Matio 28 - Ku̍o̍ Delee 1999

Jusu-ae wlǔh-ɛ

¹ Juu-a wlè-weɛ̍ sì-aɛ, ɛ̍ nu̍ Sɔnde̍-a klàɛ̍we̍ gbàìn, wɛ̀ Mɛle Makalin ke Mɛle dɔɔ mu̍ dě Jusu-a gbàlɔ̍ we̍ gbɛ̀n la̍.

² U̍h iě-a kli dǎ-a nɛ̀ wlù poɔ-a chììn tba̍ blǔh wɛ̀, sɔ ɛ̍ ku̍ wɔ̍n kaa̍. Dɛ̍nu̍ɛ, nɛ̀ Joi-a ǐnchɔ̀-a sɔ dě ja̍i̍wlɔ̀ ɛ̍ ji̍ nɔ̌ bloɔ̍. Iě ɛ̍ mu̍ dě Jusu-a gbàlɔ̍ we̍, wɛ̀ ɛ̍ kli̍bo sɔɔ̌ nɛ-a dǒ ɛ̍ wɔ̍i̍n-ɛ, iě ɛ̍ tè ɛ̍ kɛ̍n.

³ Ìn ja ɛ̍ ja̍ gbɛ̀n-ɛ, nɛ̀ ɛ̍ po̍ slaɛn ka nǐ-a chlɛ jlǐh-ɛ. Ɛ̍ pa̍-jlii̍ nɛ pɔ̀ɔ̀ ka kǒ gbo̍-ɛ.

⁴ Fledlǔ ùh-a tù-a gbàlɔ̍-a chɛ̀ jlǐhɛ̍ we̍-ɛ, sɔ ɛ̍ po̍ u̍h faɔn kaa̍ iě u̍h-a ku̍-a tlɛ̍. Iě u̍h gbǎ wlùh ka nyɔ̍ mɛ̌-ɛ.

⁵ Wɛ̀ Nyɔsoa-a ǐnchɔ̀ la̍a̍ dě nynɔ̌gbaɔᵻ laa̍ we̍, “Mɔ̀ bɔ̌ faɔn ple̍-ɛ, ǐn juo ɛ̍ Jusu ɔ̀ u̍h kɔ̍-a dǒ gbàɛ̍ kɛ̍n i̍ tu̍ wlì-ɛ, ɔ̍-ɔ bo mɔ̀-a pɔ̀n i̍.

⁶ Jɛ ɔ̍ se̍ da̍a nɛ dɛ. Ɔ̍ wlǔh-e wɛ̀, ɛ̀ ɔ̍ sà-aɛ bo ɔ̍ nu̍-a. Mɔ̀ ji̍ tà ɔ̍ pɛ̌n-a i̍ de-ɛ jě.

⁷ Ɛ̍ tìh-ɛ, mɔ̀ mu̍ suei̍ mɔ̀ iě ɔ̍ kòà wlùh sèàɛ̍. Mɔ̀ la̍a̍, ‘Ɔ̍ wlǔh-e wɛ̀, iě ɔ̍ mu̍ la̍ mɔ̀ jǔ dě Kaladii fɔɔ, dě mɔ̀-a mu̍ ɔ̍ jě-e.’ Tu̍owli ǐn blě-a dǒ mɔ̀ we̍-ɛ bo.”

⁸ Iě nynɔ̌gbaɔᵻ laa̍ u̍h tèwe u̍h sɔ dǒ gbàlɔ̍ wɔ̍i̍n, nɛ̀ u̍h-a ple̍ faɔn, jɛ nɛ̀ kǎ mɔna̍-a nu̍ u̍h ke. Wɛ̀ u̍h gba̍ ple̍-ɛ u̍h iě ɔ̍ kòà wlùh sèàɛ̍.

⁹ U̍h iě-a kèle-ɛ, nɛ̀ Jusu-a chɛ̀ jɛɛ u̍h wɛ̀. Ɔ̍ la̍a̍, “Mɔ̀ nàà wlǔh.” Wɛ̀ u̍h mu̍ ɔ̍ wlì, iě u̍h gbɛ̍n ɔ̍ bu̍hᵻ i̍, wɛ̀ u̍h sà ɔ̍ wɛɛ.

¹⁰ Wɛ̀ Jusu la̍a̍ dě u̍h we̍, “Mɔ̀ bɔ̌ faɔn ple̍-ɛ. Jɛ mɔ̀ mu̍ mɔ̀ iě ǎn kòà wlùh sèàɛ̍ ùh nu̍-a ǐn de̍di̍i̍ᵻɛ́, u̍h iě Kaladii mu̍ dě u̍h-a mu̍ ǐn jě-e.”

Fledlǔ gba̍ kunǎ

¹¹ Nynɔ̌gbaɔᵻ laa̍ u̍h nɛ dǒ mu̍ la̍ sǔh wɛ̀ fledlǔ ùh-a tù-a gbàlɔ̍ jlǐhɛ̍ we̍-ɛ, iě u̍h-a duuh mu̍ dě de̍ tùgbàwlɔ̀ di̍i̍. Wɛ̀ dɛ̍ᵻ kli̍hgbɛ̍ ìh nɛ-aɛ, iě u̍h po̍ i̍h-a kunǎ dě Nyɔsoa-a slaǎ sà nyɔ̍ klaaᵻ we̍.

¹² Wɛ̀ Nyɔsoa-a slaǎ sà nyɔ̍ klaaᵻ ke nyɔ̍ klaaᵻ jiěe dlǔ-i. Wɛ̀ u̍h nyǐ fledlǔ laa̍ wlǐ dɔu.

¹³ U̍h la̍a̍, “Ka mɔ̀ iě-a dǎ-ɛ, mɔ̀ la̍a̍, ‘À nɛ dǒ mɔ̌ la̍ wɛ̀ ɔ̍ kòà ji̍ maɔ̍, iě u̍h jlǐ ɔ̍ kǔ.’

¹⁴ Pò Pale wɔ̌n i̍h-ɛ, nɛ̀ à mu̍ ɔ̍ pɔluh i̍ pɛ̌n-ɛ ɔ̍-ɔ je̍e mɔ̀ dɛ̍ nui.”

¹⁵ Wɛ̀ fledlǔ dǔ wlǐ laa̍ iě u̍h nu̍ dɛ̍ u̍h dǎ-aɛ. Pɔ̀n laa̍ bo ɛ̀ dlɛɛ-a ka i̍ sèàn dě Juu nyɔ̍ nynɛ̌ we̍.

Jusu wlǔh-i ɔ̍ kòà kɛ̍n

¹⁶ Wɛ̀ kòà-a pùè jɔɛ̍ due laa̍ u̍h mu̍ dě Kaladii fɔɔ dě tlu̍h kɛ̍n, tà Jusu la̍ u̍h iě-a mu̍-ɛ.

¹⁷ Ti̍ u̍h jě-a ɔ̍-ɛ, iě u̍h sà ɔ̍ wɛɛ, jɛ nɛ̀ duuh-a wlùh nɛ kɛ̍-ɛ.

¹⁸ Wɛ̀ Jusu klɛɛn dǒ u̍h we̍ iě ɔ̍ la̍a̍, “Gbǐh kli̍hgbɛ̍ nɛ-a dě ja̍i̍wlɔ̀-ɛ ke jih nɛ-a nɔ̌ bloɔ̍-ɛ, i̍h nyǐ-ɛ m wɛ̀.

¹⁹ Ɛ̍ tìh-ɛ, mɔ̀ mu̍, mɔ̀ ple̍ blǔh kli̍hgbɛ̍ la we̍ mɔ̀ iě nyɔ̍ kli̍hgbɛ̍ ǎn kòà we̍i̍ nu̍. Nɛ̀ mɔ̀ po̍ u̍h nǐ dlǔ dǒ Baa ke Jǔ ke Nyɔsoa-a Sùù-a nynɛ̌ kɛ̍n.

²⁰ Nɛ̀ mɔ̀ po̍ u̍h nǎ wɛ̀ u̍h iě dɛ̍ᵻ kli̍hgbɛ̍ ǐn sèàɛ̍-a mɔ̀ wlùh-ɛ nu̍. Nɛ̀ ǎn mu̍ mɔ̀ sɔ̍nᵻ we̍ i̍ naɛ ti̍ kli̍hgbɛ̍ we̍, sɔ da̍a ìè dě ti̍-a dlǔ i̍ chlà la̍ mu̍.”