Nu̍-dɛ̍ᵻ 11 - Ku̍o̍ Delee 1999

Pitɛ po̍ Juluslɛn chɔchi̍h kunǎ

¹ Jusu-a gba̍tòà ke de̍di̍i̍ᵻ kli̍hgbɛ̍ nɛ-a dě Judia fɔɔ-ɛ, u̍h wɔ̌n i̍h ka ùh se̍-a Juu nyɔ̍-ɛ u̍h gbɛ̍n-a Nyɔsoa-a wlu̍ i̍ wɛ̀ ke̍-ɛ.

² Nyɔ̍ ùh tba̍-a plɔ̀n gbǎ dɛ bu̍hᵻ de̍e̍ i̍-ɛ, ti̍ Pitɛ mu̍-a dǒ Juluslɛn-ɛ, sɔ u̍h-a po̍ la̍ ɔ̍ pàwe̍i̍ sǔh.

³ U̍h la̍a̍, “Mɔ̀ bo ɔ̀ paɛ dě se̍ plɔ̀n gbǎ nyɔ̍ blǐ gbò iě u̍h ke àn gbo̍a̍ɛ sɔ̍n jǔ ae?”

⁴ Wɛ̀ Pitɛ dǔ wlu̍-u iě ka ɛ̍ nu̍-a nɛ-ɛɛ, wɛ̀ ɔ̍ sèàɛ̍ ɛ̍ we̍ i̍ dě u̍h we̍.

⁵ Ɔ̍ la̍a̍, “Ǐn nɛ dǒ ba̍le la̍ dǒ Jɔɔpa wlɔ̀ di̍i̍ wɛ̀ ǐn ja se̍ mɔ̌ ja̍. Dǒ ǐn jě-e dɛ̍ nɛ̀ ɛ̍ wɔ̀ jliɛ̍ klaa, wɛ̀ dɛ̍ gbɛ̍n ɛ̍ wɔ̍nᵻ gbaᵻ nyìɛ̍ i̍ wɛ̀ ɛ̍ sɔ dě ja̍u̍n we̍ iě ɛ̍ ji̍ nɔ̌ bloɔ̍ dǒ tà ǐn tè-a i̍-ɛ.

⁶ Iě ǐn gbɛ̀n dě ɛ̍ di̍i̍, wɛ̀ ǐn jě-e wlɔ̀ nmi̍i̍ ke kwlǎ nmi̍i̍ ke pɛ̀lɛ̌ naɛ nmi̍i̍ ke na̍wɛ̍ᵻ.

⁷ Dǒ-o bo ǐn wɔ̌n-ɛ wlu̍, ɛ̍ la̍a̍, ‘Pitɛ, sɔ bloɔ̍, dbǎ i̍h-a dɛ̍ ìè di̍.’

⁸ Wɛ̀ na̍a̍, ‘Joi, sakǒ o, dɛ̍ᵻ ìh nyni-a dě Nyɔsoa jlǐh i̍-ɛ ke ìh se̍-a nɛi̍ wɛ̀-ɛ i̍h-a dɛ̍-ɛ se̍a dě ǐn wɔ̍ɔ̍n gbǎ sàǐtòò.’

⁹ Wlu̍ laa̍ ɛ̍ sɔ dě ja̍i̍wlɔ̀ dɛ dode̍ ɛ̍ la̍a̍, ‘Pò dɛ̍ nmɔ dě Nyɔsoa jlǐh i̍-ɛ, nɛ̀ ìn bɔ̌ ɛ̍ jii̍ nyni dɛ dǎɛ.’

¹⁰ Ɛ̍ kɔn gbɔ̍ᵻ ta̍a̍n bo ɛ̍ nu̍, wɛ̀ i̍h kli̍hgbɛ̍ dǔ-u chlì-ɛ dě de̍ ja̍u̍n we̍.

¹¹ Dǒ tàdùè laa̍ jɔ̍gbauᵻ ta̍a̍n u̍h dbo̍-a dě ǐn we̍ ùh sɔ-a dǒ Sɛsewlia-a, nɛ̀ u̍h-a nyni̍ dǒ gbò kɔn di̍i̍ ǐn koe-aɛ.

¹² Wɛ̀ Nyɔsoa-a Sùù sèàɛ̍ ǐn wlùh nɛ̌ je̍e-o wlu̍ tba̍, u̍h ke ǐn ke à iě mu̍. De̍di̍i̍ᵻ mɛ̀o̍ la u̍h bo ùh gba̍ m̍, iě à pa̍ dě jɔ̍gbau laa̍ blǐ gbò.

¹³ Wɛ̀ ɔ̍ sèàɛ̍ àɔ̀ wlùh ka ɔ̍ jě-a Nyɔsoa-a ǐnchɔ̀ dě ɔ̍ blǐ gbò, iě ɛ̍ la̍a̍, ‘Dbo̍ nyɔ̍ Jɔɔpa u̍h iě Samo ɔ̀ kɔn nynɛ̌ diih nu̍-a Pitɛ-ɛ dǎ la̍ mu̍.

¹⁴ Wlu̍ ɔ̍ mu̍-a bla̍ dě ìn we̍-ɛ, ɛ̍ bo ìn ke àn chɛ̌ kli̍hgbɛ̍-a mu̍-u jii wɛ̀ mɔ̀ iě pǔh.’

¹⁵ Ti̍ ǐn tè-a wlu-ɛ gbɔ̀-ɛ, ɛ̀ kɔn taǐn Nyɔsoa-a Sùù nu̍-a àɔ̀ kɛ̍n gbǎ-a tɛin-ɛ, kǎ ɛ̍ nu̍ u̍h kɛ̍n gbǎ-a ke.

¹⁶ Dɛ̍ Joi bla̍-aɛ, sɔ ɛ̍ sǐ dǒ ǐn wlì i̍. Ɔ̍ la̍a̍, ‘Chɔɔn nɔ̀ɔ̍, nǐ bo ɔ̍ poe nyɔ̍ nǐ dlǔ, jɛ mɔ̀ɔ̍ nɔ̀ɔ̍, Nyɔsoa-a Sùù bo ɛ̀ mu̍ nǐ nu̍ mɔ̀ iě dlǔ po̍.’

¹⁷ Ti̍ à gbaɛ-a Joi Jusu Klai wlùh-ɛ, nyǐ-dɛ̍ kɔn taǐn Nyɔsoa nyǐ-a àɔ̀-ɛ, pò ɔ̍ nyǐ ɛ̍ u̍h ke-ɛ, nɛ̀ mɔ̍ɔ ǎn nynɛ̌-ɛ wɛ̀ iě ɔ̍ bɔ̌ i̍ po̍ ɛ?”

¹⁸ U̍h wɔ̌n-a wlu̍ la-a, sɔ ɛ̍ po̍ u̍h su̍e̍ wɔ̍i̍n. Iě u̍h-a po̍ Nyɔsoa tìhwe̍, u̍h la̍a̍, “Iě nɛ̀ Nyɔsoa nyǐ ùh se̍-a Juu nyɔ̍-ɛ flɔna̍ wɛ̀ ke, pò u̍h bǐi i̍-ɛ u̍h iě kmɔ̌ nɛ.”

Chɔchi̍h tè-ɛ gbɔ̀ dě Antiɔ

¹⁹ Klě jě-ɛ ɛ̀ dbǎ-a Slifɛn-ɛ, Nyɔsoa nyɔ̍ ùh gbà-a ja̍i̍ dǒ ɛ̍ ti̍ laa̍ we̍-ɛ, u̍h-a duuh mu̍ dě Fɔnisia blǔh ke, Saiplɔ blǔh ke dǒ Antiɔ wlɔ̀ di̍i̍. Jɛ nɛ̀ dě Juu nyɔ̍ nɛ due we̍ bo u̍h-a po̍-e Nyɔsoa-a tu̍owli.

²⁰ Jɛ gbɔ̀gbɔ̀-ɛ, jɔ̍gbauᵻ ùh nu̍-a Nyɔsoa nyɔ̍ ùh sɔ-a Saiplɔ ke dǒ Saiwlein-ɛ, u̍h nɔ̀ɔ̍, u̍h mu̍ dǒ Antiɔ wlɔ̀ di̍i̍ iě u̍h bla̍ tìh ke dě ùh se̍-a Juu nyɔ̍-ɛ we̍. Pɔ̀n chɛ̀ ɛ̀ tba̍-a dǒ Joi Jusu pùn i̍-ɛ, ɛ̍ bo u̍h-a sèàɛ̍ u̍h wlùh.

²¹ Sɔ Joi po̍ u̍h gbǐh we̍, wɛ̀ nyɔ̍ tlùgbei̍ blě wlùh gbaɛ-ɛ, iě u̍h fèàɛ̀ dě Joi we̍.

²² Ɛ̍ pɔ̀n laa̍ bo ɛ̀ nyni̍ chɔchi̍h nɛ-a dě Juluslɛn wlɔ̀-ɛ we̍. Wɛ̀ u̍h dbo̍ Banaba dě Antiɔ-a chɛ̀.

²³ Ti̍ ɔ̍ nyni̍-a deě-ɛ, dǒ ɔ̍ jě-e ɛ̍ ka Nyɔsoa nu̍-a blɛ nɛ-ɛɛ. Sɔ ɛ̍ po̍ ɔ̍ mɔna̍, iě ɔ̍ gbɛ̍n-ɛ nyɔ̍ laa̍ wɔ̍i̍n u̍h iě Joi dɛ kɛ̍n nɛ dǒ u̍h-a pɔluh kli̍hgbɛ̍ we̍.

²⁴ Banaba nu̍ nyɔ̍ chɛ̀, iě Nyɔsoa-a Sùù ke wlùh gbaɛ-ɛ jǐ dě ɔ̍ ku̍u̍. Ɛ̍ nu̍ ɛ̍ nyɔ̍ tlùgbei̍ ji̍ Joi we̍.

²⁵ Wɛ̀ Banaba mu̍ Sɔɔ i̍ pɔ̀n la̍ dě Tasɔ wlɔ̀ di̍i̍.

²⁶ Ti̍ ɔ̍ jě-a Sɔɔ-ɛ, wɛ̀ ɔ̍ ja ɔ̍ Antiɔ. Iě u̍h dǔ sɔ̀n gbàǐ dǒ u̍h ke chɔchi̍h-a tàdùè gbǎ-a we̍, iě u̍h po̍ nyɔ̍ dɔu nǎ. Dě Antiɔ laa̍ bo u̍h sàɛ̀ Jusu-a kòà Klai nyɔ̍ dǎɛ-ɛ i̍.

²⁷ Dǒ ti̍ laa̍ di̍i̍ bo Nyɔsoa-a tu̍owli po̍ nyɔ̍ duuh sɔ-ɛ dǒ Juluslɛn u̍h ji̍ dǒ Antiɔ.

²⁸ U̍h-a due ɔ̀ kɔn nynɛ̌ nu̍-a Akeba-ɛ, wɛ̀ ɔ̍ nyna i̍. Iě ɔ̍ po̍ gbànwli dě Nyɔsoa-a Sùù-a gbǐh di̍i̍ ka mɔ̌-a mu̍-a ji̍ dǒ blǔh kli̍hgbɛ̍ kɛ̍n-ɛ. (Ti̍ Kladiɔ blě-a blǔh-ɛ, dǒ mɔ̌-a chɛ̀ gbǎ-ɛ.)

²⁹ Wɛ̀ Jusu-a kòà kli̍hgbɛ̍ po̍ wlu̍ gbɔ̀ dɛ̍ jɔ bɛ̌ɛ-a sà-aɛ, ɔ̍ iě ɛ̍ sà. Wɛ̀ i̍h iě de̍di̍i̍ᵻ nɛ-a dě Judia fɔɔ-ɛ we̍ mu̍.

³⁰ Ɛ̍ bo u̍h nu̍, iě u̍h nyǐ sà-dɛ̍ᵻá chɛ̀ Banaba ke Sɔɔ. Iě u̍h gba̍ i̍h chɔchi̍h-a nyɔ̍ klaaᵻ nɛ-a dě Judia-a.