Pɔ̀n Chɛ̀ Maɛ To-a La 15 - Ku̍o̍ Delee 1999

Jusu nɛ dǒ Pale jǔ

¹ Ɛ̍ nu̍ klàɛ̍we̍ gbàìn wɛ̀ Nyɔsoa-a slaǎ sà nyɔ̍ klaaᵻ tèwe u̍h deǎɛ nyɔ̍ klaaᵻ ke, telě nǎ poe nyɔ̍ ke, taɔ kli̍hgbɛ̍, iě u̍h po̍ wlu̍ gbɔ̀. Iě u̍h sa̍n Jusu, wɛ̀ u̍h sǐ i̍ ɔ̍ sɔ̀n. Wɛ̀ u̍h sà ɔ̍ kwlǎ dě Pale we̍, ɔ̀ nu̍-a Wloma nyɔ̍-a kɔ̀mla̍-ɛ.

² Wɛ̀ Pale tèle Jusu i̍, ɔ̍ la̍a̍, “Mɔ̀ bo ɔ̀ nu̍ Juu nyɔ̍-a blǔh baa ae?” Jusu la̍a̍, “Mɔ̀ bo ɔ̀ dǎ laǎn.”

³ Wɛ̀ slaǎ sà nyɔ̍ klaaᵻ blaɛ Jusu tìh i̍ dɛ̍blɔ.

⁴ Wɛ̀ Pale tèle ɔ̍ i̍ dɛ, ɔ̍ la̍a̍, “Ìh kli̍hgbɛ̍ la u̍h-a blaɛ-a ìn i̍-ɛ, ìn se̍ u̍h-a wlu̍ pɔ̀n we̍ sà mu̍ ae?”

⁵ Jɛ Jusu se̍ ɔ̍ tɔ̍n-ɔ sà. Sɔ ɛ̍ wlǔh i̍ Pale de̍e̍.

Pale sà Jusu-a mɛ̌ɛ wlu̍ kɛ̍n

⁶ Pò ɛ̍ nu̍ Sììkɛ̍n-ɛ Peě-ɛ, nyɔ̍ u̍h-a pɔ̀n-a Pale iě-a sèìe dě kasoo-ɛ, nɛ̀ ɔ̍ bo ɔ̍ sèìe dǒ u̍h we̍. Ɛ̍ bo ɛ̀ nu̍ ɔ̍ tǐwai dɛ̍.

⁷ Ɛ̍ ti̍ laa̍ nɛ̀ kɔ̀mla̍ we̍ fɔ̀n nyɔ̍-a due ɔ̀ poe-a nyɔ̍ gbe̍ja̍a̍ dě u̍h-a slɛ̀ i̍ sà-a di̍i̍-ɛ, nɛ̀ ɔ̍ nɛ dě kasoo. Ɔ̍ nynɛ̌ bo Bawlaba.

⁸ Wɛ̀ nyɔ̍ tlùgbei̍ gbǎ tàdùè iě u̍h sèàɛ̍ kɔ̀mla̍ Pale wlùh ɔ̍ iě nyɔ̍ sèìe dǒ u̍h we̍, ɛ̀ ɔ̍ nu̍-a se̍e̍-ɛ.

⁹ Wɛ̀ ɔ̍ tèle u̍h i̍, ɔ̍ la̍a̍, “Mɔ̀-a pɔ̀n iě Juu nyɔ̍-a blǔh baa sèìe dǒ mɔ̀ we̍ ae?”

¹⁰ Ɔ̍ juo-o dɛ̍ i̍ ke kleǐn, wlɛ̀n bo ɛ̀ nu̍ ɛ̍ wɛ̀ Nyɔsoa-a slaǎ sà nyɔ̍ klaaᵻ sà Jusu kwlǎ dě ɔ̍ we̍.

¹¹ Sɔ u̍h pa̍ nyɔ̍ tlùgbei̍ sɔ̀n i̍ sǔh, u̍h iě Pale wlùh sèàɛ̍ ɔ̍ iě Bawlaba sèìe dǒ Jusu wɔ̀ɔ̀.

¹² Wɛ̀ Pale wlu dě u̍h we̍ dɛ, ɔ̍ la̍a̍, “Nɛ̀ jɔ mɔ̀-a dǎɛ-a Juu nyɔ̍-a blǔh baa-a, ka iě ɔ̍ tìh nu̍ ɛ?”

¹³ Iě u̍h sà slɛ̀ wɔ̍n, u̍h la̍a̍, “Kɔ̍ ɔ̍ dǒ gbàɛ̍ kɛ̍n i̍ tu̍ wlì.”

¹⁴ Wɛ̀ Pale tèle u̍h i̍, ɔ̍ la̍a̍, “Dɛ̍ ɛ? Dɛ̍ sɔ̀n we̍ ɔ̍ nu̍ ɛ?” Sɔ u̍h sà slɛ̀ wɔ̍n dɛ chɛ̀ɛ̌chɛ̀, u̍h la̍a̍, “Kɔ̍ ɔ̍ dǒ gbàɛ̍ kɛ̍n i̍ tu̍ wlì.”

¹⁵ Pale-a pɔ̀n nyɔ̍ tlùgbei̍ laa̍ u̍h-a wlùh i̍ pɛ̌n-ɛ i̍, ɛ̍ kɔn ɔ̍ sèìe Bawlaba dǒ u̍h we̍. Iě ɔ̍ sà nyɔ̍ wɛ̀ u̍h bla̍ Jusu. Wɛ̀ ɔ̍ dǔ ɔ̍ kwlǎ sà-a dě fledlǔ we̍ u̍h iě ɔ̍ dǒ gbàɛ̍ kɛ̍n i̍ tu̍ wlì kɔ̍-ɛ.

Fledlǔ nui Jusu jlii̍h kɛ̍n i̍

¹⁶ Wɛ̀ fledlǔ dǔ Jusu-u, iě u̍h gba̍ ɔ̍ dě kɔ̀mla̍ gbò-a bàɛ̍wɔɔn, wɛ̀ u̍h deǎɛ fledlǔ kli̍hgbɛ̍.

¹⁷ Wɛ̀ u̍h paɛ ɔ̍ dɛ̍wlo̍o̍ sàɛ̀n, iě u̍h dba̍ wiǎᵻá blawɛ̌, wɛ̀ u̍h tèè ɔ̍.

¹⁸ Sɔ u̍h-a gbàɛ̍ ɔ̍ la̍-ɛ sǔh. Nɛ̀ u̍h-a nu̍, “À tba̍ àn sɔ̍n o Juu nyɔ̍-a Blǔh Baa.”

¹⁹ Nɛ̀ u̍h-a bla̍-ɛ ɔ̍ tu̍ dlǔ, u̍h-a gbà ɔ̍ tɔ̍n, iě u̍h-a chlìi i̍ dǒ ɔ̍ jǔ.

²⁰ U̍h wɔ̀-a ɔ̍ jlii̍h kɛ̍n i̍ nui-ɛ, wɛ̀ u̍h sà ɔ̍ dɛ̍wlo̍o̍ laa̍ i̍. Iě u̍h paɛ ɔ̍ ɔ̍ chɛ̀-a jlii̍ dode̍. Wɛ̀ u̍h sǐ-i ɔ̍ sɔ̀n. Iě u̍h dǔ ɔ̍ dǒ gbàɛ̍ kɛ̍n i̍ tu̍ wlì kɔ̍ la̍ gba̍-a.

Jusu kɔ̍-ɛ dǒ gbàɛ̍ kɛ̍n i̍ tu̍ wlì

²¹ U̍h-a gba̍-a la̍ Jusu-ɛ, dǒ u̍h ke jɔ̍gbau due gbèɛ̀ɛ̍n, nɛ̀ ɔ̍ sɔ dǒ ɔ̍ blǐ wlɔ̀, dǒ Saiwlein. Ɔ̍ nynɛ̌ bo Samo. Ɛlesana ke Wlufɔ baa bo. Wɛ̀ fledlǔ nu̍ ɔ̍ kloǒ iě ɔ̍ gba̍ Jusu-a gbàɛ̍ kɛ̍n i̍ tu̍.

²² Iě u̍h gba̍ Jusu tà u̍h-a dǎɛ-a Kaokota-a, ɛ̍ gbɔ̀ nu̍ dlǔgba-a nɛ la̍.

²³ Kwɛ̍i̍n u̍h-a dǎɛ-a maa-ɛ, dǒ u̍h sìàɛ̍n ɛ̍ nmɔ̍ Jusu iě nǎ, jɛ ɔ̍ se̍ ɛ̍ i̍ gbɛ̍n.

²⁴ Wɛ̀ u̍h kɔ̍ ɔ̍ dǒ gbàɛ̍ kɛ̍n i̍ tu̍ wlì. Iě u̍h fɔ̀n nibo dǒ ɔ̍ jlii̍ gblè la̍, u̍h iě dɛ̍ jɔ-a mu̍-a gba̍-a juo.

²⁵ Klàɛ̍we̍ jlǔh-a ku̍ la̍ wɔ̍n sǔh wɛ̀ u̍h kɔ̍ ɔ̍.

²⁶ Dɛ̍ kɔn tìh u̍h kɔ̍-a ɔ̍-ɛ, kǎ u̍h nu̍ ka ɛ̍ chlǐh-ɛ, “Juu nyɔ̍-a Blǔh Baa la.”

²⁷ U̍h kɔ̍-ɛ ɔ̍ ke jlǐ-nyɔ̍ sɔɔ̌n tàdùè. Due nɛ dǒ ɔ̍ di̍na̍ we̍, iě dɔɔ nɛ dǒ ɔ̍ kwe̍na̍ we̍. [

²⁸ Ka ɛ̍ nɛ-a ka-ɛ, nɛ̀ Nyɔsoa-a wlu̍ nu̍ tìh-a taǐn. Wlu̍-a chɛ̀ la̍a̍, “U̍h-a slè-e ɔ̍ dɛ̍ᵻ sɔ̀nᵻ nu̍ nyɔ̍.”]

²⁹ Nɛ̀ sì-i nyɔ̍-a fùna dlǔ, iě u̍h-a chɛ̀ ɔ̍ we̍. U̍h la̍a̍, “Mɔ̀ ɔ̀ la̍ ɔ̀ mu̍-a Nyɔsoa-a slaǎ sà gbò wlǎ wɛ̀ ìè-a ɛ̍ po̍ dǒ wǐh ta̍a̍n di̍i̍-ɛ,

³⁰ sèìe àn chɛ̀ la̍, ìè dǒ gbàɛ̍ kɛ̍n i̍ tu̍ wlì sɔ.”

³¹ Kǎ Nyɔsoa-a slaǎ sà nyɔ̍ klaaᵻ ke telě nǎ poe nyɔ̍ nu̍ ɔ̍ jlii̍h kɛ̍n i̍ nui-ɛ ke. U̍h la̍a̍, “Ɔ̍ pǔh-i nyɔ̍ duuh, jɛ ɔ̍ se̍ ɔ̍ chɛ̀ pǔh-iɛ bɛ̌ɛ.

³² Ɔ̍ se̍ la̍ ɔ̍-ɔ Nyɔsoa-a Chèɛ̀ Tba̍ju ɔ̀ nu̍-a Eslɔɛ nyɔ̍-a blǔh baa ae? Ɔ̍ sɔ dǒ gbàɛ̍ kɛ̍n i̍ tu̍ wlì la ɔ̍ iě tlìh, nɛ̀ à mu̍ ɔ̍ tìh chɛ̀ po̍.” Ùh ke ɔ̍ kɔ̍-ɛa tàdùè-ɛ, kǎ u̍h nu̍ ɔ̍ we̍ chɛ̀-ɛ ke.

Jusu-a mɛ̌ɛ

³³ Jlǔh blaɛ dǒ wìè dlǔ i̍ sǔh, wɛ̀ kwile gbǎ dǒ blǔh kli̍hgbɛ̍-a chɛ̀ kɛ̍n. Kǎ ɛ̍ nɛ te̍e̍ wɛ̀ jlǔh te̍le i̍.

³⁴ Jlǔh te̍le-a i̍ wɛ̀-ɛ, wɛ̀ Jusu wǐ, ɔ̍ la̍a̍, “Ilɔɛ, Ilɔɛ, lama sabatani?” Ɛ̍ gbɔ̀ nu̍, “Ǎn Nyɔsoa, ǎn Nyɔsoa, dɛ̍nu̍ ìn sà ǐn jlǐhɛ̍ we̍ ɛ?”

³⁵ Nyɔ̍ ùh nyna-a doǒ i̍-ɛ, ti̍ u̍h wɔ̌n-a ɔ̍ wlu̍-ɛ, iě u̍h la̍a̍, “Mɔ̀ gbɛ̀n-e, ɔ̍ we̍le Ilaɛja wa.”

³⁶ Wɛ̀ u̍h-a due gba̍ ple̍-ɛ, iě ɔ̍ po̍ fuu̍ gba̍n nmɔ̍ i̍ iě ɔ̍ tù ɛ̍ tu̍ i̍, ɔ̍ te ɛ̍ Jusu i̍ ɔ̍ iě ɛ̍ nǎ. Ɔ̍ la̍a̍, “Mɔ̀ à chlì-o i̍ à iě jě, pò Ilaɛja-a mu̍ ji̍ ɔ̍ iě ɔ̍ dǒ gbàɛ̍ kɛ̍n i̍ tu̍ wlì sà kɔ̌ɔ.”

³⁷ Jɛ Jusu wǐ-a dode̍-ɛ, iě ɔ̍ chɛ̍n feɛ.

³⁸ Wɛ̀ jliɛ̍ ɛ̀ pèle-a dě Nyɔsoa-a slaǎ sà gbò-a gblǒ wɔ̍i̍n-ɛ, iě ɛ̍ gblè fɔ̌ᵻ sɔɔ̌n. Ɛ̍ sà fǎle-ɛ dě ɛ̍ dlǔ we̍ wɛ̀ ɛ̍ nyni̍ dě ɛ̍ gbɔ̀ we̍.

³⁹ Fledlǔ-a chape ɔ̀ bǐi-a dě Jusu we̍ i̍-ɛ, ɔ̍ jě ka Jusu nu̍-a feɛ chɛ̍n-ɛ. Iě ɔ̍ la̍a̍, “Jɔ̍gbau la, Nyɔsoa-a Jǔ bo chɛ̀.”

⁴⁰ Nɛ̀ nynɔ̌gbaɔᵻ duuh nynaɛ nya̍ u̍h-a gbɛ̀n dě u̍h we̍. Nɛ̀ Mɛle Makalin ke Mɛle ɔ̀ nu̍-a Chiin wɛ ke Jose de̍-ɛ, nɛ̀ u̍h nɛ dě u̍h nynɛ̌, ɛ̍ ke Salomi ke.

⁴¹ Ti̍ Jusu nɛ-a dě Kaladii fɔɔ-ɛ, nynɔ̌gbaɔᵻ laa̍ bo ùh-a na ɔ̍ we̍, iě u̍h-a tù ɔ̍ dɛ̍ dǒ sɛ̌ i̍. Nynɔ̌gbaɔᵻ dɔu duuh ùh gbǎ-a ɔ̍ de̍e̍ dǒ ɔ̍ Juluslɛn ji̍ la̍-ɛ, nɛ̀ u̍h nɛ-o ke.

Jusu-a i̍ tè-ɛ

⁴² Weɛ̍ ɛ̀ sì-ɛ wɛ̀ ɛ̍ nu̍-a wlè-weɛ̍-ɛ, ɛ̍ bo ɛ̀ nu̍ dɛ̍ᵻ gba̍a̍ po̍ weɛ̍. Dǒ ɛ̍ jlǔh-a tu̍ᵻ i̍ pɛ̌n la̍ bo

⁴³ jɔ̍gbau due u̍h-a dǎɛ-a Josɛ-ɛ ji̍-i, ɔ̍ sɔ dǒ Awlematia wlɔ̀ di̍i̍. Ɔ̍ nu̍ nyɔ̍ klaa ke dě taɔ pa̍ dɛ di̍i̍. Wɛ̀ ɔ̍ chɛ̀ ɔ̍ fuo Nyɔsoa-a kmɔ̌ wlu̍ i̍ kɔn-ɛa wìè dɛ ke. Ɔ̍ bo ɔ̀ bɛ̌ wlì i̍ wɛ̀ ɔ̍ mu̍ dě Pale we̍, iě ɔ̍ jbǎ Jusu-a kǔ.

⁴⁴ Sɔ ɛ̍ kèle Pale i̍ wɛ̀ ɔ̍ iě Jusu-a mɛ̌ɛ tìh wɔ̌n. Wɛ̀ ɔ̍ dǎ fledlǔ-a chape, iě ɔ̍ tèle ɔ̍ i̍ pò Jusu mɛ̌ wɛ̀ chɛ̀ kɔ̌ɔ.

⁴⁵ Ti̍ ɔ̍ wɔ̌n-a dě chape wɔ̍ɔ̍n i̍ wɛ̀-ɛ, wɛ̀ ɔ̍ wɔ̌n Josɛ iě kǔ laa̍ dǔ.

⁴⁶ Iě Josɛ tɛ̀n flɛmɛ̍ jliɛ̍, wɛ̀ ɔ̍ sà Jusu-a kǔ dǒ ja̍i̍. Wɛ̀ ɔ̍ pìàɛ̍n ɔ̍ ku̍ jliɛ̍ laa̍ i̍. Iě ɔ̍ tè ɔ̍ i̍. Gbàlɔ̍ biě-a chɛ̀ ɔ̍ blǔ i̍-ɛ dǒ sɔɔ̌ wlì. Wɛ̀ ɔ̍ kli̍bo sɔɔ̌ gbo̍ klaa dɛɛ iě ɔ̍ kaɛn ɛ̍ dǒ gbàlɔ̍ biě-a chɛ̀ wɔ̍i̍n.

⁴⁷ Nɛ̀ Mɛle Makalin ke Mɛle ɔ̀ nu̍-a Jose de̍-ɛ, nɛ̀ u̍h-a gbɛ̀n-o, iě u̍h jě Jusu-a kǔ-a pɛ̌n la̍.