Pɔ̀n Chɛ̀ Luu To-a La 20 - Ku̍o̍ Delee 1999

Nyɔ̍ bo ɔ̀ nyǐ Jusu tùn ɛ?

¹ Dǒ weɛ̍ due di̍i̍, wɛ̀ Jusu po̍ nyɔ̍ nǎ iě ɔ̍ bla̍ pɔ̀n chɛ̀-a tìh dě Nyɔsoa-a slaǎ sà gbò sɔ̀n. Wɛ̀ slaǎ sà nyɔ̍ klaaᵻ ke, telě nǎ poe nyɔ̍ ke nyɔ̍ klaaᵻ ji̍ dǒ ɔ̍ we̍.

² Wɛ̀ u̍h la̍a̍, “Sèàɛ̍ à wlùh, nyɔ̍we̍ bo ɔ̀ nyǐ ìn tùn wɛ̀ àn nu̍ ìh la ɛ? Nyɔ̍ ɔ̀ nyǐ-ɛ ìn tùn-ɛ, sǐ ɔ̍ nynɛ̌.”

³ Wɛ̀ Jusu la̍a̍, “Ǎn mu̍ mɔ̀ dɛ̍ due i̍ tèle ke. Mɔ̀ sèàɛ̍ ǐn wlùh,

⁴ nyɔ̍ bo ɔ̀ nyǐ Chɔɔn tùn ke wɛ̀ ɔ̍ po̍ nyɔ̍ nǐ dlǔ ɛ? Nyɔsoa bo ɛɛ, àe̍e̍ wlɔ̀ nyi̍ɔ̍ bo ae?”

⁵ Sɔ u̍h-a sǔh-a pu̍e̍e la̍ ɛ̍ wɔ̍ɔ̍n i̍ sǔh. U̍h la̍a̍, “Pò à la̍a̍, ‘Nyɔsoa bo-ɛ,’ nɛ̀ ɔ̍ mu̍ ka dǎ, ‘Dɛ̍nu̍ mɔ̀ se̍ ɔ̍ tìh chɛ̀ po̍ la̍ ɛ?’

⁶ Iě pò à la̍a̍, ‘Wlɔ̀ nyi̍ɔ̍ bo-ɛ,’ nɛ̀ nyɔ̍ kli̍hgbɛ̍-a mu̍ à sɔɔ̌ᵻ i̍ tbaɛ. Dɛ̍nu̍ɛ, u̍h juo ɛ̍ kleǐn ka Chɔɔn nu̍-a Nyɔsoa-a tu̍owli po̍ nyɔ̍-ɛ.”

⁷ Wɛ̀ u̍h la̍a̍, “À se̍ nyɔ̍ ɔ̀ nyǐ-a ɔ̍ tùn-ɛ juo.”

⁸ Wɛ̀ Jusu la̍a̍ dě u̍h we̍, “Iě nɛ̀ nyɔ̍ ɔ̀ nyǐ-a ǐn tùn wɛ̀ ǎn nu̍-a ìh la-ɛ, ǐn se̍ ɔ̍ nynɛ̌ sǐ mu̍ ke.”

Jusu po̍ klè i̍ gbɛ̍n nyɔ̍-a nɛnǎ

⁹ Wɛ̀ Jusu po̍ nɛnǎ la dě nyɔ̍gbei we̍. Ɔ̍ la̍a̍, “Jɔ̍gbau due bo ɔ̀ nu̍ tlo-dɛ̍ᵻá klè. Wɛ̀ ɔ̍ siee ɛ̍ klè i̍ gbɛ̍n nyɔ̍, iě ɔ̍ mu̍ dihwa̍a̍ wlè la̍.

¹⁰ Tlo-dɛ̍ᵻ laa̍ i̍h-a gbǎn-a ti̍ nyni̍-a doǒ-ɛ, iě ɔ̍ dbo̍ ɔ̍ pòi̍ju dě klè i̍ gbɛ̍n nyɔ̍ laa̍ we̍ u̍h iě ɔ̍ naɛ tlo-dɛ̍ᵻá buǒᵻ ja. Jɛ u̍h bla̍ pòi̍ju laa̍, iě ɔ̍ flɔn kwa̍a̍ i̍ u̍h dbo̍ ɔ̍ de̍.

¹¹ Wɛ̀ ɔ̍ dbo̍ pòi̍ju dɔɔ dɛ. Iě u̍h bla̍ ɔ̍ ke. Wɛ̀ u̍h nu̍ ɔ̍ tɛ̀n dɛ̍ᵻ jii̍. Wɛ̀ ɔ̍ flɔn kwa̍a̍ i̍ u̍h dbo̍ ɔ̍ de̍.

¹² Wɛ̀ ɔ̍ dbo̍ ta̍a̍n naɛ. Iě u̍h tba̍-ɛ ɔ̍ dɛ̍ᵻ i̍, wɛ̀ u̍h sà ɔ̍ dǒ klè.

¹³ Wɛ̀ klè joi-a chɛ̀ la̍a̍, ‘Dɛ̍ iě nu̍-ɛ wèè? Ǎn mu̍ ǎn tìh kma jǔ deě dbo̍. Ǐn juo ɛ̍-ɛ u̍h-a mu̍ ɔ̍ nɔ̀ɔ̍ dɛ̍ɛ̍ jě.’

¹⁴ Jɛ klè i̍ gbɛ̍n nyɔ̍ jě-a jǔ laa̍-ɛ, iě u̍h la̍a̍, ‘Ɔ̍ tèwlìɛ̍ bo ɔ̀ ji̍-a dě de̍à, mɔ̀ à dbǎ ɔ̍, nɛ̀ kɔn-dɛ̍ᵻ la i̍h-a mu̍ à i̍ wɛ̀ɛ̀.’

¹⁵ Wɛ̀ u̍h sà ɔ̍ dǒ klè, iě u̍h dbǎ ɔ̍.” Wɛ̀ Jusu tèle u̍h i̍, ɔ̍ la̍a̍, “Nɛ̀ dɛ̍ klè joi-a mu̍ ka klè i̍ gbɛ̍n nyɔ̍ laa̍ nui ɛ?

¹⁶ Nɛ̀ ɔ̍ mu̍ ji̍ wɛ̀ ɔ̍ iě klè i̍ gbɛ̍n nyɔ̍ laa̍ dbǎ, wɛ̀ ɔ̍ iě klè-a chɛ̀ nyɔ̍ duuh nyǐ.” Nyɔ̍gbei wɔ̌n-a ɔ̍ wlu̍ la-ɛ, iě u̍h la̍a̍, “Sakǒ, ɛ̍ bɔ̌-a nɛ-ɛ.”

¹⁷ Wɛ̀ Jusu gbɛ̀n u̍h ja̍ iě ɔ̍ la̍a̍, “Nɛ̀ Nyɔsoa-a wlu̍ ɛ̀ la̍a̍, ‘Sɔɔ̌ ɛ̀ gbò po̍ nyɔ̍ tba̍-a chla-ɛ, ɛ̍ bo ɛ̀ bɔ̌ɛ-a gbò-a sìtù nu̍-ɛ wɛ̀-ɛ,’ nɛ̀ ɛ̍ gbɔ̀-a nynɛ̌ ɛ?

¹⁸ Nyɔ̍ ɔ̀ mu̍-a i̍ kà dǒ sɔɔ̌ la kɛ̍n-ɛ, nɛ̀ ɔ̍ mu̍ ja̍ i̍ chlà-ɛ. Jɛ nyɔ̍ ɔ̀ sɔɔ̌-a chɛ̀-a mu̍-a kɛ̍n gbǎ-ɛ, nɛ̀ ɔ̍ mu̍ i̍ waɛ.”

Nyɔ̍ bo ɔ̀ iě taa̍sìh sà ɛ?

¹⁹ Wɛ̀ telě nǎ poe nyɔ̍ ke slaǎ sà nyɔ̍ klaaᵻ fɔ̀n dɛ̍ we̍ u̍h iě Jusu gbɛ̍n de dǒ ti̍ laa̍ di̍i̍. Dɛ̍nu̍ɛ, u̍h juo ɛ̍ ka ɔ̍ poe-a u̍h nɛnǎ la i̍-ɛ. Jɛ u̍h-a ple̍ nyɔ̍gbei jǔ.

²⁰ Ɛ̍ tìh-ɛ, u̍h pɔ̀n jii la̍ i̍, iě u̍h pɛ̌ɛ nyɔ̍ u̍h iě i̍ slɛ̌-nyɔ̍ wɔ̀, wɛ̀ u̍h iě Jusu gbɛ̍n dǒ ɔ̍ chɛ̀-a wlu̍ kɛ̍n, wɛ̀ u̍h iě ɔ̍ kwlǎ sà dě kɔ̀mla̍-a tùn blě nyɔ̍ ùh blě-a gbǐh-ɛ we̍.

²¹ Iě u̍h tèle ɔ̍ i̍, u̍h la̍a̍, “Dlǔtu, à juo ɛ̍-ɛ, mɔ̀ bo ɔ̀ sà tìh-a taǐn, iě àn poe nyɔ̍ tìh-a taǐn nǎ, wɛ̀ nɛ̀ sà wìè fɔ̌ due. Jɛ àn toe nyɔ̍ Nyɔsoa-a tìh-a taǐn wìè.

²² Sèàɛ̍ à wlùh, à telě sà à wlu̍ kɛ̍n à iě taa̍sìh sà dě Wloma nyɔ̍-a Bloa̍ Joi we̍ ɛɛ, àe̍e̍ ɛ̍ se̍ à wlu̍ kɛ̍n sà ae?”

²³ Jɛ Jusu juo dě u̍h-a gblàa̍ di̍i̍, iě ɔ̍ la̍a̍ dě u̍h we̍,

²⁴ “Mɔ̀ to ǐn wliɛ̍-a chɛ̀ i̍ iě ɛ̍ jě. Nyɔ̍ kɔn dlǔ ke nynɛ̌ bo ìh nɛ da̍a ɛ̍ kɛ̍n ɛ?” U̍h la̍a̍, “Bloa̍ Joi bo.”

²⁵ Wɛ̀ Jusu la̍a̍ dě u̍h we̍, “Dɛ̍ ɛ̀ kɔn-a dǒ Bloa̍ Joi we̍-ɛ, nɛ̀ mɔ̀ nyǐ ɛ̍ Bloa̍ Joi. Nɛ̀ dɛ̍ ɛ̀ kɔn-a dǒ Nyɔsoa we̍-ɛ, mɔ̀ nyǐ ɛ̍ Nyɔsoa.”

²⁶ Sɔ u̍h se̍ ɔ̍ gbɛ̍n-ɛ bɛ̌ɛ dǒ wlu̍ ɔ̍ bla̍-a kɛ̍n dǒ nyɔ̍gbei jlǐhwai. Jɛ ɔ̍ wlu̍ laa̍ ɛ̍ wlǔh-i u̍h de̍e̍. Sɔ u̍h nɛ tìi̍n wɛ̀ sǔh.

Jusu po̍ nyɔ̍ nǎ dǒ-e wlǔh dɛ we̍

²⁷ Wɛ̀ Sadiusii nyɔ̍-a duuh ùh la̍ nyɔ̍ se̍-ae wlǔh mu̍ dode̍-ɛ, u̍h ji̍

²⁸ Jusu i̍ tèle la̍. U̍h la̍a̍, “Dlǔtu, Mose-a telě ɔ̍ chlǐh-a dǒ àɔ̀ we̍-ɛ, ɛ̍ la̍a̍, ‘Pò jɔ̍gbau blě nynɔ̌ iě u̍h se̍ jǔ wlǔh-i wɛ̀ ɔ̍ iě mɛ̌-ɛ, nɛ̀ ɔ̍ de̍di̍i̍ kɔn ɔ̍ iě nynɔ̌ laa̍ blě, wɛ̀ u̍h iě nynuu̍ wlǔh-i dǒ ɔ̍ de̍di̍i̍ we̍.’

²⁹ Ɛ̍ nu̍ de̍di̍i̍ᵻ mɛ̀sɔɔ̌n, iě u̍h-a klaa naɛ blě nynɔ̌. Jɛ u̍h se̍ nynuu̍ wlǔh-i wɛ̀ ɔ̍ mɛ̌.

³⁰ Wɛ̀ jɔ po̍-a sɔɔ̌n-ɛ blě ɔ̍, iě ɛ̍ nɛ ɔ̍ jii̍ ke.

³¹ Iě ta̍a̍n naɛ blě ɔ̍, wɛ̀ ɛ̍ nɛ ɔ̍ jii̍ ke. Kǎ ɛ̍ nu̍ u̍h kli̍hgbɛ̍ nɛ-a mɛ̀sɔɔ̌n-ɛ, iě u̍h-a nyɔ̍ se̍-o jǔ si̍e̍ wɛ̀ u̍h mɛ̌.

³² Ɛ̍ se̍-o siee, nynɔ̌-a chɛ̀ mɛ̌-ɛ ke.

³³ Nɛ̀ɛ̍, ka ɔ̍ dǔ-a u̍h nɛ-a mɛ̀sɔɔ̌n-ɛ, ti̍ mɛ̌-nyɔ̍-a mu̍-ae wlǔh-ɛ, nɛ̀ nyɔ̍ kɔn nynɔ̌ ɔ̍ mu̍ nu̍ gbe̍i̍n ɛ?”

³⁴ Wɛ̀ Jusu la̍a̍ dě u̍h we̍, “Ti̍laa jɔ̍gbauᵻ ke nynɔ̌gbaɔᵻá tǐn-i blǐ.

³⁵ Jɛ nyɔ̍ ùh-a mu̍-ae wlǔh wɛ̀ u̍h iě-a dě kmɔ̌ jɛ mu̍-a ji̍-ɛ di̍i̍ nɛ-ɛ, u̍h bo Nyɔsoa slè-e nyɔ̍ chɛ̀. U̍h nɔ̀ɔ̍, u̍h se̍ blǐ tǐn-i mu̍.

³⁶ Nɛ̀ u̍h se̍ mɛ̌ mu̍ dɛ, dɛ̍nu̍ɛ, nɛ̀ u̍h wɔ̀ Nyɔsoa-a ǐnchɔ̀ wɛ̀. Iě u̍h nu̍ Nyɔsoa-a nynuu̍, dɛ̍nu̍ɛ, u̍h wlǔh-e.

³⁷ Mose flɔn-ɛ ɛ̍ we̍i̍ ka mɛ̌-nyɔ̍-a mu̍-ae wlǔh-ɛ. Ɛ̍ nɛ dě ɔ̍ chlǐh-dɛ̍-a fɔ̌ ɛ̀ tba̍ dǒ si̍n-i kwlǎ fàn pùn i̍-ɛ di̍i̍. Dě ɔ̍ dǎɛ Joi Eblaɛɛn ke, Ase ke Jekɔ-a Nyɔsoa.

³⁸ Ɔ̍ se̍ Nyɔsoa dǒ mɛ̌-nyɔ̍ we̍. Jɛ ɔ̍-ɔ Nyɔsoa dǒ kmɔ̌ i̍ tè nyɔ̍ we̍. Dɛ̍nu̍ɛ, dǒ ɔ̍ pùn bo nyɔ̍ kli̍hgbɛ̍ nɛ-ɛ kmɔ̌.”

³⁹ Wɛ̀ telě nǎ poe nyɔ̍-a duuh la̍a̍, “Dlǔtu, ɛ̀ ìn bla̍-aɛ, ɛ̍ taǐn bo.”

⁴⁰ Sɔ u̍h se̍ ɔ̍ dɛ̍ i̍ tèle-ɛ bɛ̌ɛ dɛ.

Nyɔ̍ bo ɔ̀ nu̍ Nyɔsoa-a Chèɛ̀ Tba̍ju ɛ?

⁴¹ Wɛ̀ Jusu la̍a̍ dě u̍h we̍, “Ka ɛ̍ nu̍ wɛ̀ u̍h la̍ Nyɔsoa-a Chèɛ̀ Tba̍ju la Depe-a tloemlai bo ɛ?

⁴² Dɛ̍nu̍ɛ, Depe-a chɛ̀ la̍a̍ dě Duǐh Chlǐh-dɛ̍ di̍i̍, ‘Joi la̍a̍ dě ǎn Joi we̍, Tè i̍ da̍a ǎn di̍na̍ we̍ te̍e̍

⁴³ iě ɛ̍ nu̍ ìè àn nyɛ̌-nyɔ̍ kɛ̍n i̍ na.’

⁴⁴ Depe-a chɛ̀-a dǎɛ ɔ̍ Joi, nɛ̀ dɛ̍ ɛ̀ nu̍ ɔ̍ Depe-a tloemlai we̍i̍ ɛ?”

Jusu tù nyɔ̍ slɛ̌n dǒ telě nǎ poe nyɔ̍ we̍

⁴⁵ Nyɔ̍ kli̍hgbɛ̍-a po̍-a dě Jusu we̍ dounᵻɛ́, iě ɔ̍ la̍a̍ dě ɔ̍ kòà we̍,

⁴⁶ “Mɔ̀ nu̍ mɔ̀-a chɛ̀-a nɛnɛ̌ dǒ telě nǎ poe nyɔ̍ we̍. U̍h jbɛɛ dɛ̍wlo̍o̍ pa̍ dɛ-ɛ dǒ wlɔ̀ i̍ nala, wɛ̀ nyɔ̍ iě u̍h ja̍ tè dǒ u̍h nyinɔ̍ i̍ sà la̍ dě dɔɔ̌ gbale̍e̍. U̍h jbɛɛ tà chɛ̀ i̍ tè-ɛ i̍ ma̍u̍ dě Juu nyɔ̍-a wɛɛ sà gbòᵻ sɔ̀n i̍ ke peě kɛ̍n i̍.

⁴⁷ U̍h-a bla̍ tèwànynɔ̌gbaɔᵻ jlǐhɛ̍ dlǔ, iě u̍h-a jǎ u̍h-a kɔn-dɛ̍ᵻ kɛ̍n. Ɛ̍ tìh u̍h-a tɛn-ɛ ba̍le-ɛ dlǔ wɛ̀ u̍h iě u̍h-a chɛ̀ dě nyɔ̍ jlǐh i̍ nmɔ-ɛ. U̍h naɛ kàn gbɛ̍n-ɛa mu̍-o dɛ̍ i̍ sìì.”