Nu̍-dɛ̍ᵻ 21 - Ku̍o̍ Delee 1999

Pɔɔ-a mu̍ Juluslɛn

¹ À gbǎ-a dě blǎgbè di̍i̍-ɛ, iě à po̍ u̍h klàe̍. Wɛ̀ à slɛ̌ i̍ gbe̍i̍n à chɛ̍n nǐ kɛ̍n. Wɛ̀ à sǐ dǒ Koo wlɔ̀ di̍i̍ i̍. Sɔ̀n sɛ̀n-aɛ, iě à mu̍ dǒ Wloo bloa̍ kɛ̍n. À sɔ-a doǒ-ɛ, iě à mu̍ dǒ Patawla wlɔ̀ di̍i̍.

² Dǒ à jě-e niɔ̍ mɛɛ̍ nɛ̀ ɛ̍ mu̍ Fɔnisia fɔɔ, wɛ̀ à gbǎ dě ɛ̍ di̍i̍ à mu̍.

³ Ti̍ à nyni̍-a dǒ Saiplɔ tbǒ-a i̍ blaɛjlǐh-ɛ, wɛ̀ à po̍ ɛ̍ kwe̍na̍ we̍ iě à mu̍ dě Siwlia bloa̍ kɛ̍n. Wɛ̀ à po̍ du̍a̍ dǒ Taiɛ wlɔ̀ di̍i̍. Nɛ̀ dǒ-o bo mɛɛ̍-a chɛ̀-a mu̍ ɛ̍ iě blewi̍h blǔh po̍.

⁴ Dǒ à jě-e Jusu-a kòà wɛ̀ à nu̍ wǐh mɛ̀sɔɔ̌n dǒ u̍h we̍. Wɛ̀ Nyɔsoa-a Sùù po̍ u̍h wlu̍ wɔ̍ɔ̍n iě u̍h sèàɛ̍ Pɔɔ wlùh ɔ̍-ɔ je̍e dǒ Juluslɛn wlɔ̀ di̍i̍ mu̍.

⁵ Jɛ ti̍ nyni̍-a à iě-a dǒ u̍h we̍ sɔ-ɛ, wɛ̀ u̍h ke u̍h-a nynɔ̌gbaɔᵻ ke nynuu̍ kli̍hgbɛ̍ gba̍ à wìè-i dě jbǒ penɔ̍ɔ̍ kɛ̍n. Iě à mu̍ kɔlu̍ᵻ kɛ̍ɛ̍n à ba̍le.

⁶ Wɛ̀ u̍h ke à gbo̍a̍ɛ wlu̍. À gbǎ-a dě mɛɛ̍ di̍i̍ wɛ̀-ɛ, iě u̍h dǔ wlɔ̀ mu̍-ɛɛ.

⁷ Niɔ̍ mɛɛ̍ sà àɔ̀ Taiɛ-ɛ, iě ɛ̍ gba̍ àɔ̀ dǒ Tolɔmiɔ wlɔ̀ di̍i̍. Dǒ à ke de̍di̍i̍ᵻ duuh jiěe, wɛ̀ à sèàɛ̍ nyinɔ̍ i̍. Iě à pɛ̌n-ɛ weɛ̍ due dǒ u̍h we̍.

⁸ Sɔ̀n sɛ̀n-aɛ, wɛ̀ à sɔ-o iě à nyni̍ dǒ Sɛsewlia. Wɛ̀ à paɛ dě Nyɔsoa-a pɔ̀n chɛ̀ nya̍ naɛ nyɔ̍ Felɔ blǐ gbò. Nyɔ̍ mɛ̀sɔɔ̌n laa̍ u̍h tba̍-a chèɛ̀-ɛ u̍h-a due bo.

⁹ Ɔ̍ blě nynuu̍ nynɔ̌gbaɔᵻ nyìɛ̍ u̍h se̍ jla̍ tǐn, iě u̍h-a po̍ Nyɔsoa-a tu̍owli.

¹⁰ Dǒ à sì wǐh gbɔ̍ wɛ̀ Nyɔsoa-a tu̍owli po̍ nyɔ̍ Akeba sɔ Judia fɔɔ ɔ̍ ji̍.

¹¹ Wɛ̀ ɔ̍ ji̍ dě àɔ̀ we̍, iě ɔ̍ dǔ Pɔɔ-a wlu̍h-u. Wɛ̀ ɔ̍ nu̍ wlu̍h-a chɛ̀ iě ɔ̍ sa̍n ɔ̍ chɛ̀-a bu̍hᵻ ke ɔ̍ sɔ̍nᵻ. Wɛ̀ ɔ̍ la̍a̍, “Nyɔsoa-a Sùù la̍a̍, ‘Nyɔ̍ ɔ̀ kɔn-a wlu̍h la-a, kǎ Juu nyɔ̍ nɛ-a Juluslɛn-ɛ u̍h-a mu̍ ɔ̍ sa̍n-a nu̍, wɛ̀ u̍h iě ɔ̍ ùh se̍-a Juu nyɔ̍-ɛ kwlǎ sà-ɛ.’ ”

¹² Ti̍ à wɔ̌n-a wlu̍ la-a, wɛ̀ à ke nyɔ̍ nɛ-a doǒ-ɛ gbɛ̍n-ɛ Pɔɔ wɔ̍i̍n ɔ̍-ɔ je̍e Juluslɛn mu̍.

¹³ Wɛ̀ ɔ̍ la̍a̍, “Dɛ̍nu̍ mɔ̀-a nu̍ la̍ fìn-ɛ, iě mɔ̀-a nyni i̍ ǎn pɔluh jii̍ ɛ? Juluslɛn ǎn mu̍-aɛ, ɛ̍ se̍ ǎn sa̍n-a tìh nɛ due ǐn se̍ gbàɛ̀, jɛ ǐn gbàɛ̀ mɛ̌-ɛ tìh-a chɛ̀ ke dǒ Joi Jusu-a nynɛ̌-a tìh we̍.”

¹⁴ À wlu wlu-u iě à seaɛ ɔ̍ i̍. Wɛ̀ à la̍a̍, “Dɛ̍ Joi-a pɔ̀n-a bo ɛ̀ iě nɛ.”

¹⁵ À nu̍-o wǐh wɛ̀ à dǔ à blewi̍h-i, iě à mu̍ Juluslɛn.

¹⁶ Kòà ùh sɔ-a Sɛsewlia-a, u̍h-a duuh gba̍ àɔ̀ wìè-i. Wɛ̀ u̍h gba̍ àɔ̀ dě Mlasɔn blǐ gbò ɔ̀ kɔn we̍ à mu̍-a i̍ tè-ɛ. Ùh nu̍-a kòà sàǐtòò kle̍kle̍-ɛ, u̍h-a due bo, ɔ̍ sɔ Saiplɔ.

Pɔɔ ke Chiin jiěe

¹⁷ Ti̍ à nyni̍-a dǒ Juluslɛn-ɛ, de̍di̍i̍ᵻ nɛ-a doǒ-ɛ, u̍h gbɛ̍n à tìh i̍ dǒ pɔluh-a i̍ pɛ̌n-ɛ we̍.

¹⁸ Sɔ̀n sɛ̀n-aɛ, wɛ̀ à ke Pɔɔ mu̍ dě Chiin we̍ i̍ nala. Nɛ̀ dě chɔchi̍h-a nyɔ̍ klaaᵻ kli̍hgbɛ̍ nɛ.

¹⁹ Pɔɔ wɔ̀-a u̍h nyinɔ̍ i̍ sà-aɛ, wɛ̀ dɛ̍ᵻ kli̍hgbɛ̍ Nyɔsoa nu̍-a dě ùh se̍-a Juu nyɔ̍-ɛ nynɛ̌ dě ɔ̍ dbo̍ nu̍-ɛ di̍i̍-ɛ, iě ɔ̍ tɛ̌n i̍h-a due due ɔ̍ bla̍ i̍h.

²⁰ U̍h wɔ̌n-a ɔ̍ wlu̍ la-ɛ, wɛ̀ u̍h tùi Nyɔsoa nynɛ̌ i̍. Wɛ̀ u̍h la̍a̍ dě ɔ̍ we̍, “De̍di̍i̍, àn jě ka Juu-a wlǔ klùh nu̍-a ka wlùh gbaɛ blě nyɔ̍ wɛ̀ u̍h kli̍hgbɛ̍ gbɛ̍n-ɛ ka Mose-a telě sɔ̍nᵻ sɔɔ̌n i̍-ɛ.

²¹ Nyɔ̍ sèàɛ̍ u̍h wlùh u̍h la̍ Juu nyɔ̍ kli̍hgbɛ̍ tǐn-a dě ùh se̍-a Juu nyɔ̍-a blǔh kɛ̍n-ɛ, àn po̍ u̍h nǎ u̍h iě Mose-a telě jlǐhɛ̍ we̍ sà. Ɛ̍ tìh àn sèàɛ̍ u̍h wlùh u̍h-u je̍e u̍h-a nynuu̍ plɔ̀n po̍, wɛ̀ u̍h iě à blǐ dɛ̍ᵻ sɔ̍n we̍ sà.

²² Ka ìn ji̍-aɛ, u̍h-a mu̍ i̍h wɔ̌n gbɔ̀gbɔ̀, nɛ̀ ka à mu̍-o nu̍ ɛ?

²³ Jɛ dɛ̍ à mu̍-a ìn wlùh sèàɛ̍-ɛ, ɛ̍ bo ìè nu̍. À blě jɔ̍gbauᵻ nyìɛ̍ da̍a u̍h po̍ wlu̍ tɔ̀ma̍a̍ dǒ Nyɔsoa we̍.

²⁴ Gbǎ u̍h nynɛ̌ u̍h ke ìè mu̍, u̍h-a chɛ̀ dě Nyɔsoa jlǐh i̍ nmɔ-ɛ dɛ u̍h-a mu̍-a nu̍-ɛ, u̍h ke ìè ɛ̍ nu̍. Nɛ̀ ìn pɛ̌ɛ dǒ u̍h-a tàà, nɛ̀ u̍h-a mu̍ u̍h-a dlǔᵻ gbla̍n. Wɛ̀ ka àn chɛ̀-a tè-a la̍-o telě i̍-ɛ, wɛ̀ nyɔ̍ kli̍hgbɛ̍ iě ɛ̍ juo. Nɛ̀ dɛ̍ᵻ u̍h bla̍-a dǒ ìn pùn-ɛ, i̍h se̍ tìh-a taǐn dɛ.

²⁵ Jɛ dě ùh se̍-a Juu nyɔ̍ juh blě-a wlùh gbaɛ we̍ nɔ̀ɔ̍, dɛ̍ à po̍-a gbɔ̀-ɛ, à dbo̍-e ɛ̍ chlǐh-dɛ̍ wɛ̀. À la̍ u̍h bɔ̌ kwɛ̍i̍n gbo̍ᵻá di̍-dɛ̍ᵻ di̍-ɛ, u̍h bɔ̌ nymɔ̍ di̍-ɛ, u̍h bɔ̌ nymɔ̍-ɔ i̍ jǎ nmi̍ɛ̍ di̍-ɛ, nɛ̀ u̍h bɔ̌ gbǎn nu̍-ɛ ke.”

²⁶ Sɔ̀n sɛ̀n-aɛ, iě Pɔɔ ke u̍h mu̍ iě u̍h nu̍ dɛ̍ ɛ̀ nmɔ-ɛa nyɔ̍ dě Nyɔsoa jlǐh i̍-ɛ. Wɛ̀ ɔ̍ mu̍ dě slaǎ sà gbò sɔ̀n, wɛ̀ ka ti̍ jɔ̍gbauᵻ laa̍ u̍h-a dě Nyɔsoa jlǐh i̍ nmɔ dɛ-a wǐh-a mu̍-ao i̍ wɛ̀, iě u̍h-a due due iě-a slaǎ sà-ɛ, wɛ̀ ɔ̍ sà i̍h-i.

Juluslɛn nyɔ̍ gbɛ̍n Pɔɔ

²⁷ Wǐh mɛ̀sɔɔ̌n-a ji̍-a la̍ wɛ̀ la̍-ɛ, dǒ Juu nyɔ̍ ùh sɔ-a Esea fɔɔ-ɛ, u̍h-a duuh jě-e Pɔɔ dě slaǎ sà gbò sɔ̀n. Wɛ̀ u̍h pa̍ nyɔ̍ tlùgbei̍ sɔ̀n i̍ iě u̍h gbɛ̍n Pɔɔ.

²⁸ Iě u̍h-a wǐi i̍, u̍h la̍a̍, “Mɔ̀ɔ̍ Eslɔɛ nyɔ̍, mɔ̀ gbǎ àɔ̀ we̍ à iě jɔ̍gbau la gbɛ̍n lě. Ɔ̍ bo ɔ̀ po̍ nyɔ̍ nǎ tà kli̍hgbɛ̍, wɛ̀ ɔ̍ nyni i̍ à blǐ nyɔ̍ ke Mose-a telě-a nynɛ̌ wɔ̍n, ɛ̍ ke à slaǎ sà gbò ke. Ɛ̍ se̍-o siee, ɔ̍ ja ùh se̍-a Juu nyɔ̍-ɛ nɔ̌ à slaǎ sà gbò sɔ̀n wɛ̀ dɛ iě ɛ̍ sɔ fau kɛ̍n.” (

²⁹ Tlofimɔ ɔ̀ nu̍-a Ɛfɛsɔ jǔ-ɛ, nɛ̀ u̍h jě ɔ̍ dǒ Pɔɔ de̍e̍ wɛ̀ sàǐtòò dǒ wlɔ̀. Sɔ u̍h jajeɛ̍ Pɔɔ gba̍ ɔ̍ dě slaǎ sà gbò sɔ̀n de.)

³⁰ Tùgbàwlɔ̀ gbàǐ laa̍ sɔ slɛ̀ gbe̍ɛ̍ɛn dǒ ɛ̍ di̍i̍ sǔh. Wɛ̀ nyɔ̍gbei gba̍ ple̍-ɛ, iě u̍h gbɛ̍n Pɔɔ. Wɛ̀ u̍h blě ɔ̍ i̍ klǎ-a u̍h sà ɔ̍ dě slaǎ sà gbò sɔ̀n. U̍h sǐ-ia ɔ̍ sɔ̀n-ɛ, nɛ̀ gbò-a chɛ̀-ɛ wɔ̍nᵻ wɔ̀ ka̍n-ɛ wɛ̀ se̍e̍.

³¹ U̍h-a pɔ̀n la̍ Pɔɔ dbǎ-a i̍ sǔh wɛ̀ wlu̍ mu̍ dě Wloma nyɔ̍-a fledlǔ-a klu̍gbòu̍-a klaa we̍ ka slɛ̀ gbǎ-a dǒ Juluslɛn wlɔ̀ kli̍hgbɛ̍ di̍i̍-ɛ.

³² Dǒ ɔ̍ nyna ɔ̍ dǔ chape nyɔ̍-i ke u̍h-a fledlǔ-u, iě u̍h gba̍ ple̍-ɛ dě nyɔ̍ tlùgbei̍ laa̍ we̍. U̍h jě-a ɔ̍ ke ɔ̍ fledlǔ-ɛ, sɔ u̍h bɔ̌ Pɔɔ bla̍ tìh sǔh.

³³ Wɛ̀ ɔ̍ mu̍ iě ɔ̍ gbɛ̍n Pɔɔ. Wɛ̀ ɔ̍ po̍ ɔ̍ fledlǔ slǔh u̍h iě Pɔɔ jɔɔdbǔᵻ sɔɔ̌n sa̍n-ɛ. Wɛ̀ ɔ̍ tèle u̍h i̍, ɔ̍ la̍a̍, “Jɔ̍gbau la ka ɔ̍ tìh nɛ ɛ? Dɛ̍ ɔ̍ nu̍ ɛ?”

³⁴ Nyɔ̍ tlùgbei̍ laa̍ u̍h-a wlu̍ se̍ due nɛ. Duuh nɛ-o u̍h-a bla̍ dɛ̍ due, wɛ̀ duuh-a bla̍ dɛ̍ dɛɛ. Sɔ ɔ̍-ɔ wɔ̌n gblangbai̍ u̍h-a slɛ̀-a i̍ tìè tìh. Wɛ̀ ɔ̍ po̍ fledlǔ slǔh u̍h iě Pɔɔ dě bàɛ̍klè gba̍.

³⁵ Jɛ Pɔɔ iě-a bàɛ̍klè-a tǐbliɛ jɛɛ-ɛ, nɛ̀ nyɔ̍ laa̍ u̍h-a kankǎn-a nɛ wɔ̌n la̍ dɛ, wɛ̀ fledlǔ-a chɛ̀ dǔ ɔ̍ gba̍-a.

³⁶ Jɛ nɛ̀ u̍h kli̍hgbɛ̍ tlo-e dǒ ɔ̍ de̍e̍ iě u̍h-a nu̍, “Mɔ̀ dbǎ ɔ̍, mɔ̀ dbǎ ɔ̍.”

Pɔɔ sà ɔ̍ chɛ̀ we̍ tìh i̍

³⁷ U̍h-a nyni̍-ia la̍ Pɔɔ dě bàɛ̍klè-ɛ, wɛ̀ ɔ̍ la̍a̍ dě fledlǔ-a klu̍gbòu̍-a klaa we̍, “Ǎn pɔ̀n iě dɛ̍-ɛ sà dě ìn we̍.” Wɛ̀ ɔ̍ tèle Pɔɔ i̍, ɔ̍ la̍a̍, “Àn po̍ Klii wlu̍ ae?

³⁸ Iche jǔ ɔ̀ tè-a kɔ̀mla̍ bu̍hᵻ i̍ tbaɛ-ɛ gbɔ̀ iě ɔ̍ dǔ-a gbòì po̍ nyɔ̍ᵻá wlǔ nyìɛ̍-ɛ (4,000), wɛ̀ ɔ̍ gba̍-a u̍h dě kwlǎslò we̍ smàɔ̍-ɛ, ɛ̍ se̍ mɔ̀ ae?”

³⁹ Pɔɔ la̍a̍, “Mɔ̍ Juu jǔ, dǒ Tasɔ bo ǐn wlǔh-i dě Selesia bloa̍ kɛ̍n. Dǒ kèàǎn wlɔ̀ di̍i̍ bo ǐn sɔ-ɔ. Dbǎkà iě dě nyɔ̍ la we̍ wlu.”

⁴⁰ Iě ɔ̍ sà Pɔɔ wlu̍ kɛ̍n, wɛ̀ Pɔɔ nyna i̍ dǒ tǐbliɛ kɛ̍n, iě ɔ̍ po̍ sɔ̍n u̍h iě slɛ̀ ja̍ sà. Wɛ̀ u̍h bɔ̌, iě ɔ̍ wlu dě u̍h we̍ dě Iblu wlu̍ di̍i̍.