Nu̍-dɛ̍ᵻ 17 - Ku̍o̍ Delee 1999

Pɔɔ ke Sale jě klě dě Tɛsolonaika

¹ Pɔɔ ke Sale wɔ̌an mu̍-u tìh-ɛ, u̍h jii dǒ Amfepole ke Apolonia wlɔ̀ᵻ di̍i̍, iě u̍h nyni̍ dǒ Tɛsolonaika. Nɛ̀ dǒ Juu nyɔ̍-a wɛɛ sà gbò nɛ.

² Wɛ̀ Pɔɔ pa̍ dě ɛ̍ di̍i̍, wɛ̀ ɔ̍ slè Nyɔsoa-a wlu̍. Iě ɔ̍ ke u̍h pu̍e̍e ɛ̍ wɔ̍ɔ̍n i̍ dǒ dɔɔ̌dlǔᵻ ta̍a̍n di̍i̍. Ɔ̍ naɛ tǐwai dɛ bo.

³ Nɛ̀ ɔ̍ sèàɛ̍ ɛ̍ we̍ i̍ iě ɔ̍ flɔn-ɛ ɛ̍ we̍i̍ ka Nyɔsoa-a Chèɛ̀ Tba̍ju la ɔ̍ kɔn ɔ̍ iě-a jua̍i̍ sàɛ̀ wɛ̀ ɔ̍ iě-ae wlǔh-ɛ. Wɛ̀ Pɔɔ la̍a̍, “Jusu la ɔ̀ kɔn tìh ǎn bla̍-a dě mɔ̀ we̍-ɛ, ɔ̍ bo ɔ̀ nu̍ Nyɔsoa-a Chèɛ̀ Tba̍ju.”

⁴ Sɔ nyɔ̍ duuh-a dlǔ jli̍-i, wɛ̀ u̍h gbǎ dǒ ɔ̍ ke Sale de̍e̍. Klii nyɔ̍ ùh-a sà-a Nyɔsoa wɛɛ-ɛ, u̍h-a gbɔ̀ù klaa gbǎ dǒ u̍h de̍e̍ ke, ɛ̍ ke nynɛ̌ kɔn nynɔ̌gbaɔᵻ dɔu ke.

⁵ Sɔ ɛ̍ po̍ Juu nyɔ̍ wlɛ̀n di̍i̍, wɛ̀ u̍h gbò se̍ dlǔ kɔn nyɔ̍ kli̍hgbɛ̍ kwlǐh ja̍i̍, wɛ̀ u̍h nynaɛ wlɔ̀-a chɛ̀ ja̍i̍. Wɛ̀ u̍h wlǎ dě Jeesɛn blǐ gbò, u̍h-a pɔ̀n Pɔɔ ke Sale i̍, pò u̍h gbɛ̍n u̍h-ɛ, u̍h iě u̍h dě nyɔ̍ laa̍ we̍ gba̍.

⁶ Jɛ u̍h se̍-a Pɔɔ ke Sale jě-ɛ, wɛ̀ u̍h gbɛ̍n Jeesɛn, u̍h blě ɔ̍ ke de̍di̍i̍ᵻ duuh i̍ klǎ-a, iě u̍h gba̍ u̍h dě wlɔ̀-a wlu̍ kwa̍ blě nyɔ̍ jǔ. Nɛ̀ u̍h-a wǐi i̍, u̍h la̍a̍, “Nyɔ̍ la ùh-a tba̍-a kmɔ̌ la jii̍ wlù-ɛ, u̍h bo ùh ji̍ da̍a à we̍ wlɔ̀ wɛ̀,

⁷ iě Jeesɛn paɛ u̍h gbò. Nɛ̀ u̍h kli̍hgbɛ̍ bo ùh-a wa̍ Wloma nyɔ̍-a Bloa̍ Joi-a telě. U̍h la̍ u̍h blě blǔh baa dɔɔ, ɔ̍ nynɛ̌ nu̍ Jusu tìh u̍h-a wlu̍.”

⁸ Jɛ u̍h wɔ̌n-a wlu̍ la-a, sɔ ɛ̍ wa̍ nyɔ̍ kli̍hgbɛ̍ ke wlɔ̀-a wlu̍ kwa̍ blě nyɔ̍-a dlǔ.

⁹ Wɛ̀ u̍h po̍ Jeesɛn bei wlǐ dlǔ. I̍h bo u̍h pɛ̌ɛ sasǎ wɛ̀ u̍h dǔ u̍h i̍ tǎli-ɛ.

Bɛwlia nyɔ̍ gbɛ̍n Pɔɔ bei-a wlu̍ i̍

¹⁰ Wlù wɔ̀-aɛ, wɛ̀ de̍di̍i̍ᵻ gbǎ-ɛ Pɔɔ ke Sale kwlǎ suei̍ iě u̍h mu̍ dǒ Bɛwlia. U̍h nyni̍-a wlɔ̀-ɛ, wɛ̀ u̍h mu̍ dě Juu nyɔ̍-a wɛɛ sà gbò sɔ̀n.

¹¹ Sɔ Juu nyɔ̍ juh nɛ-a doǒ-ɛ, u̍h nu̍ nyɔ̍ chɛ̀ ɛ̍ sìì juh nɛ-a dǒ Tɛsolonaika-a, dɛ̍nu̍ɛ, u̍h gbɛ̍n-ɛ tu̍owli laa̍ sɔ̍nᵻ sɔɔ̌n i̍. Nɛ̀ ka sɔ̀n-a sɛ̀n-aɛ, kǎ u̍h-a slè Nyɔsoa-a wlu̍ u̍h iě jě pò dɛ̍ Pɔɔ-a bla̍-aɛ, tìh-a taǐn bo kɔ̌ɔ.

¹² U̍h-a nyɔ̍ dɔu po̍ i̍h tìh chɛ̀, ɛ̍ ke Klii nyɔ̍-a wɔ̍n ku̍ nynɔ̌gbaɔᵻ dɔu ke u̍h-a jɔ̍gbauᵻ ke.

¹³ Jɛ Juu nyɔ̍ nɛ-a Tɛsolonaika-a wɔ̌n-a pɔ̀n ka Pɔɔ-a bla̍-a la̍ Nyɔsoa-a wlu̍ dɛ ke dě Bɛwlia-aɛ, wɛ̀ u̍h mu̍-e. Iě u̍h pa̍ nyɔ̍ sɔ̀n i̍ u̍h iě Pɔɔ bei slɛ̀ dlǔ i̍ sà-ɛ.

¹⁴ Wɛ̀ dǒ tàdùè laa̍ de̍di̍i̍ᵻ tèwe u̍h gbǎ-ɛ Pɔɔ kwlǎ dě jbǒ wɔ̍i̍n. Jɛ Sale ke Timote sie Bɛwlia.

¹⁵ Nyɔ̍ ùh gbǎ-ɛa Pɔɔ kwlǎ-ɛ, u̍h nyni̍-i ɔ̍ dǒ Atɛn. U̍h-a mu̍-a de̍-ɛ, wɛ̀ u̍h gba̍ Pɔɔ-a tu̍owli Sale ke Timote iě ɔ̍ kɛ̍n i̍ ji̍ suei̍.

Pɔɔ ke Atɛn nyɔ̍ sà-a

¹⁶ Ti̍ Pɔɔ-a chlì-a Sale ke Timote we̍ i̍ dǒ Atɛn wlɔ̀ di̍i̍-ɛ, dǒ ɔ̍ jě-e kwɛ̍i̍n gbo̍ᵻ dɔu dǒ wlɔ̀-a chɛ̀. Sɔ nɛ̀ ɛ̍ feǎn dǒ ɔ̍ wlì kaa̍.

¹⁷ Sɔ ɛ̍ nu̍ ɛ̍ ɔ̍ ke Juu nyɔ̍ ke ùh se̍-a Juu nyɔ̍ ùh-a sà-a Nyɔsoa wɛɛ-ɛ, u̍h-a sà wɔ̍ɔ̍n i̍ dě wɛɛ sà gbò sɔ̀n dǒ wǐh kli̍hgbɛ̍ di̍i̍, ɛ̍ ke juh-a ji̍-a dǒ ɔ̍ we̍ wlɔ̀gbàɛ̀-ɛ ke.

¹⁸ Ɛ̍ tìh flɔ̍nwlùh kɔn nyɔ̍ u̍h-a dǎɛ-a Ɛpekiuwli ke Slowe-ɛ, ɔ̍ ke u̍h-a duuh sà wɔ̍ɔ̍n i̍ ke. Iě u̍h la̍a̍, “Se̍ dɛ̍ jlǐh juo nyɔ̍ la ɔ̍ la̍ dɛ̍ɛ ke ɛ?” Duuh la̍a̍, “Nyɔ̍-se̍-juo dakɔ̍ diih-a nyɔsoa-a tìh bo ɔ̍ bla̍.” Dɛ̍nu̍ɛ, Pɔɔ-a bla̍ Jusu ke mɛ̌ wlǔh-e tìh, ɛ̍ kɔn u̍h-a wlu dɛ̍ la.

¹⁹ Wɛ̀ u̍h dǔ Pɔɔ, iě u̍h gba̍ ɔ̍ dě tìh pu̍e̍e la u̍h-a dǎɛ-a Awleɔpakɔ-ɛ. Iě u̍h la̍a̍, “Nǎ delee la àn po̍-a nyɔ̍-ɛ, à pɔ̀n à iě ɛ̍ dɛ̍ i̍ juo.

²⁰ Dɛ̍ᵻ àn sà-aɛ, i̍h-a diih nu̍ delee dě àɔ̀ dounᵻ, ɛ̍ kɔn à pɔ̀n à iě i̍h-a gbɔ̀ juo.” (

²¹ Nɛ̀ Atɛn nyɔ̍ kli̍hgbɛ̍ ke dihwi̍hᵻ tǐn-a doǒ-ɛ, u̍h-u nu̍ dɛ̍ dɛɛ. Jɛ wɔ̌n tìh delee nɛ̀ ìn sà i̍h-i due gbài̍ u̍h-a nu̍ kleǐn.)

²² Wɛ̀ Pɔɔ nyna i̍ dǒ u̍h jlǐhwai dě Awleɔpakɔ, iě ɔ̍ la̍a̍, “Mɔ̀ɔ̍ Atɛn nyɔ̍, dɛ̍ ǐn juo-a dǒ mɔ̀ we̍-ɛ, ɛ̍ nu̍ wɛɛ sà-aa po̍ mɔ̀ gbǐh.

²³ Dɛ̍nu̍ɛ, pò ǐn ja tàjɛ̀ jii-ɛ, nɛ̀ ǎn jě mɔ̀-a wɛɛ sà-ɛ la̍. Ǐn jě gblǒ u̍h chlǐh Se̍ Juo Nyɔsoa dǒ ɛ̍ wlì. Se̍ Juo Nyɔsoa mɔ̀ se̍-a juo iě mɔ̀-a sà-a wɛɛ-ɛ, ɔ̍ kɔn tìh bo ǎn bla̍-a la̍ dě mɔ̀ we̍.

²⁴ Nyɔsoa ɔ̀ nu̍-a kmɔ̌ ke dɛ̍ᵻ kli̍hgbɛ̍ nɛ-a dě ɛ̍ di̍i̍-ɛ, ɔ̍ bo ɔ̀ nu̍ blǔh ke ja̍u̍n-a Joi. Wɛɛ sà gbò nyi̍ɔ̍ po̍-aɛ, ɔ̍-ɔ tǐn dě ɛ̍ di̍i̍.

²⁵ Ɔ̍-ɔ pɔ̀n-ɛ nyi̍ɔ̍ dɛ̍ kwa̍a̍ i̍, dɛ̍nu̍ɛ, ɔ̍ chɛ̀-ɛ gbǎ bo ɔ̀ nyǐ nyɔ̍ dɛ̍ᵻ kli̍hgbɛ̍ ke feɛ iě u̍h-a fɔ.

²⁶ Dě nyɔ̍ due ja̍a̍ bo ɔ̍ nui kmɔ̌ nyɔ̍ kli̍hgbɛ̍, wɛ̀ u̍h iě blǔh la kɔn. Iě ɔ̍ sie ti̍ nya̍ wɛ̀ ɔ̍ nma̍le tà kɔn taǐn u̍h iě-a tǐn-ɛ.

²⁷ Nyɔsoa nu̍ ɛ̍-ɛ wɛ̀ kmɔ̌ nyɔ̍ iě ɔ̍ i̍ pɔ̀n. Nɛ̀ pò nyɔ̍ be̍lɛ i̍ wɛ̀ u̍h iě ɔ̍ kwlǐh i̍ pɔ̀n-ɛ, nɛ̀ u̍h-a mu̍ ɔ̍ jě. Jɛ ɔ̍ se̍ à nyɔ̍ wɛ-a chɛ̀ we̍ i̍ ti̍ɛ̍ɛn.

²⁸ Dɛ̍nu̍ɛ, ‘À pɛ̌n ɔ̍, iě à mui ɔ̍, wɛ̀ à nɛ ɔ̍.’ Ɛ̍ bo mɔ̀-a chlǐh-nyɔ̍ duuh sà-a, u̍h la̍a̍, ‘Àɔ̀ ɔ̍ nynuu̍.’

²⁹ Nɛ̀ɛ̍ ka à nu̍-a Nyɔsoa-a nynuu̍-ɛ, nɛ̀ à bɔ̌ ɔ̍ kòo̍ ke sebla̍ ke sɔɔ̌ dǎɛ. I̍h nɔ̀ɔ̍, i̍h-a sɔ dě dlǔ di̍i̍ wɛ̀ slɛ̌ kɔn nyɔ̍-a nu̍ i̍h.

³⁰ Ti̍ kmɔ̌ nyɔ̍ se̍-a dɛ̍ jlǐh juo tɛin-ɛ, nɛ̀ Nyɔsoa-a tàn-ɛ dɛ̍ᵻ jlǐh kɛ̍n de. Jɛ kaka nɔ̀ɔ̍, ɔ̍ sèàɛ̍ la̍ nyɔ̍ wlùh tà kli̍hgbɛ̍ u̍h iě i̍ bǐi.

³¹ Dɛ̍nu̍ɛ, ɔ̍ chɛ̍n weɛ̍ wɛ̀ ɔ̍ iě kmɔ̌-a tìh wlu̍ kɛ̍n po̍ i̍ slɛ̌-ɛ ka dě nyɔ̍ ɔ̍ tba̍-a chèɛ̀-ɛ ja̍a̍. Ɔ̍ flɔn-ɛ ɛ̍ we̍i̍ dě nyɔ̍gbei we̍, ɛ̍ kɔn nyɔ̍ ɔ̍ tba̍-a chèɛ̀-ɛ ɔ̍ mɛ̌-aɛ, wɛ̀ ɔ̍ sà ɔ̍-e.”

³² Ti̍ u̍h wɔ̌n-a mɛ̌ wlǔh-e tìh dě Pɔɔ wɔ̍ɔ̍n-ɛ, sɔ nyɔ̍ duuh-a po̍ ɔ̍ pàwe̍i̍. Jɛ duuh la̍a̍, “À pɔ̀n ìè ìh la bla̍ dɛ à iě i̍h-i wɔ̌n o.”

³³ Kǎ u̍h nu̍, wɛ̀ Pɔɔ sɔ dǒ u̍h we̍-e.

³⁴ Nyɔ̍ duuh blě wlùh gbaɛ iě u̍h gbǎ dǒ Pɔɔ de̍e̍. U̍h-a due nu̍ Daonisiɔ. Ùh nu̍-a tìh pu̍e̍e nyɔ̍-ɛ u̍h-a due bo. Nynɔ̌ kɔn nynɛ̌ nu̍-a Damɛwle-ɛ, ɔ̍ ke nyɔ̍ duuh blě wlùh gbaɛ wɛ̀ u̍h gbǎ dǒ Pɔɔ de̍e̍ ke.