Nu̍-dɛ̍ᵻ 23 - Ku̍o̍ Delee 1999

¹ Wɛ̀ Pɔɔ gbɛ̀n dě taɔ laa̍ we̍ sòo̍sòo̍ iě ɔ̍ la̍a̍, “De̍di̍i̍ᵻ, ǎn kmɔ̌ ǐn nɛ-a dě di̍i̍ dǒ Nyɔsoa we̍ wɛ̀ ɛ̍ iě-a sèàn weɛ̍ la kɛ̍n jɛɛ-ɛ, ɛ̍ se̍ ǎn wlùh-u kǎ.”

² Wɛ̀ slaǎ sà nyɔ̍-a dlǔtu Ɛlenaea po̍ nyɔ̍ ùh nyna-a Pɔɔ pùn-ɛ slǔh u̍h iě ɔ̍ gbǎ wɔ̍i̍n po̍.

³ Wɛ̀ Pɔɔ la̍a̍ dě ɔ̍ we̍, “Mɔ̀ la ɔ̀ blě-a pɛ̍n mɛɔ-ɛ, mɔ̀ bo Nyɔsoa-a mu̍ gbǎ tba̍. Ìn tè i̍ dǒà ìè ǎn taɔ pa̍ dě telě di̍i̍, jɛ nàa̍ u̍h tba̍ ǐn gbǎ. Nɛ̀ mɔ̀ bo ɔ̀ wa̍ telě-a chɛ̀ wɛ̀.”

⁴ Iě nyɔ̍ ùh nyna-a Pɔɔ pùn-ɛ, u̍h la̍a̍, “Nyɔsoa-a slaǎ sà nyɔ̍-a dlǔtu bo àn chlèe ae?”

⁵ Pɔɔ la̍a̍, “De̍di̍i̍ᵻ, ka ɔ̍ iě-a slaǎ sà nyɔ̍-a dlǔtu nu̍-ɛ, ǐn se̍ i̍h juo wa. Dɛ̍nu̍ɛ, Nyɔsoa-a wlu̍ la̍a̍, ‘Nyɔ̍ ɔ̀ blě-a nyɔ̍-a wlu̍ kwa̍-ɛ, nyɔ̍ bɔ̌ ɔ̍ wlu̍ sɔ̀n pùn po̍-ɛ.’ ”

⁶ Pɔɔ gbɛ̀n-a ɛ̍ ja ka nyɔ̍ duuh nu̍-a Sadiusii nyɔ̍ iě duuh nu̍-a Fɛlesii nyɔ̍-ɛ, wɛ̀ ɔ̍ wǐ dě taɔ laa̍ nynɛ̌, ɔ̍ la̍a̍, “Ǐn de̍di̍i̍ᵻ, mɔ̍ la mɔ̍ Fɛlesii nyɔ̍-a wlǔh-i jǔ. Ǐn tè ɛ̍ wlì ka mɛ̌-nyɔ̍-a mu̍-ae wlǔh-ɛ, ɛ̍ kɔn mɔ̍ u̍h nyna-ɛa bu̍hᵻ ta̍i̍ da̍a.”

⁷ Ɔ̍ wlu-a dɛ̍ la-ɛ, sɔ slɛ̀ wlǔh dǒ Fɛlesii nyɔ̍ ke Sadiusii nyɔ̍ nynɛ̌ we̍ sǔh. Sɔ nyɔ̍ ùh wɛ̀-a de̍-ɛ gblè fɔ̌ sǔh. (

⁸ Dɛ̍nu̍ɛ, Sadiusii nyɔ̍ nɔ̀ɔ̍, u̍h la̍ mɛ̌-nyɔ̍ se̍-e wlǔh mu̍, nɛ̀ sùù ke Nyɔsoa-a ǐnchɔ̀ se̍ nɛ ke. Jɛ Fɛlesii nyɔ̍ nɔ̀ɔ̍, i̍h sǐi dě u̍h di̍i̍ i̍ kli̍hgbɛ̍.)

⁹ Sɔ dɛ̍ slɛ̀ nu̍-a i̍ tìè-ɛ wɛ̀-ɛ, wɛ̀ telě nǎ poe nyɔ̍ duuh ùh nɛ-a dě Fɛlesii nyɔ̍-a gbɔ̀ù di̍i̍-ɛ, wɛ̀ u̍h nyna i̍. Iě u̍h tù ɛ̍ wɔ̍n di̍i̍, u̍h la̍a̍, “Jɔ̍gbau la à se̍ ɔ̍ dɛ̍ pùn jě. Nyɔ̍-se̍-juo sùù àe̍e̍ Nyɔsoa-a ǐnchɔ̀ bo ɛ̀ wlu dě ɔ̍ we̍.”

¹⁰ Dɛ̍ u̍h-a slɛ̀ nu̍-a i̍ kma-a wɛ̀-ɛ, sɔ ɛ̍ po̍ fledlǔ-a klaa faɔn u̍h-u je̍e Pɔɔ-a chìgbɔ̀là těnɔ. Ɛ̍ kɔn ɔ̍ dbo̍ ɔ̍ fledlǔ u̍h iě Pɔɔ dě nyɔ̍ laa̍ nynɛ̌ sà, u̍h iě ɔ̍ dě bàɛ̍klè gba̍.

¹¹ Ɛ̍ wlù weɛ̍ laa̍ dǒ Joi wlǔh-i Pɔɔ i̍ iě ɔ̍ la̍a̍, “Pɔɔ, bɛ̌ wlì i̍, ka ìn nu̍-a ǎn tìh i̍ sà-a da̍a Juluslɛn wlɔ̀ di̍i̍-ɛ, kǎ ìè ǎn sàànsi̍i̍h nu̍-ɛ nu̍ ke dǒ Wlom.”

Nyɔ̍gbei sɔ̌ Pɔɔ

¹² Wɛ̀ Juu nyɔ̍-a gbɔ̍ sɔ̌ klàɛ̍we̍ iě u̍h tè u̍h-a chɛ̀ di̍i̍h. U̍h la̍ u̍h se̍ niɛ̍ nǎ mu̍ te̍e̍ wɛ̀ u̍h iě Pɔɔ dbǎ-a wɔ̀.

¹³ Nyɔ̍ ùh dbǎ-a wlu̍ la i̍-ɛ, u̍h sì kwela nyìɛ̍ (40) kɛ̍n.

¹⁴ Wɛ̀ u̍h mu̍ dě slaǎ sà nyɔ̍ klaaᵻ ke nyɔ̍ klaaᵻ we̍, u̍h la̍a̍, “À tè à chɛ̀ di̍i̍h slèěslè, à la̍ à se̍ niɛ̍ nǎ mu̍ te̍e̍ wɛ̀ à iě Pɔɔ dbǎ.

¹⁵ Ɛ̍ tìh-ɛ, mɔ̀ ke taɔ ke mɔ̀ dbo̍ wlu̍ kaka dě fledlǔ-a klaa we̍, ka nyɔ̍-a pɔ̀n tìh-a gblangbai̍ wɔ̌n-ɛ i̍-ɛ, wɛ̀ ɔ̍ iě ɔ̍ nɔ̌ mɔ̀ we̍ ja. Jɛ ɔ̍ se̍ mɔ̀ i̍ kɔǎɛn mu̍-a chɛ̀ wɛ̀ à iě ɔ̍ dbǎ, dɛ̍nu̍ɛ, à jě ti̍ wɛ̀.”

¹⁶ Jɛ Pɔɔ de̍di̍i̍ nynɔ̌gbaɔ-a jǔ wɔ̌n u̍h-a sɔ̌-ɔ pɔ̀n. Wɛ̀ ɔ̍ mu̍ dě bàɛ̍klè, iě ɔ̍ sèàɛ̍ Pɔɔ wlùh.

¹⁷ Wɛ̀ Pɔɔ dǎ chape due iě ɔ̍ la̍a̍, “Gba̍ jɔ̍gbau jǔ la dě mɔ̀-a nyɔ̍ klaa we̍, ɔ̍ blě dɛ̍ ɔ̍ iě ɔ̍ wlùh sèàɛ̍.”

¹⁸ Wɛ̀ ɔ̍ gba̍ jǔ laa̍ dě u̍h-a nyɔ̍ klaa we̍, iě ɔ̍ la̍a̍, “Gbɛ̍n-nyɔ̍ Pɔɔ bo ɔ̀ dǎ m̌ iě jɔ̍gbau jǔ la nɔ̌ ìn we̍ ja. Dɛ̍nu̍ɛ, ɔ̍ blě dɛ̍ ɔ̍ iě ìn wlùh sèàɛ̍.”

¹⁹ Wɛ̀ fledlǔ-a klaa gbɛ̍n jǔ laa̍ ɔ̍ sɔ̍n i̍ iě u̍h chɛn chɛǐ. Wɛ̀ ɔ̍ la̍a̍, “Dɛ̍ ìn blě ìè ǐn wlùh sèàɛ̍ ɛ?”

²⁰ Ɔ̍ la̍a̍, “Juu nyɔ̍ wɔ̌n wɛ̀ u̍h iě nɔ̌ ìn we̍ wlu̍ dbo̍ ka nyɔ̍-a pɔ̀n tìh-a gblangbai̍ wɔ̌n-ɛ i̍ dǒ Pɔɔ dɛ we̍-ɛ, wɛ̀ ìè ɔ̍ dě taɔ jǔ gba̍ klàe̍.

²¹ Jɛ bɔ̌ ɛ̍-ɛ wɔ̌ɛn-ɛ, dɛ̍nu̍ɛ, u̍h-a nyɔ̍ ùh tè-ea ɔ̍ gbɛ̀ɛ̀-ɛ, u̍h sì kwela nyìɛ̍ (40) kɛ̍n. U̍h tè u̍h-a chɛ̀ di̍i̍h, u̍h la̍ u̍h se̍ niɛ̍ nǎ mu̍ te̍e̍ wɛ̀ u̍h iě ɔ̍ dbǎ-a wɔ̀. U̍h chlìì kɛ̍n wɛ̀, ka àn mu̍-a dǎ-a bo u̍h-a chlì la̍ we̍ i̍ sǔh.”

²² Wɛ̀ fledlǔ-a klaa la̍a̍, “Ka ìn po̍-a ǐn kunǎ-a, bɔ̌ nyɔ̍-o-nyɔ̍ wlùh sèàɛ̍-ɛ.” Iě ɔ̍ dǔ jɔ̍gbau jǔ laa̍ sɔ̍n kɛ̍n sà-a.

Lesiɔ dbo̍ Pɔɔ dě kɔ̀mla̍ File we̍

²³ Wɛ̀ fledlǔ-a klaa dǎ ɔ̍ chape nyɔ̍ sɔɔ̌n iě ɔ̍ la̍a̍ dě u̍h we̍, “Mɔ̀ sà fledlǔ-a kmɛ sɔɔ̌n (200) ke soo̍bliᵻ kɛ̍n na-ɛ nyɔ̍-a kwela mɛ̀sɔɔ̌n (70), ɛ̍ ke dǐᵻ blě nyɔ̍-a kmɛ sɔɔ̌n (200) kaka. Pò klèwììh kwile sì-ɛ, u̍h iě dǒ Sɛsewlia mu̍ wìɔ̍.

²⁴ Mɔ̀ sà soo̍bliᵻ ke Pɔɔ iě kɛ̍n na-ɛ, wɛ̀ mɔ̀ iě ɔ̍ kɔ̀mla̍ File we̍ gba̍ pɛlɛpɛ.”

²⁵ Iě ɔ̍ chlǐh chlǐh-dɛ̍, ɛ̍ wlu̍ la̍a̍,

²⁶ “Jɔ̍pòo̍, Kɔ̀mla̍ File, ǎn chlǐh ìn we̍. Mɔ̍ sà-a ìn nyinɔ̍ i̍-ɛ, mɔ̍ Kladiɔ Lesiɔ.

²⁷ Jɔ̍gbau la Juu nyɔ̍ gbɛ̍n ɔ̍-ɛ. U̍h-a pɔ̀n la̍ ɔ̍ dbǎ-a i̍ de wɛ̀ ǐn wɔ̌n i̍h ka ɔ̍ nu̍-a Wloma jǔ-ɛ. Wɛ̀ ǐn gba̍ ǎn fledlǔ iě à sà ɔ̍ u̍h kwa̍a̍.

²⁸ Sɔ ǎn pɔ̀n iě tìh u̍h gbɛ̍n-a ɔ̍-ɛ juo, ɛ̍ kɔn ǐn gba̍ ɔ̍ dě u̍h-a taɔ jǔ.

²⁹ Ǐn gbɛ̀n-a dě ɛ̍ di̍i̍-ɛ, ɛ̍ kɔ̍ dǒ u̍h-a telě pùn i̍. Jɛ ɔ̍ se̍ tìh kɔ̌ɛ ɛ̍ iě ɔ̍ dbǎ àe̍e̍ ɛ̍ iě ɔ̍ kasoo po̍.

³⁰ U̍h sɔ̌ ɔ̍-ɛ, wɛ̀ nyɔ̍ di̍ ǎn doun. Ɛ̍ kɔn ǐn nyna-o iě ǐn dbo̍ ɔ̍ dě ìn we̍, wɛ̀ ǐn sèàɛ̍ nyɔ̍ ùh gbɛ̍n-a ɔ̍-ɛ wlùh u̍h iě ɔ̍ tìh i̍ blaɛ la̍ ji̍ dě ìn we̍.”

³¹ Wɛ̀ fledlǔ gba̍ u̍h-a dbo̍ dluwe̍, u̍h dǔ Pɔɔ maɔ̍ iě u̍h gba̍ ɔ̍ te̍e̍ wɛ̀ u̍h nyni̍ Antipatle.

³² Dǒ u̍h pɛ̌n, sɔ̀n sɛ̀n-aɛ, iě juh-a na-a bu̍h i̍-ɛ mu̍ dě de̍ bàɛ̍klè. Wɛ̀ soo̍bliᵻ kɛ̍n na-ɛ nyɔ̍ dǔ ɔ̍ gba̍-a.

³³ U̍h nyni̍-a Sɛsewlia-ɛ, wɛ̀ u̍h nyǐ kɔ̀mla̍ chlǐh-dɛ̍ laa̍, iě u̍h dǔ Pɔɔ kwlǎ sà-a dě ɔ̍ we̍.

³⁴ Wɛ̀ ɔ̍ slè chlǐh-dɛ̍ laa̍, iě ɔ̍ tèle Pɔɔ i̍ fɔ̌ jɛ ɔ̍ sɔ-a we̍-ɛ. Ti̍ ɔ̍ juo-ao dɛ̍ i̍ ka Pɔɔ sɔ-a Selesia-ɛ,

³⁵ ɔ̍ la̍a̍, “Nyɔ̍ ùh po̍-a ìn tìh dlǔ-ɛ, pò u̍h ji̍-ɛ, nɛ̀ ǎn mu̍ àn wlu̍ wɔ̌n o.” Wɛ̀ ɔ̍ po̍ nyɔ̍ slǔh u̍h iě Pɔɔ jlǐhɛ̍ tù la̍ gba̍ dě Ɛlo-a kɔ̀mla̍ gbò di̍i̍.