Pɔ̀n Chɛ̀ Maɛ To-a La 6 - Ku̍o̍ Delee 1999

Naaslɔɛ nyɔ̍ se̍ Jusu jě-ɛ jbǎ

¹ Wɛ̀ Jusu sɔ dě tà-a chɛ̀, iě ɔ̍ ke ɔ̍ kòà mu̍ dě de̍ ɔ̍ blǐ wlɔ̀.

² Dǒ Juu-a wlè-weɛ̍ di̍i̍, wɛ̀ ɔ̍ tè nyɔ̍ nǎ po̍-ɛ gbɔ̀ dě wɛɛ sà gbò sɔ̀n. Nyɔ̍ dɔu ùh wɔ̌n-a ɔ̍ wlu̍-ɛ, sɔ ɛ̍ wlǔh i̍ u̍h de̍e̍. Wɛ̀ u̍h la̍a̍, “Tà ɔ̍ sà ìh kli̍hgbɛ̍ la ɛ? Nyɔ̍ nyǐ ɔ̍ flɔ̍nwlùh la iě ɔ̍ blě ɛ̍ ɛ? Tà ɔ̍ sà ɔ̍ naɛ gbǐh wɛ̀ ɔ̍ nu̍ la̍a̍n jbaɛdih po̍-ɛ ɛ?

³ Ɛ̍ se̍ Mɛle-a jǔ ɔ̀ nu̍-a kɔ̍-nyɔ̍, ɔ̀ kɔn de̍di̍i̍ᵻ nu̍-a Chiin ke, Josɛ ke, Juda ke Samo-ɛ ae? Ɔ̀ kɔn de̍di̍i̍ᵻ nynɔ̌gbaɔᵻ tǐn-a da̍a à we̍-ɛ, ɛ̍ se̍ ɔ̍ mɔ ae?” Sɔ u̍h se̍ ɔ̍ jě-ɛ jbǎ.

⁴ Wɛ̀ Jusu wlu dě u̍h we̍, ɔ̍ la̍a̍, “U̍h-a tè Nyɔsoa-a tu̍owli po̍ nyɔ̍ ja̍ tà kli̍hgbɛ̍. Jɛ dǒ ɔ̍ blǐ wlɔ̀ ke, ɔ̍ wloa̍ nyɔ̍ ke dě ɔ̍ blǐ gbò nyɔ̍ gbài̍ bo u̍h-u tè ɔ̍ ja̍.”

⁵ Sɔ ɔ̍ se̍-o jbaɛdih chɛ̀ poe, jɛ wɛ̌ᵻ nyɔ̍ gbɔ̍ bo ɔ̍ tè sɔ̍n dlǔ sǔh, wɛ̀ u̍h pǔh.

⁶ U̍h-a nu̍-dɛ̍ wlǔh i̍ ɔ̍ de̍e̍, dɛ̍nu̍ɛ, u̍h se̍ wlùh gbaɛ blě. Wɛ̀ Jusu mu̍ wlɔ̀ᵻ diih di̍i̍ i̍, dě ɔ̍ poe nyɔ̍ nǎ.

Jusu dbo̍ kòà-a pùè jɔ̌ sɔɔ̌n

⁷ Wɛ̀ ɔ̍ dǎ ɔ̍ kòà-a pùè jɔ̌ sɔɔ̌n laa̍ dǒ ɔ̍ we̍, iě ɔ̍ dbo̍ u̍h-a sɔɔ̌n sɔɔ̌n. Wɛ̀ ɔ̍ nyǐ u̍h gbǐh u̍h iě nyɔ̍ jeědih de̍e̍ i̍ sà.

⁸ Wɛ̀ ɔ̍ tè u̍h telě i̍, ɔ̍ la̍a̍, “Kɔu̍ due gbài̍ mɔ̀ iě gba̍, jɛ mɔ̀ bɔ̌ dɛ̍ dɛɛ gba̍-a. Mɔ̀ bɔ̌ di̍-dɛ̍ gba̍-a, mɔ̀ bɔ̌ gbèèkǔ gba̍-a. Mɔ̀ bɔ̌ wlǐ dě mɔ̀-a fànti̍gbli di̍i̍ po̍-ɛ.

⁹ Mɔ̀ po̍-e bu̍hdih, jɛ mɔ̀ bɔ̌ wola̍ sie gbɔ̍i̍ gba̍-a.

¹⁰ Pò mɔ̀ sǐ dǒ wlɔ̀ di̍i̍-ɛ, gbò kɔn di̍i̍ mɔ̀-a mu̍-a paɛ-ɛ, mɔ̀ bɔ̌-e chlà-a wɛ̀ mɔ̀ iě dǒ wlɔ̀ laa̍ di̍i̍ sɔ.

¹¹ Pò mɔ̀ sǐ dǒ wlɔ̀ di̍i̍ i̍, wɛ̀ nyɔ̍ nɛ-a dǒ ɛ̍ di̍i̍-ɛ, u̍h se̍ mɔ̀-a tìh i̍ gbɛ̍n àe̍e̍ u̍h se̍ mɔ̀ dounᵻ we̍ po̍-ɛ, nɛ̀ mɔ̀ chɛ̍n-o tìè. Mɔ̀ ja-o sɔ-ɛ, nɛ̀ mɔ̀ gbàbo blǔh bu̍hᵻ sɔ̀n i̍. Nɛ̀ nyɔ̍ nɛ-a dǒ wlɔ̀ laa̍ di̍i̍-ɛ, u̍h-a mu̍ ɛ̍ i̍ jě.”

¹² Wɛ̀ u̍h mu̍ iě u̍h bla̍ Nyɔsoa tìh nyɔ̍gbei iě gblɛ̍n sɔ̀ɛ̀n nu̍-ɛ i̍ tǎli.

¹³ Wɛ̀ u̍h sà nyɔ̍ jeědih dɔu de̍e̍ i̍. Iě u̍h tli̍ wɛ̌ᵻ nyɔ̍ chlǎn i̍, wɛ̀ u̍h pǔh.

Kǎ Chɔɔn ɔ̀ po̍-a nyɔ̍ nǐ dlǔ-ɛ nu̍ ka mɛ̌-ɛ

¹⁴ Sɔ dɛ̍ Jusu-a nynɛ̌-a nu̍-a la̍ mu̍-ɛɛ, i̍h bo Blǔh Baa Ɛlo wɔ̌n. Nyɔ̍ duuh la̍a̍, “Chɔɔn ɔ̀ po̍-a nyɔ̍ nǐ dlǔ-ɛ bo ɔ̀ wlǔh-e, ɛ̍ kɔn ɔ̍ blě gbǐh iě ɔ̍ po̍ jbaɛdih.”

¹⁵ Duuh la̍a̍, “Ilaɛja bo.” Iě duuh la̍a̍, “Ìn jě ɔ̍-ɛ, nɛ̀ nàa̍ Nyɔsoa-a tu̍owli po̍ nyɔ̍ nɛ-a tɛin-ɛ, u̍h-a due bo.”

¹⁶ I̍h-i laa̍ bo Ɛlo wɔ̌n, wɛ̀ ɔ̍ la̍a̍, “Iě Chɔɔn ɔ̀ ǐn dbǎ-a tɛin-ɛ, nɛ̀ ɔ̍ bo ɔ̀ wlǔh-e wɛ̀ lě.”

^17-18 Ɛ̀ kɔn tìh Ɛlo bla̍-a dɛ̍ la-ɛ, ɔ̍ bo ɔ̀ gbɛ̍n Chɔɔn tɛin Ɛlodia tìh. Ɛlodia ɔ̀ nu̍-a Ɛlo deǐ Felɔ-a nynɔ̌-ɛ, ɔ̍ bo Ɛlo sà Felɔ kwa̍a̍. Wɛ̀ Chɔɔn la̍ nɛ̀ ɛ̍ se̍ i̍ slɛ̌ Ɛlo iě ɔ̍ deǐ nynɔ̌ kwa̍a̍ sà. Ɛ̍ kɔn tìh Ɛlo dbo̍ nyɔ̍ wɛ̀ u̍h gbɛ̍n Chɔɔn wɛ̀ u̍h sa̍n ɔ̍, iě u̍h po̍ ɔ̍ kasoo.

¹⁹ Sɔ Ɛlodia blě-e Chɔɔn di̍i̍ i̍ wɛ̀ sǔh, iě ɔ̍ pɔ̀n ɔ̍ dbǎ-a i̍. Jɛ nɛ̀ ɔ̍-ɔ jě ɛ̍ ka̍,

²⁰ dɛ̍nu̍ɛ, Ɛlo-a ple̍ Chɔɔn jǔ. Ɔ̍ juo ɛ̍-ɛ, Chɔɔn se̍ nɛi̍ nɛ, wɛ̀ ɔ̍ slɛ̌ i̍, ɛ̍ kɔn ɔ̍ nu̍ ɔ̍ sɛ̍sɛ̍. Pò ɔ̍ wɔ̌n Chɔɔn-a wlu̍-ɛ, nɛ̀ ɛ̍ nui ɔ̍ sèò, jɛ ɔ̍ wlu̍ bo ɛ̀ po̍ ɔ̍ gbǐh.

²¹ Jɛ bɔ̌ɛ-aoɛ, sɔ Ɛlodia jě jii la̍. Kǎ ɔ̍ nu̍ ka jii la̍ jě-ɛ. Ɛ̍ nu̍ ti̍ due wɛ̀ Ɛlo dǎ peě dǒ ɔ̍ wlǔh ti̍ we̍. Wɛ̀ ɔ̍ dǎ ɔ̍ dbo̍ sɔ̀n nui nyɔ̍ klaaᵻ ke, fledlǔ-a klaaᵻ. Ɛ̍ ke seǐnynuu̍ kli̍hgbɛ̍ nɛ-a dǒ Kaladii bloa̍ kɛ̍n-ɛ ke. Wɛ̀ ɔ̍ tù peě laa̍.

²² Iě Ɛlodia-a jǔ nynɔ̌gbaɔ ji̍ iě ɔ̍ de̍le. Sɔ ɛ̍ po̍ Ɛlo ke ɔ̍ dihwi̍hᵻ pɔluh di̍i̍ kaa̍. Wɛ̀ Blǔh Baa Ɛlo la̍a̍ dě ɔ̍ we̍, “Dɛ̍ àn pɔ̀n-aɛ, sǐ ɛ̍ nynɛ̌ dě ǐn we̍, nɛ̀ ǎn mu̍ ɛ̍ ìn nyǐ.”

²³ Dǒ ɔ̍ poe wlu̍ tɔ̀ma̍a̍ dě ɔ̍ we̍, ɔ̍ la̍a̍, “Dɛ̍ àn mu̍-a ǐn jbǎ-ɛɛ, ǎn mu̍ ɛ̍ ìn nyǐ. Ɛ̍ jɛ tù ǎn bloa̍-a fɔ̌-ɛ, ǎn mu̍ ɛ̍ ìn nyǐ.”

²⁴ Wɛ̀ nynɔ̌gbaɔ jǔ sǐ sɔ̀n, iě ɔ̍ tèle ɔ̍ de̍ i̍. Ɔ̍ la̍a̍, “Dɛ̍ iě jbǎ ɛ?” Ɔ̍ de̍ la̍a̍, “Chɔɔn-a dlǔ bo ìè jbǎ.”

²⁵ Iě nynɔ̌gbaɔ jǔ laa̍ ɔ̍ gba̍ ple̍-ɛ dě de̍ blǔh baa we̍, ɔ̍ la̍a̍, “Chɔɔn ɔ̀ po̍-a nyɔ̍ nǐ dlǔ-ɛ, ǎn pɔ̀n ìè ɔ̍ dlǔ dě plɛ̌ɛ di̍i̍ po̍ kaka ìè ɛ̍ ǐn nyǐ.”

²⁶ Sɔ ɛ̍ po̍ blǔh baa-a wlùh dě de̍i̍ kaa̍, jɛ ɔ̍ se̍ dlǔ fùna-a bɛ̌ɛ, dɛ̍nu̍ɛ, ɔ̍ po̍ wlu̍ tɔ̀ma̍a̍ dǒ ɔ̍ dihwi̍hᵻ jlǐhwai.

²⁷ Wɛ̀ ɔ̍ nyna-o ɔ̍ dbo̍ fledlǔ dě kasoo ɔ̍ iě Chɔɔn-a dlǔ ja. Wɛ̀ ɔ̍ mu̍ iě ɔ̍ chɛ̍n Chɔɔn dlǔ i̍ dě kasoo.

²⁸ Wɛ̀ ɔ̍ blě-e ɛ̍ dě plɛ̌ɛ di̍i̍, iě ɔ̍ nyǐ ɛ̍ nynɔ̌gbaɔ jǔ, iě nynɔ̌gbaɔ jǔ nyǐ ɛ̍ ɔ̍ de̍.

²⁹ Chɔɔn-a kòà wɔ̀n-a ɔ̍ mɛ̌ɛ tìh-ɛ, wɛ̀ u̍h ji̍ ɔ̍ ku̍ bola̍a̍, iě u̍h tè ɔ̍ i̍.

Jusu nyǐ jɔ̍gbauᵻá wlǔ m̀m̌ di̍-dɛ̍

³⁰ Jusu-a gba̍tòà laa̍ u̍h ji̍-a de̍-ɛ, wɛ̀ dɛ̍ᵻ u̍h poe-a nyɔ̍ nǎ-a ke, u̍h nu̍-a kwa̍a̍ i̍-ɛ, iě u̍h po̍ i̍h-a kunǎ kli̍hgbɛ̍ dě ɔ̍ we̍.

³¹ Jɛ dɛ̍ nyɔ̍gbei-a nu̍-a mu̍-ɔn ji̍-ɔn nu̍-ɛɛ, sɔ Jusu ke ɔ̍ kòà-a jě dɛ̍ di̍ ka̍. Wɛ̀ ɔ̍ la̍a̍ dě u̍h we̍, “Mɔ̀ ji̍ à iě mu̍, à sǔh iě gbɔ̍i̍ chɛn wɛ̀ à iě dɛ̍wɛ fɔ.”

³² Iě u̍h-a sǔh gbǎ dě blǎgbè di̍i̍, wɛ̀ u̍h-a mu̍ tà chɛn-a gbɔ̍i̍-ɛ.

³³ Jɛ nyɔ̍ dɔu juo Jusu ke ɔ̍ kòà i̍ dǒ u̍h-a mu̍ la̍. Wɛ̀ nyɔ̍ɔ sɔ wlɔ̀ᵻ kli̍hgbɛ̍ di̍i̍ i̍, iě u̍h blě bloɔ̍ i̍ na-a u̍h gba̍ ple̍-ɛ, wɛ̀ u̍h chɛ̍n u̍h jǔ.

³⁴ Jusu sɔ-a dě blǎgbè di̍i̍ ɔ̍ sǐ-a sɔ̀n-ɛ, nɛ̀ u̍h dlɛɛ i̍ wɛ̀ tlɛ̀ngbɛ̀ɛ̀n, wɛ̀ ɔ̍ jě u̍h. Sɔ ɛ̍ po̍ ɔ̍ wɔɛ kaa̍, dɛ̍nu̍ɛ, u̍h wɔ̀ blawɛ̌ᵻ ìh se̍-a dǒ we̍ i̍ gbɛ̀n nyɔ̍ kɔn-ɛ. Sɔ ɔ̍ po̍ la̍ u̍h nǎ dǒ dɛ̍ᵻ dɔu we̍ sǔh.

³⁵ Ti̍ jlǔh-a pɛ̌n-a la̍ tu̍ᵻ i̍-ɛ, wɛ̀ ɔ̍ kòà mu̍ dǒ ɔ̍ we̍, iě u̍h la̍a̍, “Nɔ̍ɔ̀ la nɔ̌ tɛn-ɛ, wɛ̀ jlǔh la ɛ̍ pɛ̌n tu̍ᵻ i̍ wɛ̀.

³⁶ Sèàɛ̍ nyɔ̍ la wlùh u̍h iě wlɔ̀ᵻ ke gbùlòᵻ nɛ-a da̍a gbɔ̍ɔ̍-ɛ sɔ̀n i̍ mu̍, wɛ̀ u̍h iě di̍-dɛ̍ᵻ tɛ̀n dǒ u̍h-a chɛ̀ we̍ u̍h iě di̍.”

³⁷ Iě Jusu la̍a̍, “Mɔ̀-a chɛ̀ nyǐ u̍h dɛ̍ u̍h iě di̍.” Ɔ̍ kòà la̍a̍, “Tà à mu̍ sebla̍ wlǐ-a kmɛ sɔɔ̌n (200) sà, wɛ̀ à iě blèe̍ tɛ̀n dǒ nyɔ̍ tlùgbei̍ la we̍ u̍h iě di̍ ɛ?”

³⁸ Wɛ̀ ɔ̍ la̍a̍, “Blèe̍ gba̍nᵻ tìèwe̍ mɔ̀ blě ɛ? Mɔ̀ mu̍ mɔ̀ iě i̍h jě.” U̍h jě-a i̍h-ɛ, iě u̍h la̍a̍, “À blě gba̍nᵻ m̀m̌ ke smìi̍ sɔɔ̌n.”

³⁹ Wɛ̀ ɔ̍ sèàɛ̍ ɔ̍ kòà wlùh u̍h iě ɛ̍ nu̍ nyɔ̍ laa̍ u̍h-a pǔnᵻ pǔnᵻ iě i̍ tìèe̍ dǒ pei kɛ̍n.

⁴⁰ Wɛ̀ u̍h tìèe̍ i̍ nmɔ jii̍. U̍h-a pǔnᵻ diih blě nyɔ̍-a kmɛ, nɛ̀ diih blě kwela m̀m̌.

⁴¹ Wɛ̀ Jusu dǔ blèe̍ gba̍nᵻ m̀m̌ ke smìi̍ sɔɔ̌n laa̍, iě ɔ̍ gbɛ̀n dě ja̍i̍, wɛ̀ ɔ̍ po̍ Nyɔsoa tlɔ̌. Iě ɔ̍ chɛɛn blèe̍ laa̍ i̍, wɛ̀ ɔ̍ nyǐ i̍h ɔ̍ kòà u̍h iě i̍h nyɔ̍ laa̍ jii̍ gblè. Kǎ ɔ̍ nu̍ u̍h kli̍hgbɛ̍ smìi̍ laa̍ jii̍ gblè-ɛ ke.

⁴² Nyɔ̍ kli̍hgbɛ̍ di̍ dɛ̍ wɛ̀ u̍h dbo̍.

⁴³ U̍h wɔ̀-aɛ, iě ɔ̍ kòà tɛ̌n blèe̍ ke smìi̍ chɛblih sie-a i̍-ɛ, wɛ̀ i̍h jǐ taaᵻá pùè jɔ̌ sɔɔ̌n.

⁴⁴ Nyɔ̍ ùh di̍-a dɛ̍-ɛ, u̍h nu̍ jɔ̍gbauᵻá wlǔ m̀m̌ (5,000).

Jusu na nǐ kɛ̍n i̍

⁴⁵ Dǒ Jusu nyna ɔ̍ po̍ ɔ̍ kòà dě blǎgbè di̍i̍ u̍h iě ɔ̍ jǔ mu̍ dǒ Bɛseida wlɔ̀ di̍i̍ dě pɛ̍nu̍ klaa-a fɔ̌ dɛɛ we̍. Nɛ̀ kǎ ɔ̍ sèàɛ̍ nyɔ̍ tlùgbei̍ laa̍ wlùh u̍h iě de̍ i̍ mu̍.

⁴⁶ Ɔ̍ wɔ̀-a u̍h wlǎ wlì i̍ po̍-ɛɛ, wɛ̀ ɔ̍ mu̍ ba̍le la̍ dě tlu̍h kɛ̍n.

⁴⁷ Wlù iě-a wɔ̀-ɛ, nɛ̀ blǎgbè nɛ dě nǐ wèa̍ wɛ̀, wɛ̀ Jusu nɛ due nɛ dě tlu̍h kɛ̍n.

⁴⁸ Ɔ̍ juo-o dɛ̍ i̍ ka ɔ̍ kòà-a jě-a tìh-ɛ, dɛ̍nu̍ɛ, tà u̍h-a blǎgbè-a mui-aɛ, dě poɔ-a sɔ-ɛ, iě ɛ̍ du̍ u̍h-a blǎgbè we̍. Ɛ̍ ti̍ laa̍ nɛ̀ ɛ̍ nu̍ sɔ̀n wɔ̍i̍n wɛ̀. Iě Jusu blě nǐ kɛ̍n i̍ na-a ɔ̍ ji̍ u̍h jii̍ sì la̍.

⁴⁹ Wɛ̀ u̍h jě ɔ̍, nɛ̀ ɔ̍ na nǐ kɛ̍n i̍. Sɔ u̍h jajeɛ̍ kǔpàùn bo de, iě u̍h wǐ.

⁵⁰ Dɛ̍nu̍ɛ, dɛ̍ wa̍ u̍h kli̍hgbɛ̍ we̍. Jɛ Jusu tèwe ɔ̍ wlu, ɔ̍ la̍a̍, “Mɔ̀ dbǎ ku̍, mɔ̍ bo, mɔ̀ bɔ̌ faɔn ple̍-ɛ.”

⁵¹ Wɛ̀ ɔ̍ gbǎ dě u̍h we̍ blǎgbè di̍i̍, iě poɔ bɔ̌. Sɔ ɛ̍ flɔn-ɛ ɔ̍ kòà wɔ̍n kaa̍.

⁵² Dɛ̍nu̍ɛ, blèe̍ jɔ̍gbauᵻá wlǔ m̀m̌ (5,000) laa̍ u̍h di̍-aɛ, u̍h-u jě ɛ̍ flɔ̍nwlùh ke̍. Jɛ tìh-a dlɔ̍ dě u̍h dounᵻ dɛbo.

Jusu pǔh-i poa-nyɔ̍ dě Kɛnɛslɔɛ

⁵³ U̍h tàn-a nǐ-ɛ, dě Kɛnɛslɔɛ fɔɔ bo u̍h kɔ̍-ɛ gbuǔh. Wɛ̀ u̍h mɔɛ u̍h-a blǎgbè i̍.

⁵⁴ U̍h jǎ-a tlu̍h ka-a, sɔ nyɔ̍gbei juo Jusu i̍ sǔh.

⁵⁵ Wɛ̀ u̍h-a ple̍ wlɔ̀ᵻ gbàɛ̀ nɛ-a deě-ɛ we̍. Nɛ̀ pò u̍h wɔ̌n Jusu-a nynɛ̌ tà jɛ-ɛ, wɛ̀ u̍h-a blě-e wɛ̌ᵻ nyɔ̍ dě sabli̍ᵻ di̍i̍ u̍h-a gba̍ u̍h dě ɔ̍ we̍.

⁵⁶ Nɛ̀ pò Jusu mu̍ tà jɛ-ɛ, ɛ̍ tù dǒ wlɔ̀ jǔ di̍i̍ àe̍e̍ tùgbàwlɔ̀ di̍i̍ ke dǒ gbùlò sɔ̀n-ɛ, nɛ̀ nyɔ̍gbei-a gba̍ wɛ̌ᵻ nyɔ̍ dě dɔɔ̌ gbale̍e̍. Iě u̍h ba̍le ɔ̍, ɛ̍ tù ɔ̍ plɛ̀i̍-a mlǎ-a chɛ̀-ɛ, poa-nyɔ̍ iě ɛ̍ i̍ tǔh. Sɔ nyɔ̍ kli̍hgbɛ̍ ùh tǔh-a ɛ̍ i̍-ɛ, u̍h pǔh-i.