Nu̍-dɛ̍ᵻ 10 - Ku̍o̍ Delee 1999

Kɔleniɔ tu̍o Pitɛ ɔ̍ iě ji̍

¹ Jɔ̍gbau due nɛ-a dǒ Sɛsewlia wlɔ̀ di̍i̍-ɛ, ɔ̍ nynɛ̌ bo Kɔleniɔ. Ɔ̍ nu̍ fledlǔ-a klu̍gbòu̍-a chape, iě u̍h-a dǎɛ ɛ̍ Etele fledlǔ-a klu̍gbòu̍.

² Ɔ̍ sìì Nyɔsoa dɛ we̍, wɛ̀ ɔ̍ ke ɔ̍ chɛ̌ kli̍hgbɛ̍-a ple̍ Nyɔsoa-a faɔn. Ɔ̍ nmɔ-a wlùh dǒ nyɔ̍ɔ we̍-ɛ, ɛ̍ se̍ dɛ̍ka nɛ. Iě ɔ̍-ɔ fɔ-ɛ Nyɔsoa ba̍le-ɛ we̍ i̍.

³ Jlǔh te̍le i̍ chɛ̀gbɛɛ dǒ weɛ̍ due di̍i̍ wɛ̀ ɔ̍ ja se̍ mɔ̌ ja̍. Ɔ̍ jě Nyɔsoa-a ǐnchɔ̀ te̍gbe̍i̍n ɛ̍ pa̍ dě ɔ̍ we̍ gbò, ɛ̍ la̍a̍, “Kɔleniɔ.”

⁴ Kɔleniɔ gbɛ̀n-a ɛ̍ ja̍-a, sɔ ɔ̍ ple̍ faɔn, iě ɔ̍ la̍a̍, “Joi, dɛ̍ bo ɛ?” Ǐnchɔ̀ la̍a̍, “Àn ba̍le wlu̍ ke wlùh nmɔ dbo̍ nyni̍ dě Nyɔsoa we̍ ja̍i̍ wɛ̀. Ɛ̍ tìh-ɛ, i̍h-a sǐ-i àn tìh dǒ ɔ̍ wlì i̍.

⁵ Nɛ̀ kaka la̍ dbo̍ nyɔ̍ Jɔɔpa u̍h iě Samo bola̍a̍ mu̍, ɔ̍ nynɛ̌ diih bo Pitɛ.

⁶ Samo ɔ̀ nu̍-a dɛ̍ᵻ ku̍ᵻ nma̍le nyɔ̍ ɔ̀ tǐn-a dě jbǒ wɔ̍i̍n-ɛ, ɔ̍ bo Pitɛ koe blǐ.”

⁷ Nyɔsoa-a ǐnchɔ̀ wɔ̀-a dě ɔ̍ we̍ wlu-ɛɛ, iě ɛ̍ mu̍. Wɛ̀ Kɔleniɔ dǎ ɔ̍ pòi̍nynuu̍ sɔɔ̌n. Iě ɔ̍ fledlǔ due ɔ̀ sìì-a Nyɔsoa dɛ we̍ dě ɔ̍ fledlǔ ùh-a gbɛ̀n-a dǒ ɔ̍ we̍ i̍-ɛ nynɛ̌-ɛ, wɛ̀ ɔ̍ dǎ ɔ̍ ke.

⁸ Iě ka ɛ̍ nu̍-a nɛ-ɛ kli̍hgbɛ̍-ɛ, wɛ̀ ɔ̍ sèàɛ̍ u̍h wlùh, iě ɔ̍ dǔ u̍h dǒ Jɔɔpa dbo̍-ɛ.

⁹ U̍h mu̍-aɛ, wɛ̀ u̍h pɛ̌n wìè-i. Sɔ̀n sɛ̀n-aɛ, iě u̍h dǔ wìè-e, u̍h kɔǎɛn wlɔ̀ i̍ wɛ̀ sǔh, wɛ̀ Pitɛ jǎ dě gbò pɛ̍lɛ dlǔ i̍ kɛ̍n jlǔhgbàɔ̀ ɔ̍ iě Nyɔsoa ba̍le.

¹⁰ Sɔ mɔ̌-a nu̍ ɔ̍ la̍-ɛ, iě ɔ̍ pɔ̀n dɛ̍ di̍-ɛ i̍. Jɛ u̍h nɛ dǒ ɔ̍ di̍-dɛ̍-a chɛ̀ gba̍a̍ po̍ la̍ sǔh, wɛ̀ ɔ̍ ja se̍ mɔ̌ ja̍.

¹¹ Wɛ̀ ɔ̍ jě ja̍u̍n ɛ̍ pɔ̀ni wɔ̍i̍n, iě dɛ̍ wɔ̀ jliɛ̍ klaa ɛ̍ sɔ dě ja̍u̍n di̍i̍. Nɛ̀ ɛ̍ wɔ̍nᵻ gbaᵻ nɛ-a nyìɛ̍-ɛ, i̍h gbɛ̍n-ɛ ɛ̍ i̍ iě ɛ̍ tlìh ɛ̍ ji̍ nɔ̌ bloɔ̍.

¹² Nɛ̀ nmi̍i̍ kaɛn kaɛn nɛ dě ɛ̍ di̍i̍, pɛ̀lɛ̌ naɛ nmi̍i̍ ke na̍wɛ̍ᵻ.

¹³ Dǒ ɔ̍ wɔ̌n-ɛ wlu̍, ɛ̍ la̍a̍, “Pitɛ, sɔ bloɔ̍, dbǎ i̍h-a dɛ̍ ìè di̍.”

¹⁴ Jɛ Pitɛ la̍a̍, “Joi, sakǒ o, nɛ̌ se̍a dɛ̍-o-dɛ̍ ɛ̀ nyni-a dě Nyɔsoa jlǐh i̍-ɛ ke ɛ̀ se̍-a nɛi̍ wɛ̀-ɛ di̍ sàǐtòò.”

¹⁵ Wlu̍ laa̍ iě ɛ̍ wlu dɛ, ɛ̍ la̍a̍, “Pò dɛ̍ nmɔ dě Nyɔsoa jlǐh i̍-ɛ, nɛ̀ ìn bɔ̌ ɛ̍ jii̍ nyni dɛ̍ dǎɛ.”

¹⁶ Ɛ̍ kɔn gbɔ̍ᵻ ta̍a̍n bo ɛ̍ nu̍, iě dɛ̍-a chɛ̀ dǔ de̍ ja̍u̍n we̍ gba̍-ɛ.

¹⁷ Ja̍ laa̍ ɛ̍ gbɔ̀ bo Pitɛ nɛ-o i̍ pɔ̀n la̍-a sǔh wɛ̀ jɔ̍gbauᵻ ùh Kɔleniɔ dbo̍-aɛ, iě u̍h juo tà Samo-a gbò nyna-a i̍-ɛ. Wɛ̀ u̍h mu̍ dǒ ɛ̍ gbàɛ̍gbà wɔ̍ɔ̍n u̍h nyna i̍.

¹⁸ Wɛ̀ u̍h dǎ, iě u̍h tèle tìh i̍, pò Samo ɔ̀ kɔn nynɛ̌ diih nu̍-a Pitɛ-ɛ, dǒ ɔ̍ koe kɔ̌ɔ.

¹⁹ Dǒ ja̍ laa̍ wlùh i̍ naɛ la̍ bo Pitɛ nɛ, wɛ̀ Nyɔsoa-a Sùù la̍a̍ dě ɔ̍ we̍, “Gbɛ̀n-e, jɔ̍gbauᵻ ta̍a̍n-a pɔ̀n ìn i̍.

²⁰ Ɛ̍ tìh-ɛ, sɔ bloɔ̍ ìè tlìh, nɛ̀ ìn bɔ̌-o wlu̍ tba̍-a u̍h ke ìè mu̍. Dɛ̍nu̍ɛ, mɔ̍ bo ɔ̀ dbo̍ u̍h.”

²¹ Wɛ̀ Pitɛ tlìh, iě ɔ̍ la̍a̍ dě u̍h we̍, “Mɔ̍ mɔ̀-a pɔ̀n-a i̍-ɛ, mɔ̍ la. Dɛ̍ɛ tìh mɔ̀ ji̍ we̍ ɛ?”

²² U̍h la̍a̍, “Chape Kɔleniɔ bo ɔ̀ dbo̍ àɔ̀. Ɔ̍ nmɔ gblɛ̍n-ɛ, iě ɔ̍ ple̍ Nyɔsoa-a faɔn. Ɛ̍ tìh-ɛ, Juu nyɔ̍ kli̍hgbɛ̍-a jě ɔ̍ dɛ̍ɛ̍. Wɛ̀ Nyɔsoa-a ǐnchɔ̀ sèàɛ̍ ɔ̍ wlùh ɔ̍ iě ìn dǎ dě ɔ̍ blǐ gbò, dɛ̍ ìn blě-a ìè-a sà-a, ɔ̍ iě ɛ̍ dounᵻ we̍ po̍.”

²³ Wɛ̀ Pitɛ paɛ u̍h gbò, iě u̍h pɛ̌n-o. Sɔ̀n sɛ̀n-aɛ, wɛ̀ ɔ̍ ke u̍h mu̍, ɛ̍ ke de̍di̍i̍ᵻ duuh sɔ-a Jɔɔpa-a ke.

²⁴ U̍h pɛ̌n wìè-i. Sɔ̀n sɛ̀n-aɛ, wɛ̀ u̍h dǔ dǒ Sɛsewlia nyni̍-ɛ. Nɛ̀ Kɔleniɔ dǎ ɔ̍ wloa̍ nyɔ̍ ke ɔ̍ jbɛɛ nyɔ̍ kli̍hgbɛ̍, iě u̍h-a gbɛ̀n dě ɔ̍ we̍ wìè-i.

²⁵ Pitɛ naɛ àn pa̍ dě gbò-ɛ, Kɔleniɔ jǎɛ ɔ̍ i̍, wɛ̀ ɔ̍ chlìi i̍ gbìi̍i dǒ ɔ̍ jǔ.

²⁶ Jɛ Pitɛ sà ɔ̍ bloɔ̍, iě ɔ̍ la̍a̍, “Sɔ-ɔ ìè i̍ nyna, dɛ̍nu̍ɛ, ǎn chɛ̀ la mɔ̍ wlɔ̀ nyi̍ɔ̍ fɔɔ ke.”

²⁷ U̍h-a pa̍-a dě gbò-ɛ, nɛ̀ kǎ Pitɛ-a wlu dě ɔ̍ we̍ sǔh. Pitɛ nu̍-a ka-a nɛ̀ nyɔ̍ dɔu wèla i̍.

²⁸ Wɛ̀ Pitɛ la̍a̍ dě u̍h we̍, “Mɔ̀-a chɛ̀ juo ɛ̍-ɛ gbàkla̍a̍, ɛ̍ nu̍ telě àɔ̀ nu̍-a Juu-ɛ, à ke ùh se̍-a Juu nyɔ̍-ɛ ke à-a nɛ̍aɛ we̍ wɛ̀ à iě dě u̍h we̍-a chɛ̀ i̍ nala mu̍. Jɛ Nyɔsoa to ɛ̍-ɛ ka ǐn se̍-a kɔn iě-a nyɔ̍-o-nyɔ̍ dě Nyɔsoa jlǐh i̍ nyni nyɔ̍ ke nɛi̍ nɛ nyɔ̍ dǎɛ-ɛ.

²⁹ Ɛ̍ kɔn tìh mɔ̀ dbo̍-a ǐn wlu̍ we̍-ɛ, wɛ̀ ǐn se̍-o wlu̍ tba̍ dǒ ji̍ la̍. À wɔ̌n-e la̍, dɛ̍ kɔn tìh mɔ̀ dǎ m̌ ɛ?”

³⁰ Wɛ̀ Kɔleniɔ la̍a̍, “Sɛ̀ɛ̀n klààwa̍, nɛ̀ kǎ ti̍ nɛ ka, iě ǎn ba̍le Nyɔsoa dě ǐn blǐ gbò, nɛ̀ jlǔh te̍le i̍ wɛ̀. Iě-a kèle-ɛ nɛ̀ jɔ̍gbau due pa̍ jlii̍ plǔᵻ wɛ̀ ɔ̍ nyna i̍ dǒ ǐn jǔ.

³¹ Iě ɔ̍ la̍a̍, ‘Kɔleniɔ, Nyɔsoa wɔ̌n àn ba̍le wlu̍ wɛ̀, iě àn wlùh nmɔ tìh sǐ dǒ ɔ̍ wlì i̍.

³² Ɛ̍ tìh-ɛ, dbo̍ nyɔ̍ Jɔɔpa u̍h iě Samo ɔ̀ kɔn nynɛ̌ diih nu̍-a Pitɛ-ɛ dǎ la̍ mu̍. Samo ɔ̀ nu̍-a dɛ̍ᵻ ku̍ᵻ nma̍le nyɔ̍ ɔ̀ tǐn-a dě jbǒ wɔ̍i̍n-ɛ, ɔ̍ bo ɔ̍ koe blǐ.’

³³ Ɛ̍ kɔn tìh ǐn nyna-o wɛ̀ ǐn dbo̍ ìn wlu̍ we̍, iě àn gblɛ̍n chɛ̀ ja m̀. Kaka la̍, à kli̍hgbɛ̍ à nɛ da̍a Nyɔsoa jǔ wɛ̀. À po̍ dě ìn we̍ dounᵻ dɛ̍ Joi-a mu̍-a dě ìn wɔ̍ɔ̍n po̍-ɛ, ìè ɛ̍-ɛ sà dě àɔ̀ we̍.”

Nyɔsoa se̍-e nyɔ̍-ɔ i̍ chlɛ̌

³⁴ Wɛ̀ Pitɛ dǔ wlu̍-u, ɔ̍ la̍a̍, “Ka Nyɔsoa se̍-ae nyɔ̍-ɔ i̍ chlɛ̌ da̍a kmɔ̌ la we̍-ɛ, tìh-a taǐn bo, jɛwɛ̀ ǐn juo i̍h.

³⁵ Bloa̍ kli̍hgbɛ̍ kɛ̍n i̍ nyɔ̍-o-nyɔ̍ ɔ̀ ple̍-a Nyɔsoa-a faɔn wɛ̀ ɔ̍ nu̍-dɛ̍ iě i̍ slɛ̌-ɛ, nɛ̀ Nyɔsoa wɔ̌ɛn ɔ̍ tìh i̍ wɛ̀.

³⁶ Mɔ̀ juo tu̍owli ɔ̍ dbo̍-a dě Eslɔɛ nyɔ̍ we̍-ɛ, nyɔ̍-a wlùh i̍ tè-e pɔ̀n chɛ̀ la Jusu Klai ɔ̀ nu̍-a nyɔ̍ kli̍hgbɛ̍-a Joi-ɛ, dě ɔ̍ ja̍a̍ bo ɔ̍ jii wɛ̀ ɔ̍ bla̍ ɛ̍ we̍i̍.

³⁷ Ti̍ Chɔɔn wɔ̀-a nǐ dlǔ po̍ tìh bla̍-aɛ, dɛ̍ ɛ̀ nɛ-a dě Judia bloa̍ kli̍hgbɛ̍ kɛ̍n-ɛ, mɔ̀ juo ɛ̍-ɛ. Dě Kaladii bo ɛ̍ tè-e gbɔ̀.

³⁸ Jusu ɔ̀ sɔ-a dǒ Naaslɔɛ-ɛ, Nyɔsoa po̍ ɔ̍ Sùù dě ɔ̍ ku̍u̍, wɛ̀ ɔ̍ nyǐ ɔ̍ gbǐh. Ɛ̍ kɔn pò ɔ̍ mu̍ tàjɛ̀-ɛ, nɛ̀ ɔ̍ nu̍ dɛ̍ chɛ̀ iě ɔ̍ pǔh-i nyɔ̍ ùh Kǔ sìì-a wɔ̍n-ɛ, dɛ̍nu̍ɛ, Nyɔsoa-a naɛ ɔ̍ sɔ̍nᵻ we̍ i̍.

³⁹ Dɛ̍ᵻ kli̍hgbɛ̍ ɔ̍ nu̍-a dě Juu nyɔ̍-a bloa̍ kɛ̍n i̍ ke dǒ Juluslɛn wlɔ̀ di̍i̍-ɛ, àɔ̀ bo à nu̍ i̍h-a sàànsi̍i̍h. U̍h wɔ̌an ɔ̍ dbǎ-a tìh-ɛ, dǒ gbàɛ̍ kɛ̍n i̍ tu̍ wlì bo u̍h kɔ̍-ɛ ɔ̍.

⁴⁰ Jɛ wǐh ta̍a̍n sì-aɛ wɛ̀ Nyɔsoa sà ɔ̍-e, iě ɔ̍ nu̍ ɛ̍ wɛ̀ nyɔ̍ gba̍ ɔ̍ jlǐhɛ̍ pùn.

⁴¹ Ɛ̍ se̍ nyɔ̍ kli̍hgbɛ̍ ùh se̍ ɔ̍ jě, jɛ àɔ̀ Nyɔsoa tba̍-a chèɛ̀ à iě-a sàànsi̍i̍h nu̍-ɛ, àɔ̀ bo à jě ɔ̍. Ɔ̍ ke à di̍ dɛ̍ iě à nǎ-ɛ kàu̍n due di̍i̍.

⁴² Iě ɔ̍ po̍ àɔ̀ slǔh à iě tìh bla̍ dě nyɔ̍ɔ we̍. Wɛ̀ à iě ɛ̍ we̍i̍ flɔn-ɛ ka ɔ̍ bo Nyɔsoa tba̍-a chèɛ̀ ɔ̀ iě-a mɛ̌-nyɔ̍ ke kmɔ̌ nɛ nyɔ̍-a sàwi̍h sì nyɔ̍ nu̍-ɛ.

⁴³ Nyɔsoa-a tu̍owli po̍ nyɔ̍ kli̍hgbɛ̍ sà ɔ̍ we̍ tìh i̍. U̍h la̍ nyɔ̍ jɔ mu̍-a ɔ̍ wlùh gbaɛ-ɛ, nɛ̀ ɔ̍ gblɛ̍n sɔ̀ɛ̀n-a tìh-a mu̍ i̍ tǎli-ɛ dǒ ɔ̍ nynɛ̌ kɛ̍n.”

Ùh se̍-a Juu nyɔ̍-ɛ u̍h jě Nyɔsoa-a Sùù

⁴⁴ Pitɛ nɛ dǒ wlu la̍ sǔh, wɛ̀ nyɔ̍ ùh-a po̍-a dě ɔ̍ wlu̍ laa̍ we̍ dounᵻɛ́ iě Nyɔsoa-a Sùù gbǎ u̍h kɛ̍n.

⁴⁵ Juu-a wlùh gbaɛ-ɛ blě nyɔ̍ ùh ke Pitɛ na-aɛ, sɔ ɛ̍ wlǔh i̍ u̍h de̍e̍ wɛ̀ Sùù ɛ̀ nu̍-a Nyɔsoa-a nyǐ-dɛ̍-ɛ, ɛ̍ iě ka ùh se̍-a Juu nyɔ̍-ɛ kɛ̍n gbǎ ke.

⁴⁶ Nɛ̀ kǎ u̍h-a po̍ wlu̍ diih iě u̍h-a po̍ Nyɔsoa tìhwe̍ u̍h-a wɔ̌n i̍h. Wɛ̀ Pitɛ la̍a̍,

⁴⁷ “Ɛ̀ kɔn taǐn à nu̍-a Nyɔsoa-a Sùù jě-ɛɛ, ɛ̍ bo nyɔ̍ la u̍h nu̍ wɛ̀ ke. Nyɔ̍we̍ bo ɔ̀ bɛ̌ɛ ka u̍h nǐ dlǔ po̍ wìè-i sà-a ɛ?”

⁴⁸ Wɛ̀ ɔ̍ sà u̍h wlu̍ kɛ̍n u̍h iě nǐ dlǔ po̍ dǒ Jusu Klai-a nynɛ̌ kɛ̍n. Wɛ̀ u̍h sà Pitɛ wìè-i ɔ̍ iě dǒ u̍h we̍ wǐh gbɔ̍ sì.