Nu̍-dɛ̍ᵻ 12 - Ku̍o̍ Delee 1999

Ɛlo-a jě-e chɔchi̍h klě

¹ Dǒ ti̍ laa̍ di̍i̍ bo Blǔh Baa Ɛlo tè-e chɔchi̍h-a nyɔ̍ duuh klě jě-eɛ gbɔ̀.

² Wɛ̀ ɔ̍ dbǎ-ɛ Chɔɔn de̍di̍i̍ Chiin plàn chlɛ̀n i̍.

³ Ɔ̍ gbɛ̀n-a ɛ̍ ja̍-a, nɛ̀ ɛ̍ tè-e Juu nyɔ̍-a wlùh i̍, ɛ̍ kɔn ɔ̍ gbɛ̍n Pitɛ ke. Nɛ̀ ɛ̍ nu̍ Se̍ Fù Blèe̍-a Peě tù ti̍.

⁴ Ɔ̍ gbɛ̍n-a Pitɛ-ɛ, wɛ̀ ɔ̍ po̍ ɔ̍ kasoo. Iě ɔ̍ sà fledlǔ nyìɛ̍-a gbɔ̍ᵻ nyìɛ̍. Wɛ̀ ɔ̍ po̍ Pitɛ dě u̍h kwa̍a̍ u̍h iě ɔ̍ jlǐhɛ̍ we̍ tù. Ɛlo-a chɛ̍n di̍i̍chì pò Sììkɛ̍n-a Peě chlà-a, ɔ̍ iě Pitɛ dǒ gbaɛ̍we̍ gba̍, wɛ̀ ɔ̍ iě sàwi̍h sì.

⁵ Sɔ u̍h tè-e Pitɛ dě kasoo i̍ wɛ̀ sǔh. Jɛ nɛ̀ kǎ chɔchi̍h nyɔ̍-a po̍-e gbǐh u̍h-a ba̍le Nyɔsoa dǒ ɔ̍ tàà.

Pitɛ-a kasoo sɔ-ɛ

⁶ Wlù weɛ̍ kɔn di̍i̍ Ɛlo-a mu̍-a Pitɛ sɔ̀n sǐ-i de ɔ̍ iě-a sàwi̍h sì-ɛ, nɛ̀ u̍h sa̍n-ɛ ɔ̍ jɔɔdbǔᵻ sɔɔ̌n iě ɔ̍ mɔ̌ dǒ fledlǔ sɔɔ̌n nynɛ̌ we̍. Nɛ̀ fledlǔ duuh nyna i̍ dǒ kasoo gbò-a gbàɛ̍gbà wɔ̍i̍n u̍h-a tù ɛ̍ jlǐhɛ̍.

⁷ Kli-a ka-a, nɛ̀ Joi-a ǐnchɔ̀ wlǔh-ie wɛ̀. Sɔ dě kasoo-a chɛ̀ nɛ plòu̍n sǔh. Iě ɛ̍ bla̍ Pitɛ kɛ̍n i̍ ɛ̍ la̍a̍, “Tèwe ìè bloɔ̍ sɔ.” Iě jɔɔdbǔᵻ chɛn Pitɛ sɔ̍nᵻ i̍.

⁸ Wɛ̀ ǐnchɔ̀ la̍a̍ dě ɔ̍ we̍, “Pa̍ dɛ̍-ɛ ìè àn bu̍hdih bu̍h-u po̍.” Wɛ̀ Pitɛ nu̍ i̍h. Ɛ̍ la̍a̍, “Dǔ àn plɛ̀i̍-i ìè ɛ̍ we̍ tù, nɛ̀ ìn wɔ̀ dǒ ǐn de̍e̍.”

⁹ Pitɛ wɔ̀ dǒ ɛ̍ de̍e̍ wɛ̀ u̍h sǐ sɔ̀n. Jɛ ìh kli̍hgbɛ̍ Nyɔsoa-a ǐnchɔ̀-a nu̍-a dǒ ɔ̍ we̍-ɛ, ɔ̍ se̍ i̍h tìh chɛ̀ dǎɛ. Ɔ̍ jajeɛ̍ se̍ mɔ̌ ja̍ bo ɔ̍ ja de.

¹⁰ Wɛ̀ ɛ̍ ke Pitɛ sì kasoo fuo nyɔ̍-a gbɔ̍ᵻ sɔɔ̌n jii̍, iě u̍h jɛɛ nɛ̍ne̍ɛ̍ gbàɛ̍gbà-a wɔ̍n ɛ̀ bǐi-a dě wlɔ̀ i̍-ɛ. Wɛ̀ ɛ̍ chɛ̀ pɔ̀ni iě u̍h sǐ sɔ̀n. U̍h na wlɔ̀gbàɛ̀ wìè we̍ chɛ̀gbɛɛ, kli-a ka-a nɛ̀ ǐnchɔ̀ mǎ-ɛ ɔ̍ jlǐh wɛ̀.

¹¹ Wɛ̀ Pitɛ ji̍ ɔ̍ chɛ̀ we̍, iě ɔ̍ la̍a̍, “Jɛwɛ̀ ǐn juo-o dɛ̍ i̍. Joi dbo̍ ǐnchɔ̀ iě ɛ̍ sèìe m dě Ɛlo kwa̍a̍ ɛ̍ ke dɛ̍ᵻ kli̍hgbɛ̍ ìh kɔn tìh Juu nyɔ̍ gbàɛ̀-a ìh iě-a ǐn jii̍ nɛ de-ɛ ke.”

¹² Ɔ̍ juo-ao dɛ̍ i̍ wɛ̀-ɛ, wɛ̀ ɔ̍ mu̍ dě Chɔɔn Maɛ de̍ Mɛle blǐ gbò. Nɛ̀ dě nyɔ̍ dɔu nɛ u̍h-a ba̍le Nyɔsoa.

¹³ Wɛ̀ Pitɛ bla̍ gbaba jɛ wɔ̀-a dě sɔ̀n-ɛ. Iě nynɔ̌gbaɔ jǔ ɔ̀ nu̍-a pòi̍ju-ɛ, wɛ̀ ɔ̍ mu̍ ɔ̍ iě gbò wɔ̍i̍n pɔ̀ni. Ɔ̍ nynɛ̌ bo Wloda.

¹⁴ Sɔ ɔ̍ juo Pitɛ-a wlu̍ i̍, ɛ̍ mɔna̍ sìì ɔ̍ wìè-ɛ, iě ɔ̍ se̍ gbò wɔ̍i̍n pɔ̀ni wɛ̀ ɔ̍ gba̍ ple̍-ɛ dě de̍ gbò. Iě ɔ̍ sà i̍h ka Pitɛ nɛ-a dǒ gbò wɔ̍i̍n-ɛ.

¹⁵ Iě u̍h la̍a̍ dě ɔ̍ we̍, “Se̍na̍-a nu̍ m̀.” Jɛ ɔ̍ wɔ̍n nɛ kankǎn kleǐn, ɔ̍ la̍ ɔ̍ se̍ si̍h tmɔ̌. Wɛ̀ u̍h la̍a̍, “Iě nɛ̀ ɔ̍ sùù bo lě.”

¹⁶ Jɛ nɛ̀ kǎ Pitɛ-a bla̍ gbaba sǔh, wɛ̀ u̍h pɔ̀ni dǒ gbò wɔ̍i̍n. U̍h nu̍-a ka-a, nɛ̀ mɔ̀ Pitɛ, sɔ ɛ̍ wlǔh i̍ u̍h de̍e̍.

¹⁷ Wɛ̀ Pitɛ po̍ sɔ̍n u̍h iě slɛ̀ ja̍ sà. Iě ɔ̍ sèàɛ̍ ɛ̍ we̍ i̍ ka Joi nu̍-a ɔ̍ dě kasoo sà sɔɛn-ɛ. Ɔ̍ la̍a̍, “Mɔ̀ poe ɛ̍ Chiin ke de̍di̍i̍ᵻ duuh sie-a dǒ de̍-ɛ kunǎ ke.” Wɛ̀ ɔ̍ sɔ dǒ u̍h we̍-e iě ɔ̍ mu̍ tàdɔ̀ɔ̀.

¹⁸ Sɔ̀n sɛ̀n-aɛ, sɔ ɛ̍ ja wɔ̍ɔ̍n i̍ bɛ̌-ɛ dǒ fledlǔ-a sǔh nynɛ̌.

¹⁹ Ɛlo sà nyɔ̍ iě u̍h pɔ̀n Pitɛ i̍, jɛ u̍h se̍ ɔ̍ jě. Wɛ̀ fledlǔ ùh-a fuo-a kasoo gbò-ɛ, iě ɔ̍ chlɛ̌ u̍h wɔ̍ɔ̍n i̍. Wɛ̀ ɔ̍ po̍ nyɔ̍ slǔh u̍h iě fledlǔ laa̍ dbǎ. Ɛ̍ sì-a i̍ wɛ̀-ɛ, iě Ɛlo mu̍ dě Judia fɔɔ, wɛ̀ ɔ̍ nu̍ wǐh gbɔ̍ dǒ Sɛsewlia.

Kǎ Ɛlo nu̍ ka mɛ̌-ɛ

²⁰ Ɛ̍ ti̍ laa̍ nɛ̀ Blǔh Baa Ɛlo gbǎ-ɛ Taiɛ ke Saidɔn wlɔ̀ᵻá nyɔ̍ jlu̍h. Wɛ̀ u̍h bla̍ɛ we̍ iě u̍h mu̍ ɔ̍ ba̍le la̍. Jɛ Blaaslɔ ɔ̀ nu̍-a Ɛlo-a jlǐhɛ̍-ɛ, dě ɔ̍ ja̍a̍ bo u̍h jii wɛ̀ u̍h dǔ dě Ɛlo we̍ mu̍-ɛɛ. Iě u̍h-a ba̍le sàǎsà iě dǒ ɔ̍ ke u̍h nynɛ̌ we̍ sɔ, dɛ̍nu̍ɛ, dě ɔ̍ bloa̍ kɛ̍n bo u̍h-a di̍-dɛ̍ᵻá sɔ-ɔ.

²¹ Dǒ weɛ̍ u̍h chɛ̍n-aɛ di̍i̍ wɛ̀ Ɛlo dǔ ɔ̍ blǔh baa jliɛ̍-ɛ iě ɔ̍ pa̍ ɛ̍-ɛ. Wɛ̀ ɔ̍ tè i̍ dǒ ɔ̍ nynɛ̌ gbalǎ kɛ̍n. Wɛ̀ ɔ̍ wlu dě nyɔ̍ɔ we̍.

²² Nɛ̀ u̍h-a wǐi i̍, u̍h la̍a̍, “Jɔ̍gbau la nɔ̀ɔ̍, à nyɔsoa due bo wɛ̀, ɔ̍ se̍ wlɔ̀ nyi̍ɔ̍-a wlu̍ blě dɛ.”

²³ Dǒ tàdùè laa̍ Joi-a ǐnchɔ̀ tù ɔ̍ wɛ̌, dɛ̍nu̍ɛ, ɔ̍ se̍ Nyɔsoa dɛ̍ɛ̍ jě. Wɛ̀ samɔᵻ di̍ ɔ̍, iě ɔ̍ mɛ̌.

²⁴ Jɛ Nyɔsoa-a wlu̍ nɔ̀ɔ̍, ɛ̍ pàɛ̀n nya̍ iě ɛ̍ sɛ̍ i̍.

²⁵ Wɛ̀ Banaba ke Sɔɔ wɔ̀ u̍h-a dbo̍ i̍, iě u̍h dǔ dǒ Juluslɛn sɔ-ɛɛ. U̍h wɔ̌an mu̍-u tìh-ɛ, u̍h gba̍ Chɔɔn Maɛ.