Pɔ̀n Chɛ̀ Luu To-a La 15 - Ku̍o̍ Delee 1999

Jusu po̍ mǎ-a blawɛ̌-a nɛnǎ

¹ Ɛ̍ nu̍ ti̍ due, wɛ̀ taa̍sìh sà nyɔ̍ ke gblɛ̍n sɔ̀ɛ̀n nyɔ̍ dɔu ji̍ Jusu-a wlu̍ wɔ̌n la̍-a.

² Wɛ̀ Fɛlesii nyɔ̍ ke telě nǎ poe nyɔ̍-a wlu̍ i̍ wɔ̍ɔ̍n i̍. U̍h la̍a̍, “Jɔ̍gbau la ɔ̍ ke gblɛ̍n sɔ̀ɛ̀n nyɔ̍-a nɛ̍aɛ we̍, wɛ̀ ɔ̍ ke u̍h-a di̍-i dɛ̍ tàdùè wa.”

³ Wɛ̀ Jusu po̍ nɛnǎ la dě u̍h we̍.

⁴ Ɔ̍ la̍a̍, “Pò mɔ̀-a nyɔ̍ due blě blawɛ̌ᵻá kmɛ wɛ̀ i̍h-a due iě mǎ-ɛ, nɛ̀ ɔ̍ se̍ kwela mɛ̀nyìɛ̍ jɔ̌ mɛ̀nyìɛ̍ laa̍ dě pibǐ di̍i̍ sie mu̍ ɔ̍ iě jɛ laa̍ i̍ pɔ̀n te̍e̍ wɛ̀ ɔ̍ iě ɛ̍ jě ae?

⁵ Pò ɔ̍ jě ɛ̍-ɛ, nɛ̀ ɔ̍ se̍ ɛ̍ wlè i̍ po̍ mu̍ ɔ̍ iě nmɔ ae?

⁶ Pò ɔ̍ ji̍ wlɔ̀-ɛ, nɛ̀ ɔ̍ mu̍ ɔ̍ ba̍ᵻ ke nyɔ̍ nɛ-a dǒ gbò wɔ̍ɔ̍n-ɛ dǎ. Nɛ̀ ɔ̍ la̍a̍ dě u̍h we̍, ‘Mɔ̀ gbǎ ǐn we̍ à iě nmɔ, dɛ̍nu̍ɛ, ǎn blawɛ̌ ɛ̀ mǎ-a de-ɛ, ǐn jě ɛ̍ wɛ̀.’

⁷ Ǎn sèàɛ̍ mɔ̀ wlùh, kǎ ɛ̍ mu̍ nɛ ke. Pò gblɛ̍n sɔ̀ɛ̀n nyɔ̍ due bǐi i̍-ɛ, nɛ̀ mɔna̍-a mu̍ nui-ɛ dɛ̍blɔ dě ja̍i̍wlɔ̀ ɛ̍ iě i̍ slɛ̌-nyɔ̍-a kwela mɛ̀nyìɛ̍ jɔ̌ mɛ̀nyìɛ̍ ùh la̍ ùh se̍-a i̍ bǐi nyɔ̍-ɛ sìì.

Jusu po̍ sebla̍ wliɛ̍ ɛ̀ mǎ-aɛ nɛnǎ

⁸ “Nynɔ̌ ɔ̀ blě-a sebla̍ wlǐ-a jɔ̌ pùè-ɛ, pò i̍h-a due mǎ-ɛ, nɛ̀ dɛ̍ ɔ̍ mu̍ nu̍ ɛ? Nɛ̀ ɔ̍ mu̍ nape̍ tba̍ ɔ̍ iě dě gbò i̍ wo̍lo, ɔ̍ iě i̍ gbèɛ̀ɛ̍n te̍e̍, wɛ̀ ɔ̍ iě ɛ̍ jě-ɛ dǔ.

⁹ Pò ɔ̍ jě ɛ̍-ɛ, nɛ̀ ɔ̍ mu̍ ɔ̍ ba̍ᵻ ke nyɔ̍ nɛ-a dǒ gbò wɔ̍ɔ̍n-ɛ dǎ. Nɛ̀ ɔ̍ mu̍ ka dǎ dě u̍h we̍, ‘Mɔ̀ gbǎ ǐn we̍ à iě nmɔ, dɛ̍nu̍ɛ, ǎn sebla̍ wliɛ̍ ɛ̀ mǎ-a de-ɛ, ǐn jě ɛ̍ wɛ̀.’

¹⁰ Ǎn sèàɛ̍ mɔ̀ wlùh, kǎ ɛ̍ nɛ ke. Nyɔsoa-a ǐnchɔ̀-a nu̍ mɔna̍ dɛ̍blɔ dǒ gblɛ̍n sɔ̀ɛ̀n nyɔ̍ due ɔ̀ bǐi-a i̍-ɛ we̍.”

Mǎ-a jǔ wlǔh tà

¹¹ Wɛ̀ Jusu la̍a̍, “Jɔ̍gbau due bo ɔ̀ blě jɔ̍gbauᵻ nynuu̍ sɔɔ̌n.

¹² Iě juwɛ naɛ la̍a̍ dě ɔ̍ we̍, ‘Ǐn baa, àn kɔn-dɛ̍ᵻá fɔ̌ ìh kɔn-a dǒ ǐn we̍-ɛ, sà i̍h-o ìè i̍h ǐn nyǐ.’ Wɛ̀ ɔ̍ gblè i̍h u̍h jii̍.

¹³ Ɛ̍ se̍-o wlè, iě wɛ naɛ laa̍ ɔ̍ ple̍ dɛ̍ᵻ kli̍hgbɛ̍ ɔ̍ baa nyǐ-a ɔ̍-ɛ. Iě ɔ̍ mu̍ dakɔ̍ de̍e̍. Dě ɔ̍ nyni-i i̍h-a wlǐ jii̍ dě sàwlùh-ɛ di̍i̍.

¹⁴ Ɔ̍ wɔ̀-a ɔ̍ dɛ̍ᵻ kli̍hgbɛ̍ ple̍-ɛ, wɛ̀ mɔ̌ dɔu gbǎ dě blǔh laa̍ kɛ̍n. Sɔ ɔ̍ se̍ dɛ̍-a sà la̍ kɔn dɛ.

¹⁵ Wɛ̀ ɔ̍ mu̍ iě ɔ̍ gbǎ blǔh laa̍ ɛ̍ jɔ̍gbau due we̍. Iě ɔ̍ dbo̍ ɔ̍ dě ɔ̍ blǐ klè ɔ̍ iě ɔ̍ be̍e̍ᵻ di̍-dɛ̍ᵻ nyǐ.

¹⁶ Mɔ̌-a nu̍-a ɔ̍-ɛ, sɔ ɔ̍ pɔ̀n ɔ̍ iě be̍e̍ᵻá di̍-dɛ̍ᵻ di̍ de. Jɛ nyɔ̍ se̍ ɔ̍ i̍h-a dɛ̍ nyǐ.

¹⁷ Jɛ ti̍ ɔ̍ ji̍-a ɔ̍ chɛ̀ we̍-ɛ, iě ɔ̍ la̍a̍, ‘Ǐn baa-a dbo̍ nu̍ nyɔ̍ blě di̍-dɛ̍ᵻ dɔu i̍h sie kɛ̍n i̍, wɛ̀ ǎn ji̍ mɔ̌ i̍ mɛ̌ la̍ da̍a.

¹⁸ Ǎn mu̍ da̍a sɔ iě dě ǐn baa we̍ mu̍ dode̍. Nɛ̀ ǎn mu̍ ka dǎ dě ɔ̍ we̍, “Ǐn baa, ǐn nu̍ dɛ̍ sɔ̀n dǒ ìn ke Nyɔsoa we̍.

¹⁹ Ǐn se̍ i̍ blaɛ dɛ nyɔ̍ iě ǐn àn jǔ dǎɛ. Dǔ m̌ la̍ sǔh ka àn dbo̍ nu̍ nyɔ̍-a due-ɛ.” ’

²⁰ Wɛ̀ ɔ̍ sɔ bloɔ̍, iě ɔ̍ dǔ ɔ̍ baa we̍ wìè-e. “Jɛ ɔ̍ nɛ dě wìè nya̍ sǔh wɛ̀ ɔ̍ baa jě ɔ̍. Sɔ ɛ̍ po̍ ɔ̍ baa wɔɛ. Wɛ̀ ɔ̍ gba̍ ple̍-ɛ iě ɔ̍ gblèè ɔ̍, iě ɔ̍ tù ɔ̍ wlì.

²¹ Wɛ̀ ɔ̍ jǔ la̍a̍ dě ɔ̍ we̍, ‘Ǐn baa, ǐn nu̍ dɛ̍ sɔ̀n dǒ ìn ke Nyɔsoa we̍. Ǐn se̍ i̍ blaɛ dɛ nyɔ̍ iě ǐn àn jǔ dǎɛ.’

²² Jɛ ɔ̍ baa la̍a̍ dě ɔ̍ pòi̍nynuu̍ we̍, ‘Mɔ̀ ja dɛ̍wlo̍o̍ ɛ̀ nmɔ-a jii̍-ɛ suei̍ mɔ̀ iě ɛ̍ ɔ̍-ɔ pa̍-ɛ. Mɔ̀ po̍ ɔ̍ bɔ̌ chèɛ̀-ɛ, mɔ̀ iě ɔ̍ bu̍hdih bu̍h-u po̍.

²³ Nɛ̀ mɔ̀ ja ǎn chlǎn bli plɔ̀ mɔ̀ iě ɛ̍ dbǎ, à iě dɛ̍ di̍ à iě mɔna̍ nu̍.

²⁴ Dɛ̍nu̍ɛ, ǎn jǔ la ɔ̍ mɛ̌-ɛ de, wɛ̀ ɔ̍ wlǔh-e. Ɔ̍ mǎ-ɛ de, wɛ̀ ɔ̍ jě-ɛ wɛ̀.’ Wɛ̀ u̍h tè mɔna̍ nu̍-ɛ gbɔ̀.

²⁵ “Nɛ̀ ɔ̍ jǔ jɔ̍gbau klaa naɛ nɛ dě klè. Ɔ̍ ji̍-a la̍ wlɔ̀-ɛ, ɔ̍ kɔǎɛn-a la̍ u̍h-a gbò i̍-ɛ, iě ɔ̍ wɔ̌n de̍le-ɛ ke ble̍-e slɛ̀.

²⁶ Wɛ̀ ɔ̍ dǎ pòi̍ju due iě ɔ̍ tèle ɔ̍ i̍. Ɔ̍ la̍a̍, ‘Dɛ̍ gbǎ ɛ?’

²⁷ Iě pòi̍ju la̍a̍ dě ɔ̍ we̍, ‘Ìn deǐ ji̍-i, wɛ̀ mɔ̀ baa dbǎ-ɛ ɔ̍ chlǎn bli plɔ̀. Dɛ̍nu̍ɛ, ɔ̍ jǔ ji̍ de̍ pɛlɛpɛ dɛ̍ se̍ ɔ̍ nu̍.’

²⁸ Wɛ̀ ɔ̍ gbǎ jlu̍h-u, iě ɔ̍ la̍ nɛ̀ ɔ̍ se̍-e gbò pa̍ mu̍. Wɛ̀ u̍h baa sǐ sɔ̀n, iě ɔ̍ ba̍le ɔ̍.

²⁹ Jɛ ɔ̍ sà ɔ̍ baa-a wlu̍ pɔ̀n we̍, ɔ̍ la̍a̍, ‘Gbɛ̀n-e, sɔ̀nᵻ dɔu la ǐn nui-a àn dbo̍-ɛ, wɛ̀ nɛ̌ se̍a àn wlu̍ wɔ̍n blaɛ. Jɛ nɛ̀ se̍a ǐn gbàdɔ̍ jǔ-a chɛ̀ nyǐ wɛ̀ ǐn ke ǐn ba̍ᵻ ke à iě mɔna̍ nu̍.

³⁰ Jɛ àn jǔ la ɔ̀ gbɔ̀lɔ-a àn kɔn-dɛ̍ᵻ i̍ dǒ kàìà nynɔ̌gbaɔᵻ we̍-ɛ, ɔ̍ ji̍-aɛ, iě ìn dbǎ-ɛ ɔ̍ chlǎn bli plɔ̀.’

³¹ Wɛ̀ u̍h baa la̍a̍ dě ɔ̍ we̍, ‘Ǎn jǔ, ìn nɛ da̍a ǐn we̍ ti̍ kli̍hgbɛ̍ we̍. Dɛ̍ kli̍hgbɛ̍ ǐn blě-aɛ, mɔ̀ kɔn ɛ̍.

³² À kɔn à iě mɔna̍ nu̍ à iě de̍le. Dɛ̍nu̍ɛ, ìn deǐ la ɔ̍ mɛ̌-ɛ de, wɛ̀ ɔ̍ wlǔh-e. Ɔ̍ mǎ-ɛ de, wɛ̀ ɔ̍ jě-ɛ wɛ̀.’ ”