Matio 24 - Ku̍o̍ Delee 1999

Nyɔsoa-a slaǎ sà gbò-a mu̍-u gbɔ̀lɔ

¹ Ti̍ Jusu sɔ-a dě Nyɔsoa-a slaǎ sà gbò we̍ ɔ̍ mu̍-a la̍-ɛ, wɛ̀ ɔ̍ kòà ji̍, iě u̍h dǎɛ ɔ̍ de̍, u̍h iě ɛ̍ gbòᵻ diih ɔ̍ toe.

² Wɛ̀ ɔ̍ la̍a̍, “Bɔ̌ ǐn sèàɛ̍ mɔ̀ wlùh, ìh kli̍hgbɛ̍ la mɔ̀-a jě i̍h, jɛ sɔɔ̌ᵻ u̍h poe-a gbò la-ɛ, i̍h-a dɛ̍ se̍ dǒ i̍h ba̍ kɛ̍n sie mu̍. I̍h-a mu̍ wlǎ-ɛ kli̍hgbɛ̍.”

Wě ke klě jě-ɛ

³ Jusu wɔ̀-a dɛ̍ la wlu-ɛɛ, wɛ̀ ɔ̍ mu̍ dě Ɔle-Tu̍ᵻá Tlu̍h kɛ̍n. Wɛ̀ ɔ̍ kòà chɛn gbɔ̍i̍ u̍h mu̍ dě ɔ̍ we̍. U̍h la̍a̍, “Sèàɛ̍ à wlùh, ti̍we̍ ìh la i̍h-a mu̍ nɛ ɛ? Nɛ̀ ti̍ àn mu̍-a de̍ ji̍-ɛ ke ti̍-a dlǔ i̍ chlà-a ke, dɛ̍ bo ɛ̀ mu̍ juola nu̍ à iě i̍ juo ɛ?”

⁴ Jusu la̍a̍, “Mɔ̀ nu̍ mɔ̀-a chɛ̀-a nɛnɛ̌ wɛ̀ nyɔ̍-ɔ je̍e mɔ̀ i̍ boe.

⁵ Dɛ̍nu̍ɛ, nyɔ̍ dɔu-a mu̍ dǒ ǎn nynɛ̌ kɛ̍n jii, u̍h iě ka dǎ, ‘Mɔ̍ bo ɔ̀ nu̍ Nyɔsoa-a Chèɛ̀ Tba̍ju.’ Wɛ̀ u̍h iě nyɔ̍ dɔu i̍ boe.

⁶ Mɔ̀-a mu̍ tu̍h-a fɔ̀n-ɔ slɛ̀ wɔ̌n ɛ̍ iě mɔ̀ i̍ kɔǎn-ɛ, wɛ̀ mɔ̀ iě tu̍h-a pɔ̀n wɔ̌n dě tà tɔ̀ɔ̀n. Jɛ ɛ̍ bɔ̌ mɔ̀ sèò nui-ɛ. Ìh kaɛn la i̍h-a mu̍ nɛ, jɛ nɛ̀ ɛ̍ se̍ ti̍-a dlǔ i̍ chlà-a ke̍.

⁷ Bloa̍ ke bloa̍-a mu̍ fɔ̀n, wɛ̀ kɔ̀mla̍ ke kɔ̀mla̍ iě fɔ̀n. Nɛ̀ wlù poɔ-a mu̍ blǔh kli̍hgbɛ̍ i̍ sèke, wɛ̀ mɔ̌ iě gbǎ.

⁸ Ìh kli̍hgbɛ̍ la i̍h wɔ̀ ka nynɔ̌-a kwlǐ-a tɛ̀n gbǐh ɔ̍ iě gbàɔ̀n sà-ɛ.

⁹ “Nɛ̀ mɔ̀-a mu̍ gbɛ̍n-ɛ, u̍h iě mɔ̀ klě jě-e, wɛ̀ mɔ̀ iě ɛ̍ sɔ̀n mɛ̌-ɛ. Nɛ̀ ǎn tìh-ɛ nyɔ̍ kli̍hgbɛ̍-a mu̍ mɔ̀ faɛn.

¹⁰ Ɛ̍ ti̍ laa̍ nɛ̀ nyɔ̍ dɔu-a mu̍ u̍h-a wlùh gbaɛ i̍ tǎli. Nɛ̀ u̍h-a mu̍ sà ìn ba̍ kwlǎ ìn ba̍ sà ìn kwlǎ nu̍ dě nyɔ̍ duuh we̍. Jɔ-ɛ, nɛ̀ ɔ̍ mu̍ ɔ̍ ba̍ faɛn.

¹¹ Nɛ̀ Nyɔsoa-a tu̍owli po̍ nyɔ̍-a si̍h naɛ dɔu-a mu̍ mɔ̀ kɛ̍n wlǔh-i, u̍h iě nyɔ̍ dɔu i̍ boe.

¹² Ɛ̍ ti̍ laa̍ kà kɔn-ɛa kɛ̍n gbǎ tìh bo ɛ̀ mu̍ nyɔ̍ dɔu-a jbɛɛ seɔn po̍.

¹³ Jɛ nyɔ̍ ɔ̀ mu̍-ae klì i̍ ku̍ wɛ̀ ɛ̍ iě-a dlǔ i̍ chlà-ɛ, nɛ̀ ɔ̍ mu̍ pǔh.

¹⁴ Nɛ̀ Nyɔsoa-a kmɔ̌ wlu̍ i̍ kɔn-ɛa pɔ̀n chɛ̀ la ɛ̍ tìh-a mu̍ bla̍-ɛ dě kmɔ̌ gbàǐ la we̍, nyɔ̍ kli̍hgbɛ̍ iě i̍h wɔ̌n. Wɛ̀ ti̍-a chlà-a iě ji̍-ɛ dǔ.

Jusu sà bɔ̌ɛ-o wǐh-a tìh i̍

¹⁵ “Mɔ̀-a mu̍ slèwlì dɛ̍ ɛ̀ sàɛ̀-a nyɔ̍-a dlǔ wìè-eɛ jě. Ɛ̍ kɔn tìh bo Nyɔsoa-a tu̍owli po̍ nyɔ̍ Danio bla̍. Ɔ̍ la̍ ɛ̍ mu̍ i̍ nyna dě slaǎ sà gbò sɔ̀n.” Nyɔ̍ mu̍-a ɛ̀ la slè-ɛ, bɔ̌ ɔ̍ wɔ̌n ɛ̍ we̍i̍ chɛ̀gbɛɛ.

¹⁶ “Nɛ̀ nyɔ̍ ùh nɛ-a dě Judia fɔɔ-ɛ, u̍h ple̍ u̍h iě dě tlu̍hᵻ kɛ̍n i̍ mu̍.

¹⁷ Nɛ̀ nyɔ̍ ɔ̀ nɛ-a dě gbò pɛ̍lɛ dlǔ i̍ kɛ̍n-ɛ, dě ɔ̍ iě waɛn la̍ sǔh, jɛ nɛ̀ ɔ̍ bɔ̌ dɛ̍-ɛ dǔ la̍ mu̍-ɛ dɛ dě de̍ gbò.

¹⁸ Nɛ̀ nyɔ̍ ɔ̀ nɛ-a dě klè-ɛ, ɔ̍ bɔ̌ ɔ̍ dɛ̍wlo̍o̍ bola̍a̍ mu̍-ɛ dě de̍ wlɔ̀.

¹⁹ Dǒ wǐh laa̍ di̍i̍, nɛ̀ ɛ̍ mu̍ wɔ̍n kma-dɛ̍ nu̍ dǒ kwlǐᵻ nynɔ̌gbaɔᵻ we̍, ɛ̍ ke juh-a nyǎ-ɛa nynuu̍-ɛ ke.

²⁰ Mɔ̀ ba̍le wɛ̀ mɔ̀-a ple̍-ɛ je̍e dě wìla̍ di̍i̍ nu̍, ɛ̍ ke dǒ wlè-weɛ̍ di̍i̍ ke.

²¹ Dɛ̍nu̍ɛ, dǒ ti̍ laa̍ di̍i̍ jua̍i̍ sàɛ̀-ɛ ɛ̀ kɔn ba̍-a se̍a nɛ sɔ dě kmɔ̌-a gbɔ̀ tè la̍ wɛ̀ ɛ̍ iě-a ka ti̍ la jɛɛ-ɛ, nɛ̀ ɛ̍ bo ɛ̀ mu̍ nɛ. Sakǒ, ɛ̍ blaiɛ̍ se̍ gba̍ nɛ dɛ.

²² Pò wǐh la i̍h se̍ dlǔ i̍ chɛ̍n-ɛ de-ɛ, nɛ̀ nyɔ̍ se̍-o tàn mu̍ de. Jɛ nyɔ̍ ùh Nyɔsoa tba̍-a chèɛ̀-ɛ, u̍h-a tìh bo ɔ̍ mu̍ wǐh la dlǔ i̍ chɛ̍n.

²³ “Nɛ̀ pò nyɔ̍ la̍a̍ dě mɔ̀ we̍, ‘Mɔ̀ gbɛ̀n-e, Nyɔsoa-a Chèɛ̀ Tba̍ju la da̍a,’ àe̍e̍, ‘Ɔ̍-ɔ nɛ-a dě de̍à,’ nɛ̀ mɔ̀ bɔ̌ i̍h tìh chɛ̀ po̍-ɛ.

²⁴ Dɛ̍nu̍ɛ, Nyɔsoa-a Chèɛ̀ Tba̍ju-a si̍h naɛ ke Nyɔsoa-a tu̍owli po̍ nyɔ̍-a si̍h naɛ-a mu̍ mɔ̀ kɛ̍n wlǔh-i, u̍h iě nyɔ̍ wɔ̍n flɔn-ɛ dɛ̍ᵻ ke jbaɛdih po̍, wɛ̀ u̍h iě nyɔ̍ i̍ boe. Nɛ̀ pò ɛ̍ nɛ ɛ̍ ka̍-ɛ, nyɔ̍-a chɛ̀ ùh Nyɔsoa tba̍-a chèɛ̀-ɛ, nɛ̀ u̍h-a mu̍ u̍h i̍ boe ke.

²⁵ Gbɛ̀n-e, ǎn si̍e̍ ti̍ nya̍ wɛ̀ ǎn sèàɛ̍ mɔ̀ wlùh duedɛ.

²⁶ “Ɛ̍ tìh-ɛ, pò nyɔ̍ la̍a̍ dě mɔ̀ we̍, ‘Ɔ̍ nɛ dě pòɛ̍ɛ̍ kɛ̍n o-ɛ,’ mɔ̀ bɔ̌ deě mu̍-ɛ. Àe̍e̍ pò u̍h la̍a̍, ‘Ɔ̍ nɛ dě gbòju di̍i̍-ɛ,’ mɔ̀ bɔ̌ i̍h tìh chɛ̀ po̍-ɛ.

²⁷ Dɛ̍nu̍ɛ, ɛ̀ kɔn ba̍ nǐ-a chlɛ-a jlǐh dě blǔh kwea̍i̍ wɛ̀ ɛ̍ tɛ̀àn-a sǐ-a dě sɔ̀ni̍-ɛ, kǎ Nyi̍ɔ̍-a Jǔ-a mu̍ ji̍-ɛ nu̍.

²⁸ “Nɛ̀ɛ̍, tà mɛ̌-ɛ kǔ nɛ-aɛ, nɛ̀ dě-e bo chìsǐᵻá gbòe i̍.”

Nyi̍ɔ̍-a Jǔ-a ji̍-ɛ la

²⁹ Jusu la̍a̍, “Dǒ wǐh laa̍ di̍i̍ pò jua̍i̍ sàɛ̀ la ɛ̍ chɛ̍n i̍-ɛ, ɛ̍ se̍-o wlè mu̍, nɛ̀ jlǔh-a mu̍ gbe, nɛ̀ chǔh se̍ fa̍n mu̍ dɛ. Nɛ̀ chǔhtlɛ̀n-a mu̍ dě ja̍u̍n wlì blu̍. Nɛ̀ gbǐh nɛ-a dě ja̍u̍n wlì-ɛ, i̍h-a mu̍ tèla̍ wlǔh.

³⁰ Dǒ ti̍ laa̍ di̍i̍ nɛ̀ Nyi̍ɔ̍-a Jǔ-a juola-a mu̍ dě ja̍u̍n wlì wlǔh-i. Nɛ̀ kmɔ̌ nyi̍ɔ̍ kli̍hgbɛ̍-a mu̍ sùàɛ̀n pa̍. Nɛ̀ u̍h-a mu̍ Nyi̍ɔ̍-a Jǔ jě ɔ̍ iě dě nǐgbanᵻ kɛ̍n naɛ dě ja̍u̍n wlì dǒ gbǐh ke tìh-a i̍ bɛ̌-ɛ ɛ̀ ku̍-a wɔ̍n-ɛ we̍.

³¹ Nɛ̀ dɔ̍gbɛ̍-a mu̍ wlu, wɛ̀ ɔ̍ iě ɔ̍ ǐnchɔ̀ blǔh kàɛ̀n nɛ-a nyìɛ̍-ɛ kɛ̍n i̍ dbo̍. Wɛ̀ i̍h iě Nyɔsoa-a chèɛ̀ tba̍ nyɔ̍ i̍ gbòe, sɔ dě blǔh-a siee la ìè dě dɛɛ we̍ mu̍.

Fei-tu̍-a cheǎn-a dɛ̍

³² “Tlo-tu̍ u̍h-a dǎɛ-a fei-ɛ, dǒ ɛ̍ pùn bo mɔ̀ iě dɛ̍ cheǎn-ɛ. Pò mɔ̀ jě ɛ̍ wlɔ̍nᵻ i̍h po̍ plɔ̀ᵻ wɛ̀ i̍h iě wa̍ wɛ̀-ɛ, nɛ̀ klǎᵻ wlè nɔɔ-a kɔǎn la̍ we̍.

³³ Nɛ̀ pò mɔ̀ jě ìh kli̍hgbɛ̍ la i̍h ja la̍ nɛ-ɛ, nɛ̀ mɔ̀ juo-o dɛ̍ i̍ ka ti̍ kɔǎn-a we̍ wɛ̀-ɛ. Ɛ̍ nɛ dǒ mɔ̀-a gbò wɔ̍i̍n wɛ̀.

³⁴ Bɔ̌ ǐn sèàɛ̍ mɔ̀ tìh-a taǐn wlùh, nyɔ̍ la ùh nɛ-a ka kmɔ̌-ɛ, u̍h se̍ mɛ̌ mu̍ te̍e̍ wɛ̀ ìh kli̍hgbɛ̍ la i̍h iě gbǎ.

³⁵ Blǔh ke ja̍u̍n-a tìh-a mu̍ i̍ sì, jɛ ǎn wlu̍ nɔ̀ɔ̍, ɛ̍ se̍ i̍ sì mu̍.

Nyɔ̍ se̍ ɛ̍ weɛ̍ ke ɛ̍ ti̍ juo

³⁶ “Weɛ̍ ke ti̍ Nyi̍ɔ̍-a Jǔ-a mu̍-a de̍ ji̍-ɛ, nyɔ̍ dɔɔ se̍ ɛ̍ juo. Nyɔsoa-a ǐnchɔ̀ nɛ-a dě ja̍i̍wlɔ̀-a chɛ̀-ɛ, i̍h se̍ ɛ̍ juo. Jǔ-a chɛ̀ wɔ̍ se̍ ɛ̍ juo ke. Jɛ Baa nɛ due gbài̍ bo ɔ̀ juo ti̍ ke weɛ̍ laa̍.

³⁷ Dɛ̍ ɛ̀ nɛ-a dǒ Nɔa-a ti̍ we̍-ɛ, ɛ̍ kɔn ba̍ bo ɛ̀ mu̍ nɛ ke dǒ Nyi̍ɔ̍-a Jǔ-a ji̍ la̍.

³⁸ Dɛ̍nu̍ɛ, ti̍ nǐ laa̍ ɛ̍ iě-a jǐ-ɛ, nɛ̀ nyɔ̍gbei-a di̍-e dɛ̍ i̍, u̍h-a nǎ. Nɛ̀ nynɔ̌gbaɔᵻ ke jɔ̍gbauᵻá tǐn-i blǐ. Ɛ̍ bo u̍h nɛ dǒ nu̍ la̍ wɛ̀ Nɔa pa̍ dě ɔ̍ blǎgbè klaa laa̍ di̍i̍.

³⁹ Jɛ dɛ̍ ɛ̀ mu̍-a nɛ-ɛ, u̍h se̍ ɛ̍ juo te̍e̍ wɛ̀ jǐ-nǐ ji̍, iě ɛ̍ gba̍ u̍h kli̍hgbɛ̍. Ɛ̀ laa̍ ɛ̍ kɔn ba̍ bo ɛ̀ mu̍ nɛ ke dǒ Nyi̍ɔ̍-a Jǔ-a ji̍ la̍.

⁴⁰ Nɛ̀ jɔ̍gbauᵻ sɔɔ̌n-a mu̍ dě klè sǐi, wɛ̀ due iě-e dǔ-iɛ, wɛ̀ ɔ̍ ba̍ iě sie.

⁴¹ Nɛ̀ nynɔ̌gbaɔᵻ sɔɔ̌n-a mu̍ dǒ dɛ̍ du̍ la̍ plɛɛn, wɛ̀ due iě-e dǔ-iɛ, iě due iě-o sie.

⁴² Ɛ̍ tìh-ɛ, mɔ̀ nu̍ mɔ̀-a chɛ̀-a nɛnɛ̌, dɛ̍nu̍ɛ, weɛ̍ mɔ̀-a Joi-a mu̍-a ja-a, mɔ̀ se̍ ɛ̍ juo.

⁴³ Jɛ dɛ̍ mɔ̀ iě-a juo-ɛ, ɛ̍ nu̍ pò gbò joi juo dɛ̍ i̍ de ti̍ jlǐ-nyɔ̍-a mu̍-a dě ɔ̍ we̍ gbò ji̍ maɔ̍-ɛ, nɛ̀ ɔ̍ se̍ nyinɔ̍ i̍ gbǎ mu̍ de wɛ̀ jlǐ-nyɔ̍-ɔ je̍e pa̍.

⁴⁴ Nɛ̀ɛ̍, mɔ̀ po̍ mɔ̀-a chɛ̀ gba̍a̍. Dɛ̍nu̍ɛ, ti̍ mɔ̀ se̍-a Nyi̍ɔ̍-a Jǔ-a tìh gbàɛ̀-ɛ, dǒ ɔ̍ mu̍ ji̍-i.

Wlì tè pòi̍ju la

⁴⁵ “Nyɔ̍we̍ bo ɔ̀ nu̍ wlì tè pòi̍ju wɛ̀ ɔ̀ flɔn di̍i̍ ɛ? Ɔ̍ kɔn kwa̍a̍ bo ɔ̍ dlǔtu si̍e̍ ɔ̍ gbò, wɛ̀ ɔ̍ iě ɔ̍ ba̍ᵻ pòi̍nynuu̍ di̍-dɛ̍ nyǐ pò ti̍ blaɛ i̍-ɛ.

⁴⁶ Nɛ̀ ti̍ ɔ̍ dlǔtu-a mu̍-a de̍ ji̍ wɛ̀ ɔ̍ iě ɔ̍ dbo̍ chɛ̀ nu̍ la̍ jɛɛ-ɛ, nɛ̀ pòi̍ju laa̍ ɔ̍ nmɔ i̍.

⁴⁷ Tìh-a taǐn ǎn sèàɛ̍ mɔ̀ wlùh, nɛ̀ ɔ̍ dlǔtu-a mu̍ ɔ̍ dǒ ɔ̍ kɔn-dɛ̍ᵻ kli̍hgbɛ̍ dlǔwèàì po̍.

⁴⁸ Jɛ pò gblɛ̍n-ɛ jii̍ nyni pòi̍ju laa̍ ɔ̍ dǎ ka dě ɔ̍ chɛ̀ we̍, ‘Ǎn dlǔtu la ɔ̍ wlè-o ji̍ la̍-a.’

⁴⁹ Wɛ̀ ɔ̍ iě ɔ̍ ba̍ᵻ pòi̍nynuu̍ bla̍, ɔ̍ ke nmɔ̍-a nu̍ nyɔ̍ iě dɛ̍ we̍ di̍-i u̍h iě nǎ-ɛ,

⁵⁰ nɛ̀ weɛ̍ ɔ̍ se̍-a gbàɛ̀-ɛ dǒ ɔ̍ dlǔtu-a mu̍ ji̍-i, ɛ̍ ke ti̍ ɔ̍ se̍-a wlùh kɛ̍n tè-ɛ ke.

⁵¹ Nɛ̀ ɔ̍ dlǔtu-a mu̍ ɔ̍ dě kàn gbèèɛ̀ po̍ dě nyɔ̍ ùh nɛ-a mɛɔ sɔɔ̌n wɔ̍ɔ̍n-ɛ nynɛ̌. Dě ɔ̍ mu̍ nɛ ɔ̍ iě fìn, ɔ̍ iě nynɛ̌ di̍ kìàǎnkìàǎn.”