Matio 19 - Ku̍o̍ Delee 1999

Jusu flɔn-ɛ nynɔ̌ kwlǎ sà dɛ we̍i̍

¹ Ti̍ Jusu wɔ̀-a ìh la bla̍-aɛ, iě ɔ̍ sɔ Kaladii fɔɔ wɛ̀ ɔ̍ mu̍ dě Judia fɔɔ, dě Jɔɔdɛn nǐ-a fɔ̌ dɛɛ we̍.

² Ɔ̍ wɔ̌an mu̍ tìh-ɛ, nyɔ̍ tlùgbei̍ wɔ̀ dǒ ɔ̍ de̍e̍, wɛ̀ ɔ̍ pǔh-i u̍h dě tà-a chɛ̀.

³ Wɛ̀ Fɛlesii nyɔ̍ ji̍ dǒ ɔ̍ we̍ iě u̍h-a tɛ̀n ɔ̍, u̍h la̍a̍, “Nyɔsoa-a telě la̍ ka nyɔ̍ jě-ɛ ɔ̍ nu̍ nynɔ̌ kwlǎ sà-a sǔh ae?”

⁴ Wɛ̀ Jusu la̍a̍, “Mɔ̀-ɔ se̍-a Nyɔsoa-a wlu̍ slè sàì ae? Ɛ̍ la̍ sɔ dě tɔ̀blɔ̍ɔ̍-ɛ, Nyɔsoa nu̍ nyi̍ɔ̍-a nynɔ̌ ke je̍ɔ̍.

⁵ Iě ɔ̍ la̍a̍, ‘Ɛ̍ tìh-ɛ, jɔ̍gbau-a mu̍ dǒ ɔ̍ de̍ ke ɔ̍ baa we̍-e sɔ, wɛ̀ ɔ̍ ke ɔ̍ nynɔ̌ iě i̍ tùi. Nɛ̀ u̍h nɛ-a sɔɔ̌n-ɛ, u̍h-a mu̍ nyɔ̍ due nu̍.’

⁶ Sɔ nɛ̀ u̍h se̍ sɔɔ̌n nɛ dɛ, jɛ nɛ̀ u̍h nɛ due wɛ̀. Ɛ̍ tìh-ɛ, dɛ̍ Nyɔsoa tùi-a i̍-ɛ, nyɔ̍ dɔɔ bɔ̌ ɛ̍ i̍ sèàɛ̍.”

⁷ Wɛ̀ u̍h tèle ɔ̍ i̍, u̍h la̍a̍, “Wɛ̀ dɛ̍nu̍ Mose-a telě la̍ nɛ̀ nyɔ̍ nyǐ nynɔ̌ chlǐh-dɛ̍ wɛ̀ nyɔ̍ iě ɔ̍ kwlǎ sà-a dǔ ɛ?”

⁸ Iě Jusu la̍a̍, “Mose sà mɔ̀ wlu̍ kɛ̍n mɔ̀ iě mɔ̀-a nynɔ̌ kwlǎ sà, dɛ̍nu̍ɛ, mɔ̀-a dlǔ kmu-i. Jɛ ɛ̍ se̍ dě tɔ̀blɔ̍ɔ̍ i̍ sɔ.

⁹ Bɔ̌ ǐn sèàɛ̍ mɔ̀ wlùh, nyɔ̍ ɔ̀ kɔn nynɔ̌ se̍-a nynɛ̌à nu̍ wɛ̀ ɔ̍ iě ɔ̍ kwlǎ sà, ɔ̍ iě nynɔ̌ dɔɔ blě-ɛ, nɛ̀ nynɛ̌à bo ɔ̍ nu̍.”

¹⁰ Wɛ̀ ɔ̍ kòà la̍a̍ dě ɔ̍ we̍, “Pò ɛ̍ nu̍ ka nɛ-ɛ dǒ nynɔ̌ ke kɔan nynɛ̌ we̍-ɛ, nɛ̀ ɛ̍ mu̍ jii̍ nmɔ nyɔ̍ bɔ̌ nynɔ̌ blě-ɛ sǔh kleǐn.”

¹¹ Jusu la̍a̍, “Ɛ̍ se̍ nyɔ̍ kli̍hgbɛ̍ ùh se̍ nǎ la i̍ gbɛ̍n-ɛ bɛ̌ɛ. Jɛ nyɔ̍ ùh Nyɔsoa nyǐ-a ɛ̍-ɛ, u̍h bo ùh bɛ̌ɛ ɛ̍ i̍ gbɛ̍n-ɛ.

¹² Nyɔ̍ duuh se̍ nynɔ̌ dɛ bɛ̌ɛ, dɛ̍nu̍ɛ, kǎ u̍h nɛ wɛ̀ u̍h wlǔh, wɛ̀ wlɔ̀ nyi̍ɔ̍ nu̍ la̍a̍n duuh-a tìh. Iě duuh-a tù Nyɔsoa-a kmɔ̌ wlu̍ i̍ kɔn tìh wɛ̀ u̍h se̍ nynɔ̌ blě. Nyɔ̍ ɔ̀ bɛ̌ɛ-a wlu̍ la i̍ gbɛ̍n-ɛ, nɛ̀ ɔ̍ gbɛ̍n ɛ̍ i̍.”

Jusu tè nynuu̍plìh sɔ̍n dlǔ

¹³ Wɛ̀ nyɔ̍gbei-a ja u̍h-a nynuu̍plìh dǒ Jusu we̍, ɔ̍ iě u̍h sɔ̍n dlǔ tè wɛ̀ ɔ̍ iě dǒ u̍h-a tàà ba̍le. Jɛ ɔ̍ kòà po̍ nyɔ̍ laa̍ bɔ̌ i̍ u̍h-u je̍e u̍h-a nynuu̍ dǒ Jusu we̍ ja.

¹⁴ Iě ɔ̍ la̍a̍, “Mɔ̀ bɔ̌ nynuu̍plìh la u̍h iě nɔ̌ ǐn we̍ ji̍. Mɔ̀ bɔ̌ u̍h wìè-i sà-a. Dɛ̍nu̍ɛ, nyɔ̍ ùh nɛ-a ka-a, u̍h bo ùh kɔn dǒ Nyɔsoa-a kmɔ̌ wlu̍ i̍ kɔn-ɛ we̍.”

¹⁵ Wɛ̀ ɔ̍ tè u̍h sɔ̍n dlǔ iě ɔ̍ dǔ mu̍-ɛ.

Ɛ̍ kma-a pàn-nyɔ̍ iě dǒ Nyɔsoa de̍e̍ gbǎ

¹⁶ Wɛ̀ jɔ̍gbau due ji̍ dǒ Jusu we̍ iě ɔ̍ tèle ɔ̍ i̍, ɔ̍ la̍a̍, “Dlǔtu, dɛ̍ chɛ̀ we̍ iě nu̍ wɛ̀ iě kmɔ̌ sie feɛ blě ɛ?”

¹⁷ Wɛ̀ Jusu la̍a̍, “Dɛ̍nu̍ àn tèle ǐn i̍ dɛ̍ chɛ̀ tìh ɛ? Nyɔ̍ due gbài̍ bo ɔ̀ nu̍ nyɔ̍ chɛ̀. Pò ìn ja pɔ̀n ìè kmɔ̌ sie feɛ blě-ɛ, nɛ̀ ìn jě Nyɔsoa-a telě dɛ̍ɛ̍.”

¹⁸ Wɛ̀ jɔ̍gbau la̍a̍, “Telě jihwe̍ ɛ?” Iě Jusu la̍a̍, “Bɔ̌ nyɔ̍ gbe̍ja̍a̍ po̍-ɛ, bɔ̌ nynɛ̌à nu̍-ɛ, bɔ̌ jlǐ-ɛ, bɔ̌ nyɔ̍ si̍h i̍ tùi-ɛ,

¹⁹ nɛ̀ ìn jě ìn de̍ ke ìn baa dɛ̍ɛ̍, nɛ̀ ìn jbɛɛ ìn pònyɔ̍-ɔ ka àn chɛ̀-ɛ.”

²⁰ Wɛ̀ jǔgbèlà laa̍ ɔ̍ la̍a̍, “Ǐn gbɛ̍n telě jih kli̍hgbɛ̍ la̍ nɔ̀ɔ̍ i̍ wɛ̀. Dɛ̍ dɛɛ we̍ sie-o iě nu̍ ɛ?”

²¹ Jusu la̍a̍, “Pò nàa̍ àn nu̍-dɛ̍ iě gblɛ̍ja̍i̍ wɛ̀-ɛ, nɛ̀ ìn mu̍ ìè àn kɔn-dɛ̍ᵻ kli̍hgbɛ̍ ple̍, ìè i̍h-a wlǐ nyɔ̍gbà nyɔ̍ nyǐ, nɛ̀ àn mu̍ pàn dě ja̍i̍wlɔ̀. Nɛ̀ ìn ji̍ ìè dǒ ǐn de̍e̍ gbǎ.”

²² Ti̍ jǔgbèlà laa̍ ɔ̍ wɔ̌n-a wlu̍ la-ɛ, sɔ ɔ̍ wlùh gbǎ seɔn-ɔ. Iě ɔ̍ mu̍, dɛ̍nu̍ɛ, ɔ̍ blě kɔn-dɛ̍ᵻ dɔu.

²³ Wɛ̀ Jusu la̍a̍ dě ɔ̍ kòà we̍, “Ɛ̍ se̍ pàɔ̀n, ɛ̍ mu̍ i̍ kma kaa̍ wɛ̀ pàn-nyɔ̍ iě dě Nyɔsoa-a kmɔ̌ wlu̍ i̍ kɔn-ɛ di̍i̍ gbǎ.

²⁴ Bɔ̌ ǐn gba̍ ɛ̍ kɛ̍n i̍ dɛ, ɛ̍ kma i̍ pàn-nyɔ̍ iě dě Nyɔsoa-a kmɔ̌ wlu̍ i̍ kɔn-ɛ di̍i̍ gbǎ, ɛ̍ sìì gbo̍ kɛ̍ɛ̍n bli-a dě mɛnɔ̍-a gbɔ̀ di̍i̍ jii-ɛ.”

²⁵ Ti̍ ɔ̍ kòà wɔ̌n-a ìh la-ɛ, sɔ ɛ̍ kèle u̍h i̍ kaa̍, iě u̍h tèle tìh i̍, u̍h la̍a̍, “Nɛ̀ nyɔ̍we̍ bo ɔ̀ mu̍-o pǔh ɛ?”

²⁶ Wɛ̀ Jusu gbɛ̀n u̍h ja̍ iě ɔ̍ la̍a̍, “Dǒ nyi̍ɔ̍ we̍ nɔ̀ɔ̍, nɛ̀ ɛ̍ kma nu̍-ɛ. Jɛ dǒ Nyɔsoa we̍ nɔ̀ɔ̍, dɛ̍ᵻ kli̍hgbɛ̍ se̍ nu̍-ɛ kma.”

²⁷ Wɛ̀ Pitɛ la̍a̍ dě ɔ̍ we̍, “Gbɛ̀n-e, à tǎli dɛ̍ᵻ kli̍hgbɛ̍ i̍ wɛ̀ à gbǎ dǒ ìn de̍e̍. Nɛ̀ dɛ̍ we̍ à mu̍-o jě ɛ?”

²⁸ Wɛ̀ Jusu la̍a̍ dě u̍h we̍, “Tìh-a taǐn àn sèàɛ̍ mɔ̀ wlùh, ti̍ dɛ̍ᵻ kli̍hgbɛ̍-a mu̍-a delee i̍ gbǎ-ɛ, nɛ̀ Nyi̍ɔ̍-a Jǔ-a mu̍ i̍ tè dǒ ɔ̍ nynɛ̌ gbalǎ kɛ̍n dě ɔ̍ tìh-a i̍ bɛ̌-ɛ di̍i̍. Nɛ̀ mɔ̀ɔ̍ ùh gbǎ-a dǒ ǐn de̍e̍-ɛ, wɛ̀ mɔ̀ iě dǒ nynɛ̌ gbalǎᵻá pùè jɔ̌ sɔɔ̌n kɛ̍n i̍ tìèe̍ ke, wɛ̀ mɔ̀ iě Eslɔɛ nyɔ̍-a chɛ̌tu-a pùè jɔ̌ sɔɔ̌n wlu̍ i̍ kɔn.

²⁹ Nyɔ̍-o-nyɔ̍ ɔ̀ mu̍-a ɔ̍ gbòᵻ o, de̍di̍i̍ᵻ jɔ̍gbauᵻ o, de̍di̍i̍ᵻ nynɔ̌gbaɔᵻ o, de̍ o, baa o, nynuu̍ o, klèᵻ o, ɔ̍ mu̍-a i̍h-a dɛ̍ i̍ tǎli ǎn tìh-ɛ, nɛ̀ ɔ̍ mu̍ i̍h-a gbɔ̍ᵻá kmɛ jě dǒ kɛ̍n. Wɛ̀ ɔ̍ iě kmɔ̌ sie feɛ blě dɛ.

³⁰ Jɛ nyɔ̍ dɔu ùh wɔ̀-a ka nya̍-ɛ, u̍h-a mu̍ de̍ wɔ̀. Wɛ̀ juh wɔ̀-a ka de̍-ɛ, u̍h iě nya̍ wɔ̀.”