Matio 25 - Ku̍o̍ Delee 1999

Nynɔ̌gbaɔᵻ nynuu̍ plɔ̀ᵻ pùè-a nɛnǎ

¹ Jusu la̍a̍, “Dǒ ti̍ laa̍ di̍i̍ nɛ̀ Nyɔsoa-a kmɔ̌ wlu̍ i̍ kɔn-ɛ ke nynɔ̌gbaɔᵻ nynuu̍ plɔ̀ᵻ pùè-a mu̍ wɔ̀ɛ. U̍h dǔ u̍h-a chlǎn nape̍ᵻ, iě u̍h mu̍ jɔ̍gbau ɔ̀ kɔn nynɔ̌-a mu̍-a jla̍ ji̍-ɛ i̍ jǎɛ la̍.

² U̍h-a m̀m̌ bo we̍i̍, wɛ̀ m̀m̌ flɔn di̍i̍-i.

³ Juh ùh bo-a we̍i̍-ɛ, u̍h gba̍ u̍h-a nape̍ᵻ, jɛ u̍h se̍ i̍h chlǎn sie gbɔ̍ɔ̍i̍ we̍ blě-e.

⁴ Wɛ̀ juh flɔn-a di̍i̍ i̍-ɛ nɔ̀ɔ̍, u̍h po̍ chlǎn dɛɛ dě su̍e̍ di̍i̍ iě u̍h blě-e ɛ̍ u̍h-a nape̍ᵻ we̍.

⁵ Jɛ jɔ̍gbau kɔn nynɔ̌-a ji̍-a jla̍-ɛ, ɔ̍ se̍ ji̍ suei̍. Sɔ nynɔ̌gbaɔᵻ nynuu̍ laa̍ u̍h-a mɔ̌ɛ la̍ ja̍i̍ sǔh, iě u̍h gboǎɛ nyinɔ̍ i̍.

⁶ “Ɛ̍ nu̍ tòloo slɛ̀ɛ̍n wɛ̀ tlùngbɛ̀n sɔ-ɔ. U̍h la̍a̍, ‘Nynɔ̌ kɔn nyɔ̍-a chɛ̀ ji̍ wɛ̀ o, mɔ̀ ji̍ ɔ̍ i̍ jǎɛ o.’

⁷ Wɛ̀ nynɔ̌gbaɔᵻ nynuu̍ laa̍ u̍h sɔ bloɔ̍, iě u̍h nma̍le u̍h-a nape̍ᵻ.

⁸ Wɛ̀ nynɔ̌gbaɔᵻ nynuu̍ juh bo-a we̍i̍-ɛ, iě u̍h la̍a̍ dě di̍i̍ flɔn naɛ we̍, ‘Mɔ̀ nyǐ à chlǎn dɛ̍wɛ lě. Jɛ à nape̍ᵻá mɔ̌-ɛ wa.’

⁹ Iě u̍h la̍a̍, ‘Iěe, chlǎn la ɛ̍ se̍ i̍ tìè dǒ mɔ̀ ke à we̍. Dɛ̍ mɔ̀ iě-a nu̍-ɛ, mɔ̀ mu̍ dě chlǎn ple̍-nyɔ̍ we̍ mɔ̀ iě mɔ̀ naɛ tɛ̀n.’

¹⁰ Dě chlǎn tɛ̀n la̍ bo u̍h maɛ, wɛ̀ jɔ̍gbau kɔn nynɔ̌-a ji̍-a jla̍-ɛ, iě ɔ̍ nyni̍. Wɛ̀ juh kɔn nape̍ᵻ nɛ-a chlǎn di̍i̍-ɛ, u̍h ke ɔ̍ pa̍ dě peě tù-i gbò. Iě gbò-a chɛ̀ dǔ wɔ̍i̍n ka̍n-ɛ.

¹¹ “Ɛ̍ se̍-o wlè wɛ̀ juh mu̍-a chlǎn tɛ̀n la̍-ɛ ji̍ de̍. U̍h la̍a̍, ‘Nyɔ̍ klaa, dbǎkà, pɔ̀ni à wɔ̍i̍n lě.’

¹² Jɛ ɔ̍ la̍a̍, ‘Bɔ̌ ǐn sèàɛ̍ mɔ̀ wlùh, ǐn se̍ mɔ̀ juo.’

¹³ “Ɛ̍ tìh-ɛ, mɔ̀ tù mɔ̀-a chɛ̀ jlǐhɛ̍, dɛ̍nu̍ɛ, mɔ̀ se̍ weɛ̍ ke ti̍ Joi-a mu̍-a ja-ɛ juo.”

Pòi̍nynuu̍ ta̍a̍n-a nɛnǎ

¹⁴ Jusu la̍a̍, “Dode̍-ɛ, Nyɔsoa-a kmɔ̌ wlu̍ i̍ kɔn-ɛ la, ɛ̍ mu̍ jɔ̍gbau ɔ̀ mu̍-a dihwa̍a̍-a wɔ̀. Ɔ̍ wɔ̌an mu̍-u tìh-ɛ, iě ɔ̍ dǎ ɔ̍ pòi̍nynuu̍ wɛ̀ ɔ̍ si̍e̍ ɔ̍ kɔn-dɛ̍ᵻ dě u̍h kwa̍a̍.

¹⁵ Ɔ̍ nyǐ due pɔu̍nᵻá wlǔ m̀m̌ (5,000), wɛ̀ ɔ̍ nyǐ dɔɔ wlǔ sɔɔ̌n (2,000), iě ɔ̍ nyǐ dɔɔ wlǔ due (1,000). Ka u̍h nu̍-a sɔ̀n-i siee-ɛ, kǎ ɔ̍ nu̍ u̍h dɛ̍ nyǐ-ɛ. Wɛ̀ ɔ̍ dǔ dihwa̍a̍ mu̍-ɛ.

¹⁶ Jɔ ɔ̀ jě-a pɔu̍nᵻá wlǔ m̀m̌-ɛ, dǒ ɔ̍ nyna iě ɔ̍ tlee̍ wlǐ laa̍ kɛ̍n i̍. Wɛ̀ wlǔ m̀m̌ diih gbǎ dǒ i̍h kɛ̍n.

¹⁷ Jɔ jě-a wlǔ sɔɔ̌n-ɛ, kǎ ɔ̍ nu̍ ke. Iě ɔ̍ jě sɔɔ̌n diih dǒ i̍h kɛ̍n.

¹⁸ Jɛ jɔ jě-a wlǔ due-ɛ, ɔ̍ mu̍-aɛ, iě ɔ̍ blǔ biě wɛ̀ ɔ̍ po̍ ɔ̍ dlǔtu-a wlǐ laa̍ wlù.

¹⁹ “Ɛ̍ wlè-o wlè-e, iě pòi̍nynuu̍ laa̍ u̍h-a dlǔtu ji̍ de̍. Wɛ̀ ɔ̍ dǎ u̍h ɔ̍ iě wlǐ nɛ-a dě u̍h we̍-ɛ gbàɛ̍.

²⁰ Jɔ̍gbau jɔ jě-a pɔu̍nᵻá wlǔ m̀m̌-ɛ, ɔ̍ wɔ̌an ji̍-i tìh-ɛ, sɔ ɔ̍ ja m̀m̌ diih dǒ i̍h kɛ̍n. Ɔ̍ la̍a̍, ‘Dlǔtu, ìn wɔ̌an mu̍-u tìh-ɛ, wlǔ m̀m̌ bo ìn siee m. Jɛ gbɛ̀n-e, ǐn jě wlǔ m̀m̌ diih dǒ i̍h kɛ̍n.’

²¹ Wɛ̀ ɔ̍ dlǔtu la̍a̍, ‘Ɛ̍ nmɔ jii̍. Mɔ̀ pòi̍ju chɛ̀, iě ìn nu̍ wlì tè nyɔ̍. Ka nyɔ̍-a tè-a la̍ ìn wlì dǒ dɛ̍ juwɛ we̍-ɛ, nɛ̀ ǎn mu̍ ìn dǒ dɛ̍ᵻ dɔu dlǔwèàì po̍. Ji̍ ìn ke ǐn ke à iě sɔ̍n jǔ gbo̍a̍ɛ.’

²² Wɛ̀ jɔ̍gbau jɔ jě-a pɔu̍nᵻá wlǔ sɔɔ̌n-ɛ ji̍. Ɔ̍ la̍a̍, ‘Dlǔtu, ìn wɔ̌an mu̍-u tìh-ɛ, wlǔ sɔɔ̌n bo ìn siee m. Jɛ gbɛ̀n-e, ǐn jě wlǔ sɔɔ̌n diih dǒ i̍h kɛ̍n.’

²³ Wɛ̀ ɔ̍ dlǔtu la̍a̍, ‘Ɛ̍ nmɔ jii̍. Mɔ̀ pòi̍ju chɛ̀, iě ìn nu̍ wlì tè nyɔ̍. Ka nyɔ̍-a tè-a la̍ ìn wlì dǒ dɛ̍ juwɛ we̍-ɛ, nɛ̀ ǎn mu̍ ìn dǒ dɛ̍ᵻ dɔu dlǔwèàì po̍.’

²⁴ Wɛ̀ jɔ̍gbau ɔ̀ jě-a pɔu̍nᵻá wlǔ due-ɛ, iě ɔ̍ ji̍. Ɔ̍ la̍a̍, ‘Dlǔtu, ǐn juo àn wɔ̍n kma tìh. Dɛ̍ ìn se̍-a tù-ɛ, ɛ̍ bo àn gbǎn. Iě klè ìn se̍-a nu̍-ɛ, wɛ̀ àn chɛ̍n ɛ̍.

²⁵ Sɔ ǎn ple̍ faɔn iě ǐn sìle àn wlǐ-a chɛ̀ dě wlù. Gbɛ̀n-e, àn wlǐ-a chɛ̀ la.’

²⁶ Wɛ̀ ɔ̍ dlǔtu la̍a̍, ‘Pòi̍ju la, ìn flàn-ɛ, iě ìn kɔn kà. Ìn juo-a ɛ̍ ke gblagblǎ dɛ̍ ǐn se̍-a tù-ɛ, ɛ̍ bo ǎn gbǎn-aɛ,

²⁷ nɛ̀ ìn kɔn ìè ǎn wlǐ la dě pànkɛ̍ɛ̍n po̍ de. Wɛ̀ ti̍ ǐn ji̍-a de̍ ka-ɛ, wɛ̀ iě i̍h ke i̍h-a po̍ kɛ̍n i̍ jě.

²⁸ Ɛ̍ tìh-ɛ, mɔ̀ sà ɔ̍ wlǐ la kwa̍a̍, mɔ̀ iě i̍h jɔ blě-a pɔu̍nᵻá wlǔ pùè-ɛ nyǐ.

²⁹ Dɛ̍nu̍ɛ, nyɔ̍ kli̍hgbɛ̍ ùh blě-a dɛ̍-ɛ, nɛ̀ u̍h-a mu̍ dɛ̍ dɔu nyǐ-ɛ, wɛ̀ u̍h iě tlùgbei̍ blě. Jɛ nyɔ̍ ɔ̀ se̍-a dɛ̍ blě-ɛ, nɛ̀ dɛ̍ juwɛ-a chɛ̀ ɔ̍ blě-a de-ɛ, ɛ̍ mu̍ ɔ̍ kwa̍a̍ sà-ɛ.

³⁰ Nɛ̀ pɔ̀ɔ̍pìe̍ jɔ̍gbau la nɔ̀ɔ̍, mɔ̀ po̍ ɔ̍ sɔ̀n dě kwile-e, dě ɔ̍ mu̍ fìn-i, ɔ̍ iě nynɛ̌ di̍ kìàǎnkìàǎn.’ ”

Bɔ̌ɛ-o sàwi̍h

³¹ Jusu la̍a̍, “Ti̍ Nyi̍ɔ̍-a Jǔ-a mu̍-a ji̍ dě ɔ̍ tìh-a i̍ bɛ̌-ɛ di̍i̍ wɛ̀ ɔ̍ ke ɔ̍ ǐnchɔ̀ iě-a na-ɛ, nɛ̀ ɔ̍ mu̍ i̍ tè dǒ ɔ̍ nynɛ̌ gbalǎ kɛ̍n.

³² Nɛ̀ kmɔ̌ nyɔ̍ kli̍hgbɛ̍-a mu̍ i̍ gbòe-ɛ dǒ ɔ̍ jǔ. Nɛ̀ ɔ̍ mu̍ u̍h-e i̍ gblè ka blawɛ̌ᵻ we̍ i̍ gbɛ̀n nyɔ̍-a sèàɛ̍ blawɛ̌ᵻ ke gbàdɔ̍ᵻ we̍-ɛ.

³³ Nɛ̀ ɔ̍ mu̍ blawɛ̌ᵻ dě di̍na̍ we̍ po̍, wɛ̀ ɔ̍ iě gbàdɔ̍ᵻ dě kwe̍na̍ we̍ po̍.

³⁴ Nɛ̀ Blǔh Baa-a mu̍ ka dǎ dě nyɔ̍ ùh nɛ-a dě ɔ̍ di̍na̍ we̍ ka-a we̍, ‘Mɔ̀ɔ̍ ǐn Baa nyǐ-a pɔ̀ìě-ɛ, mɔ̀ ji̍ kmɔ̌ Nyɔsoa kɔn-a wlu̍ i̍-ɛ, ɔ̍ mu̍ ɛ̍ mɔ̀ nyǐ. Ɔ̍ po̍ ɛ̍ gba̍a̍ dǒ mɔ̀ we̍ se̍e̍ wɛ̀ kmɔ̌ la ɛ̍ dǔ nui-ɛ.

³⁵ Dɛ̍nu̍ɛ, mɔ̌-a nu̍ m, wɛ̀ mɔ̀ nyǐ ǐn di̍-dɛ̍. Dǒ ǐn wlì-a bǔ-i, wɛ̀ mɔ̀ nyǐ ǐn nǎ-nǐ. Ǐn nu̍ dihwi̍h, wɛ̀ mɔ̀ gba̍ ǐn gbò we̍.

³⁶ Ǐn chɛn gbaǎn, iě mɔ̀ nyǐ ǐn jlii̍. Ǐn poa-ɛ, iě mɔ̀ gbɛ̀n dǒ ǐn we̍ i̍. Ǐn nɛ-a dě kasoo-ɛ, iě mɔ̀ ji̍ ǐn nyinɔ̍ i̍ sà la̍.’

³⁷ Nɛ̀ i̍ slɛ̌-nyɔ̍-a mu̍ ɔ̍ i̍ tèle, ‘Joi, ti̍we̍ à jě àn mɔ̌-a nu̍ la̍ wɛ̀ à nyǐ ìn di̍-dɛ̍, àe̍e̍ dǒ ìn wlì-a bǔ iě à nyǐ ìn nǎ-nǐ ɛ?

³⁸ Nɛ̀ ti̍we̍ à jě àn dihwi̍h nu̍ la̍ wɛ̀ à gba̍ ìn gbò we̍, àe̍e̍ ti̍we̍ ìn chɛn gbaǎn iě à nyǐ ìn jlii̍ ɛ?

³⁹ Nɛ̀ ti̍we̍ à jě àn poa la̍ ke àn kasoo nɛ la̍ wɛ̀ à ji̍ ìn nyinɔ̍ i̍ sà la̍ ɛ?’

⁴⁰ Nɛ̀ Blǔh Baa-a mu̍ ka dǎ dě u̍h we̍, ‘Bɔ̌ ǐn sèàɛ̍ mɔ̀ wlùh, dɛ̍ jɛ mɔ̀ nu̍-a dǒ ǐn de̍di̍i̍ᵻ la u̍h-a bla̍-a jlǐhɛ̍ dlǔ-ɛ we̍-ɛ, nɛ̀ mɔ̀ nu̍ ɛ̍ ǐn pùn wɛ̀.’

⁴¹ “Nɛ̀ ɔ̍ mu̍ ka dǎ dě ùh nɛ-a dě ɔ̍ kwe̍na̍ we̍ ka-a we̍, ‘Mɔ̀ɔ̍ ùh Nyɔsoa po̍-a wlu̍we̍i̍-ɛ, mɔ̀ sɔ da̍a ǐn jua̍i̍. Mɔ̀ mu̍ dě nɛ̍ ɛ̀ se̍-a mɔ̌ la̍ kɔn-ɛ di̍i̍, ɛ̀ ɔ̍ po̍-a gba̍a̍ dǒ Kǔ ke ɛ̍ ǐnchɔ̀ we̍-ɛ.

⁴² Dɛ̍nu̍ɛ, mɔ̌-a nu̍ m, wɛ̀ mɔ̀ se̍ ǐn di̍-dɛ̍ nyǐ. Dǒ ǐn wlì-a bǔ-i, wɛ̀ mɔ̀ se̍ ǐn nǎ-nǐ nyǐ.

⁴³ Ǐn nu̍ dihwi̍h, iě mɔ̀ se̍ ǐn gbò we̍ gba̍. Ǐn chɛn gbaǎn, wɛ̀ mɔ̀ se̍ ǐn jlii̍ nyǐ. Wɛ̀ ǎn poa iě ǐn nɛ kasoo, wɛ̀ mɔ̀ se̍ dǒ ǐn we̍ i̍ gbɛ̀n.’

⁴⁴ Nɛ̀ u̍h-a mu̍ ɔ̍ i̍ tèle ke, ‘Joi, ti̍we̍ à jě àn mɔ̌-a nu̍ la̍, iě dǒ ìn wlì-a bǔ, wɛ̀ ìn nu̍ dihwi̍h, iě ìn chɛn gbaǎn, iě ìn poa, wɛ̀ ìn nɛ kasoo, iě à se̍ ìn we̍ gbǎ ɛ?’

⁴⁵ Nɛ̀ Blǔh Baa-a mu̍ ka dǎ dě u̍h we̍, ‘Bɔ̌ ǐn sèàɛ̍ mɔ̀ wlùh, ka jɛ mɔ̀ se̍-a dɛ̍ nu̍ dǒ ùh la u̍h-a bla̍-a jlǐhɛ̍ dlǔ-ɛ we̍-ɛ, nɛ̀ mɔ̀ se̍ ɛ̍ nu̍ dǒ ǐn we̍ ke.’

⁴⁶ Nɛ̀ u̍h-a mu̍ kàn gbɛ̍n-ɛ se̍-a dlǔ i̍ chlà la̍ kɔn-ɛ we̍ mu̍. Jɛ nɛ̀ i̍ slɛ̌-nyɔ̍-a mu̍ kmɔ̌ sie feɛ we̍ mu̍.”