Pɔ̀n Chɛ̀ Luu To-a La 18 - Ku̍o̍ Delee 1999

Jusu po̍ tèwànynɔ̌ ke kɛɛ̍n-a nɛnǎ

¹ Wɛ̀ Jusu po̍ nɛnǎ dě ɔ̍ kòà we̍ ka u̍h-a gbǐh bɔ̌-a mɛ̌-ɛ, wɛ̀ u̍h kɔn u̍h iě-a ba̍le ti̍ kli̍hgbɛ̍ we̍-ɛ.

² Ɔ̍ la̍a̍, “Kɛɛ̍n due bo ɔ̀ tǐn dǒ wlɔ̀ due di̍i̍. Ɔ̍-ɔ ple̍ Nyɔsoa jǔ, iě ɔ̍ bla̍ nyɔ̍ jlǐhɛ̍ dlǔ.

³ Nɛ̀ tèwànynɔ̌ due nɛ dǒ wlɔ̀ laa̍ di̍i̍, ɔ̍ po̍ dě ɔ̍ we̍ wìè-i. Ɔ̍ la̍a̍, ‘Dbǎkà, nyɔ̍ ke ǐn ke à blě-a sà-tìh-ɛ, ìè ɔ̍ kɛ̀n sà ìè ǐn nyǐ lě.’

⁴ Ɔ̍ nu̍ nynɔ̌ laa̍ jla̍-a i̍ dǒ ti̍ gbɔ̍ di̍i̍. Wɛ̀ ɔ̍ la̍a̍ dě ɔ̍ chɛ̀ we̍, ‘Nɛ̌ ple̍ Nyɔsoa jǔ, wɛ̀ ǎn bla̍ nyɔ̍ jlǐhɛ̍ dlǔ-a chɛ̀ gbɛɛ.

⁵ Jɛ tèwànynɔ̌ la ɔ̍ bɛ̌ɛ ǐn wɔ̍ɔ̍n i̍, ǎn mu̍ ɔ̍ kɛ̀n nyǐ. Pò ǐn se̍ ɛ̍ nu̍-ɛ, nɛ̀ ɔ̍ mu̍ da̍a ji̍ ke̍ ma̍u̍ ɔ̍ iě ǐn se̍na̍.’ ”

⁶ Wɛ̀ Joi la̍a̍, “Mɔ̀ po̍-e dounᵻ, mɔ̀ iě dɛ̍ kɛɛ̍n la ɔ̀ se̍-a i̍ slɛ̌-ɛ bla̍-a wɔ̌n.

⁷ Doǒ bo Nyɔsoa-a nyɔ̍ ùh-a ba̍le-a ɔ̍ wlù ke sɔ̀n-ɛ, ɔ̍ se̍ u̍h kɛ̀n nyǐ-i mu̍ ae? Àe̍e̍ nɛ̀ ɔ̍ mu̍ tlɛ̀n dǒ u̍h sɔ̍n we̍ po̍ la̍-a ae?

⁸ Ǎn sèàɛ̍ mɔ̀ wlùh, ɔ̍ mu̍ u̍h kɛ̀n nyǐ suei̍. Jɛ pò Nyi̍ɔ̍-a Jǔ ji̍-ɛ, nɛ̀ ɔ̍ mu̍ ɔ̍ wlùh gbaɛ blě nyɔ̍ da̍a kmɔ̌ we̍ jɛɛ ae?”

Jusu po̍ Fɛlesii jǔ ke taa̍sìh sà jǔ-a nɛnǎ

⁹ Jusu po̍ nɛnǎ la ke dě nyɔ̍ ùh gbaɛ-a u̍h-a chɛ̀ wlùh ka u̍h nu̍-a i̍ slɛ̌-nyɔ̍ wɛ̀ u̍h-u jě-a nyɔ̍ duuh dɛ̍ɛ̍ we̍.

¹⁰ Ɔ̍ la̍a̍, “Jɔ̍gbauᵻ sɔɔ̌n bo ùh mu̍ dě Nyɔsoa-a slaǎ sà gbò sɔ̀n u̍h iě ba̍le. Due nu̍ Fɛlesii jǔ, iě dɔɔ nu̍ taa̍sìh sà jǔ.

¹¹ Fɛlesii jǔ nyna i̍ iě ɔ̍ ba̍le dǒ ɔ̍ chɛ̀ we̍. Ɔ̍ la̍a̍, ‘Nyɔsoa, ǐn po̍ ìn tlɔ̌ wɛ̀ ǐn se̍ nyɔ̍ duuh ùh nu̍-a klǎn kɔn nyɔ̍ ke, telě wa̍ nyɔ̍ ke, nynɛ̌à nu̍ nyɔ̍-ɛ wɔ̀. Wɛ̀ ǐn se̍ taa̍sìh sà jǔ-a chɛ̀ la wɔ̀, nɛ̀ ǐn po̍ ìn tlɔ̌.

¹² Ǎn nu̍ jlǔh po̍-ɛa sɔɔ̌n dǒ dɔɔ̌dlǔ due di̍i̍. Dɛ̍ᵻ kli̍hgbɛ̍ ǎn jě-aɛ, ǎn sà-o ɛ̀ po̍-a pùè-ɛ dǒ ìn we̍.’

¹³ Jɛ taa̍sìh sà jǔ nyna-ɛ nya̍, ɔ̍ se̍ ɔ̍ dlǔ-a chɛ̀ ja̍i̍ dǔ. Iě ɔ̍ tba̍ gbǎ wlì, ɔ̍ la̍a̍, ‘Nyɔsoa, jě ǐn wɔɛ, mɔ̍ gblɛ̍n sɔ̀ɛ̀n nu̍ nyɔ̍ o.’

¹⁴ Ǎn sèàɛ̍ mɔ̀ wlùh, jɔ̍gbau la, ti̍ ɔ̍ mu̍-a gbò we̍-ɛ, ɔ̍ slɛ̌ i̍ dě Nyɔsoa jlǐh ɛ̍ sìì Fɛlesii jǔ. Dɛ̍nu̍ɛ, nyɔ̍ jɔ dǔ-a ɔ̍ chɛ̀ ja̍i̍-ɛ, nɛ̀ ɔ̍ mu̍ wlù ja-ɛ. Nɛ̀ nyɔ̍ jɔ ja-a ɔ̍ chɛ̀ wlù-ɛ, nɛ̀ ɔ̍ mu̍ ja̍i̍ dǔ-iɛ.”

Jusu tè nynuu̍plìh sɔ̍n dlǔ

¹⁵ Wɛ̀ nyɔ̍gbei-a ja u̍h-a nynuu̍pli dǒ Jusu we̍ ɔ̍ iě u̍h sɔ̍n dlǔ tè. Ɔ̍ kòà juo-ao dɛ̍ i̍-ɛ, wɛ̀ u̍h po̍ nyɔ̍ laa̍ bɔ̌ i̍.

¹⁶ Jɛ Jusu dǎ nynuu̍plìh laa̍ dě ɔ̍ we̍. Iě ɔ̍ la̍a̍, “Mɔ̀ bɔ̌ nynuu̍plìh la u̍h iě nɔ̌ ǐn we̍ ji̍. Mɔ̀ bɔ̌ u̍h wìè-i sà-a. Dɛ̍nu̍ɛ, nyɔ̍ ùh nɛ-a ka-ɛ, u̍h bo ùh kɔn dǒ Nyɔsoa-a kmɔ̌ wlu̍ i̍ kɔn-ɛ we̍.

¹⁷ Bɔ̌ ǐn sèàɛ̍ mɔ̀ tìh-a taǐn wlùh, nyɔ̍ jɔ se̍-a Nyɔsoa-a kmɔ̌ wlu̍ i̍ kɔn-ɛa tìh i̍ gbɛ̍n mu̍ ka jǔwɛ-ɛ, nɛ̀ ɔ̍ se̍-e i̍ sǐ mu̍.”

Kǎ pàn-nyɔ̍ ke Nyɔsoa-a kmɔ̌ wlu̍ i̍ kɔn-ɛ nɛ ka

¹⁸ Wɛ̀ Juu nyɔ̍-a wlu̍ i̍ kɔn nyɔ̍ due tèle Jusu i̍. Ɔ̍ la̍a̍, “Dlǔtu chɛ̀, dɛ̍we̍ iě nu̍ wɛ̀ iě kmɔ̌ sie feɛ blě ɛ?”

¹⁹ Iě Jusu la̍a̍ dě ɔ̍ we̍, “Dɛ̍nu̍ àn dǎɛ ǐn nyɔ̍ chɛ̀ ɛ? Nyɔ̍ chɛ̀ dɔɔ se̍ nɛ, Nyɔsoa due gbài̍ bo ɔ̀ nu̍ nyɔ̍ chɛ̀.

²⁰ Ìn juo ka telě dǎ-a, ɛ̍ la̍a̍, ‘Bɔ̌ nynɛ̌à-a nu̍-ɛ, bɔ̌ nyɔ̍ gbe̍ja̍a̍ po̍-ɛ, bɔ̌ jlǐ-ɛ, bɔ̌ nyɔ̍ si̍h i̍ tùi-ɛ, nɛ̀ ìn jě ìn de̍ ke ìn baa dɛ̍ɛ̍.’ ”

²¹ Wɛ̀ ɔ̍ la̍a̍, “Sɔ dě ǎn jǔwɛ blǐ ǐn tè-o telě kli̍hgbɛ̍ la i̍ se̍e̍.”

²² Jusu wɔ̌n-a wlu̍ la-ɛ, iě ɔ̍ la̍a̍ dě ɔ̍ we̍, “Dɛ̍ due gbài̍ bo ìn se̍ nu̍ ke. Mu̍ ìè àn kɔn-dɛ̍ᵻ kli̍hgbɛ̍ ple̍, ìè i̍h-a wlǐ nyɔ̍gbà nyɔ̍ jii̍ gblè, nɛ̀ àn mu̍ pàn dě ja̍i̍wlɔ̀. Nɛ̀ ìn ji̍ ìè dǒ ǐn de̍e̍ gbǎ.”

²³ Jɛ jǔ wɔ̌n-a wlu̍ la-ɛ, sɔ ɛ̍ po̍ ɔ̍ wlùh seɔn. Dɛ̍nu̍ɛ, ɔ̍ pàn-ɛ kaa̍.

²⁴ Jusu gbɛ̀n-a ɔ̍ ja̍-ɛ, iě ɔ̍ la̍a̍, “Ɛ̍ mu̍-u kma kaa̍ wɛ̀ pàn-nyɔ̍ iě dě Nyɔsoa-a kmɔ̌ wlu̍ i̍ kɔn-ɛ di̍i̍ gbǎ.

²⁵ Ɛ̍ mu̍-u kma pàn-nyɔ̍ iě dě Nyɔsoa-a kmɔ̌ wlu̍ i̍ kɔn-ɛ di̍i̍ gbǎ, ɛ̍ sìì gbo̍ kɛ̍ɛ̍n bli-a dě mɛnɔ̍-a gbɔ̀ di̍i̍ jii-ɛ.”

²⁶ Nyɔ̍ ùh wɔ̌n-a ìh la-ɛ, iě u̍h la̍a̍, “Nɛ̀ nyɔ̍we̍ bo ɔ̀ mu̍-o pǔh ɛ?”

²⁷ Jɛ Jusu la̍a̍, “Dɛ̍ ɛ̀ kmu-a dǒ nyi̍ɔ̍ we̍-ɛ, nɛ̀ ɛ̍ se̍ kmu dǒ Nyɔsoa we̍.”

²⁸ Wɛ̀ Pitɛ la̍a̍, “Gbɛ̀n-e, à tǎli à gbòᵻ i̍ wɛ̀ à gbǎ dǒ ìn de̍e̍.”

²⁹ Wɛ̀ Jusu la̍a̍ dě u̍h we̍, “Tìh-a taǐn ǎn sèàɛ̍ mɔ̀ wlùh, nyɔ̍ jɔ tǎli-a ɔ̍ gbò o, nynɔ̌ o, de̍di̍i̍ᵻ o, de̍ ke baa o, ɛ̍ ke ɔ̍ nynuu̍ ke dǒ Nyɔsoa-a kmɔ̌ wlu̍ i̍ kɔn-ɛa tìh we̍-ɛ,

³⁰ nɛ̀ ɔ̍ mu̍ i̍h-a dɔu jě da̍a ti̍laa kmɔ̌ di̍i̍, wɛ̀ ɔ̍ iě kmɔ̌ sie feɛ jě dě kmɔ̌ delee di̍i̍.”

Jusu sà ɔ̍ mɛ̌ɛ tìh i̍ dɛ

³¹ Jusu chɛn-ɛ ɔ̍ kòà-a pùè jɔ̌ sɔɔ̌n gbɔ̍i̍, iě ɔ̍ la̍a̍ dě u̍h we̍, “À mu̍ la̍ dǒ Juluslɛn wlɔ̀ di̍i̍. Dɛ̍ᵻ kli̍hgbɛ̍ ìh Nyɔsoa-a tu̍owli po̍ nyɔ̍ chlǐh-a dǒ Nyi̍ɔ̍-a Jǔ pùn-ɛ, i̍h-a mu̍ la̍ chɛ̀-ɛ gbǎ.

³² Ɔ̍ mu̍ kwlǎ sà-ɛ dě ùh se̍-a Juu nyɔ̍-ɛ we̍. Wɛ̀ u̍h iě ɔ̍ jlii̍h kɛ̍n i̍ nui, u̍h iě ɔ̍ chlèe, wɛ̀ u̍h iě ɔ̍ tɔ̍n gbà.

³³ U̍h-a mu̍ ɔ̍ bla̍, wɛ̀ u̍h iě ɔ̍ dbǎ. Jɛ pò wǐh ta̍a̍n sì-ɛ, nɛ̀ ɔ̍ mu̍-e wlǔh.”

³⁴ Jɛ ɔ̍ kòà se̍ dɛ̍ ɔ̍ bla̍-a i̍ wɔ̌n, ɛ̍ mǎ-ɛ dě u̍h di̍i̍ i̍. Sɔ u̍h se̍ dɛ̍ Jusu bla̍-a juo.

Jusu pǔh-i jɔ̍gbau ɔ̀ dɔ̌-aɛ

³⁵ Jusu-a nyni̍-a la̍ dǒ Jɛwlekoo wlɔ̀ di̍i̍-ɛ, nɛ̀ dɔ̌-jɔ̍gbau due tè i̍ dǒ wìè wɔ̍i̍n ɔ̍ slɔ̀-ɛ.

³⁶ Ɔ̍ wɔ̌n-a nyɔ̍ dɔu-a sì i̍ slɛ̀-ɛ, iě ɔ̍ tèle tìh i̍, ɔ̍ la̍a̍, “Dɛ̍ bo ɛ̀ gbǎ ɛ?”

³⁷ Wɛ̀ u̍h sèàɛ̍ ɔ̍ wlùh, u̍h la̍a̍, “Jusu ɔ̀ sɔ-a dǒ Naaslɔɛ wlɔ̀ di̍i̍-ɛ bo ɔ̀ sì.”

³⁸ Wɛ̀ ɔ̍ we̍le, ɔ̍ la̍a̍, “Depe-a Jǔ Jusu, jě ǐn wɔɛ lě.”

³⁹ Iě nyɔ̍ ùh wɔ̀-a nya̍-ɛ po̍ ɔ̍ bɔ̌ i̍. U̍h sèàɛ̍ ɔ̍ wlùh ɔ̍ iě tìi̍n nɛ. Jɛ ɔ̍ gbǎ dě de̍ i̍ dǒ we̍le la̍. Ɔ̍ la̍a̍, “Depe-a Jǔ, jě ǐn wɔɛ lě o.”

⁴⁰ Wɛ̀ Jusu nyna i̍, iě ɔ̍ sèàɛ̍ nyɔ̍ wlùh u̍h iě jɔ̍gbau laa̍ dǒ ɔ̍ we̍ ja. U̍h kɔǎɛn-a ɔ̍ Jusu i̍-ɛ, iě Jusu tèle ɔ̍ i̍,

⁴¹ “Dɛ̍ àn pɔ̀n iě nu̍ dǒ ìn we̍ ɛ?” Ɔ̍ la̍a̍, “Nyɔ̍ klaa, ǎn pɔ̀n iě i̍ jě.”

⁴² Wɛ̀ Jusu la̍a̍ dě ɔ̍ we̍, “Jě i̍. Àn wlùh gbaɛ-ɛ bo ɛ̀ pǔh-i m̀.”

⁴³ Dǒ ɔ̍ jlǐh nyna iě i̍h pɔ̀ni. Wɛ̀ ɔ̍ gbǎ dǒ Jusu de̍e̍ iě ɔ̍ bɛ̌-ɛ Nyɔsoa-a nynɛ̌ i̍. Nyɔ̍ kli̍hgbɛ̍ jě-a ɛ̀ la-ɛ, iě u̍h po̍ Nyɔsoa tìhwe̍.