Pɔ̀n Chɛ̀ Luu To-a La 16 - Ku̍o̍ Delee 1999

Jusu po̍ pòi̍ju ɔ̀ se̍-a i̍ slɛ̌-ɛ nɛnǎ

¹ Jusu la̍a̍ dě ɔ̍ kòà we̍, “Pàn-jɔ̍gbau due bo ɔ̀ blě ɔ̍ pòi̍ju ɔ̀ gbɛ̀n-a dǒ ɔ̍ kɔn-dɛ̍ᵻ we̍ i̍-ɛ. Wɛ̀ nyɔ̍ po̍ ɔ̍ kunǎ ka ɔ̍ pòi̍ju-a gbɔ̀lɔ-a ɔ̍ kɔn-dɛ̍ᵻɛ́.

² Wɛ̀ ɔ̍ dǎ ɔ̍, iě ɔ̍ la̍a̍ dě ɔ̍ we̍, ‘Ka ɛ̍ nu̍ wɛ̀ ǎn wɔ̌n ìh kaɛn la dǒ ìn pùn ɛ? Ìn se̍ dǒ ǎn kɔn-dɛ̍ᵻ we̍ i̍ gbɛ̀n mu̍ dɛ. Ɛ̍ tìh-ɛ, sà ǎn kɔn-dɛ̍ᵻ kli̍hgbɛ̍-a dǐfluhᵻ ìn blě-aɛ kwlǎ.’

³ Wɛ̀ pòi̍ju la̍a̍ dě ɔ̍ chɛ̀ we̍, ‘Ka ǎn dlǔtu-a sà-a la̍ ǐn dbo̍ la kɛ̍n-ɛ, nɛ̀ ka iě nu̍-ɛ wèè? Mɔ̍ɔ wɔ̍ ǐn se̍ kmu wɛ̀ iě blǔ-u dbo̍ nu̍, iě mɔ̍ɔ ǎn ple̍ tɛ̀n ke iě nyɔ̍ we̍ slɔ̀.

⁴ Bɔ̌, ǐn juo dɛ̍ ǎn mu̍-a nu̍-ɛ, wɛ̀ pò ǐn sà-ɛ dbo̍ kɛ̍n-ɛ, wɛ̀ nyɔ̍ɔ iě ǐn gbò we̍ gba̍.’

⁵ Wɛ̀ ɔ̍ nyɔ̍ ùh blě-a ɔ̍ dlǔtu-a gba̍ᵻɛ́, iě ɔ̍ dǎ u̍h-a due due. Ɔ̍ la̍a̍ dě sàǐtòò nyɔ̍ ɔ̍ dǎ-aɛ we̍, ‘Dɛ̍ tìèwe̍-a gba̍ ìn blě dǒ ǎn dlǔtu we̍ ɛ?’

⁶ Ɔ̍ la̍a̍, ‘Chlǎn bi̍ᵻá kmɛ mɛ̀ta̍a̍n (800) bo ǐn blě.’ Wɛ̀ pòi̍ju la̍a̍ dě ɔ̍ we̍, ‘Dǔ àn gba̍-a dǐfluh. Tè i̍ iě kmɛ nyìɛ̍ (400) chlǐh suei̍ dǒ ɛ̍ kɛ̍n.’

⁷ Wɛ̀ ɔ̍ dǎ dɔɔ, ɔ̍ la̍a̍ dě ɔ̍ we̍, ‘Dɛ̍ tìèwe̍-a gba̍ ìn blě ɛ?’ Ɔ̍ la̍a̍, ‘Kwǐ kɛnɛ̌ᵻá bɔlɔᵻá kmɛ ta̍a̍n (300).’ Wɛ̀ pòi̍ju la̍a̍ dě ɔ̍ we̍, ‘Dǔ àn gba̍-a dǐfluh ìè kmɛ sɔɔ̌n kwela nyìɛ̍ (240) chlǐh dǒ ɛ̍ kɛ̍n.’

⁸ Dlǔtu po̍ se̍ i̍ slɛ̌ pòi̍ju la tìhwe̍ dǒ ɔ̍ flɔ̍nwlùh chɛ̀ la we̍. Dɛ̍nu̍ɛ, kmɔ̌ we̍ nyɔ̍ blě flɔ̍nwlùh chɛ̀ dǒ u̍h-a chɛ̀-a dɛ̍ we̍ ɛ̍ sìì nyɔ̍ ùh kɔn-a dǒ sɔ̀npli we̍-ɛ.

⁹ “Ǎn sèàɛ̍ mɔ̀ wlùh, kmɔ̌ we̍ pàn-dɛ̍ᵻ mɔ̀ blě-aɛ, mɔ̀ gbɛ̍n-ɛ i̍h ba̍ᵻ dǒ mɔ̀-a chɛ̀ we̍. Wɛ̀ pò i̍h wɛ̀ i̍-ɛ, iě Nyɔsoa iě mɔ̀-a tìh i̍ gbɛ̍n ke dě ɔ̍ kmɔ̌ sie tèla̍ di̍i̍.

¹⁰ Nyɔ̍ jɔ gbɛ̍n-a gba̍n dǒ dɛ̍ juwɛ we̍-ɛ, nɛ̀ ɔ̍ mu̍ gba̍n gbɛ̍n ke dǒ dɛ̍ᵻ dɔu we̍. Nyɔ̍ jɔ se̍-a gba̍n gbɛ̍n dǒ dɛ̍ juwɛ we̍-ɛ, nɛ̀ ɔ̍ se̍ gba̍n gbɛ̍n mu̍ ke dǒ dɛ̍ᵻ dɔu we̍.

¹¹ Pò mɔ̀ se̍ gba̍n gbɛ̍n dǒ kmɔ̌-a pàn-dɛ̍ᵻ we̍-ɛ, nɛ̀ ka nyɔ̍-a mu̍ mɔ̀ pàn-dɛ̍ᵻá chɛ̀ naɛ kwa̍ tèè-ɛ nu̍ ɛ?

¹² Nɛ̀ pò mɔ̀ se̍ gba̍n gbɛ̍n dǒ nyɔ̍ dɔɔ-a dɛ̍ we̍-ɛ, nɛ̀ nyɔ̍we̍-a mu̍ mɔ̀ dɛ̍ nyǐ mɔ̀-a chɛ̀ iě kɔn ɛ?

¹³ “Pòi̍ju due se̍ dlǔtuᵻ sɔɔ̌n jǔ dbee-ɛ bɛ̌ɛ. Nɛ̀ ɔ̍ mu̍ due faɛn, wɛ̀ ɔ̍ iě due-e jbɛɛ. Nɛ̀ ɔ̍ mu̍ due we̍ fòè wɛ̀ ɔ̍ iě-o due i̍ si̍e̍. Kǎ ɛ̍ nɛ, mɔ̀ se̍ wlǐ-i jbɛɛ ke Nyɔsoa wɛɛ sà-a tàdùè nui-ɛ bɛ̌ɛ.”

Jusu po̍ dɛ̍ᵻ diih-a nǎ

¹⁴ Fɛlesii nyɔ̍ ùh jbɛɛ-a wlǐ-iɛ, u̍h wɔ̌n ìh kli̍hgbɛ̍ la, wɛ̀ u̍h-a po̍ Jusu pàwe̍i̍.

¹⁵ Jɛ Jusu la̍a̍ dě u̍h we̍, “Mɔ̀ɔ̍ bo ùh-a dǎɛ mɔ̀-a chɛ̀ i̍ slɛ̌-nyɔ̍ dǒ nyɔ̍ɔ jlǐhwai. Jɛ Nyɔsoa juo mɔ̀-a wlùh. Dɛ̍nu̍ɛ, dɛ̍ ɛ̀ gbǎ-a dɛ̍kɛ̍n kaa̍ dě nyɔ̍ jlǐh-ɛ, ɛ̍ se̍ dɛ̍wɛ-a chɛ̀ wɔ̀ dě Nyɔsoa nɔ̀ɔ̍ jlǐh.

¹⁶ “Mose-a telě ke Nyɔsoa-a tu̍owli po̍ nyɔ̍-a chlǐh-dɛ̍ᵻ nɛ-ɛ se̍e̍, wɛ̀ Chɔɔn ɔ̀ po̍-a nyɔ̍ nǐ dlǔ-ɛ dǔ wlǔh-ɛ. Sɔ dǒ ti̍ laa̍ di̍i̍-ɛ, pɔ̀n chɛ̀ ɛ̀ kɔn-a dǒ Nyɔsoa-a kmɔ̌ wlu̍ i̍ kɔn-ɛ we̍-ɛ, ɛ̍ dǔ-a bla̍-ɛɛ bo ɛ̍ blě-a. Wɛ̀ nyɔ̍ kli̍hgbɛ̍-a fɔ̀n dɛ̍ we̍ u̍h iě dě ɛ̍ di̍i̍ gbǎ.

¹⁷ Jɛ blǔh ke ja̍u̍n-a tìh-a i̍ sì-ɛ se̍ i̍ kma mu̍ ɛ̍ se̍ telě-a dɛ̍ juwɛ-a chɛ̀-a dǒ wìè-i sà-a sìì mu̍.

¹⁸ “Nyɔ̍ ɔ̀ sà-a ɔ̍ nynɔ̌ kwlǎ iě ɔ̍ dǔ-a nynɔ̌ dɔɔ-ɛ, nɛ̀ nynɛ̌à bo ɔ̍ nu̍. Nɛ̀ nyɔ̍ ɔ̀ dǔ-a nynɔ̌ jɔ ɔ̍ kɔan sà-a kwlǎ ke-ɛ, nɛ̀ nynɛ̌à bo ɔ̍ nu̍.

Jusu po̍ pàn-nyɔ̍ ke Laaslɔɛ-a nɛnǎ

¹⁹ “Jɔ̍gbau due bo ɔ̀ pàn, sɔ jlii̍ chɛ̀ ìh kɔn pɛlǔh bɛ̌-a i̍-ɛ bo ɔ̍ pa̍-a iě ɔ̍ nu̍ kmɔ̌ wlù ke sɔ̀n.

²⁰ Dǒ ɔ̍ gbò-a gbàɛ̍gbà-a wɔ̍n we̍ bo jɔ̍gbau due ɔ̀ pa̍-a nyɔ̍gbà-ɛ pɛ̌n i̍. Ɔ̍ nynɛ̌ nu̍ Laaslɔɛ. Ɔ̍ ku̍ nu̍ chìèᵻá sǔh.

²¹ Nɛ̀ di̍-dɛ̍ᵻ ìh-a blu̍-a dǒ pàn-nyɔ̍-a teble̍ kɛ̍n-ɛ, i̍h bo ɔ̍ pɔ̀n di̍-ɛ i̍. Nɛ̀ kǎ gbèᵻá ji̍ wɛ̀ i̍h-a bɛ̍ ɔ̍ chìèᵻ jlǐh i̍.

²² Nyɔ̍gbà nyɔ̍ laa̍ wɛ̀ ɔ̍ mɛ̌, iě Nyɔsoa-a ǐnchɔ̀ gba̍ ɔ̍ sùù dě Eblaɛɛn we̍ ɛ̍ iě i̍ tè. Pàn-nyɔ̍ laa̍ ɔ̍ mɛ̌-a ke-ɛ, iě u̍h tè ɔ̍ i̍.

²³ Wɛ̀ ɔ̍ mu̍ dě kàn nɛ̍ di̍i̍, tà nyɔ̍-a jě-ea tìh-ɛ. Ɔ̍ dǔ-a dlǔ ja̍i̍-ɛ, iě ɔ̍ jě Eblaɛɛn dě nya̍, nɛ̀ Laaslɔɛ tè ɔ̍ pùn.

²⁴ Wɛ̀ ɔ̍ we̍le, ɔ̍ la̍a̍, ‘Baa Eblaɛɛn, jě ǐn wɔɛ lě. Dbo̍ Laaslɔɛ ɔ̍ iě ɔ̍ chèɛ̀-a mlǎ dě nǐ we̍ gba̍, wɛ̀ ɔ̍ iě ɛ̍ dǒ ǎn mɛɔ kɛ̍n tǒ-e wɛ̀ iě flɛ̀n i̍ wlǎ. Dɛ̍nu̍ɛ, ǎn sàɛ̀ jua̍i̍ kaa̍ nɔ̌ nɛ̍ la di̍i̍.’

²⁵ Jɛ Eblaɛɛn la̍a̍, ‘Ǎn jǔ, nu̍ wlùh, ti̍ ìn tè-a kmɔ̌ i̍-ɛ, nɛ̀ àn jě dɛ̍ᵻ chɛ̀ chɛ̀, wɛ̀ Laaslɔɛ-a jě sɔ̀ɛ̀n. Jɛ ɔ̍ nu̍ la̍ kmɔ̌ nɔ̍ɔ̀ iě àn sàɛ̀ ka jua̍i̍.

²⁶ Ɛ̍ se̍-o siee tɔ̀ùn dlǔ sùbi̍i̍ nɛ dǒ mɔ̀ ke àɔ̀ nynɛ̌. Wɛ̀ nyɔ̍-ɔ je̍e nɔ̌ àɔ̀ we̍ sɔ u̍h-u je̍e dě mɔ̀ we̍ gbǎ, wɛ̀ nyɔ̍ wɔ̍-ɔ je̍e dě mɔ̀ we̍ sɔ ke u̍h-u je̍e nɔ̌ àɔ̀ we̍ gbǎ.’

²⁷ Wɛ̀ ɔ̍ la̍a̍, ‘Nɛ̀ɛ̍, ǎn ba̍le m̀ baa Eblaɛɛn, ìè ɔ̍ dě ǐn baa blǐ gbò dbo̍.

²⁸ Dɛ̍nu̍ɛ, ǐn blě de̍di̍i̍ᵻ m̀m̌, wɛ̀ ɔ̍ iě u̍h wɔ̍i̍n gbɛ̍n-ɛ u̍h-u je̍e nɔ̍ɔ̀ la ǎn jě-ea ka tìh-ɛ ji̍ ke.’

²⁹ Jɛ Eblaɛɛn la̍a̍, ‘U̍h blě Mose ke Nyɔsoa-a tu̍owli po̍ nyɔ̍ dě u̍h we̍. U̍h kɔn wlu̍ bo u̍h iě dounᵻ tù.’

³⁰ Wɛ̀ pàn-nyɔ̍ laa̍ ɔ̍ la̍a̍, ‘Iěe, baa Eblaɛɛn, pò ɛ̍ tù nyɔ̍ wlǔh-e wɛ̀ ɔ̍ iě dě u̍h we̍ mu̍-ɛ, nɛ̀ u̍h-a mu̍ u̍h-a gblɛ̍n sɔ̀ɛ̀n kɛ̍n i̍ poe.’

³¹ Eblaɛɛn la̍a̍ dě ɔ̍ we̍, ‘Pò u̍h se̍ Mose ke Nyɔsoa-a tu̍owli po̍ nyɔ̍-a wlu̍ dounᵻ tù-ɛ, nɛ̀ pò nyɔ̍-a jɛ wlǔh-eɛ, ɛ̍ se̍ u̍h-a dlǔ jli̍-i mu̍ ke sǔh.’ ”