Nu̍-dɛ̍ᵻ 24 - Ku̍o̍ Delee 1999

Juu nyɔ̍ blaɛ Pɔɔ tìh i̍

¹ Wǐh m̀m̌ sì wɛ̀ Nyɔsoa-a slaǎ sà nyɔ̍-a dlǔtu Ɛlenaea dǔ nyɔ̍ klaaᵻ gbɔ̍ ke telě juo nyɔ̍ Tɛtulɔ-ɔ, iě u̍h mu̍ dǒ Sɛsewlia. Wɛ̀ dɛ̍ kɔn tìh u̍h gbɛ̍n-a Pɔɔ-ɛ iě u̍h po̍ ɛ̍ i̍ dǒ kɔ̀mla̍ jǔ.

² Iě u̍h dǎ Pɔɔ, wɛ̀ Tɛtulɔ tè ɔ̍ tìh i̍ blaɛ-ɛ gbɔ̀, ɔ̍ la̍a̍, “Jɔ̍pòo̍ File, blǔh la ìn blě-aɛ, àn di̍i̍ i̍ flɔn-ɛ bo ɛ̀ ja à wlùh-a i̍ tè-ɛ ke kmɔ̌ nu̍-ɛ dɔu la̍ we̍. Wɛ̀ dɛ̍ᵻ delee chɛ̀ chɛ̀-a nɛ da̍a blǔh la kɛ̍n.

³ Ɛ̍ tìh tà-o-tà à mu̍ ti̍ kli̍hgbɛ̍ we̍-ɛ, u̍h-a nyǐ àɔ̀ tèla̍, ɛ̍ kɔn à sà-ɛ ìn nǐ wɔ̍n.

⁴ Ǐn se̍ pɔ̀n iě ìn gbǔh kɛ̍ɛ̍n wlè-e. Jɛ ǎn ba̍le m̀, gbɛ̍n wlùh-i dɛ̍ tile à mu̍-a bla̍-ɛ, ìè ɛ̍-ɛ i̍ wɔ̌n.

⁵ Jɔ̍gbau la à juo ɛ̍-ɛ, kanɛa nyɔ̍ bo, ɛ̍ kɔn à gbɛ̍n ɔ̍. Ɔ̍ sà wě ja̍a̍ i̍ dě Juu nyɔ̍ nynɛ̌ da̍a kmɔ̌ kli̍hgbɛ̍ la we̍, iě ɔ̍ nu̍ fààmlà dě Naaslɔɛ nyɔ̍-a gbɔ̀ù di̍i̍.

⁶ Ɔ̍-ɔ due laa̍ bo ɔ̀ pɔ̀n la̍ à slaǎ sà gbò fau kɛ̍n sà-a i̍ dɛ, iě à gbɛ̍n ɔ̍. [Ɛ̍ kɔn sàwi̍h bo à pɔ̀n ɔ̍ iě sì dě à telě di̍i̍ de.

⁷ Jɛ fledlǔ-a klaa nu̍ à kloǒ iě ɔ̍ sà ɔ̍ àɔ̀ kwa̍a̍.

⁸ Ɔ̍ la̍ nyɔ̍ mu̍-a ɔ̍ tìh i̍ blaɛ-ɛ, nɛ̀ ɔ̍ ji̍ nɔ̌ ìn we̍.] Pò ìn chlɛ̌ ɔ̍ wɔ̍ɔ̍n i̍-ɛ, tìh kli̍hgbɛ̍ à blaɛ-a ɔ̍ i̍-ɛ, nɛ̀ àn chɛ̀-a mu̍-o dɛ̍ i̍ juo.”

⁹ Tìh ɔ̍ blaɛ-a Pɔɔ i̍-ɛ, Juu nyɔ̍ se̍ ɔ̍ bu̍h de̍e̍ sà.

Pɔɔ pɔ̀ni ɔ̍ chɛ̀

¹⁰ Wɛ̀ kɔ̀mla̍ po̍ sɔ̍n Pɔɔ iě wlu, iě Pɔɔ la̍a̍, “Ǐn juo ɛ̍-ɛ ìn wlè sàwi̍h sì gbai wɛ̀ da̍a blǔh la kɛ̍n, sɔ nɛ̀ ǎn pɔluh pɛ̌n i̍ iě ǎn chɛ̀ tìh kɛ̍n sà da̍a ìn jǔ.

¹¹ Pò ìn tèle nyɔ̍ i̍-ɛ, u̍h-a mu̍ ìn wlùh sèàɛ̍. Ǐn mu̍-a Nyɔsoa wɛɛ sà la̍ dě Juluslɛn-ɛ, ɛ̍-ɛ se̍a wǐh-a pùè jɔ̌ sɔɔ̌n-a chɛ̀ kɛ̍n sì.

¹² Ùh-a blaɛ-a ka ǐn tìh i̍-ɛ, u̍h se̍ ǐn jě ǐn ke nyɔ̍-o-nyɔ̍ iě wɔ̍ɔ̍n i̍ sà, wɛ̀ iě nyɔ̍ sɔ̀n i̍ pa̍ dě slaǎ sà gbò sɔ̀n ke wɛɛ sà gbòᵻ sɔ̀n i̍, ɛ̍ ke dǒ wlɔ̀-a chɛ̀ ke gbàsǎ.

¹³ Tìh u̍h-a blaɛ-a ka ǐn i̍-ɛ, u̍h-a nyɔ̍ se̍ ɛ̍ ìn i̍ to-ɛ bɛ̌ɛ ka i̍h se̍-a si̍h-ɛ.

¹⁴ Ɛ̀ la bo ǎn mu̍-u sà dě ìn we̍, Wìè u̍h la̍ ɛ̀ se̍-a i̍ slɛ̌-ɛ, ɛ̍ bo ǎn gba̍. À baaᵻá Nyɔsoa bo ǎn sà wɛɛ iě ǐn tè-o Mose-a telě kli̍hgbɛ̍ i̍, ɛ̍ ke dɛ̍ᵻ nɛ-a dě Nyɔsoa-a tu̍owli po̍ nyɔ̍-a chlǐh-dɛ̍ᵻ di̍i̍-ɛ ke.

¹⁵ Nyɔsoa due u̍h tè-a wlì-ɛ, ɔ̍ bo ǐn tè wlì ke. Ǐn tè ɛ̍ wlì nyɔ̍ sɔ̀nᵻ ke nyɔ̍ chɛ̀ ùh mɛ̌-aɛ, u̍h-a mu̍-e wlǔh dode̍.

¹⁶ Ɛ̍ kɔn ǎn po̍-e gbǐh ti̍ kli̍hgbɛ̍ we̍, wɛ̀ nɛ̌ je̍e dɛ̍ nu̍ ɛ̍ je̍e ǎn wlùh-u kǎ dǒ Nyɔsoa ke wlɔ̀ nyi̍ɔ̍ we̍.

¹⁷ “Ǐn sɔ-a Juluslɛn-ɛ, ɛ̍ nu̍ sɔ̀nᵻ dɔu sasǎ wɛ̀ ǐn dǔ-e de̍ mu̍-ɛ. Wɛ̀ ǐn gba̍ ǎn nyɔ̍ɔ wlǐ i̍h iě u̍h sɔ̍n-ɔ sà, wɛ̀ iě slaǎ sà dǒ Nyɔsoa we̍.

¹⁸ Ɛ̍ laa̍ bo ǐn nɛ dǒ nu̍ la̍ dě slaǎ sà gbò sɔ̀n, wɛ̀ u̍h jɛɛ ǐn kɛ̍n. Jɛ nɛ̀ ǐn wɔ̀ ǎn chɛ̀ dě Nyɔsoa jlǐh i̍ nmɔ-ɛ wɛ̀. Nɛ̀ nyɔ̍ tlùgbei̍ se̍-o nɛ, mɔ̍ɔ-ɛ, ǐn se̍ nyɔ̍-a dounᵻ de̍i̍ gba̍ dɛ nu̍ ke.

¹⁹ Ɛ̍ ti̍ laa̍ Juu nyɔ̍ duuh sɔ-a Esea fɔɔ-ɛ, nɛ̀ dǒ u̍h nɛ. U̍h-a chɛ̀ kɔn u̍h iě da̍a ìn jǔ ji̍ pò u̍h jě dɛ̍ dǒ ǐn pùn-ɛ, u̍h iě ɛ̍-ɛ sà.

²⁰ Ɛ̍ se̍-o siee, ti̍ iě-a dǒ taɔ jǔ nɛ-ɛ, ɛ̀ nu̍-a ǎn gbɛ̍n-ɛ tìh-ɛ, ɛ̍ nynɛ̌ ɛ? Tèle nyɔ̍ la i̍ u̍h iě ɛ̍-ɛ sà dě ìn we̍.

²¹ Dɛ̍ due gbài̍ bo ǐn nu̍ dǒ u̍h jǔ, ǐn wǐ-i, wɛ̀ na̍a̍, ‘Ǐn gbaɛ ɛ̍ wlùh mɛ̌-nyɔ̍-a mu̍-e wlǔh. Ɛ̍ bo ɛ̀ nyna-ɛa ka ǐn bu̍hᵻ ta̍i̍ sèàn da̍a mɔ̀ jǔ.’ ”

²² Nɛ̀ File nɔ̀ɔ̍, ɔ̍ juo-a dě Joi-a Wìè dɛ di̍i̍-ɛ, wɛ̀ ɔ̍ la̍a̍, “Ǐn gbɛ̍n tìh-a chɛ̀ i̍ ke̍-o, pò fledlǔ-a klaa Lesiɔ ji̍-ɛ, wɛ̀ iě mɔ̀-a tìh la i̍ chɛ̍n o.”

²³ Wɛ̀ ɔ̍ sèàɛ̍ chape wlùh ɔ̍ iě Pɔɔ kasoo gba̍, jɛ nɛ̀ ɔ̍ sà ɔ̍ sɔ̍n kɛ̍n wɛɛ, wɛ̀ ɔ̍ ba̍ᵻ iě ɔ̍ dɛ̍ nyǐ ka̍ jě.

Pɔɔ nɛ dǒ File ke Dlusila jǔ

²⁴ Wǐh gbɔ̍ sì-aɛ, wɛ̀ File ke ɔ̍ nynɔ̌ Dlusila ji̍. Juu nynɔ̌ bo. Wɛ̀ File dbo̍ Pɔɔ wlu̍ we̍, iě ɔ̍ bla̍ Jusu Klai-a wlùh gbaɛ dɛ we̍i̍. Iě ɔ̍ po̍ dě ɔ̍ we̍ dounᵻ.

²⁵ Jɛ i̍-i slɛ̌-ɛ ke, nyɔ̍-a chɛ̀ i̍ gbɛ̍n-ɛ ke, sàwi̍h sì-ɛ ɛ̀ mu̍-a ji̍-ɛ, Pɔɔ-a sà-a la̍ i̍h-a tìh i̍-ɛ, sɔ File gbǎ faɔn. Iě ɔ̍ la̍a̍, “Mu̍ ke̍ sèàn, pò ǐn jě ti̍ dɛ-ɛ, nɛ̀ ǎn mu̍ ìn dǎ.”

²⁶ Nɛ̀ ɔ̍ tè ɛ̍ wlì ke de Pɔɔ iě ɔ̍ wlǐ nyǐ. Ɛ̍ kɔn ɔ̍ dbo̍ ɔ̍ wlu̍ we̍ chɛ̍chɛ̍ ɔ̍ ke ɔ̍ iě sɔ̀ìn chɛ̍n.

²⁷ Sɔ̀nᵻ sɔɔ̌n sì-aɛ, wɛ̀ Pɔsiɔ Fɛslɔ gbǎ-ɛ dǒ File wɔ̀ɔ̀. Jɛ File-a pɔ̀n ɔ̍ iě Juu nyɔ̍-a wlùh i̍ tè-e, ɛ̍ kɔn ɔ̍ si̍e̍ Pɔɔ dě kasoo.