Pɔ̀n Chɛ̀ Luu To-a La 21 - Ku̍o̍ Delee 1999

Tèwànynɔ̌-a nyǐ-dɛ̍

¹ Jusu gbɛ̀n-aeɛ, iě ɔ̍ jě pàn-nyɔ̍ nɛ̀ u̍h-a po̍ u̍h-a nyǐ-dɛ̍ᵻ dě wlǐ di̍i̍ sà-ɛ gblòùn di̍i̍ dě slaǎ sà gbò sɔ̀n.

² Dǒ ɔ̍ jě-e tèwànynɔ̌ due ke, ɔ̍ pa̍ nyɔ̍gbà. Wɛ̀ ɔ̍ po̍-e falǐ jɔ̌ sɔɔ̌n.

³ Iě Jusu la̍a̍, “Bɔ̌ ǐn sèàɛ̍ mɔ̀ gblangbai̍ wlùh, nyɔ̍gbà tèwànynɔ̌ la ɔ̍ po̍ dɛ̍ dɔu dě gblòùn la di̍i̍ ɛ̍ sìì nyɔ̍ kli̍hgbɛ̍.

⁴ Dɛ̍nu̍ɛ, nyɔ̍ duuh nɔ̀ɔ̍, dǒ u̍h-a wlǐ dɔu kɛ̍n bo u̍h gba̍ sɔ̍n wɛ̀ u̍h po̍ gblòùn la wlǐ di̍i̍. Jɛ nynɔ̌ la ɔ̍ nyɔ̍gbà wliɛ̍ ɔ̍ blě-a ɔ̍ iě-a wlì tè-ɛ, ɛ̍ bo ɔ̍ po̍-e kli̍hgbɛ̍.”

Nyɔsoa-a slaǎ sà gbò-a mu̍-u gbɔ̀lɔ

⁵ Sɔɔ̌ᵻ chɛ̀ chɛ̀ bo u̍h poe Nyɔsoa-a slaǎ sà gbò. Sɔ ɛ̍ nmɔ jii̍, ɛ̍ ke nyǐ-dɛ̍ᵻ ìh kɔn-a dǒ Nyɔsoa we̍-ɛ ke. I̍h kɔn we̍ sɔ̀ìn bo kòà duuh-a chɛ̍n, iě Jusu la̍a̍ dě u̍h we̍,

⁶ “Sɔɔ̌ᵻ kli̍hgbɛ̍ la mɔ̀-a jě-aɛ, ɛ̍ mu̍ ti̍ kɔn i̍h iě wlǎ. I̍h-a dɛ̍ se̍ dǒ i̍h ba̍ kɛ̍n sie mu̍.”

Wě ke klě jě-ɛ

⁷ Wɛ̀ Jusu-a kòà tèle ɔ̍ i̍, u̍h la̍a̍, “Dlǔtu, ti̍we̍ ìh la i̍h-a mu̍ nɛ ɛ? Nɛ̀ pò i̍h ja la̍ nɛ mu̍-ɛ, nɛ̀ dɛ̍ bo ɛ̀ mu̍ juola nu̍ à iě i̍ juo ɛ?”

⁸ Iě Jusu la̍a̍, “Mɔ̀ nu̍ mɔ̀-a chɛ̀-a nɛnɛ̌ wɛ̀ nyɔ̍-ɔ je̍e mɔ̀ i̍ boe. Dɛ̍nu̍ɛ, nyɔ̍ dɔu-a mu̍ dǒ ǎn nynɛ̌ kɛ̍n jii, u̍h iě ka nu̍, ‘Mɔ̍ bo ɔ̀ nu̍ Chèɛ̀ Tba̍ju. Bɔ̌ɛ-o ti̍ kɔǎn we̍ wɛ̀.’ Jɛ mɔ̀ bɔ̌ dǒ u̍h de̍e̍ gbǎ-a.

⁹ Mɔ̀-a mu̍ tu̍h-a fɔ̀n-ɛ ke klě jě-ɛa pɔ̀n wɔ̌n, jɛ faɔn bɔ̌ mɔ̀ nu̍-ɛ. Dɛ̍nu̍ɛ, ìh la i̍h kɔn i̍h iě nɛ sàǐtòò. Jɛ nɛ̀ ti̍-a dlǔ i̍ chlà-a se̍ i̍ kɔǎɛn ke̍.”

¹⁰ Wɛ̀ ɔ̍ la̍a̍ dě u̍h we̍, “Bloa̍ ke bloa̍-a mu̍ fɔ̀n, wɛ̀ kɔ̀mla̍ ke kɔ̀mla̍ iě fɔ̀n.

¹¹ Wlù poɔ ɛ̀ ku̍-a wɔ̍n-ɛ ke, mɔ̌ ke wɛ̌ᵻá mu̍ tà kli̍hgbɛ̍ gbǎ, wɛ̀ slènai dɛ̍ᵻ ke wɔ̍n ku̍ jbaɛdih iě dě ja̍u̍n wlì sɔ.

¹² Jɛ pò ìh kli̍hgbɛ̍ la i̍h iě nɛ-ɛ, mɔ̀-a mu̍ gbɛ̍n-ɛ, u̍h iě mɔ̀ klě jě-e. Nɛ̀ u̍h-a mu̍ mɔ̀ sàwi̍h sì la̍ gba̍ dě wɛɛ sà gbòᵻ sɔ̀n i̍, wɛ̀ u̍h iě mɔ̀ kasooᵻ i̍ po̍. Ǎn tìh-ɛ, u̍h-a mu̍ mɔ̀ dǒ blǔh baaᵻ ke kɔ̀mla̍ᵻ jǔ gba̍.

¹³ Dǒ mɔ̀-a mu̍ flɔn la̍ jě-e, wɛ̀ mɔ̀ iě pɔ̀n chɛ̀-a tìh we̍i̍ bla̍.

¹⁴ Dɛ̍ mɔ̀ iě-a wlùh kɛ̍n tè-ɛ, ɛ̍ nu̍ dɛ̍ mɔ̀-a mu̍-a bla̍ dǒ ti̍ laa̍ di̍i̍-ɛ, ɛ̍ sèò bɔ̌ mɔ̀ nu̍-ɛ.

¹⁵ Dɛ̍nu̍ɛ, ǎn mu̍ mɔ̀ wlu̍ wɔ̍ɔ̍n po̍, wɛ̀ iě mɔ̀ flɔ̍nwlùh nyǐ. Nɛ̀ mɔ̀-a nyɛ̌-nyɔ̍ se̍ ɛ̍ i̍ nyna-a bɛ̌ɛ mu̍ u̍h iě ɛ̍ dǒ wìè-i sà.

¹⁶ Mɔ̀-a de̍ᵻ ke, de̍di̍i̍ᵻ ke, wloa̍ nyɔ̍ ke ba̍ᵻá mu̍ mɔ̀ kwlǎ sà. Nɛ̀ mɔ̀-a duuh-a mu̍ dbǎ-ɛ.

¹⁷ Nyɔ̍ kli̍hgbɛ̍-a mu̍ mɔ̀ faɛn ǎn tìh.

¹⁸ Jɛ mɔ̀-a mǐ-ɛ jɔɛ̍ due-a chɛ̀ bo ɛ̀ se̍ mǎ mu̍ dǒ mɔ̀ dlǔ.

¹⁹ Mɔ̀-a dě klì i̍ ku̍-ɛ bo ɛ̀ mu̍ mɔ̀-a chɛ̀ sèìe.

Juluslɛn wlɔ̀-a mu̍-u gbɔ̀lɔ

²⁰ “Jɛ pò mɔ̀ jě Juluslɛn wlɔ̀ wɛ̀ fledlǔ iě ɛ̍ dlɛ̌-ɛ, nɛ̀ mɔ̀ juo-o dɛ̍ i̍ ka ɛ̍ wa̍-a ti̍ se̍-a we̍ tɛn dɛ-ɛ.

²¹ Nɛ̀ nyɔ̍ ùh nɛ-a dě Judia fɔɔ-ɛ, u̍h ple̍ u̍h iě dě tlu̍hᵻ kɛ̍n i̍ mu̍. Nɛ̀ nyɔ̍ ùh nɛ-a dǒ Juluslɛn wlɔ̀-a chɛ̀ di̍i̍-ɛ, u̍h sɔ-o. Nyɔ̍ ùh se̍-a doǒ nɛ-ɛ, nɛ̀ u̍h bɔ̌-o mu̍-ɛ dɛ.

²² Dɛ̍nu̍ɛ, wǐh laa̍ i̍h nu̍ nyɔ̍ kàn gbɛ̍n wǐh, wɛ̀ ɛ̍ iě Nyɔsoa-a chlǐh-wlu̍ kli̍hgbɛ̍ kɛ̀ǐn po̍.

²³ Dǒ wǐh laa̍ di̍i̍, nɛ̀ ɛ̍ mu̍ wɔ̍n kma-dɛ̍ nu̍ dǒ kwlǐᵻ nynɔ̌gbaɔᵻ we̍, ɛ̍ ke juh-a nyǎ-ɛa nynuu̍-ɛ ke. Dɛ̍nu̍ɛ, dǒ tìh jě-ɛ klaa-a mu̍ da̍a blǔh la kɛ̍n ji̍-i, wɛ̀ Nyɔsoa iě nyɔ̍ la kàn gbɛ̍n.

²⁴ U̍h-a duuh-a mu̍ plàn chlɛ̀n i̍ mɛ̌-ɛ, wɛ̀ duuh iě gbɛ̍n-ɛɛ, u̍h iě bloa̍ kli̍hgbɛ̍ kɛ̍n i̍ gba̍-ɛ. Iě ùh se̍-a Juu nyɔ̍-ɛ u̍h iě Juluslɛn wlɔ̀ wlu̍ i̍ kɔn te̍e̍ wɛ̀ u̍h-a ti̍ iě-o i̍ wɛ̀.

Nyi̍ɔ̍-a Jǔ-a ji̍-ɛ

²⁵ “Nɛ̀ jlǔh ke chǔh ke chǔhtlɛ̀n-a mu̍ jbaɛdih po̍, wɛ̀ tìh jě-ɛ iě bloa̍ kli̍hgbɛ̍ kɛ̍n i̍ nɛ nɔ̌ kmɔ̌ la̍ we̍. Nɛ̀ nyɔ̍ kli̍hgbɛ̍-a mu̍ jbǒ-a klu̍-ɛ ke ɛ̍ dǒ po̍ wlu̍ jǔ ple̍.

²⁶ Nyɔ̍gbei-a mu̍ wlùh i̍ gboǎɛ dǒ faɔn ple̍-ɛ ke dɛ̍ ɛ̀ mu̍-a bloa̍ jii̍ nɛ-ɛ dǒ ɛ̍ kɛ̍ɛ̍n fuo-ɛ we̍. Dɛ̍nu̍ɛ, gbǐh nɛ-a dě ja̍u̍n wlì-ɛ, i̍h-a mu̍ tèla̍ wlǔh.

²⁷ Nɛ̀ u̍h-a mu̍ Nyi̍ɔ̍-a Jǔ jě ɔ̍ iě dě nǐgban kɛ̍n naɛ dě ja̍u̍n wlì dǒ gbǐh ke tìh-a i̍ bɛ̌-ɛ ɛ̀ ku̍-a wɔ̍n-ɛ we̍.

²⁸ Pò dɛ̍ᵻ la i̍h ja la̍ nɛ-ɛ, nɛ̀ mɔ̀ nyna i̍ mɔ̀ iě ku̍ dbǎ la̍ sǔh. Dɛ̍nu̍ɛ, nɛ̀ ti̍ Nyɔsoa-a mu̍-a mɔ̀ sèìe-ɛ kɔǎn we̍ wɛ̀.”

Jusu po̍ fei-tu̍-a nɛnǎ

²⁹ Wɛ̀ Jusu po̍ nɛnǎ dě u̍h we̍, ɔ̍ la̍a̍, “Mɔ̀ gbɛ̀n fei-tu̍ ke tu̍ᵻ kli̍hgbɛ̍ ja̍.

³⁰ Pò i̍h ja la̍ wlɔ̍nᵻ plɔ̀ᵻ po̍-ɛ, nɛ̀ mɔ̀ juo-o dɛ̍ i̍ ka klǎᵻ wlè nɔɔ kɔǎn-a we̍ wɛ̀-ɛ.

³¹ Kǎ ɛ̍ nɛ ke, pò mɔ̀ jě ìh la i̍h ja la̍ nɛ-ɛ, nɛ̀ mɔ̀ juo-o dɛ̍ i̍ ka Nyɔsoa-a kmɔ̌ wlu̍ i̍ kɔn-ɛ kɔǎn-a we̍ wɛ̀-ɛ.

³² “Bɔ̌ ǐn sèàɛ̍ mɔ̀ tìh-a taǐn wlùh, nyɔ̍ la ùh nɛ-a ka kmɔ̌-ɛ, u̍h se̍ mɛ̌ mu̍ te̍e̍ wɛ̀ ìh kli̍hgbɛ̍ la i̍h iě gbǎ.

³³ Blǔh ke ja̍u̍n-a tìh-a mu̍ i̍ sì, jɛ ǎn wlu̍ nɔ̀ɔ̍, ɛ̍ se̍ i̍ sì mu̍.

³⁴ “Mɔ̀ nu̍ mɔ̀-a chɛ̀-a nɛnɛ̌, wɛ̀ peě kɛ̍n i̍ mu̍-ɛ dɔu ke, mɔ̀-a chɛ̀ nmɔ̍ wlì sìèè-ɛ ke, kmɔ̌-a sèò la mɔ̀-ɔ je̍e i̍h we̍ maɛ wɛ̀ weɛ̍ Nyi̍ɔ̍-a Jǔ-a mu̍-a ja-ɛ, ɛ̍-ɛ je̍e mɔ̀ kɛ̍n kèè, wɛ̀ ɛ̍-ɛ je̍e mɔ̀ gbɛ̍n.

³⁵ Dɛ̍nu̍ɛ, nyɔ̍ kli̍hgbɛ̍ nɛ-a nɔ̌ kmɔ̌-ɛ bo weɛ̍ laa̍ ɛ̍ ji̍ we̍.

³⁶ Mɔ̀ nu̍ nɛnɛ̌ ti̍ kli̍hgbɛ̍ we̍. Mɔ̀ ba̍le wɛ̀ mɔ̀ iě gbǐh blě, nɛ̀ mɔ̀-a mu̍ ìh kli̍hgbɛ̍ la ìh-a mu̍-a nɛ-ɛ wɔ̍i̍n wa̍n. Wɛ̀ mɔ̀ iě dǒ Nyi̍ɔ̍-a Jǔ jǔ i̍ nyna-a bɛ̌ɛ.”

³⁷ Ka sɔ̀n-a sɛ̀n-aɛ, kǎ Jusu-a po̍ nyɔ̍ nǎ dě Nyɔsoa-a slaǎ sà gbò sɔ̀n. Jɛ pò wlù wɔ̀-ɛ, nɛ̀ ɔ̍ mu̍ pɛ̌na̍ we̍ dě Ɔle-Tu̍ᵻá Tlu̍h kɛ̍n.

³⁸ Klàɛ̍we̍ gbàìn-ɛ, nɛ̀ nyɔ̍ kli̍hgbɛ̍-a mu̍ dě ɔ̍ we̍ dě slaǎ sà gbò sɔ̀n u̍h iě ɔ̍ wlu̍ wɔ̌n.