Nu̍-dɛ̍ᵻ 25 - Ku̍o̍ Delee 1999

Pɔɔ kàn dě Bloa̍ Joi we̍

¹ Fɛslɔ sǐ-a dě fɔ̌ laa̍ we̍ i̍-ɛ, ɛ̍ nu̍ wǐh ta̍a̍n sǔh wɛ̀ ɔ̍ sɔ dǒ Sɛsewlia ɔ̍ mu̍ dǒ Juluslɛn wlɔ̀ di̍i̍.

² Dǒ-o bo Nyɔsoa-a slaǎ sà nyɔ̍-a klaaᵻ ke Juu-a nyɔ̍ klaaᵻ mu̍-i dě ɔ̍ we̍, wɛ̀ u̍h blaɛ Pɔɔ tìh i̍. Wɛ̀ u̍h gbɛ̍n Fɛslɔ-a bu̍h i̍

³ ɔ̍ iě dɛ̍ nu̍ dǒ u̍h we̍. U̍h-a pɔ̀n ɔ̍ iě Pɔɔ dě u̍h we̍ Juluslɛn dbo̍, dɛ̍nu̍ɛ, u̍h sɔ̌-ɛ u̍h iě gbɛ̀ɛ̀ tè dǒ wìè-i, wɛ̀ u̍h iě Pɔɔ dbǎ.

⁴ Fɛslɔ la̍a̍, “Pɔɔ nɛ kasoo dě Sɛsewlia. Ǎn chɛ̀ ǎn mu̍-e de̍ mu̍ suei̍.

⁵ Nɛ̀ mɔ̀-a wlu̍ blě nyɔ̍ ke ǐn ke à mu̍ pò ɔ̍ nu̍ dɛ̍ sɔ̀n-ɛ, u̍h iě ɔ̍ tìh i̍ blaɛ deě.”

⁶ Fɛslɔ bɛ̌ɛ wǐh mɛ̀ta̍a̍n ke pùè nu̍-ɛ dě u̍h we̍ sasǎ, wɛ̀ ɔ̍ dǔ Sɛsewlia mu̍-ɛ. Sɔ̀n sɛ̀n-aɛ, iě ɔ̍ mu̍ dě koti̍ gbò sɔ̀n ɔ̍ tè i̍. Wɛ̀ ɔ̍ po̍ nyɔ̍ slǔh u̍h iě Pɔɔ ja.

⁷ Pɔɔ ji̍-aɛ, wɛ̀ Juu nyɔ̍ ùh sɔ-a Juluslɛn-ɛ, iě u̍h dlɛ̌ ɔ̍. Iě u̍h-a blaɛ ɔ̍ tìh i̍, ìh gbàìn gbàìn u̍h se̍-aa we̍i̍ flɔn-ɛɛ bɛ̌ɛ-ɛ, i̍h bo u̍h-a blaɛ ɔ̍ i̍.

⁸ Wɛ̀ Pɔɔ sà ɔ̍ chɛ̀ tìh kɛ̍n ɔ̍ la̍a̍, “Ǐn se̍ Juu nyɔ̍-a telě ke slaǎ sà gbò dɛ̍ sɔ̀n pùn nu̍, wɛ̀ ɛ̍ iě Wloma nyɔ̍-a Bloa̍ Joi-a chɛ̀ jɛɛ.”

⁹ Fɛslɔ-a pɔ̀n ɔ̍ iě Juu nyɔ̍-a wlùh i̍ tè-e, ɛ̍ kɔn ɔ̍ la̍a̍, “Pɔɔ, tìh la u̍h blaɛ-a ìn i̍-ɛ, àn pɔ̀n iě Juluslɛn mu̍ wɛ̀ mɔ̀ iě i̍h-i sà dǒ ǐn jǔ ae?”

¹⁰ Pɔɔ la̍a̍, “Jɛ ǐn nyna-a ka-a da̍a-ɛ, dě Bloa̍ Joi-a koti̍-i bo ǐn kɔn iě sàwi̍h sì-i. Dɛ̍nu̍ɛ, àn chɛ̀ juo ɛ̍-ɛ gbàkla̍a̍ ǐn se̍ dɛ̍-o-dɛ̍ i̍ sì dǒ Juu nyɔ̍ we̍.

¹¹ Pò ǐn wa̍ telě, iě pò ǐn sì dɛ̍ i̍ wɛ̀ ɛ̍ iě ǎn dbǎ ka̍ nɛ-ɛ, nɛ̀ ǐn se̍ ɛ̍ i̍ gblìh mu̍. Jɛ tìh u̍h-a blaɛ-a ǐn i̍-ɛ, pò tìh-a taǐn se̍ dě i̍h di̍i̍ nɛ-ɛ, nɛ̀ nyɔ̍ se̍ i̍ blaɛ ɔ̍ iě ǐn kwlǎ sà dě u̍h we̍. Dě Bloa̍ Joi we̍ bo ǐn kàn.”

¹² Fɛslɔ ke ɔ̍ slɛ̌n tù nyɔ̍ wɔ̀-a dlǔ i̍ jiěe-ɛ, wɛ̀ ɔ̍ la̍a̍, “Ka ìn kàn-a dě Bloa̍ Joi we̍-ɛ, dě àn mu̍ mu̍ o.”

Pɔɔ nɛ dǒ Aklepa ke Bɛnii jǔ

¹³ Wǐh gbɔ̍ sì-aɛ, wɛ̀ Blǔh Baa Aklepa ke Bɛnii ji̍ i̍ nala dǒ Sɛsewlia, u̍h iě Fɛslɔ tàlo̍ po̍.

¹⁴ Ka u̍h nu̍-ao wǐh dɔu wɛ̀-ɛ, ɛ̍ kɔn Pɔɔ-a sɔ̀nwli laa̍ wɛ̀ Fɛslɔ chɛn-ɛ i̍h sɔ̀ìn dě blǔh baa we̍. Ɔ̍ la̍a̍, “Jɔ̍gbau due nɛ da̍a, ɔ̍ nu̍ gbɛ̍n-nyɔ̍ iě File si̍e̍ ɔ̍.

¹⁵ Ti̍ ǐn mu̍-a dǒ Juluslɛn-ɛ, Nyɔsoa-a slaǎ sà nyɔ̍ klaaᵻ ke Juu-a nyɔ̍ klaaᵻ blaɛ ɔ̍ tìh i̍, iě u̍h-a sèàɛ̍ ǐn wlùh iě ɔ̍ kɛ̀n sà.

¹⁶ Jɛ na̍ Wloma nyɔ̍-ɔ nu̍ la̍a̍n. Nyɔ̍ u̍h blaɛ-a tìh i̍-ɛ, ɔ̍ ke ɔ̍ tìh i̍ blaɛ nyɔ̍-ɔ se̍ jua̍a̍ i̍ jiěe wɛ̀ à-a sà ɔ̍ kwlǎ. Dɛ̍nu̍ɛ, ɔ̍ kɔn ɔ̍ iě flɔna̍ jě ke, wɛ̀ ɔ̍ iě ɔ̍ chɛ̀ tìh kɛ̍n sà dǒ tìh u̍h blaɛ-a ɔ̍ i̍-ɛ we̍.

¹⁷ Ɛ̍ kɔn u̍h ji̍-a da̍a ǐn we̍-ɛ, iě sɔ̀n sɛ̀n-aɛ, ǐn se̍ ti̍ gba̍n-ɛ, wɛ̀ ǐn pɔ̀ni koti̍. Wɛ̀ ǐn po̍ nyɔ̍ slǔh u̍h iě jɔ̍gbau laa̍ ja.

¹⁸ Ti̍ nyɔ̍ ke ɔ̍ kɔn-a tìh-ɛ u̍h nyna-a i̍-ɛ, u̍h se̍ dɛ̍ sɔ̀n gbàù bla̍ dǒ ɔ̍ pùn ìh ǐn jajeɛ̍ u̍h-a mu̍-a bla̍ de-ɛ.

¹⁹ Jɛ tìh ɔ̍ ke u̍h-a sà-a wɔ̍ɔ̍n i̍ sǔh-ɛ, ɛ̍ nu̍ u̍h-a chɛ̀-a wɛɛ sà dɛ̍ᵻá tìh, ɛ̍ ke jǔ kɔn nynɛ̌ nu̍-a Jusu ɔ̀ mɛ̌-a. Jɛ Pɔɔ la̍ nɛ̀ ɔ̍ nɛ kmɔ̌.

²⁰ Sɔ ka iě-a dě tìh-a chɛ̀ di̍i̍ gbɛ̀n-ɛ nu̍-ɛ, dě ǐn di̍i̍ mǎ-ɛ. Ɛ̍ kɔn ǐn tèle Pɔɔ i̍ pò ɛ̍ mu̍ ɔ̍ gbǐh po̍ ɔ̍ iě tìh la-a sà dě Juluslɛn-ɛ, ɔ̍ iě-e mu̍.

²¹ Jɛ Pɔɔ kàn dě Bloa̍ Joi we̍, iě ɔ̍ tèle ǐn i̍ ɔ̍ iě dǒ kɔ̀mla̍-a sɔ̍n kɛ̍n nɛ te̍e̍ wɛ̀ Bloa̍ Joi iě ɔ̍ sàwi̍h sì. Ɛ̍ kɔn na̍ nɛ̀ ɔ̍ nɛ dě kasoo ke̍ te̍e̍ wɛ̀ ɔ̍ mu̍-u ti̍ iě nyni̍.”

²² Wɛ̀ Aklepa la̍a̍ dě Fɛslɔ we̍, “Ǎn pɔ̀n ǎn chɛ̀ iě jɔ̍gbau la ɔ̍ wlu̍ wɔ̌n.” Fɛslɔ la̍a̍, “Bɔ̌, àn mu̍ ɔ̍ wlu̍ wɔ̌n klàe̍ o.”

²³ Sɔ̀n sɛ̀n-aɛ, wɛ̀ nyɔ̍ɔ blě Aklepa ke Bɛnii gbàɛ-ɛ, iě u̍h pa̍ dě slǎ sɔ̀n. Nɛ̀ u̍h ke fledlǔ-a klaaᵻ ke seǐnynuu̍ nɛ-a dǒ wlɔ̀ laa̍ di̍i̍-ɛ na. Wɛ̀ Fɛslɔ po̍ nyɔ̍ slǔh iě u̍h ja Pɔɔ.

²⁴ Fɛslɔ la̍a̍, “Blǔh Baa Aklepa ke nyɔ̍ kli̍hgbɛ̍ nɛ-a da̍a à we̍-ɛ, mɔ̀-a jě jɔ̍gbau la, ɔ̍ kɔn tìh bo Juu nyɔ̍ kli̍hgbɛ̍ nɛ-a Juluslɛn-ɛ ke juh nɛ-a da̍a wlɔ̀-ɛ, u̍h-a ja kunǎ nɔ̌ ǐn we̍. Nɛ̀ u̍h-a wǐi i̍, u̍h la̍ ɔ̍ se̍ i̍ blaɛ dɛ kleǐn ɔ̍ iě kmɔ̌ nɛ.

²⁵ Jɛ dɛ̍ kɔn tìh nyɔ̍ iě-a ɔ̍ dbǎ-a, nɛ̌ jě ɛ̍. Wɛ̀ ɔ̍ kàn-a dě Bloa̍ Joi we̍-ɛ, ɛ̍ kɔn ǐn po̍ ɛ̍ gbɔ̀ iě ɔ̍-e dbo̍.

²⁶ Jɛ dɛ̍ iě-a chlǐh dǒ ɔ̍ pùn gbe̍i̍n dě ǎn joi we̍-ɛ, ǐn se̍ ɛ̍ juo. Ɛ̍ kɔn ǐn ja ɔ̍ da̍a mɔ̀ kli̍hgbɛ̍ jǔ, Blǔh Baa Aklepa jǔ-a chɛ̀ bo ǎn dǎ gbòǒ. Ka dě i̍h di̍i̍-a mu̍-a nɛ wɛ̀-ɛ, nɛ̀ ǎn mu̍ dɛ̍ blě iě chlǐh.

²⁷ Tìh nyɔ̍-a dbo̍-a gbɛ̍n-nyɔ̍ pò i̍h se̍ tba̍ la̍ kɔn-ɛ, mɔ̍ɔ nɛ̀ ɛ̍ se̍ i̍ blaɛ dě ǐn jlǐh.”