Matio 17 - Ku̍o̍ Delee 1999

Jusu-a sàɛ̀-ɛ

¹ Wǐh mɛ̀o̍ sì-aɛ, wɛ̀ Jusu dǔ Pitɛ ke Chiin ke ɔ̍ de̍di̍i̍ Chɔɔn. Iě ɔ̍ gba̍ u̍h dě tlu̍h tɔ̀ɔ̀n due dlugbɔ̌. U̍h nɛ due ke ɔ̍ nɛ deě.

² U̍h iě-ae gbɛ̀n-ɛ, nɛ̀ ɔ̍ sàɛ̀ wɛ̀ dǒ u̍h jlǐhwai. Nɛ̀ ɔ̍ jua̍a̍-a fa̍n-ɛ ka jlǔh-ɛ, iě ɔ̍ jlii̍ nɛ pɔ̀ɔ̀ ka kǒ gbo̍-ɛ.

³ Dǒ u̍h jě-e Mose ke Ilaɛja, nɛ̀ u̍h ke Jusu-a chɛ̍n sɔ̀ìn.

⁴ Wɛ̀ Pitɛ la̍a̍ dě Jusu we̍, “Joi, ɛ̍ nmɔ jii̍ wɛ̀ à nɛ da̍a. Pò ɛ̍ ja ìn gbǐh po̍ mu̍-ɛ, nɛ̀ ǎn mu̍ wɛ̀ɛ̀ sɔ̍n wlù ta̍a̍n po̍, ìn kɔn due, Mose kɔn due, nɛ̀ Ilaɛja kɔn due.”

⁵ Ɔ̍ nɛ dǒ wlu la̍ sǔh wɛ̀ nǐgban ji̍ iě ɛ̍ kaɛn dǒ u̍h dlǔwèàì. Dǒ wlu̍ sɔ-ɛ dě ɛ̍ di̍i̍, ɛ̍ la̍a̍, “Ɔ̀ la ǎn tìh kma Jǔ bo, ǎn wlùh tè i̍ dǒ ɔ̍ we̍. Mɔ̀ tù ɔ̍ wlu̍ dounᵻ.”

⁶ Ti̍ ɔ̍ kòà wɔ̌n-a wlu̍ la-ɛ, sɔ dɛ̍ wa̍ u̍h we̍ sǔh, iě u̍h chlìi i̍ dǒ bloɔ̍.

⁷ Jɛ Jusu ji̍-aɛ, iě ɔ̍ tǔh u̍h i̍, ɔ̍ la̍a̍, “Mɔ̀ bɔ̌ faɔn ple̍-ɛ, mɔ̀ sɔ bloɔ̍.”

⁸ U̍h dǔ-a dlǔ ja̍i̍-ɛ, nɛ̀ Jusu nɛ due bo u̍h-a jě la̍.

⁹ U̍h-a sɔ-a la̍ dě tlu̍h kɛ̍n-ɛ, wɛ̀ Jusu tù u̍h slɛ̌n, ɔ̍ la̍a̍, “Dɛ̍ ɛ̀ mɔ̀ jě-a tiɔ dě tlu̍h dlugbɔ̌-ɛ, mɔ̀ bɔ̌ nyɔ̍ dɔɔ wlùh sèàɛ̍ te̍e̍ wɛ̀ Nyi̍ɔ̍-a Jǔ iě-e wlǔh o.”

¹⁰ Wɛ̀ ɔ̍ kòà tèle ɔ̍ i̍, u̍h la̍a̍, “Dɛ̍nu̍ u̍h la̍ Ilaɛja bo ɔ̀ kɔn ɔ̀ iě ji̍ sàì ɛ?”

¹¹ Ɔ̍ la̍a̍, “I̍i̍n, kǎ ɛ̍ nɛ. Ilaɛja-a mu̍ ji̍ wɛ̀ ɔ̍ iě dɛ̍ᵻ kli̍hgbɛ̍ gba̍a̍ po̍.

¹² Jɛ ǎn sèàɛ̍ mɔ̀ wlùh, Ilaɛja ji̍ wɛ̀ se̍e̍, iě u̍h se̍ ɔ̍ i̍ juo. Wɛ̀ u̍h nu̍ ɔ̍ kà i̍ ka u̍h-a pɔ̀n-a u̍h iě-a ɔ̍ kà i̍ nu̍-ɛ nu̍-ɛ. Kǎ Nyi̍ɔ̍-a Jǔ-a mu̍ tìh jě-ɛ nu̍ ke dě u̍h kwa̍a̍.”

¹³ Dɛ̍ ɔ̍ bla̍-aɛ, sɔ ɔ̍ kòà juo-o dɛ̍ i̍ ka ɔ̍ se̍-a Ilaɛja dǎ-a, jɛ Chɔɔn ɔ̀ po̍-a nyɔ̍ nǐ dlǔ-ɛ bo ɔ̍ dǎ-aɛ.

Jusu pǔh-i dbaǎdɛ-a nu̍ jǔwɛ

¹⁴ Ti̍ u̍h ji̍-a dǒ nyɔ̍ tlùgbei̍ we̍-ɛ, jɔ̍gbau due ji̍ dǒ Jusu we̍, wɛ̀ ɔ̍ chlìi i̍ dǒ ɔ̍ jǔ.

¹⁵ Ɔ̍ la̍a̍, “Nyɔ̍ klaa, jě ǎn jǔ la wɔɛ lě. Dbaǎdɛ-a nu̍ ɔ̍-ɛ, sɔ ɛ̍ sàɛ̀ ɔ̍ jua̍i̍ kaa̍. Ɛ̍ po̍ ɔ̍ jlǐh chɛ̍chɛ̍, ɛ̍ ke dě niɔ̍ ke.

¹⁶ Ǐn ja ɔ̍ da̍a àn kòà we̍ jɛ u̍h se̍ ɔ̍ pǔh-iɛ bɛ̌ɛ.”

¹⁷ Wɛ̀ Jusu la̍a̍, “Mɔ̀ɔ̍ ti̍laa nyɔ̍ la, mɔ̀ se̍ wlùh gbaɛ blě. Mɔ̀-a nu̍ tba̍ɛ kɛ̍n i̍. Ti̍ tìèwe̍ iě da̍a mɔ̀ we̍ nu̍ ke̍ gbɔ̀ɔ ɛ? Ka iě mɔ̀-a tìh nu̍ ɛ? Mɔ̀ ja jǔwɛ laa̍ nɔ̌ ǐn we̍.”

¹⁸ Wɛ̀ ɔ̍ sèàɛ̍ jeědih laa̍ wlùh ɛ̍ iě dǒ jǔwɛ de̍e̍ sɔ, iě ɛ̍ sɔ dǒ ɔ̍ de̍e̍, wɛ̀ ɔ̍ pǔh dǒ tàdùè laa̍.

¹⁹ Wɛ̀ ɔ̍ kòà chɛn gbɔ̍i̍ u̍h mu̍ dě ɔ̍ we̍, iě u̍h tèle ɔ̍ i̍. U̍h la̍a̍, “Dɛ̍nu̍ wɛ̀ à nɔ̀ɔ̍, à se̍ jeědih dǒ jǔwɛ la de̍e̍ sà-a bɛ̌ɛ ɛ?”

²⁰ Iě Jusu la̍a̍ dě u̍h we̍, “Dɛ̍nu̍ɛ, mɔ̀-a Nyɔsoa wlùh gbaɛ bo ɛ̀ se̍ i̍ ku̍ kaa̍ dɛbo. Jɛ tìh-a taǐn ǎn sèàɛ̍ mɔ̀ wlùh, pò mɔ̀ blě wlùh gbaɛ-a chɛ̀ ɛ̍ wàn i̍ ka majlɛkɛ jɔɛ̍-ɛ, nɛ̀ pò mɔ̀ nàa̍ dě tlu̍h la we̍ sɔ da̍a ìè de̍à mu̍-ɛ, nɛ̀ ɛ̍ mu̍ mu̍. Nɛ̀ dɛ̍ se̍ kmu mu̍ dǒ mɔ̀ we̍. [

²¹ Jeědih kaɛn la dɛ̍ dɛɛ se̍ ɛ̍ klà sà, ba̍le-ɛ ke jlǔh po̍-ɛ due gbài̍ bo ìh sà ɛ̍ klà.]”

Jusu gba̍ ɔ̍ mɛ̌ɛ dɛ kɛ̍n i̍

²² Ti̍ Jusu ke ɔ̍ kòà gbǎ-a tàdùè dě Kaladii fɔɔ-ɛ, wɛ̀ ɔ̍ la̍a̍ dě u̍h we̍, “Nyi̍ɔ̍-a Jǔ-a mu̍ kwlǎ sà-ɛ dě nyɔ̍gbei kwa̍a̍.

²³ Nɛ̀ u̍h-a mu̍ ɔ̍ dbǎ, nɛ̀ pò wǐh ta̍a̍n sì-ɛ, wɛ̀ ɔ̍ iě-e wlǔh dode̍.” Sɔ ɛ̍ po̍ ɔ̍ kòà-a wlùh dě de̍ i̍ kaa̍.

Jusu bla̍ dɛ̍ dǒ Nyɔsoa-a wɛɛ sà gbò-a taa̍sìh we̍

²⁴ Ti̍ Jusu ke ɔ̍ kòà sǐ-a wlɔ̀ i̍ dǒ Kepanium-ɛ, wɛ̀ jɔ̍gbauᵻ ùh-a sà-a Nyɔsoa gbò-a taa̍sìh-ɛ, iě u̍h tèle Pitɛ i̍, u̍h la̍a̍, “Na̍a̍, mɔ̀-a dlǔtu la ɔ̍ pɛ̌ɛ wɛɛ sà gbò-a taa̍sìh ke lě?”

²⁵ Pitɛ la̍a̍, “I̍i̍n, kǎ ɛ̍ nɛ.” Ti̍ Pitɛ mu̍-a dě de̍ gbò-ɛ, Jusu nu̍ sàǐtòò nyɔ̍ ɔ̀ wlu. Ɔ̍ la̍a̍, “Pitɛ, ka ɛ̍ nɛ ke dě ìn wlùh we̍ ɛ? Blǔh baaᵻ nɛ-a da̍a kmɔ̌ la we̍-ɛ, nyɔ̍ kɔn kwa̍a̍ u̍h-a gbɛ̍n-ɛ taa̍sìh ɛ? Dě u̍h-a chɛ̀-a nynuu̍ kwa̍a̍ ɛɛ, àe̍e̍ dě nyɔ̍ duuh kwa̍a̍?”

²⁶ Pitɛ la̍a̍, “Dě nyɔ̍ duuh kwa̍a̍ bo.” Wɛ̀ Jusu la̍a̍, “Nɛ̀ u̍h-a nynuu̍ se̍ kɔn u̍h iě i̍h pɛ̌ɛ.

²⁷ Jɛ à-a je̍e dɛ̍ nu̍ ɛ̍-ɛ je̍e nyɔ̍ wɔ̍i̍n nyaɛ. Ɛ̍ tìh-ɛ, mu̍ ìè kɔɛ̍n po̍ dě pɛ̍nu̍ klaa kɛ̍n. Smìɛ̍ àn mu̍-a sà sàǐtòò-ɛ, nɛ̀ ìn gbɛ̀n dě ɛ̍ wɔ̍ɔ̍n wliɛ̍ àn mu̍-ae jě-ɛ, ɛ̍ mu̍ ìn ke ǐn ke à taa̍sìh pɛ̌ɛ wɛ̀. Nɛ̀ ìn gba̍ ɛ̍ u̍h, à nàɛ̀ taa̍sìh bo.”