Nu̍-dɛ̍ᵻ 19 - Ku̍o̍ Delee 1999

Pɔɔ jɛɛ kòà duuh Ɛfɛsɔ

¹ Apolo maɛ dǒ Kɔwlɛn wɛ̀ Pɔɔ gba̍ kwlǎ di̍i̍ wìè iě ɔ̍ jii kwlǎ wlɔ̀ᵻ gbàɛ̀ di̍i̍ i̍, wɛ̀ ɔ̍ wlǔh-i dǒ Ɛfɛsɔ wlɔ̀ di̍i̍. Dě ɔ̍ jě-e kòà duuh.

² Ɔ̍ la̍a̍ dě u̍h we̍, “Ti̍ mɔ̀ blě-a wlùh gbaɛ-ɛ, mɔ̀ jě Nyɔsoa-a Sùù wɛ̀ ae?” U̍h la̍a̍, “Iěe, ka Nyɔsoa-a Sùù-a chɛ̀ nɛ-a nɔ̌ kmɔ̌-ɛ, à-a se̍a i̍h wɔ̌n sàì.”

³ Iě ɔ̍ la̍a̍, “Nɛ̀ nǐ tu̍ we̍ bo mɔ̀ po̍ dlǔ ɛ?” U̍h la̍a̍, “Chɔɔn naɛ bo.”

⁴ Pɔɔ la̍a̍, “Chɔɔn naɛ laa̍, gblɛ̍n sɔ̀ɛ̀n kɛ̍n i̍ poe nǐ bo ɔ̍ po̍ nyɔ̍ dlǔ. Ɔ̍ sèàɛ̍ nyɔ̍gbei wlùh u̍h iě nyɔ̍ ɔ̀ mu̍-a ɔ̍ kɛ̍n i̍ ji̍-ɛ wlùh gbaɛ. Jusu bo ɔ̍ dǎ.”

⁵ U̍h wɔ̌n-a wlu̍ la-ɛ, iě u̍h po̍ nǐ dlǔ dǒ Joi Jusu-a nynɛ̌ kɛ̍n.

⁶ Wɛ̀ Pɔɔ tè u̍h sɔ̍n dlǔ, iě Nyɔsoa-a Sùù gbǎ u̍h kɛ̍n. Wɛ̀ u̍h po̍ wlu̍ diih, iě u̍h-a po̍ Nyɔsoa-a tu̍owli.

⁷ U̍h kli̍hgbɛ̍ u̍h wɛ̀ nyɔ̍-a pùè jɔ̌ sɔɔ̌n nu̍-ɛ.

⁸ Nɛ̀ kǎ Pɔɔ-a mu̍ dě wɛɛ sà gbò sɔ̀n iě ɔ̍ wlu gbài̍gbài̍, wɛ̀ ɔ̍ kui wɔ̍i̍n ɔ̍ sèàɛ̍ Nyɔsoa-a kmɔ̌ wlu̍ i̍ kɔn tìh we̍ i̍. Ɛ̍ bo ɔ̍ nu̍ dǒ chǔhᵻ ta̍a̍n di̍i̍.

⁹ Jɛ nyɔ̍ duuh-a dlǔ kmu i̍, sɔ u̍h se̍ wlùh gbaɛ blě tìh i̍ wɔ̌ɛn. Iě u̍h-a po̍ Joi-a Wìè wlu̍ pùn i̍ dǒ nyɔ̍ tlùgbei̍ laa̍ jlǐhwai. Ɛ̍ kɔn Pɔɔ sɔ dě u̍h nynɛ̌, iě ɔ̍ gba̍ kòà laa̍. Nɛ̀ ka sɔ̀n-a sɛ̀n-aɛ, ɔ̍ ke u̍h-a mu̍ dě Tawlana-a slǎ sɔ̀n, iě ɔ̍ bla̍ gbòɛ̀ dě u̍h we̍.

¹⁰ Ɛ̀ laa̍ bo ɛ̀ mu̍ dluwe̍ dǒ sɔ̀nᵻ sɔɔ̌n di̍i̍. Sɔ ɛ̍ nu̍ ɛ̍ Juu nyɔ̍ ke ùh kli̍hgbɛ̍ se̍-a Juu nyɔ̍ ùh tǐn-a Esea fɔɔ-ɛ, iě u̍h wɔ̌n Joi-a wlu̍.

Nyɔsoa po̍ jbaɛdih dě Pɔɔ ja̍a̍

¹¹ Wɛ̀ Nyɔsoa po̍ jbaɛdih ìh se̍-a blaiɛ̍ kɔn-ɛ dě Pɔɔ ja̍a̍.

¹² Nɛ̀ pò pàa̍ngbaa àe̍e̍ wlì i̍ wlǎ jliɛ̍ sɔ dǒ ɔ̍ pùn wɛ̀ nyɔ̍ iě ɛ̍ wɛ̌ᵻ nyɔ̍ we̍ gba̍-ɛ, nɛ̀ u̍h-a wɛ̌ᵻá chɛ̀ bɔ̌-ɛ. Iě pò ɛ̍ tù jeědih-ɛ, nɛ̀ i̍h sɔ dǒ u̍h de̍e̍.

¹³ Juu nyɔ̍ duuh ùh-a mu̍-a di̍i̍h i̍ ùh-a sà-a nyɔ̍ jeědih de̍e̍ i̍-ɛ, sɔ Joi Jusu-a nynɛ̌ bo u̍h-a gba̍ jeědih-a de̍e̍ nɛ nyɔ̍ we̍. U̍h mu̍-ɛ, nɛ̀ u̍h la̍a̍, “Jeědih, Jusu kɔn tìh Pɔɔ-a bla̍-a, ǎn sèàɛ̍ ìn wlùh dǒ ɔ̍ nynɛ̌ kɛ̍n ìè dǒ jɔ̍gbau la de̍e̍ sɔ.”

¹⁴ Sifa ɔ̀ nu̍-a Juu nyɔ̍-a slaǎ sà nyɔ̍-a dlǔtu due-ɛ, ɔ̍ jɔ̍gbauᵻ nynuu̍ mɛ̀sɔɔ̌n bo ùh-a nu̍ dɛ̍ᵻ la.

¹⁵ Jɛ nɛ̀ jeědih la̍a̍ dě u̍h we̍, “Ǐn juo Jusu, iě ǐn juo Pɔɔ. Jɛ mɔ̀ɔ̍ nɔ̀ɔ̍, mɔ̀-a nynɛ̌-ɛ ke ɛ?”

¹⁶ Wɛ̀ jɔ̍gbau ɔ̀ jeědih nɛ-a de̍e̍-ɛ, iě ɔ̍ gbǎ dě u̍h ja̍, wɛ̀ ɔ̍ fɔ̀n u̍h we̍, iě ɔ̍ bla̍ u̍h kli̍hgbɛ̍. Wɛ̀ nymɔ̍ blě u̍h i̍ flǔi-ɛ, u̍h nu̍ gbou̍, u̍h blě ple̍-ɛ u̍h sǐ sɔ̀n.

¹⁷ Ti̍ Juu nyɔ̍ ke ùh se̍-a Juu nyɔ̍ ùh tǐn-a dǒ Ɛfɛsɔ-ɛ, u̍h wɔ̌n-a pɔ̀n la-a, iě u̍h kli̍hgbɛ̍ gbǎ faɔn. Sɔ ɛ̍ dǔ Joi Jusu-a nynɛ̌ ja̍i̍ dɛ kaa̍.

¹⁸ Wɛ̀ nyɔ̍ dɔu juh blě-a wlùh gbaɛ wɛ̀-ɛ, iě u̍h ji̍ wɛ̀ u̍h sà u̍h-a chɛ̀-a nu̍-dɛ̍ᵻ gbɔ̀ i̍ dǒ wlɔ̀gbàɛ̀.

¹⁹ Wɛ̀ nyɔ̍ ùh-a nu̍-a wòjù de-ɛ, iě u̍h ja u̍h-a chlǐh-dɛ̍ᵻ dǒ wlɔ̀gbàɛ̀. Wɛ̀ u̍h fɔ̍n i̍h dǒ nyɔ̍ kli̍hgbɛ̍ jlǐhwai. U̍h gbàɛ-a i̍h-a wlǐ-ɛ, i̍h nu̍ pɔu̍nᵻá wlǔ-a pùè jɔ̌ sɔɔ̌n (1,200).

²⁰ Sɔ ɛ̍ nu̍ ɛ̍ wɛ̀ Joi-a wlu̍ sɛ̍ i̍, iě ɛ̍ pàɛ̀n nya̍ dǒ gbǐh we̍.

Ɛfɛsɔ nyɔ̍ sà-ɛ Pɔɔ slɛ̀ dlǔ i̍

²¹ Ìh la i̍h wɔ̀-a nɛ-ɛɛ, wɛ̀ Pɔɔ po̍ tìh gbɔ̀ ɔ̍ iě Mɛsedonia ke Akaia fɔɔ jii, wɛ̀ ɔ̍ iě dǒ Juluslɛn mu̍. Ɔ̍ la̍a̍, “Pò ǐn nɛ Juluslɛn nɔ̀ɔ̍ wɛ̀-ɛ, nɛ̀ ǎn mu̍ dǒ Wlom nyni̍ ke gbɔ̀gbɔ̀.”

²² Wɛ̀ Timote ke Iwlaslu ùh-a gbǎ-a ɔ̍ we̍-ɛ, iě ɔ̍ dbo̍ u̍h dě Mɛsedonia. Wɛ̀ ɔ̍ chɛ̀ sì ti̍ gbɔ̍ dě de̍ Esea bloa̍ kɛ̍n.

²³ Dǒ ti̍ laa̍ di̍i̍ bo sàǎsà klaa wlǔh-i ja̍i̍. Ɛ̍ kɔ̍ dǒ Joi-a Wìè dɛ kɛ̍n i̍.

²⁴ Jɔ̍gbau due ɔ̀ kɔn nynɛ̌ nu̍-a Dimɛtleɔ-ɛ, ɔ̍ nu̍ bla̍-nyɔ̍. Nɛ̀ ɔ̍ ke ɔ̍ dbo̍ nu̍ nyɔ̍ ke u̍h-a nu̍ wù nyɔsoa Atemi-a slaǎ sà gbò-a blaiɛ̍ plìh plìh dǒ sebla̍ we̍, wɛ̀ ɛ̍ nyǐ u̍h wlǐ dɔu.

²⁵ Wɛ̀ ɔ̍ dǎ ɔ̍ dbo̍ nu̍ nyɔ̍ ke nyɔ̍ duuh ùh-a nu̍-a dbo̍ tu̍-a chɛ̀ ke-ɛ dǒ tàdùè. Iě ɔ̍ la̍a̍, “Mɔ̀ɔ̍ wɛ̀-a de̍-ɛ, mɔ̀-a chɛ̀ juo ɛ̍-ɛ, dbo̍ la ɛ̍-ɛ bo à jěe dɛ̍ i̍.

²⁶ Jɛ Pɔɔ la ɔ̍ la̍ kwɛ̍i̍n gbo̍ᵻ nyi̍ɔ̍ nu̍-aɛ, nɛ̀ i̍h se̍ nyɔsoa fu̍u̍. Ɛ̍ bo ɔ̍ nɛ̌ kɛ̍ɛ̍n, wɛ̀ ɔ̍ fèàɛ̀ nyɔ̍ɔ dɔu-a dlǔᵻ da̍a Ɛfɛsɔ. Ɛ̍ se̍ da̍a Ɛfɛsɔ nɛ due ɔ̍ se̍ ɛ̍ nui, jɛ Esea bloa̍ kli̍hgbɛ̍ kɛ̍n i̍ bo ɔ̍ nui ɛ̍ muɔ. Wɛ̀ mɔ̀-a gba̍ jlǐhɛ̍ mɔ̀-a jě ɛ̍, iě mɔ̀-a wɔ̌n i̍h.

²⁷ Sɔ nɛ̀ ɛ̍ nu̍ kanɛa dɛ. Ɛ̍ se̍ à dbo̍-a nynɛ̌-ɛ je̍e jii̍ nyni nɛ due tìh, jɛ nɛ̀ à nyɔsoa Atemi ɛ̀ ku̍-a wɔ̍n-ɛ, nɛ̀ ɛ̍ slaǎ sà gbò-a nynɛ̌ bo ɛ̀ nyni wɔ̍n. Nɛ̀ à nyɔsoa ɛ̀ Esea nyɔ̍ ke kmɔ̌ kli̍hgbɛ̍-a sà-a wɛɛ de-ɛ, nɛ̀ ɛ̍ tìh-a mu̍ ja̍a̍i̍ gbǎ, wɛ̀ ɛ̍ iě da̍a sà-ɛ.”

²⁸ U̍h wɔ̌n-a wlu̍ la-a, sɔ u̍h sɔ̀n-ɛ dǒ jlu̍h we̍. Iě u̍h-a wǐi i̍, u̍h la̍a̍, “Ɛfɛsɔ nyɔ̍-a Atemi ku̍ wɔ̍n o.”

²⁹ Sɔ slɛ̀ sɛ̍ i̍ dǒ tùgbàwlɔ̀-a chɛ̀ di̍i̍. Iě u̍h gbɛ̍n Kaeɔ ke Awleslakɔ ùh nu̍-a Mɛsedonia nynuu̍ ùh ke Pɔɔ-a na-aɛ. Wɛ̀ u̍h blě u̍h i̍ klǎ-a u̍h-a gba̍ u̍h dě tìh pu̍e̍e la̍.

³⁰ Sɔ Pɔɔ-a pɔ̀n dě u̍h we̍ mu̍-ɛ i̍ de, jɛ nɛ Jusu-a kòà-a nɛ wɔ̌n la̍.

³¹ Wɛ̀ bloa̍-a jlǐhɛ̍ ùh ke Pɔɔ jbɛɛ-a dǒ blǔh laa̍ kɛ̍n-ɛ, iě u̍h dbo̍ tu̍owli u̍h-a ba̍le Pɔɔ ɔ̍-ɔ je̍e ɔ̍ chɛ̀ tà sà la̍ mu̍ dě tìh pu̍e̍e la̍.

³² Jɛ nyɔ̍ ùh gbòe-a i̍-ɛ, u̍h-a i̍ wǐi wlu̍ se̍ due nɛ. Juh-ɛ, nɛ̀ u̍h-a wlu̍ nɛ-o dɔɔ̌. Duuh dɔu-a chɛ̀ se̍ dɛ̍ kɔn tìh u̍h wɛ̀-a de̍-ɛ juo.

³³ Nɛ̀ Ɛlesana bo Juu nyɔ̍ po̍ dě u̍h-a nya̍. Wɛ̀ nyɔ̍ tlùgbei̍ laa̍ u̍h-a duuh-a wǐi i̍, u̍h-a po̍ ɔ̍ slɛ̌ chèɛ̀ i̍. Wɛ̀ ɔ̍ po̍ sɔ̍n u̍h iě slɛ̀ ja̍ sà, wɛ̀ ɔ̍ iě ɔ̍ chɛ̀ dě nyɔ̍ wɔ̍ɔ̍n sà.

³⁴ Jɛ u̍h juo-a ɔ̍ i̍ ka ɔ̍ nu̍-a Juu jǔ-ɛ, sɔ u̍h-a i̍ wǐi wlu̍ nɛ due wɛ̀ sǔh. U̍h bɛ̌ɛ àba̍ sɔɔ̌n nu̍-ɛ dǒ i̍ wǐi la̍, nɛ̀ u̍h-a nu̍, “Ɛfɛsɔ nyɔ̍-a Atemi ku̍ wɔ̍n o.”

³⁵ Wɛ̀ wlɔ̀-a klaki̍h po̍ u̍h bɔ̌ i̍. Iě ɔ̍ la̍a̍, “Mɔ̀ɔ̍ Ɛfɛsɔ nyɔ̍, Atemi ke ɛ̍ gbàìn nɛ sɔɔ̌ blu̍-a dě ja̍u̍n wlì-ɛ, ka Ɛfɛsɔ wlɔ̀ bo ɛ̀ gbɛ̀n-a dǒ i̍h-a slaǎ sà gbò we̍ i̍-ɛ, nyɔ̍we̍ ɔ̀ se̍ i̍h juo da̍a kmɔ̌ la we̍ ɛ?

³⁶ Ɛ̍ tìh-ɛ, ka ɛ̍ nɔ̀ɔ̍ ɛ̍ se̍-a tòlo tìh-ɛ, nɛ̀ mɔ̀ nɛ tìi̍n, mɔ̀ bɔ̌ sàǎsà dɛ nu̍-ɛ.

³⁷ Mɔ̀ ja nyɔ̍ la da̍a wɛ̀ gbɛɛ, jɛ u̍h se̍ à slaǎ sà gbò we̍ jlǐ, u̍h wɔ̍ se̍ à nyɔsoa Atemi wlu̍ pùn po̍ ke.

³⁸ Pò Dimɛtleɔ ke ɔ̍ dbo̍ nu̍ nyɔ̍ ja nyɔ̍ kunǎ i̍ poe-ɛ i̍ pɔ̀n-ɛ, koti̍ pɔ̀ni-i, dě taɔ pa̍ nyɔ̍ nɛ. Nɛ̀ u̍h mu̍-e, u̍h iě we̍ kunǎ i̍ poe.

³⁹ Jɛ pò dɛ̍ dɛɛ nɛ dǒ de̍ mɔ̀ ja pɔ̀n-ɛ, nɛ̀ blǔh nyɔ̍ bo ùh iě ɛ̍ tàdùè po̍.

⁴⁰ Kanɛa dɛ bo mɔ̀ nu̍ sèàn. Pò u̍h gbɛ̍n àɔ̀ de sèàn slɛ̀ i̍ sà tìh-ɛ, à se̍ i̍h dlǔ i̍ sà-a bɛ̌ɛ mu̍, dɛ̍nu̍ɛ, ɛ̍ se̍ tba̍ la̍ kɔn.”

⁴¹ Ɔ̍ wɔ̀-a dɛ̍ laa̍ bla̍-aɛ, wɛ̀ ɔ̍ sèàɛ̍ nyɔ̍ kli̍hgbɛ̍ wlùh u̍h iě i̍ che̍ɛ̍ɛn.