Pɔ̀n Chɛ̀ Luu To-a La 9 - Ku̍o̍ Delee 1999

Jusu dbo̍ ɔ̍ kòà-a pùè jɔ̌ sɔɔ̌n

¹ Jusu dǎ ɔ̍ kòà-a pùè jɔ̌ sɔɔ̌n laa̍ iě ɔ̍ po̍ u̍h tàdùè. Wɛ̀ ɔ̍ nyǐ u̍h gbǐh, iě ɔ̍ nyǐ u̍h tùn u̍h iě nyɔ̍ jeědih kaɛn kaɛn kli̍hgbɛ̍ de̍e̍ i̍ sà u̍h iě nyɔ̍ɔ-a wɛ̌ᵻ bɔ̌-ɛ.

² Wɛ̀ ɔ̍ dbo̍ u̍h u̍h iě Nyɔsoa-a kmɔ̌ wlu̍ i̍ kɔn tìh bla̍, wɛ̀ u̍h iě wɛ̌ᵻ nyɔ̍ pǔh-i.

³ Iě ɔ̍ la̍a̍ dě u̍h we̍, “Mɔ̀ ja mu̍-ɛ, mɔ̀ bɔ̌ dɛ̍-o-dɛ̍ gba̍-a. Mɔ̀ bɔ̌ kɔu̍ gba̍-a. Mɔ̀ bɔ̌ gbèèkǔ ke di̍-dɛ̍ gba̍-a. Mɔ̀ bɔ̌ wlǐ gba̍-a, nɛ̀ mɔ̀ bɔ̌ wola̍ sie gbɔ̍i̍ gba̍-a ke.

⁴ Gbò kɔn di̍i̍ mɔ̀-a mu̍-a paɛ-ɛ, mɔ̀ bɔ̌-e chlà-a wɛ̀ mɔ̀ iě dǒ wlɔ̀ laa̍ di̍i̍ sɔ.

⁵ Wlɔ̀ kɔn di̍i̍ u̍h se̍-a mɔ̀-a tìh i̍ gbɛ̍n-ɛ mu̍-ɛ, pò mɔ̀ ja doǒ sɔ-ɛ, nɛ̀ mɔ̀ gbàbo blǔh bu̍hᵻ sɔ̀n i̍, wɛ̀ ɛ̍ iě ɛ̍ to ka tìh tè-a dǒ u̍h dlǔ i̍-ɛ.”

⁶ Iě u̍h sɔ-ɔ, u̍h mu̍ wlɔ̀ᵻ gbàɛ̀ di̍i̍ i̍ u̍h-a bla̍ pɔ̀n chɛ̀-a tìh, wɛ̀ u̍h-a pǔh-i nyɔ̍ tà kli̍hgbɛ̍.

Jusu-a sèò-a nu̍ Ɛlo

⁷ Ɛlo ɔ̀ nu̍-a Kaladii nyɔ̍-a dlǔtu-ɛ, ti̍ ɔ̍ wɔ̌n-a dɛ̍ᵻ kli̍hgbɛ̍ ìh-a nɛ-aɛ, sɔ ɔ̍ se̍ dɛ̍ ɔ̍ iě-a nu̍-ɛ juo. Dɛ̍nu̍ɛ, nyɔ̍ duuh la̍ Chɔɔn bo ɔ̀ wlǔh-e.

⁸ Iě duuh la̍ Ilaɛja bo ɔ̀ ji̍ de̍. Wɛ̀ duuh la̍ Nyɔsoa-a tu̍owli po̍ nyɔ̍ nɛ-a tɛin-ɛ, u̍h-a due bo ɔ̀ wlǔh-e.

⁹ Ɛlo la̍a̍, “Ǐn chɛ̍n Chɔɔn nɔ̀ɔ̍ dlǔ i̍. Jɛ nɛ̀ nyɔ̍we̍ kɔn pùn bo ǎn wɔ̌n-ɛ ìh kaɛn la dɛ ɛ?” Sɔ ɔ̍ fɔ̀n la̍ dɛ̍ we̍ sǔh ɔ̍ iě Jusu jě.

Jusu nyǐ nyɔ̍-a wlǔ m̀m̌ di̍-dɛ̍

¹⁰ Gba̍tòà ji̍-a de̍-ɛ, dɛ̍ᵻ u̍h nu̍-a i̍-ɛ, wɛ̀ u̍h po̍ i̍h-a kunǎ dě Jusu we̍. Iě ɔ̍ dǔ u̍h-u, wɛ̀ u̍h-a sǔh chɛn gbɔ̍i̍ u̍h-a mu̍ wlɔ̀ u̍h-a dǎɛ-ɛ Bɛseida-a wlì i̍.

¹¹ Nyɔ̍ tlùgbei̍ juo-ao dɛ̍ i̍-ɛ, iě u̍h mu̍ ɔ̍ kɛ̍n i̍. Wɛ̀ ɔ̍ gbɛ̍n u̍h i̍, iě ɔ̍ bla̍ Nyɔsoa-a kmɔ̌ wlu̍ i̍ kɔn tìh dě u̍h we̍. Wɛ̀ ɔ̍ pǔh-i nyɔ̍ ùh-a poa-ɛ.

¹² Flì-a wlǎ-a la̍ i̍-ɛ, iě ɔ̍ kòà-a pùè jɔ̌ sɔɔ̌n laa̍ u̍h ji̍ dǒ ɔ̍ we̍. U̍h la̍a̍, “Dbo̍ nyɔ̍ dɔu la de̍ i̍ u̍h iě wlɔ̀ᵻ gbàɛ̀ ke gbùlòᵻ nɛ-a de̍ i̍-ɛ di̍i̍ i̍ mu̍, wɛ̀ u̍h iě pɛ̌na̍ ke di̍-dɛ̍ i̍ pɔ̀n. Dɛ̍nu̍ɛ, tà à nɛ-aɛ, nɔ̌ tɛn-ɛ.”

¹³ Jɛ Jusu la̍a̍ dě u̍h we̍, “Mɔ̀ɔ̍ bo ùh iě u̍h di̍-dɛ̍ nyǐ u̍h iě di̍.” U̍h la̍a̍, “À blě blèe̍ gba̍nᵻ m̀m̌ ke smìi̍ sɔɔ̌n gbài̍. Pò à ja di̍-dɛ̍ᵻ tɛ̀n mu̍ dǒ nyɔ̍ kli̍hgbɛ̍ la we̍ nɔ̀ɔ̍-ɛ, nɛ̀ ɛ̍ kɔn tɛ̀ à sà-o.” (

¹⁴ Jɔ̍gbauᵻ ùh nɛ-a doǒ-ɛ, u̍h bɛ̌ɛ wlǔ m̀m̌ (5,000) nu̍-ɛ.) Wɛ̀ Jusu la̍a̍ dě ɔ̍ kòà we̍, “Mɔ̀ nu̍ ɛ̍ nyɔ̍ la u̍h-a pǔnᵻ pǔnᵻ iě i̍ tìèe̍, ɛ̍ tù nyɔ̍-a kwela m̀m̌-ɛ, u̍h iě pǔn due nu̍.”

¹⁵ Wɛ̀ u̍h nu̍ ɛ̍, iě nyɔ̍ kli̍hgbɛ̍ tìèe̍ i̍.

¹⁶ Wɛ̀ Jusu dǔ blèe̍ gba̍nᵻ m̀m̌ ke smìi̍ sɔɔ̌n laa̍, iě ɔ̍ gbɛ̀n dě ja̍i̍, wɛ̀ ɔ̍ po̍ Nyɔsoa tlɔ̌. Wɛ̀ ɔ̍ chɛɛn blèe̍ ke smìi̍ laa̍ i̍. Iě ɔ̍ nyǐ i̍h ɔ̍ kòà u̍h iě i̍h nyɔ̍ laa̍ jii̍ gblè.

¹⁷ Nyɔ̍ kli̍hgbɛ̍ di̍ dɛ̍ wɛ̀ u̍h dbo̍. U̍h wɔ̀-aɛ, iě ɔ̍ kòà tɛ̌n blèe̍ chɛblih sie-a i̍-ɛ, iě i̍h nu̍ taaᵻá pùè jɔ̌ sɔɔ̌n.

Pitɛ sèàɛ̍ Jusu-a tìh we̍ i̍

¹⁸ Dǒ ti̍ due di̍i̍ nɛ̀ Jusu nɛ due-a ba̍le-e, nɛ̀ ɔ̍ kòà tè ɔ̍ pùn. Iě ɔ̍ tèle u̍h i̍, ɔ̍ la̍a̍, “Nyɔ̍gbei la̍ mɔ̍ nyɔ̍we̍ ɛ?”

¹⁹ Wɛ̀ u̍h la̍a̍, “Nyɔ̍ duuh la̍ mɔ̀ Chɔɔn ɔ̀ po̍-a nyɔ̍ nǐ dlǔ-ɛ. Iě duuh la̍ mɔ̀ Ilaɛja, wɛ̀ duuh la̍ mɔ̀ Nyɔsoa-a tu̍owli po̍ nyɔ̍ nɛ-a tɛin-ɛ, u̍h-a due bo ɔ̀ wlǔh-e.”

²⁰ Wɛ̀ Jusu la̍a̍ dě u̍h we̍, “À wɔ̌n dě mɔ̀ we̍ ke, mɔ̀ la̍ mɔ̍ nyɔ̍we̍ ke ɛ?” Iě Pitɛ la̍a̍, “Mɔ̀ Nyɔsoa-a Chèɛ̀ Tba̍ju.”

²¹ Jɛ Jusu nɛ̌ɛ u̍h wlu̍ dounᵻ i̍ kaa̍ u̍h-u je̍e nyɔ̍-o-nyɔ̍ wlùh sèàɛ̍.

Jusu sà ɔ̍ tìh jě-ɛ ke ɔ̍ mɛ̌ɛ tìh i̍

²² Jusu la̍a̍, “Nyi̍ɔ̍-a Jǔ kɔn ɔ̍ iě jua̍i̍ sàɛ̀ dɛ̍blɔ, wɛ̀ nyɔ̍ klaaᵻ ke, Nyɔsoa-a slaǎ sà nyɔ̍ klaaᵻ ke telě nǎ poe nyɔ̍ iě ɔ̍ chla tba̍. Nɛ̀ ɔ̍ mu̍ dbǎ-ɛ, jɛ pò wǐh ta̍a̍n sì-ɛ, nɛ̀ ɔ̍ mu̍-e wlǔh.”

²³ Wɛ̀ ɔ̍ la̍a̍ dě u̍h kli̍hgbɛ̍ we̍, “Pò nyɔ̍-o-nyɔ̍ ja pɔ̀n ɔ̍ iě dǒ ǐn de̍e̍ gbǎ-ɛ, nɛ̀ ɔ̍ tǎli ɔ̍ chɛ̀-a wlùh dɛ̍ᵻ i̍, ka sɔ̀n-a mu̍-a sɛ̀n-ɛ, ɔ̍ iě ɔ̍ naɛ gbàɛ̍ kɛ̍n i̍ tu̍-u dǔ, wɛ̀ ɔ̍ iě dǒ ǐn de̍e̍ gbǎ.

²⁴ Dɛ̍nu̍ɛ, nyɔ̍ jɔ pɔ̀n-a ɔ̍ feɛ sèìe-ɛ i̍-ɛ, nɛ̀ ɛ̍ mu̍ ɔ̍ kwa̍ mǎ-ɛ. Jɛ nyɔ̍ jɔ se̍-a ɔ̍ feɛ sèìe mu̍ ǎn tìh-ɛ, nɛ̀ ɔ̍ mu̍ ɛ̍ sèìe.

²⁵ Pò nyɔ̍ blě dɛ̍ᵻ kli̍hgbɛ̍ da̍a kmɔ̌ la we̍ wɛ̀ ɔ̍ iě ɔ̍ feɛ mǎ-ɛɛ, nɛ̀ dɛ̍ ɛ̍ mu̍ ɔ̍-o po̍ ɛ?

²⁶ Nyɔ̍-o-nyɔ̍ ɔ̀ mu̍-a ǐn ke ǎn nǎ poe wlu̍ tɛ̀n i̍ ple̍-eɛ, nɛ̀ ti̍ Nyi̍ɔ̍-a Jǔ-a mu̍-a ji̍ dě ɔ̍ tìh-a i̍ bɛ̌-ɛ di̍i̍-ɛ, ɛ̍ ke dě ɔ̍ Baa Nyɔsoa ke ɔ̍ ǐnchɔ̀ naɛ tìh-a i̍ bɛ̌-ɛ di̍i̍-ɛ, nɛ̀ ɔ̍ mu̍ nyɔ̍ laa̍ tɛ̀n i̍ ple̍-e ke.

²⁷ Tìh-a taǐn ǎn sèàɛ̍ mɔ̀ wlùh, nyɔ̍ duuh nyna i̍ da̍a u̍h se̍ mɛ̌ mu̍ te̍e̍ wɛ̀ u̍h iě Nyɔsoa-a kmɔ̌ wlu̍ i̍ kɔn-ɛ jě.”

Jusu sàɛ̀-ɛ

²⁸ Jusu wɔ̀-a ìh la bla̍-aɛ, ɛ̍ bɛ̌ɛ wǐh mɛ̀ta̍a̍n nu̍-ɛ, wɛ̀ ɔ̍ dǔ Pitɛ ke Chɔɔn ke Chiin, iě ɔ̍ gba̍ u̍h dě tlu̍h kɛ̍n ɔ̍ iě ba̍le.

²⁹ Ɔ̍ nɛ-a dǒ ba̍le la̍-ɛ, wɛ̀ ɔ̍ jua̍a̍ sàɛ̀, iě ɔ̍ jlii̍ nɛ pɔ̀ɔ̀ ka kǒ gbo̍-ɛ.

³⁰ Dǒ-o bo Mose ke Ilaɛja chɛ̍n-ɛ sɔ̀ìn dě ɔ̍ we̍.

³¹ U̍h jii dě tìh-a i̍ bɛ̌-ɛ di̍i̍, iě u̍h chɛ̍n sɔ̀ìn dě Jusu we̍ dǒ ka ɔ̍ mu̍-a mɛ̌ dě Juluslɛn wɛ̀ ɛ̍ iě-a Nyɔsoa-a wlu̍ kɛ̀ǐn po̍-ɛ.

³² Nɛ̀ Pitɛ ke ɔ̍ ba̍ᵻ laa̍ u̍h-a mɔ̌-ɛ. U̍h wlǔh-a nyinɔ̍ i̍-ɛ, wɛ̀ u̍h jě Jusu-a tìh-a i̍ bɛ̌-ɛ ke jɔ̍gbauᵻ sɔɔ̌n ùh ke ɔ̍ nyna-a i̍-ɛ.

³³ Jɔ̍gbauᵻ laa̍ u̍h-a sɔ-a la̍ dǒ Jusu we̍-ɛ, iě Pitɛ la̍a̍ dě ɔ̍ we̍, “Dlǔtu, ɛ̍ nmɔ jii̍ wɛ̀ à nɛ da̍a. Bɔ̌ à po̍ wɛ̀ɛ̀ sɔ̍n wlù ta̍a̍n, ìn kɔn due, Mose kɔn due, nɛ̀ Ilaɛja kɔn due.” Jɛ nɛ̀ ɔ̍ se̍ dɛ̍ ɔ̍ bla̍-a juo.

³⁴ Ɔ̍ nɛ dǒ wlu la̍ sǔh wɛ̀ nǐgban ji̍ iě ɛ̍ kaɛn dǒ u̍h dlǔwèàì. Sɔ ɛ̍ po̍ kòà laa̍ faɔn.

³⁵ Dǒ wlu̍ sɔ-ɛ dě nǐgban laa̍ di̍i̍. Ɛ̍ la̍a̍, “Ɔ̀ la ǎn Jǔ ǐn tba̍-a chèɛ̀-ɛ bo. Mɔ̀ tù ɔ̍ wlu̍ dounᵻ.”

³⁶ Wlu̍ la ɛ̍ wɔ̀-a wlu-ɛɛ, sɔ Jusu nɛ due bo u̍h-a jě la̍. Dɛ̍ Jusu-a kòà jě-aɛ, u̍h se̍ nyɔ̍ wɛ-a chɛ̀ slǎn bla̍ dǒ ti̍ laa̍ di̍i̍.

Jusu pǔh-i jǔwɛ jeědih nɛ-a de̍e̍-ɛ

³⁷ Sɔ̀n sɛ̀n-aɛ, wɛ̀ Jusu ke ɔ̍ kòà ta̍a̍n laa̍ u̍h sɔ dě tlu̍h kɛ̍n. Iě nyɔ̍ tlùgbei̍ jǎɛ ɔ̍ i̍.

³⁸ Wɛ̀ jɔ̍gbau due wǐ dě nyɔ̍ laa̍ nynɛ̌, ɔ̍ la̍a̍, “Dlǔtu, ǎn ba̍le m, gbɛ̀n dǒ ǎn jǔ la we̍ i̍ lě. Ɔ̍ nɛ due gbài̍ ǐn blě wa.

³⁹ Pò jeědih sǐ ɔ̍-ɛ, nɛ̀ ɔ̍ wǐi i̍ ka kleǐn, iě ɔ̍ slɛ̌ɛ tàɔn, wɛ̀ fùǔ-a tè ɔ̍ wɔ̍i̍n. Nɛ̀ ɛ̍ tba̍-ɛ ɔ̍ dɛ̍ᵻ i̍. Ɛ̍-ɛ wɔ̌n-ɛ ɔ̍ i̍ tǎli tìh i̍.

⁴⁰ Ǐn ba̍le àn kòà u̍h iě ɛ̍ dǒ ɔ̍ de̍e̍ sà, jɛ u̍h se̍ ɛ̍ bɛ̌ɛ.”

⁴¹ Wɛ̀ Jusu la̍a̍, “Mɔ̀ɔ̍ ti̍laa nyɔ̍ la, mɔ̀ se̍ wlùh gbaɛ blě. Mɔ̀-a nu̍ tba̍ɛ kɛ̍n i̍. Ti̍ tìèwe̍ iě da̍a mɔ̀ we̍ nu̍ ke̍ gbɔ̀ɔ ɛ? Ka iě mɔ̀-a tìh nu̍ ɛ? Ja àn jǔ laa̍ nɔ̀ɔ̍.”

⁴² Ɔ̍ ji̍-a la̍-ɛ, iě jeědih sǐ ɔ̍-ɔ. Wɛ̀ ɔ̍ kà i̍ dǒ bloɔ̍, iě ɔ̍ slɛ̌ɛ tàɔn. Jɛ Jusu wlu-i jeědih laa̍ we̍, iě ɔ̍ pǔh-i jǔwɛ laa̍. Wɛ̀ ɔ̍ sà ɔ̍ kwlǎ dě ɔ̍ baa we̍.

⁴³ Sɔ Nyɔsoa-a wɔ̍n ku̍ gbǐh wlǔh i̍ nyɔ̍ kli̍hgbɛ̍ de̍e̍. Ìh kli̍hgbɛ̍ Jusu nu̍-aɛ, i̍h flɔn-ɛ nyɔ̍ kli̍hgbɛ̍ wɔ̍n. U̍h nɛ dǒ i̍h-a wlùh i̍ pu̍e̍e la̍ sǔh, iě ɔ̍ la̍a̍ dě ɔ̍ kòà we̍,

Jusu sà ɔ̍ mɛ̌ɛ tìh i̍ dɛ

⁴⁴ “Mɔ̀ tù dɛ̍ ǎn ji̍-a mɔ̀ wlùh sèàɛ̍ la̍-ɛ dounᵻ. Nyi̍ɔ̍-a Jǔ-a mu̍ kwlǎ sà-ɛ dě nyɔ̍ɔ kwa̍a̍.”

⁴⁵ Jɛ dɛ̍ ɔ̍ bla̍-aɛ, u̍h se̍ ɛ̍ we̍i̍ wɔ̌n. Ɛ̍ flɔ̍nwlùh se̍ u̍h nyǐ-ɛ, iě u̍h se̍ ɛ̍ gbɔ̀ juo. Wɛ̀ u̍h-a ple̍ faɔn ke u̍h iě ɔ̍ i̍ tèle dǒ ɛ̍ we̍.

Nyɔ̍ bo ɔ̀ ku̍ wɔ̍n ɛ?

⁴⁶ Wɛ̀ wɔ̍ɔ̍n i̍ sà-a wlǔh ja̍ dǒ Jusu-a kòà nynɛ̌, dǒ u̍h-a nyɔ̍ ɔ̀ ku̍-a wɔ̍n ɔ̀ sìì-a ɔ̍ ba̍ᵻ dě u̍h nynɛ̌-ɛ we̍.

⁴⁷ Jɛ Jusu juo dɛ̍ u̍h-a pu̍e̍e-a wlùh i̍-ɛ, iě ɔ̍ dǔ jǔwɛ due wɛ̀ ɔ̍ nyna-ɛ ɔ̍ i̍ dǒ ɔ̍ chɛ̀ pùn.

⁴⁸ Wɛ̀ ɔ̍ la̍a̍, “Nyɔ̍-o-nyɔ̍ ɔ̀ gbɛ̍n-a jǔwɛ la ɔ̍ tìh i̍ dǒ ǎn nynɛ̌ kɛ̍n-ɛ, nɛ̀ ɔ̍ gbɛ̍n ǎn tìh i̍ wɛ̀ ke. Nɛ̀ nyɔ̍-o-nyɔ̍ ɔ̀ gbɛ̍n-a ǎn tìh i̍-ɛ, nɛ̀ ɔ̍ gbɛ̍n nyɔ̍ ɔ̀ dbo̍-a m-ɛ ɔ̍ tìh i̍ wɛ̀ ke. Nɛ̀ nyɔ̍ ɔ̀ ja-a ɔ̍ chɛ̀ wlù dě mɔ̀ kli̍hgbɛ̍ nynɛ̌-ɛ bo ɔ̀ ku̍ wɔ̍n ɔ̀ sìì ɔ̍ ba̍ᵻ.”

Nyɔ̍ se̍ mɔ̀ faɛn-ɛ, nɛ̀ ɔ̍ ke mɔ̀ nɛ due

⁴⁹ Wɛ̀ Chɔɔn la̍a̍, “Dlǔtu, à jě jɔ̍gbau due nɛ̀ ɔ̍ gba̍ àn nynɛ̌, wɛ̀ ɔ̍ sà nyɔ̍ɔ jeědih de̍e̍ i̍. Iě à po̍ ɔ̍ bɔ̌ i̍, dɛ̍nu̍ɛ, ɔ̍ ke à se̍ due nɛ.”

⁵⁰ Wɛ̀ Jusu la̍a̍ dě ɔ̍ we̍, “Mɔ̀ bɔ̌ ɔ̍ bɔ̌ i̍ po̍-ɛ, dɛ̍nu̍ɛ, nyɔ̍ ɔ̀ se̍-a mɔ̀ bu̍hᵻ i̍ tbaɛ-ɛ, nɛ̀ ɔ̍ ke mɔ̀-a dɛ nɛ due.”

Sɛmewlea wlɔ̀ se̍ Jusu i̍ gbɛ̍n-ɛ i̍ pɔ̀n

⁵¹ Ti̍-a kɔǎn-ɛa la̍ i̍ Jusu iě-a dě ja̍i̍wlɔ̀ gba̍-ɛɛ, iě ɔ̍ dǔ wìè-e ɔ̍ iě Juluslɛn mu̍.

⁵² Wɛ̀ ɔ̍ dbo̍ nyɔ̍ nya̍. Iě u̍h mu̍ dǒ Sɛmewlea bloa̍-a wlɔ̀ due di̍i̍ u̍h iě dɛ̍ᵻ gba̍a̍ po̍ dǒ ɔ̍ we̍.

⁵³ Jɛ nyɔ̍ nɛ-a doǒ-ɛ, u̍h se̍ ɔ̍ tìh i̍ gbɛ̍n. Dɛ̍nu̍ɛ, nɛ̀ Juluslɛn bo ɔ̍ mu̍.

⁵⁴ Ti̍ ɔ̍ kòà Chiin ke Chɔɔn jě-a dɛ̍ nyɔ̍ laa̍ u̍h nu̍-aɛ, iě u̍h la̍a̍, “Joi, àn pɔ̀n à iě Nyɔsoa i̍ tèle ɔ̍ iě nɛ̍ dbo̍ ɛ̍ iě dě ja̍i̍wlɔ̀ sɔ, wɛ̀ ɛ̍ iě nyɔ̍ la-a gbɔ̀lɔ ae?”

⁵⁵ Jɛ Jusu bǐi-a i̍-ɛ, wɛ̀ ɔ̍ bla̍ ɛ̍ dě u̍h wɔ̍ɔ̍n.

⁵⁶ Wɛ̀ u̍h kli̍hgbɛ̍ mu̍ dǒ wlɔ̀ dɛɛ di̍i̍.

Nyɔ̍ɔ-a pɔ̀n Jusu-a kòà nu̍-ɛ i̍

⁵⁷ Jusu ke ɔ̍ kòà-a na-a dǒ wìè-iɛ, iě jɔ̍gbau due la̍a̍ dě ɔ̍ we̍, “Ǎn mu̍ dǒ ìn de̍e̍ gbǎ. Nɛ̀ tà ìn pa̍-a, ǎn mu̍-o pa̍.”

⁵⁸ Wɛ̀ Jusu la̍a̍ dě ɔ̍ we̍, “Kwlǎ nmi̍i̍ blě pɛ̌na̍ wɛ̀ na̍wɛ̍ᵻ blě tlěᵻ. Jɛ Nyi̍ɔ̍-a Jǔ nɔ̀ɔ̍, ɔ̍ se̍ tè la̍ kɔn.”

⁵⁹ Iě Jusu la̍a̍ dě jɔ̍gbau dɔɔ we̍, “Gbǎ dǒ ǐn de̍e̍.” Jɛ ɔ̍ la̍a̍, “Nyɔ̍ klaa, bɔ̌ ǐn mu̍ iě ǐn baa i̍ tè ke̍ sàǐtòò.”

⁶⁰ Wɛ̀ Jusu la̍a̍ dě ɔ̍ we̍, “Bɔ̌ mɛ̌-nyɔ̍ iě u̍h-a chɛ̀-a mɛ̌-nyɔ̍ i̍ tè. Jɛ mɔ̀ɔ̍-ɛ, mu̍ ìè Nyɔsoa-a kmɔ̌ wlu̍ i̍ kɔn tìh bla̍.”

⁶¹ Jɔ̍gbau dɔɔ la̍a̍, “Nyɔ̍ klaa, ǎn mu̍ dǒ ìn de̍e̍ gbǎ. Jɛ bɔ̌ ǐn mu̍ iě nyɔ̍ ùh nɛ-a dě ǐn blǐ gbò-ɛ wlu̍ gba̍.”

⁶² Wɛ̀ Jusu la̍a̍ dě ɔ̍ we̍, “Nyɔ̍ ɔ̀ ja dɛ̍ nu̍-ɛ wɛ̀ ɔ̍ gbɛ̀n-a de̍-ɛ, nɛ̀ ɔ̍ se̍ dɛ̍ nu̍-ɛ bɛ̌ɛ dě Nyɔsoa-a kmɔ̌ wlu̍ i̍ kɔn-ɛ di̍i̍.”