Nu̍-dɛ̍ᵻ 20 - Ku̍o̍ Delee 1999

Pɔɔ sɔ Ɛfɛsɔ

¹ Slɛ̀ pa̍-a dǒ peɛ wɛ̀-ɛ, wɛ̀ Pɔɔ dǎ Jusu-a kòà kli̍hgbɛ̍. Iě ɔ̍ bla̍ tìh dě u̍h we̍ ɛ̍ iě u̍h-a wlùh fùka. Wɛ̀ ɔ̍ po̍ u̍h klàe̍, iě ɔ̍ dǔ Mɛsedonia fɔɔ mu̍-ɛ.

² Iě ɔ̍ na fɔ̌ laa̍ we̍ i̍, wɛ̀ ɔ̍ fùka nyɔ̍ɔ-a wlùh dǒ ɔ̍ wɔ̍i̍n wlu̍ we̍ dɛ̍blɔ. Iě ɔ̍ dǔ Klii blǔh kɛ̍n nyni̍-ɛ.

³ Dě ɔ̍ nu̍ chǔhᵻ ta̍a̍n. Ɔ̍ mu̍ la̍ nǐ kɛ̍n jii de sǔh ɔ̍ iě Siwlia bloa̍ kɛ̍n mu̍, jɛ nɛ̀ Juu nyɔ̍ sɔ̌ ɔ̍-ɛ. Wɛ̀ ɔ̍ pu̍e̍e ɛ̍ ɔ̍ iě dě de̍ Mɛsedonia jii.

⁴ Ɔ̍ wɔ̌an mu̍-u tìh-ɛ, Pewlɔ sɔ-a Bɛwlia-a, ɔ̍ jǔ jɔ̍gbau Sopata ke ɔ̍ mu̍, ɛ̍ ke Awleslakɔ ke Sɛkundɔ sɔ-a dǒ Tɛsolonaika-a ke. Wɛ̀ Kaeɔ sɔ-a dǒ Dɛɛbi-ɛ ke Timote mu̍. Iě Tekikɔ ke Tlofimɔ sɔ-a dě Esea fɔɔ-ɛ ke ɔ̍ mu̍ ke.

⁵ U̍h mu̍-a àɔ̀ jǔ-ɛ, dǒ Tloa wlɔ̀ di̍i̍ bo u̍h fuo-e àɔ̀.

⁶ Se̍ Fù Blèe̍-a Peě chlà-a wɛ̀-ɛ, iě à gbǎ blǎgbè di̍i̍ à sɔ dǒ Felepai. À nu̍ wǐh m̀m̌ wɛ̀ à jɛɛ u̍h kɛ̍n dě Tloa, dǒ à nu̍ wǐh mɛ̀sɔɔ̌n.

Pɔɔ-a bɔ̌ɛ-o weɛ̍ dǒ Tloa

⁷ Ɛ̍ nu̍-a Bɔ̌ɛ Kɔanwe̍-a wìe̍we̍-ɛ, wɛ̀ à gbǎ tàdùè à iě sɔ̍n jǔ gbo̍a̍ɛ. Wɛ̀ Pɔɔ bla̍ tìh dě nyɔ̍ laa̍ we̍ te̍e̍ wɛ̀ ɛ̍ nu̍ tòloo slɛ̀ɛ̍n. Nɛ̀ sɔ̀n sɛ̀n-ɛ ɔ̍ mu̍ mu̍, ɛ̍ kɔn ɔ̍ tɛn-ɛ wlu-ɛ dlǔ.

⁸ Nɛ̀ ja̍i̍ gbòju kɔn di̍i̍ à gbèɛ̀ɛn-aɛ, fààn nape̍ᵻ dɔu nɛ-e.

⁹ Nɛ̀ jǔgbèlà due tè i̍ dǒ fɛ̍nwɔn kɛ̍n, iě ɔ̍ mɔ̌ɛ ja̍i̍. Ɔ̍ nynɛ̌ bo Utekɔ. Pɔɔ gba̍ wlu-ɛ dluwe̍ te̍e̍ wɛ̀ nyinɔ̍ sìì jǔ laa̍ wìè. Iě ɔ̍ blu̍ dě ja̍i̍ gbò tɔ̀ɔ̀n laa̍ ja̍ ɔ̍ gbǎ sɔ̀n. U̍h iě-a ɔ̍ ja̍i̍ dǔ-ɛ, nɛ̀ ɔ̍ mɛ̌ wɛ̀.

¹⁰ Wɛ̀ Pɔɔ sǐ sɔ̀n, iě ɔ̍ chlìi ɔ̍ kɛ̍n, ɔ̍ gbà ɔ̍ wlì. Iě ɔ̍ la̍a̍, “Sèò bɔ̌ mɔ̀ nu̍-ɛ, dɛ̍ se̍ ɔ̍ nu̍.”

¹¹ Wɛ̀ Pɔɔ jǎ dě de̍ ja̍i̍, iě ɔ̍ chɛɛn blèe̍ i̍ ɔ̍ di̍. Ɔ̍ wlu dě u̍h we̍ te̍e̍ wɛ̀ sɔ̀n gbà i̍, iě ɔ̍ dǔ mu̍-ɛ.

¹² Iě jǔgbèlà laa̍ ɔ̍ wlǔh-e, iě u̍h gba̍ ɔ̍ gbò we̍. Sɔ ɛ̍ tè-e u̍h-a wlùh i̍ kaa̍.

À mu̍ la̍ Mailitɔ

¹³ À gbǎ-a dě blǎgbè di̍i̍-ɛ, wɛ̀ à mu̍ Pɔɔ jǔ dǒ Aso wlɔ̀ di̍i̍. Dɛ̍nu̍ɛ, ɔ̍ la̍ ɔ̍ mu̍ bloɔ̍ i̍ na, wɛ̀ à iě ɔ̍-e dǔ-i dě nya̍.

¹⁴ Ɔ̍ jɛɛ-a à kɛ̍n dě Aso-ɛ, wɛ̀ à po̍ ɔ̍ dě blǎgbè di̍i̍, iě à mu̍ dǒ Mɛtelini wlɔ̀ di̍i̍.

¹⁵ Sɔ̀n sɛ̀n-aɛ, wɛ̀ à gbǎ blǎgbè di̍i̍ iě à sɔ-o, wɛ̀ à sǐ dǒ Kiɔ-a bloa̍-a blaɛjlǐh i̍. Ɛ̀ po̍-a wǐh sɔɔ̌n-ɛ, iě à nyni̍ dǒ Samɔ bloa̍ kɛ̍n. Sɔ̀n dɛɛ sɛ̀n-aɛ, wɛ̀ à sǐ dǒ Mailitɔ wlɔ̀ i̍.

¹⁶ Pɔɔ se̍ pɔ̀n ɔ̍ iě Esea bloa̍ kɛ̍n wǐh sì, ɛ̍ kɔn ɔ̍ po̍ ɛ̍ gbɔ̀ ɔ̍ iě Ɛfɛsɔ wlɔ̀ sɔ̀n jii. Dɛ̍nu̍ɛ, ɔ̍ wlùh-a nu̍ jàjà ɔ̍ iě dǒ Juluslɛn wlɔ̀ nɛ sasǎ, wɛ̀ ɛ̍ iě klèᵻá sàì jua̍a̍-a weɛ̍ kɛ̍n jɛɛ-ɛ dǔ, pò ɔ̍ bɛ̌ɛ ɛ̍-ɛ.

Chɔchi̍h nyɔ̍ klaaᵻ ke Pɔɔ gbo̍a̍ɛ wlu̍

¹⁷ Dǒ Mailitɔ wlɔ̀ di̍i̍ bo Pɔɔ nɛ, wɛ̀ ɔ̍ dbo̍ chɔchi̍h nyɔ̍ klaaᵻ nɛ-a dǒ Ɛfɛsɔ-ɛ wlu̍ we̍ u̍h iě dǒ ɔ̍ we̍ ji̍.

¹⁸ U̍h ji̍-aɛ, wɛ̀ ɔ̍ la̍a̍ dě u̍h we̍, “Ǐn sàɛ̀-a da̍a Esea bloa̍ kɛ̍n ji̍-ɛ i̍-ɛ, ti̍ dɔu la ǐn nu̍-a da̍a mɔ̀ we̍-ɛ, mɔ̀-a chɛ̀ juo ka ǐn nu̍-a da̍a nɛ sɔɛn-ɛ.

¹⁹ Ǎn dbee Joi jǔ iě ǎn wàn-ɛ ǎn chɛ̀ i̍. Ǎn jě tìh wɛ̀ mǐtɛɛn-a wɛ̀ dě ǐn jlǐh i̍ dǒ ka Juu nyɔ̍ nu̍-a ǐn sɔ̌-ɔ sɔɛn-ɛ we̍.

²⁰ Mɔ̀-a chɛ̀ juo ɛ̍-ɛ, dɛ̍ᵻ ìh-a po̍-ao nyɔ̍ dɛ̍-ɛ, ti̍ ǎn ple̍-a mɔ̀ we̍ gbòᵻ i̍ ke wlɔ̀gbàɛ̀ i̍, iě ǎn bla̍-a i̍h we̍i̍ ǎn po̍-a mɔ̀ nǎ-ɛ, ǐn se̍ bu̍h de̍e̍ gbà.

²¹ Nɛ̀ ǎn gbɛ̍n-ɛ Juu nyɔ̍ ke ùh se̍-a Juu nyɔ̍-ɛ wɔ̍i̍n u̍h iě dě Nyɔsoa we̍ i̍ bǐi, wɛ̀ u̍h iě à Joi Jusu wlùh gbaɛ.

²² Nɛ̀ kaka la̍, Nyɔsoa-a Sùù nɛ̌ ǐn kɛ̍ɛ̍n iě dǒ Juluslɛn mu̍. Nɛ̀ɛ̍, ǎn mu̍ la̍-e, jɛ dɛ̍ mu̍-a ǐn jii̍ nɛ deě-ɛ, ǐn se̍ ɛ̍ juo.

²³ Dɛ̍ due ǐn juo-a sǔh-ɛ, wlɔ̀-o-wlɔ̀ ǎn mu̍-a dǒ di̍i̍ i̍ sǐ-ɛ, nɛ̀ Nyɔsoa-a Sùù-a gbòɛ̀ɛ̀ m ka kasoo ke tìh jě-ɛa fuo-a m-ɛ.

²⁴ Jɛ ǎn feɛ nɔ̀ɔ̍, ǐn se̍ ɛ̍ dɛ̍ dǎɛ. Jɛ pɔ̀n chɛ̀ la ɛ̀ kɔ̍-a dǒ Nyɔsoa-a blɛ pùn i̍-ɛ, ɛ̍ we̍i̍ bla̍ dbo̍ Joi Jusu nyǐ-a m-ɛ, ɛ̍-ɛ due gbài̍ ǎn pɔ̀n iě i̍ wɔ̀ gblaan.

²⁵ “Kaka la̍ mɔ̀ɔ̍ kli̍hgbɛ̍ ǎn na-a we̍ i̍ de wɛ̀ ǎn bla̍-a Nyɔsoa-a kmɔ̌ wlu̍ i̍ kɔn tìh-ɛ, ǐn juo ɛ̍-ɛ mɔ̀ se̍ ǐn jlǐhɛ̍ tba̍ mu̍ dɛ.

²⁶ Ɛ̍ kɔn tìh ǎn gbòɛ̀ɛ̀ mɔ̀ duedɛ. Sɔ da̍a sèàn blǐ, pò mɔ̀-a nyɔ̍ gba̍ ka wìè sɔ̀n-ɛ, nɛ̀ ɛ̍ se̍ ǎn tìh o.

²⁷ Dɛ̍nu̍ɛ, ti̍ ǎn toe-a mɔ̀ Nyɔsoa-a di̍i̍chì-ɛ, ǐn se̍ bu̍h de̍e̍ gbà.

²⁸ Ɛ̍ tìh-ɛ, mɔ̀ tù mɔ̀-a chɛ̀ jlǐhɛ̍, nɛ̀ blawɛ̌ᵻ la ìh kɔn fààmlà Nyɔsoa-a Sùù nu̍-a mɔ̀ we̍i̍-ɛ, mɔ̀ tù i̍h jlǐhɛ̍ ke. Nɛ̀ ɔ̍ chɔchi̍h la ɛ̀ kɔn pɛlǔh ɔ̍ po̍-a dǒ ɔ̍ Jǔ-a nymɔ̍ we̍-ɛ, mɔ̀ tù ɛ̍ tìh jlǐhɛ̍.

²⁹ Ǐn juo ɛ̍-ɛ pò ǐn sɔ da̍a-ɛ, gbɛ̍n-nmi̍i̍ ìh kma-a wɔ̍n-ɛ, i̍h-a mu̍ mɔ̀ nynɛ̌ gbǎ. Nɛ̀ i̍h se̍-o blawɛ̌ᵻ la i̍h-a dɛ̍ i̍ sie mu̍.

³⁰ Dě mɔ̀ nynɛ̌ bo nyɔ̍-a mu̍ sɔ u̍h iě kòà dɔu iě dǒ u̍h de̍e̍ gbǎ tìh tù, wɛ̀ u̍h iě tìh-a taǐn-a wɛ̀àn plùn chɛ̍n.

³¹ Ɛ̍ tìh-ɛ, mɔ̀ tù mɔ̀-a chɛ̀ jlǐhɛ̍. Mɔ̀ nu̍ wlùh, dǒ sɔ̀nᵻ ta̍a̍n di̍i̍ kǎ ǎn sàɛ̀ jua̍i̍ sǔh iě ǎn po̍ mɔ̀-a due due nǎ wlù ke sɔ̀n.

³² “Nɛ̀ kaka la̍, ǐn po̍ mɔ̀ dě Nyɔsoa ke ɔ̍ blɛ tu̍owli kwa̍a̍. Ɛ̍-ɛ bo ɛ̀ bɛ̌ɛ mɔ̀ dǒ ta̍i̍ po̍-ɛ. Wɛ̀ ɛ̍ iě mɔ̀ pɔ̀ìě ɛ̀ ɔ̍ tè-a i̍ dǒ ɔ̍ i̍ slɛ̌-nyɔ̍ we̍-ɛ nyǐ.

³³ Ǎn dɛ̍ ǎn nu̍-aɛ, nyɔ̍ɔ-a sebla̍ ke, kòo̍ ke jlii̍ u̍h blě-aɛ, ǎn jlǐh se̍ i̍h we̍ nɛ.

³⁴ Mɔ̀-a chɛ̀-a gbǎ juo ɛ̍-ɛ, pò ǐn ke ǎn na-a nyɔ̍ ja dɛ̍ i̍ pɔ̀n-ɛ, ǎn chɛ̀-a sɔ̍n-a gbǎ bo ǎn nu̍ wɛ̀ à jě ɛ̍.

³⁵ Ǎn nu̍ ɛ̍-ɛ wɛ̀ mɔ̀ iě ɛ̍ juo ka pò nyɔ̍ ja ka dbo̍ nu̍ sɔɛn nu̍-ɛ, wɛ̀ nyɔ̍-a gbǎ nyɔ̍ ùh se̍-a dɛ̍ nu̍-ɛ bɛ̌ɛ we̍. Mɔ̀ bɔ̌ Joi Jusu-a wlu̍ la we̍ mǎle-ɛ, ɔ̍ la̍a̍, ‘Nyɔ̍ dɛ̍ nyǐ-ɛ blě pɔ̀ìě dɔu ɛ̍ sìì dɛ̍ jě-ɛ.’ ”

³⁶ Pɔɔ chlà-a ɔ̍ wlu̍-ɛ, iě ɔ̍ ke u̍h mu̍ kɔlu̍ᵻ kɛ̍ɛ̍n kli̍hgbɛ̍, wɛ̀ u̍h ba̍le.

³⁷ Ti̍ u̍h-a gblèè-a ɔ̍, u̍h-a po̍-a ɔ̍ wlǎ wlìi̍-ɛ, nɛ̀ u̍h-a fìn-i.

³⁸ Wlu̍ ɔ̍ bla̍-aɛ bo ɛ̀ po̍ u̍h-a wlùh dě de̍i̍. Ɔ̍ la̍ u̍h se̍ ɔ̍ jlǐhɛ̍ tba̍ mu̍ dɛ. Wɛ̀ u̍h gba̍ ɔ̍ wìè-i dě blǎgbè di̍i̍.