 26 - Ku̍o̍ Delee 1999

Pɔɔ sà ɔ̍ chɛ̀ we̍ tìh i̍

¹ Wɛ̀ Aklepa la̍a̍ dě Pɔɔ we̍, “Ìn sà-ɛ wlu̍ kɛ̍n ìè àn chɛ̀ we̍ tìh i̍ sà.” Iě Pɔɔ to sɔ̍n ja̍i̍, sɔ ɔ̍ sà la̍ ɔ̍ chɛ̀ tìh kɛ̍n sǔh.

² Ɔ̍ la̍a̍, “Blǔh Baa Aklepa, ka ǐn nyna i̍ sèàn da̍a ìn jǔ iě tìh kli̍hgbɛ̍ Juu nyɔ̍ blaɛ-a ǐn i̍-ɛ, wɛ̀ ǎn mu̍-a i̍h ǎn chɛ̀ dlǔ i̍ sà-ɛ, nɛ̀ ǐn nmɔ i̍.

³ Ɛ̀ nu̍-a ɛ̍-ɛ chɛ̀ gbòǒ-ɛ, ìn juo Juu nyɔ̍-a nu̍-dɛ̍ᵻ kli̍hgbɛ̍ ke u̍h-a tòlo tìh. Ɛ̍ tìh-ɛ, ǎn ba̍le-e, gbɛ̍n wlǔh-i ìè nɔ̌ ǐn we̍ dounᵻ po̍.

⁴ “Sɔ dě tɔ̀blɔ̍ɔ̍ dě ǎn jǔwɛ blǐ-ɛ, Juu nyɔ̍ kli̍hgbɛ̍ ju̍o̍e ǎn kmɔ̌ we̍ i̍ dě ǐn blǐ ke dǒ Juluslɛn wlɔ̀ di̍i̍.

⁵ Ɛ̍ nɔ̀ɔ̍, u̍h-a chɛ̀-a mu̍ ǐn tìh we̍ sà, u̍h juo m tɛin se̍e̍. Fɛlesii-a gbɔ̀ù ɛ̀ kɔn-a nɛnɛ̌ dě à wɛɛ sà dɛ di̍i̍-ɛ, ɛ̍ we̍ sɔɛn bo ǎn nu̍.

⁶ Nɛ̀ kaka la̍ wlu̍ Nyɔsoa po̍-a tɔ̀ma̍a̍ dǒ à baaᵻ we̍-ɛ, ɛ̍ bo ǐn tè wlì. Ɛ̍ kɔn mɔ̍ bo ɔ̀ nyna-a bu̍hᵻ ta̍i̍ da̍a.

⁷ Blǔh Baa, tɔ̀ma̍a̍ wlu̍ la ɛ̍ bo à chɛ̌tuᵻá pùè jɔ̌ sɔɔ̌n tè wlì u̍h iě jě. Iě u̍h-a sà Nyɔsoa wɛɛ wlù ke sɔ̀n. Wlì tè dɛ̍ laa̍, ɛ̍ tìh ɛ̍ kɔn mɔ̍ bo Juu nyɔ̍-a blaɛ-a tìh i̍.

⁸ Mɔ̀ɔ̍ Juu nyɔ̍, ka Nyɔsoa-a sà-e mɛ̌-nyɔ̍-ɛ, dɛ̍nu̍ mɔ̀-ɔ gbaɛ ɛ̍ wlùh ɛ?

⁹ “Ǎn chɛ̀ la ɛ̍ nu̍ ǎn wlùh, dɛ̍-o-dɛ̍ ɛ̀ mu̍-a Jusu ɔ̀ sɔ-a dǒ Naaslɔɛ-ɛ ɔ̍ nynɛ̌ wɔ̍n nyni i̍-ɛ, i̍h kli̍hgbɛ̍ bo ǐn fɔ̀n dɛ̍ we̍ ǎn nu̍ sàǐtòò.

¹⁰ Ìh laa̍ bo ǐn nu̍ dǒ Juluslɛn. Nɛ̀ Nyɔsoa-a slaǎ sà nyɔ̍ klaaᵻá tba̍ ǐn bu̍hᵻ de̍e̍ i̍ wɛ̀ ǎn po̍ Nyɔsoa nyɔ̍ dɔu kasoo. Nɛ̀ pò u̍h-a dbǎ-a dɛ klain-ɛ, nɛ̀ ǐn wɔ̌ɛn ɛ̍ we̍.

¹¹ Ti̍ kli̍hgbɛ̍ we̍ ǎn ple̍ wɛɛ sà gbòᵻ sɔ̀n i̍ iě ǎn gbɛ̍n u̍h kàn, iě ǎn nu̍ u̍h-a kloǒ u̍h iě Nyɔsoa-a nynɛ̌ wɔ̍n nyni i̍. U̍h-a dɛ se̍ ǐn wlì i̍ nɛ tìh ǎn mu̍ dě dakɔ̍ duuh-a wlɔ̀ᵻ di̍i̍-a chɛ̀ iě ǎn jě-e u̍h klě.

Pɔɔ-a Nyɔsoa dɛ-ɛ gbǎ-a

¹² “Ɛ̍ kɔn tìh bo Nyɔsoa-a slaǎ sà nyɔ̍ klaaᵻ nyǐ ǐn tùn, wɛ̀ u̍h po̍ ǐn slǔh iě ǎn mu̍ dǒ Damaɛkɔ wlɔ̀ di̍i̍.

¹³ Blǔh Baa, ǐn nɛ dǒ wìè-i jlǔh gbàɔ̀ klo̍o̍, wɛ̀ ǐn jě fààn nape̍ ɛ̍ fa̍n ɛ̍ sìì jlǔh, iě ɛ̍ sɔ dě ja̍u̍n we̍. Nɛ̀ ǐn ke ǐn ba̍ᵻ na, wɛ̀ ɛ̍ fa̍n sààn à de̍e̍ i̍.

¹⁴ Wɛ̀ à kèàɛ i̍ dǒ bloɔ̍. Dǒ ǐn wɔ̌n-ɛ wlu̍ dě Iblu wlu̍ di̍i̍, ɛ̍ la̍a̍ dě ǐn we̍, ‘Sɔɔ, Sɔɔ, dɛ̍nu̍ àn jě-e ǐn klě ɛ? Jɛ wiǎ bo àn tba̍ gbǎ jlǐh o.’

¹⁵ Wɛ̀ na̍a̍, ‘Nyɔ̍ bo ɛ?’ Iě Joi la̍a̍, ‘Mɔ̍ Jusu ɔ̀ àn jě-ea klě-ɛ.

¹⁶ Sɔ bloɔ̍ ìè i̍ nyna. Ǐn wlǔh-i ìn i̍ iě ìn chèɛ̀ tba̍ ìè ǐn jǔ dbee, wɛ̀ ìè ǎn sàànsi̍i̍h nu̍ dǒ ka ìn nu̍-a ǐn jě-ɛ ke, dɛ̍ᵻ ǎn mu̍-a ìn toe-ɛ we̍.

¹⁷ Eslɔɛ nyɔ̍ ke nyɔ̍ ùh se̍-a Juu nyɔ̍ ùh kɔn we̍ ǎn mu̍-a ìn dbo̍-ɛ, ǎn mu̍ ìn kɛ̍n kaɛn u̍h-u je̍e ìn dɛ̍ nui.

¹⁸ Nɛ̀ ìn pɔ̀ni u̍h-a jlǐh. Bǐi u̍h nɔ̌ sɔ̀npli we̍ u̍h iě kwile kɛ̍n i̍ poe. Sà u̍h dǒ Setɔn-a gbǐh sɔ̀n u̍h iě Nyɔsoa naɛ we̍ ji̍, wɛ̀ u̍h-a gblɛ̍n sɔ̀ɛ̀n-a tìh iě i̍ tǎli-ɛ dě u̍h-a ǎn wlùh gbaɛ di̍i̍. Nɛ̀ u̍h-a mu̍ wɔ̀ɔ̀ kɔn dě Nyɔsoa-a chèɛ̀ tba̍ nyɔ̍ nynɛ̌.’

Pɔɔ sà ɔ̍ dbo̍ nu̍ tìh i̍

¹⁹ “Nɛ̀ɛ̍, Blǔh Baa Aklepa, se̍ mɔ̌ ja̍wli sɔ-a dě ja̍i̍wlɔ̀ ǐn ja-aɛ, ǐn se̍ ɛ̍ wɔ̍n blaɛ.

²⁰ Dǒ Damaɛkɔ wlɔ̀ di̍i̍ bo ǐn sàɛ̀ tìh bla̍-a i̍, iě ǐn po̍ ɛ̍ dǒ Juluslɛn i̍. Wɛ̀ ǐn ple̍ Juu-a blǔh kli̍hgbɛ̍ we̍, ɛ̍ ke dě ùh se̍-a Juu nyɔ̍-ɛ we̍ ke. U̍h iě u̍h-a gblɛ̍n sɔ̀ɛ̀n kɛ̍n i̍ poe, wɛ̀ u̍h iě dě Nyɔsoa we̍ i̍ bǐi. Nɛ̀ u̍h nu̍ dɛ̍ᵻ i̍h iě ɛ̍ to ka u̍h bǐi-a i̍-ɛ.

²¹ Ɛ̍ kɔn tìh bo Juu nyɔ̍ gbɛ̍n m̍ dě slaǎ sà gbò sɔ̀n. U̍h fɔ̀n ɛ̍ we̍ de u̍h iě ǐn dbǎ.

²² Ǎn chɛ̀ Nyɔsoa bo ɔ̀ gbǎ ǐn we̍ wɛ̀ ǐn nyna i̍ da̍a sèàn, iě ǎn sèàɛ̍ tìh we̍ i̍ dě klaaᵻ ke plìh we̍. Dɛ̍ Nyɔsoa-a tu̍owli po̍ nyɔ̍ ke Mose la̍ ɛ̀ mu̍-a nɛ-ɛ, ɛ̍ taǐn bo ǎn sì wɔ̀ɔ̀ we̍ i̍.

²³ Ka Nyɔsoa-a Chèɛ̀ Tba̍ju-a mu̍-a jua̍i̍ sàɛ̀, wɛ̀ ɔ̍ iě-a sàǐtòò nyɔ̍ nu̍ ɔ̍ iě-ae wlǔh, wɛ̀ ɔ̍ iě-a sɔ̀npli-a tìh we̍i̍ bla̍ dě ɔ̍ chɛ̀-a nyɔ̍ ke ùh se̍-a Juu nyɔ̍-ɛ we̍-ɛ, i̍h bo ǎn bla̍ ke.”

²⁴ Pɔɔ sǐi dǒ ɔ̍ chɛ̀ tìh dlǔ i̍ sà la̍ sǔh iě Fɛslɔ wǐi ɔ̍ dlǔ i̍, ɔ̍ la̍a̍, “Pɔɔ, àn wlùh mǎ-ɛ. Àn dɛ̍ᵻ dɔu cheǎn-a bo ɛ̀ mǎ-ɛ àn wlùh.”

²⁵ Pɔɔ la̍a̍, “Jɔ̍pòo̍, ǎn wlùh se̍ mǎ o. Tìh-a taǐn bo ǎn bla̍, ɛ̍ se̍ sìowìè-i ǐn se̍ i̍ chɛ̍n.

²⁶ Dɛ̍nu̍ɛ, Blǔh Baa Aklepa ju̍o̍e ìh la we̍ i̍, ɛ̍ kɔn nɛ̌ wlu-i kɛ̍ dě ɔ̍ we̍. Ǐn juo ɛ̍-ɛ i̍h-a dɛ̍ se̍ ɔ̍ jii̍ sìle, dɛ̍nu̍ɛ, ɛ̍ se̍ dě kwile-e i̍h se̍ nui-ɛ.

²⁷ Blǔh Baa Aklepa, na̍ ìn po̍ Nyɔsoa-a tu̍owli po̍ nyɔ̍-a wlu̍ tìh chɛ̀ lě. Ǐn juo ɛ̍-ɛ kǎ ìn nu̍.”

²⁸ Wɛ̀ Aklepa la̍a̍ dě Pɔɔ we̍, “Da̍a ti̍ tile la di̍i̍ bo àn mu̍ la̍ ǐn Klai-a nyɔ̍ we̍i̍ nui ae?”

²⁹ Pɔɔ la̍a̍, “Ti̍ tile o, ti̍ tɔ̀ɔ̀n o, ǎn ba̍le Nyɔsoa ɛ̍ iě laǎn nɛ. Ɛ̍ se̍ ìn nɛ due, jɛ nyɔ̍ kli̍hgbɛ̍ ùh-a po̍-a nɔ̌ ǐn we̍ dounᵻ da̍a sèàn-ɛ, kǎ ǐn nɛ-aɛ, u̍h iě laǎn nɛ. Jɔɔdbǔᵻ la i̍h kɔn tɛ̀ ǐn sà-o.”

³⁰ Wɛ̀ blǔh baa ke, kɔ̀mla̍ ke, Bɛnii ke nyɔ̍ kli̍hgbɛ̍ nɛ-a doǒ-ɛ, klùh, u̍h sɔ bloɔ̍.

³¹ U̍h-a mu̍-a la̍-ɛ, nɛ̀ kǎ u̍h-a wlu, u̍h la̍a̍, “Jɔ̍gbau la dɛ̍-o-dɛ̍ ɔ̍ iě-a nu̍ wɛ̀ nyɔ̍ iě-a ɔ̍ dbǎ, àe̍e̍ ɔ̍ iě-a kasoo gbǎ-ɛ, ɛ̍ se̍ nɛ.”

³² Iě Aklepa la̍a̍ dě Fɛslɔ we̍, “Jɔ̍gbau la pò ɔ̍ se̍ dě Bloa̍ Joi we̍ kàn de-ɛ, nɛ̀ ɔ̍ kɔn ɔ̍ iě sɔ̍n kɛ̍n sà-ɛ de.”