Nu̍-dɛ̍ᵻ 15 - Ku̍o̍ Delee 1999

Gba̍tòà ke nyɔ̍ klaaᵻ pu̍e̍e tìh

¹ Dǒ nyɔ̍ duuh sɔ-ɛ Judia fɔɔ iě u̍h ji̍ dǒ Antiɔ. Wɛ̀ u̍h-a po̍ de̍di̍i̍ᵻ nɛ-a doǒ-ɛ nǎ. U̍h la̍a̍, “Pò mɔ̀ gbǎ plɔ̀n ka Mose-a telě dǎ-aɛ, nɛ̀ à sà-o ɛ̍ tɛ̀. Jɛ pò mɔ̀ se̍ la̍a̍n nu̍-ɛ, nɛ̀ mɔ̀ se̍ pǔh ke̍ o.”

² Ɛ̍ bo ɛ̀ tòlo u̍h ke Pɔɔ ke Banaba, iě u̍h-a sà wɔ̍ɔ̍n i̍. Ɛ̍ bo ɛ̀ sà Pɔɔ ke Banaba, ɛ̍ ke wlùh gbaɛ-ɛ blě nyɔ̍ duuh ke u̍h iě Jusu-a gba̍tòà ke nyɔ̍ klaaᵻ jě la̍-a mu̍ dě Juluslɛn wlɔ̀ di̍i̍, dǒ dɛ̍ la u̍h-a tòlo-a we̍.

³ Wɛ̀ chɔchi̍h dbo̍ u̍h. U̍h-a mu̍-a la̍-ɛ, iě u̍h jii Fɔnisia fɔɔ ke Sɛmewlea. Dě u̍h poe kunǎ ka ùh se̍-a Juu nyɔ̍-ɛ fèàɛ̀-a wɛ̀ dě Nyɔsoa we̍-ɛ. Sɔ ɛ̍ pɛ̌n-ɛ de̍di̍i̍ᵻ kli̍hgbɛ̍-a pɔluh i̍ kaa̍.

⁴ U̍h nyni̍-a Juluslɛn-ɛ, chɔchi̍h ke, gba̍tòà ke, nyɔ̍ klaaᵻ gbɛ̍n u̍h-a tìh i̍. Dɛ̍ᵻ kli̍hgbɛ̍ ìh Nyɔsoa nu̍-a dě u̍h ja̍a̍-ɛ, iě u̍h po̍ i̍h-a kunǎ kli̍hgbɛ̍ dě u̍h we̍.

⁵ Wɛ̀ wlùh gbaɛ-ɛ blě nyɔ̍ juh nɛ-a dě Fɛlesii nyɔ̍ naɛ gbɔ̀ù di̍i̍-ɛ, iě u̍h nyna i̍, u̍h la̍a̍, “Ùh se̍-a Juu nyɔ̍-ɛ u̍h kɔn u̍h iě plɔ̀n gbǎ, nɛ̀ mɔ̀ à sèàɛ̍ u̍h wlùh u̍h iě Mose-a telě dɛ̍ɛ̍ jě.”

⁶ Wɛ̀ gba̍tòà ke nyɔ̍ klaaᵻ gbèɛ̀ɛn u̍h-a tìh-a chɛ̀ kɛ̍n u̍h iě dě i̍h di̍i̍ gbɛ̀n.

⁷ Iě u̍h sà wɔ̍ɔ̍n i̍ sà-a, wɛ̀ Pitɛ nyna i̍. Ɔ̍ la̍a̍, “Ǐn de̍di̍i̍ᵻ, mɔ̀-a chɛ̀ juo ɛ̍-ɛ mɔ̍ bo Nyɔsoa tba̍ chèɛ̀ tɛin dě mɔ̀ nynɛ̌, ɔ̀ iě pɔ̀n chɛ̀-a tìh bla̍ dě ùh se̍-a Juu nyɔ̍-ɛ we̍, wɛ̀ u̍h iě wlùh gbaɛ blě.

⁸ Nyɔsoa ɔ̀ juo-a nyɔ̍-a wlùh-ɛ, ɔ̍ bo ɔ̀ to ɛ̍ ka ɔ̍ wɔ̌ɛn-a ùh se̍-a Juu nyɔ̍-ɛ tìh i̍-ɛ. Ɛ̍ kɔn ka ɔ̍ nu̍-a àɔ̀ ɔ̍ Sùù nyǐ-ɛɛ, iě ɔ̍ nu̍ la̍a̍n ɛ̍ u̍h nyǐ-ɛ ke.

⁹ Ɔ̍ se̍ u̍h ke àɔ̀ deě i̍ gblè, ɛ̍ kɔn ɔ̍ nu̍ u̍h-a pɔluh-a wlaǎwla u̍h-a wlùh gbaɛ blě tìh.

¹⁰ Nɛ̀ɛ̍, gbɛ̀ la à baaᵻ ke à chɛ̀ se̍-a gba̍-a bɛ̌ɛ iě mɔ̀-a tè-a ɛ̍ dǒ Jusu-a kòà delee la dlǔ i̍-ɛ, nɛ̀ mɔ̀-a se̍-o Nyɔsoa-a jlu̍h duǐh-a tù ae?

¹¹ Dɛ̍nu̍ɛ, ka à gbaɛ-a ɛ̍ wlùh à pǔh-a wɛ̀ dě Joi Jusu-a blɛ nɛ-ɛ di̍i̍-ɛ, kǎ u̍h nɛ ke.”

¹² Nyɔ̍ wɔ̍n flɔn-ɛ dɛ̍ᵻ ke jbaɛdih Nyɔsoa po̍-a dě Pɔɔ ke Banaba ja̍a̍ dě ùh se̍-a Juu nyɔ̍-ɛ nynɛ̌ we̍-ɛ, u̍h-a po̍-a i̍h-a kunǎ-a, nɛ̀ nyɔ̍ kli̍hgbɛ̍ wɛ̀-a de̍-ɛ, u̍h nɛ tìi̍n u̍h-a po̍ dě u̍h we̍ dounᵻ.

¹³ U̍h wɔ̀-a kunǎ laa̍ po̍-ɛ, wɛ̀ Chiin la̍a̍, “Ǐn de̍di̍i̍ᵻ, mɔ̀ po̍ nɔ̌ ǐn we̍ dounᵻ.

¹⁴ Samo sèàɛ̍ àɔ̀ wlùh tiɔ, ɔ̍ la̍ Nyɔsoa iě-a ùh se̍-a Juu nyɔ̍-ɛ ja̍ gbɛ̀n-ɛ i̍ sàɛ̀-ɛ, dǒ ɔ̍ sà-ɛ nyɔ̍ dě u̍h nynɛ̌ ɔ̍ nynɛ̌ iě u̍h kɛ̍n nɛ.

¹⁵ Wlu̍ la ɛ̍ ke Nyɔsoa-a tu̍owli po̍ nyɔ̍-a wlu̍ nɛ due. Ɛ̍ chlǐh wlu̍ la̍a̍,

¹⁶ ‘Pò jɛ la ɛ̍ sì-ɛ, nɛ̀ ǎn mu̍ wɔ̀ɔ̀ de̍ sà, wɛ̀ iě Depe-a wlǎ-gbò po̍ dode̍. Nɛ̀ ǎn mu̍ ɛ̍ jii̍ nyni dɛ̍ᵻ ta̍i̍ poe, wɛ̀ iě ɛ̍ i̍ nyna-ɛ dode̍.

¹⁷ Wɛ̀ kmɔ̌ nyɔ̍ kli̍hgbɛ̍ juh sie-a dǒ de̍ ùh se̍-a Juu nyɔ̍ iě ǎn nynɛ̌ nɛ-a kɛ̍n-ɛ, wɛ̀ u̍h iě ǐn kwlǐh i̍ pɔ̀n.

¹⁸ Joi ɔ̀ sà-a ìh la tà tɛin-ɛ, ɔ̍ bo ɔ̀ bla̍ ìh la.’

¹⁹ “Ɛ̍ tìh-ɛ, naɛ̍ flɔ̍nwlùh nu̍ ùh se̍-a Juu nyɔ̍ ùh bǐi-a dě Nyɔsoa we̍-ɛ, mɔ̀ à bɔ̌ u̍h-a chèɛ̀ gbɛ̀ɛ̍ dlǔ tè-ɛ.

²⁰ Jɛ mɔ̀ à chlǐh u̍h we̍, à iě u̍h wlùh sèàɛ̍. Di̍-dɛ̍ u̍h pi̍-a dǒ kwɛ̍i̍n gbo̍ᵻ we̍-ɛ, nɛ̀ u̍h bɔ̌ i̍h di̍-ɛ. U̍h tǎli gbǎn nu̍ dɛ i̍, nmi̍ɛ̍ jǎ nymɔ̍ i̍-ɛ, nɛ̀ u̍h bɔ̌ ɛ̍ di̍-ɛ. Nɛ̀ u̍h bɔ̌ nymɔ̍ di̍-ɛ ke.

²¹ Dɛ̍nu̍ɛ, Mose-a telě dǔ slè-ɛ sɔ dě tɛin blǐ, nɛ̀ nyɔ̍gbei dǔ ɛ̍ we̍i̍ bla̍-a se̍e̍ wlɔ̀ᵻ di̍i̍ i̍ dě wɛɛ sà gbòᵻ sɔ̀n i̍ dǒ wlè-weɛ̍ di̍i̍.”

Chlǐh-dɛ̍ mu̍ ùh se̍-a Juu nyɔ̍-ɛ we̍

²² Wɛ̀ Jusu-a gba̍tòà ke, nyɔ̍ klaaᵻ ke chɔchi̍h nyɔ̍ kli̍hgbɛ̍ po̍ ɛ̍ gbɔ̀ u̍h iě nyɔ̍ dě u̍h-a gbɔ̀ù di̍i̍ sà, u̍h ke Pɔɔ ke Banaba iě dǒ Antiɔ wlɔ̀ di̍i̍ mu̍. Wɛ̀ u̍h sà Juda, ɔ̀ u̍h-a dǎɛ-a Basaba-a, ɛ̍ ke Sale ke. U̍h bo ùh nu̍ de̍di̍i̍ᵻ laa̍ u̍h-a fààmlà.

²³ U̍h bo u̍h tù chlǐh-dɛ̍-a chɛ̀ kwa̍a̍ iě u̍h gba̍ ɛ̍. Ɛ̍ wlu̍ la̍a̍, “Àɔ̀ nu̍-a gba̍tòà ke nyɔ̍ klaaᵻɛ́, mɔ̀ɔ̍ nu̍-a à de̍di̍i̍ᵻ ùh se̍-a Juu nyɔ̍ ùh tǐn-a Antiɔ ke, Siwlia ke Selesia fɔɔ-ɛ, à sà mɔ̀ nyinɔ̍ i̍.

²⁴ À wɔ̌n i̍h nyɔ̍ sɔ nɔ̌ àɔ̀ nynɛ̌ iě u̍h-a bɛ̌ɛ mɔ̀ wɔ̍ɔ̍n i̍, iě ɛ̍ po̍ mɔ̀-a wlùh dě de̍ i̍ dǒ dɛ̍ u̍h-a sà-a we̍. Jɛ u̍h se̍ ɛ̍ dě à wɔ̍ɔ̍n dǔ i̍ o.

²⁵ Ɛ̍ kɔn à kli̍hgbɛ̍ à wɔ̌n à iě nyɔ̍ sà, u̍h ke à tìh kma nyɔ̍ Banaba ke Pɔɔ iě dě mɔ̀ we̍ ji̍.

²⁶ Ùh tè-a u̍h-a feɛ tɔ̀ma̍a̍ dǒ à Joi Jusu Klai-a tìh we̍-ɛ, u̍h bo à mu̍ dbo̍.

²⁷ Ɛ̍ tìh-ɛ, ɛ̀ kɔn taǐn à chlǐh-a nɔ̌ chlǐh-dɛ̍ la di̍i̍-ɛ, Juda ke Sale bo à dbo̍ ùh iě ɛ̍ mɔ̀ wlùh sèàɛ̍ dě wɔ̍ɔ̍n.

²⁸ À ke Nyɔsoa-a Sùù ke à wɔ̌ɛn ɛ̍ kɛ̍n i̍, nyɔ̍-ɔ je̍e mɔ̀ gbɛ̀ dɛɛ dlǔ i̍ tè dǒ ìh la à po̍-a tu̍i̍-ɛ de̍e̍.

²⁹ Di̍-dɛ̍ u̍h sà-ɛa slaǎ dǒ kwɛ̍i̍n gbo̍ᵻ we̍-ɛ, nɛ̀ mɔ̀ bɔ̌ ɛ̍ di̍-ɛ. Nmi̍ɛ̍ jǎ-a nymɔ̍ i̍-ɛ, mɔ̀ bɔ̌ ɛ̍ di̍-ɛ. Mɔ̀ bɔ̌ nymɔ̍ di̍-ɛ ke, mɔ̀ tǎli gbǎn nu̍ dɛ i̍. Pò mɔ̀ bɔ̌ ìh la-a, nɛ̀ mɔ̀-a mu̍ dɛ̍ chɛ̀ nu̍. Mɔ̀ à iě jiěe dɛ o.”

³⁰ Wɛ̀ u̍h dǔ nyɔ̍ laa̍ dbo̍-ɛ, iě u̍h mu̍ dǒ Antiɔ. Wɛ̀ u̍h gbòe chɔchi̍h nyɔ̍ kli̍hgbɛ̍ i̍. Iě u̍h sà chlǐh-dɛ̍ laa̍ kwlǎ dě u̍h we̍.

³¹ Wɛ̀ u̍h slè ɛ̍. Sɔ nyɔ̍ gbǐh ku̍u̍ po̍ wlu̍ nɛ-a dě ɛ̍ di̍i̍-ɛ, ɛ̍ po̍ u̍h mɔna̍-a kaa̍.

³² Iě Juda ke Sale ùh kɔn chɛ̀ nu̍-a Nyɔsoa-a tu̍owli po̍ nyɔ̍-ɛ, wɛ̀ u̍h bla̍ wlu̍ dɔu dě de̍di̍i̍ᵻ laa̍ we̍ ɛ̍ iě u̍h-a wlùh fùka, wɛ̀ gbǐh iě u̍h ku̍u̍ gbǎ.

³³ Wɛ̀ u̍h sì ti̍ gbɔ̍ dǒ de̍di̍i̍ᵻ laa̍ we̍, iě u̍h sà u̍h sɔ̍n kɛ̍n u̍h iě dě de̍ juh dbo̍-a u̍h-ɛ we̍ mu̍ pɛlɛpɛ. [

³⁴ Jɛ Sale po̍ ɛ̍ gbɔ̀ ɔ̍ iě-e sie.]

³⁵ Wɛ̀ Pɔɔ ke Banaba nɛ dǒ Antiɔ, iě u̍h ke nyɔ̍ dɔu duuh-a po̍ nǎ, u̍h-a bla̍ Joi-a tìh.

Pɔɔ ke Banaba sèàɛ̍ kɛ̍n

³⁶ Ti̍ gbɔ̍ sì-aɛ, wɛ̀ Pɔɔ la̍a̍ dě Banaba we̍, “De̍di̍i̍ᵻ kɔn we̍ à bla̍-ɛa Joi-a tìh-ɛ, à mu̍ de̍ à iě u̍h we̍ wlɔ̀ᵻ di̍i̍ i̍ na due due, à iě jě pò ka u̍h nɛ wɛ̀ kɔ̌ɔ.”

³⁷ Sɔ Banaba-a pɔ̀n u̍h ke Chɔɔn Maɛ iě mu̍.

³⁸ Jɛ ɛ̍ se̍ dě Pɔɔ di̍i̍ i̍ sǐi, dɛ̍nu̍ɛ, u̍h-a dbo̍ se̍ dlǔ i̍ chlà wɛ̀ ɔ̍ si̍e̍ u̍h dě Panfelia fɔɔ.

³⁹ Wɛ̀ u̍h sà wɔ̍ɔ̍n i̍ flǐn, ɛ̍ bo ɛ̀ sèàɛ̍ u̍h kɛ̍n. Wɛ̀ Banaba dǔ Chɔɔn Maɛ, iě u̍h jii blǎgbè di̍i̍ u̍h mu̍ Saiplɔ bloa̍ kɛ̍n.

⁴⁰ Wɛ̀ Pɔɔ klɛ̀ɛ̀n Sale ɔ̍ ke ɔ̍ iě na. Iě de̍di̍i̍ᵻ po̍ u̍h dě Joi kwa̍a̍ dǒ ɔ̍ blɛ nɛ-ɛ we̍. Iě Pɔɔ mu̍,

⁴¹ ɔ̍ jii Siwlia ke Selesia fɔɔ, iě ɔ̍ dǔ chɔchi̍h nyɔ̍ nɛ-a deě-ɛ ja̍i̍.