Pɔ̀n Chɛ̀ Luu To-a La 14 - Ku̍o̍ Delee 1999

Jusu pǔh-i poa-jɔ̍gbau

¹ Dǒ wlè-weɛ̍ due di̍i̍ Jusu mu̍-a dɛ̍ di̍ la̍ dě Fɛlesii nyɔ̍-a dlǔtu due blǐ gbò-ɛ, nɛ̀ nyɔ̍gbei-a klǎɛ ɔ̍ jlǐhɛ̍.

² Nɛ̀ jɔ̍gbau due nɛ dǒ ɔ̍ jǔ ɔ̍ bu̍hᵻ ke ɔ̍ sɔ̍nᵻ pùn-i.

³ Wɛ̀ Jusu wlu dě telě nǎ poe nyɔ̍ ke Fɛlesii nyɔ̍ we̍. Ɔ̍ la̍a̍, “À telě sà à wlu̍ kɛ̍n à iě nyɔ̍ pǔh-i dǒ wlè-weɛ̍ di̍i̍ ɛɛ, àe̍e̍ ɛ̍ se̍ à wlu̍ kɛ̍n sà ae?”

⁴ Jɛ u̍h nɛ tìi̍n. Wɛ̀ Jusu dǔ jɔ̍gbau laa̍, iě ɔ̍ pǔh-i ɔ̍. Iě ɔ̍ sèàɛ̍ ɔ̍ wlùh ɔ̍ iě gbò we̍ mu̍.

⁵ Wɛ̀ Jusu la̍a̍ dě u̍h we̍, “Pò mɔ̀-a nyɔ̍ blě ɔ̍ jǔ àe̍e̍ bli wɛ̀ ɛ̍ iě dě nǐ biě di̍i̍ gbǎ dǒ wlè-weɛ̍ di̍i̍-ɛ, nɛ̀ ɔ̍ se̍-o nyna mu̍ ɔ̍ iě ɛ̍-e sà ae?”

⁶ Jɛ u̍h se̍ ɔ̍ wlu̍ pɔ̀n we̍ sà-a bɛ̌ɛ.

Nyɔsoa-a mu̍ nyɔ̍ ɔ̀ ja-a ɔ̍ chɛ̀ wlù-ɛ ja̍i̍ dǔ

⁷ Nyɔ̍ u̍h dǎ-a dɛ̍ di̍ la̍-ɛ, ka u̍h-a duuh-a nu̍-a tà chɛ̀ klɛ̀ɛ̀n-ɛ, ɛ̍ bo Jusu jě. Iě ɔ̍ po̍ nɛnǎ dě u̍h we̍. Ɔ̍ la̍a̍,

⁸ “Pò nyɔ̍ dǎ m̀ dǒ nynɔ̌ jla̍ ja peě kɛ̍n-ɛ, bɔ̌ tà chɛ̀ i̍ tè-ɛ. Nyɔ̍-se̍-juo nyɔ̍ ɔ̀ gbǎ-a dɛ̍kɛ̍n ɔ̀ sìì-a m̀-ɛ, u̍h dǎ ɔ̍ ke.

⁹ Nɛ̀ nyɔ̍ ɔ̀ dǎ-a mɔ̀-a gbɔ̍ᵻ nɛ-a sɔɔ̌n-ɛ, pò ɔ̍ ji̍-ɛ, nɛ̀ ɔ̍ mu̍ ka nu̍, ‘Nyǐ jɔ̍gbau la tè la.’ Nɛ̀ pò ìn ja̍ la̍ dǒ plǒai tà i̍ tè la̍ mu̍-ɛ, nɛ̀ tɛ̀n-a mu̍ ìn nu̍.

¹⁰ Jɛ pò nyɔ̍ dǎ m̀-ɛ, mu̍ ìè dǒ plǒai tà i̍ tè, wɛ̀ pò àn dihwi̍h baa ji̍-ɛ, ɔ̍ iě ka nu̍, ‘Ǐn ba̍, da̍a se̍ ìn i̍ wɔ̀, nɔ̍ɔ̀ bo ɛ̀ wɔ̀ ìn i̍ ìè i̍ tè.’ Nɛ̀ ɛ̍ mu̍ ìn kǔkɛ̍n po̍ dǒ ìn ba̍ᵻ dihwi̍hᵻ kli̍hgbɛ̍ jlǐhwai.

¹¹ Dɛ̍nu̍ɛ, nyɔ̍ jɔ dǔ-a ɔ̍ chɛ̀ ja̍i̍-ɛ, nɛ̀ ɔ̍ mu̍ wlù ja-ɛ. Nɛ̀ nyɔ̍ jɔ ja-a ɔ̍ chɛ̀ wlù-ɛ, nɛ̀ ɔ̍ mu̍ ja̍i̍ dǔ-iɛ.”

¹² Wɛ̀ Jusu wlu dě dihwi̍h baa we̍ ke. Ɔ̍ la̍a̍, “Pò ìn dǎ peě-ɛ, bɔ̌ ìn ba̍ᵻ o, ìn de̍di̍i̍ᵻ o, àn wloa̍ nyɔ̍ o, pàn-nyɔ̍ ùh ke ìn tǐn-a dǒ gbòᵻ nynɛ̌-ɛ o, bɔ̌ u̍h-a nyɔ̍ dǎ-a. Dɛ̍nu̍ɛ, u̍h-a mu̍ ìn peě kɛ̍n dǎ ke u̍h iě àn gba̍ sà.

¹³ Jɛ pò ìn dǎ peě-ɛ, nɛ̀ ìn dǎ nyɔ̍gbà nyɔ̍ ke, i̍ kɔ̌-nyɔ̍ ke, klɔ-nyɔ̍ ke dɔ̌-nyɔ̍.

¹⁴ Nɛ̀ àn mu̍ i̍ nmɔ, dɛ̍nu̍ɛ, u̍h nɔ̀ɔ̍, u̍h se̍ àn gba̍ sà-a bɛ̌ɛ. Jɛ ti̍ i̍ slɛ̌-nyɔ̍-a mu̍-ae wlǔh-ɛ, dǒ Nyɔsoa-a mu̍ ìn pɛ̌ɛ.”

Jusu po̍ peě klaa-a nɛnǎ

¹⁵ Jɔ̍gbau due ɔ̀ ke Jusu bei tè-a i̍ dǒ teble̍ gbɔ̀-ɛ wɔ̌n-a wlu̍ la-ɛ, iě ɔ̍ la̍a̍ dě Jusu we̍. “Nyɔ̍ ùh-a mu̍-a dɛ̍ di̍ dě Nyɔsoa-a kmɔ̌ wlu̍ i̍ kɔn-ɛ di̍i̍-ɛ, nɛ̀ u̍h nmɔ i̍ gbɛɛ̍.”

¹⁶ Wɛ̀ Jusu la̍a̍ dě ɔ̍ we̍, “Jɔ̍gbau due bo ɔ̀ dǎ peě klaa, iě ɔ̍ dǎ nyɔ̍ dɔu.

¹⁷ Peě tù ti̍ nyni̍-aɛ, wɛ̀ ɔ̍ dbo̍ ɔ̍ pòi̍ju ɔ̍ iě nyɔ̍ ɔ̍ dbo̍-a wlu̍ we̍ i̍-ɛ dǎ. Ɔ̍ iě ka nu̍, ‘Mɔ̀ ji̍, dɛ̍ᵻ kli̍hgbɛ̍ gbǎ gba̍a̍ wɛ̀.’

¹⁸ Jɛ u̍h kli̍hgbɛ̍ po̍ kafinǎ. Sàǐtòò nyɔ̍ la̍a̍ dě pòi̍ju we̍, ‘Ǐn tɛ̀n blǔh, wɛ̀ ǐn kɔn iě ɛ̍ jě la̍-a mu̍. Ìn gba̍ kɛ̀n sèàɛ̍ àn dlǔtu wlùh ǐn se̍ ji̍-ɛ bɛ̌ɛ.’

¹⁹ Wɛ̀ dɔɔ la̍a̍, ‘Ǐn tɛ̀n bliᵻ pùè, ǎn mu̍ i̍h jě la̍-a, pò i̍h nmɔ jii̍ kɔ̌ɔ. Ìn gba̍ kɛ̀n sèàɛ̍ àn dlǔtu wlùh ǐn se̍ ji̍-ɛ bɛ̌ɛ.’

²⁰ Dɔɔ la̍a̍, ‘Kaka bo ǐn ple̍-e nynɔ̌. Ɛ̍ tìh-ɛ, ǐn se̍ ji̍-ɛ bɛ̌ɛ.’

²¹ Wɛ̀ pòi̍ju laa̍ ɔ̍ mu̍ de̍. Iě ɔ̍ sèàɛ̍ ɔ̍ dlǔtu ìh kli̍hgbɛ̍ la wlùh. Iě ɔ̍ dlǔtu gbǎ jlu̍h-u, wɛ̀ ɔ̍ la̍a̍ dě ɔ̍ pòi̍ju we̍, ‘Mu̍ dě wlɔ̀gbàɛ̀ ke gbòᵻ nynɛ̌ i̍ suei̍ ìè nyɔ̍gbà nyɔ̍ ke, i̍ kɔ̌-nyɔ̍ ke, dɔ̌-nyɔ̍ ke klɔ-nyɔ̍ ja.’

²² Pòi̍ju ji̍-a de̍-ɛ, wɛ̀ ɔ̍ la̍a̍, ‘Nyɔ̍ klaa, dɛ̍ ìn sèàɛ̍ ǐn wlùh-ɛ, ǐn wɔ̀ ɛ̍ nu̍-ɛ wɛ̀. Jɛ tèla̍ sie i̍ ke̍.’

²³ Wɛ̀ ɔ̍ dlǔtu la̍a̍ dě ɔ̍ we̍ dɛ, ‘Gba̍ wìèᵻ klaaᵻ ke kɛ̌n wìèᵻ ìè nyɔ̍ kɛ̍ɛ̍n nɛ̌ ìè u̍h ja, wɛ̀ ǎn gbò iě jǐ.

²⁴ Ǎn sèàɛ̍ mɔ̀ wlùh, jɔ̍gbauᵻ ǐn dǎ-a sàì-ɛ, u̍h-a nyɔ̍ se̍ ǎn peě la ɛ̍ di̍-dɛ̍ wɔ̍n tɛ̀n mu̍.’ ”

Dɛ̍ nyɔ̍-a ple̍ iě àn nu̍ Jusu-a kòà ɛ?

²⁵ Nyɔ̍ tlùgbei̍ ke Jusu-a na, iě ɔ̍ bǐi dě u̍h we̍, wɛ̀ ɔ̍ la̍a̍,

²⁶ “Pò nyɔ̍-o-nyɔ̍ gbǎ dǒ ǐn de̍e̍ wɛ̀ ɔ̍ iě ɔ̍ de̍ ke, ɔ̍ baa ke, ɔ̍ nynɔ̌ ke, ɔ̍ nynuu̍ ke, ɔ̍ de̍di̍i̍ᵻ jɔ̍gbauᵻ ke, de̍di̍i̍ᵻ nynɔ̌gbaɔᵻ ke ɔ̍ chɛ̀-a feɛ-a tìh kma ɛ̍ iě-a ǐn sìì-ɛ, nɛ̀ ɔ̍ se̍ ǎn kòà nu̍-ɛ bɛ̌ɛ.

²⁷ Nyɔ̍ jɔ se̍-a ɔ̍ naɛ gbàɛ̍ kɛ̍n i̍ tu̍-u dǔ mu̍ wɛ̀ ɔ̀ iě-a dǒ ǐn de̍e̍ gbǎ-a dǔ-ɛ, nɛ̀ ɔ̍ se̍ ǎn kòà nu̍-ɛ bɛ̌ɛ.

²⁸ Pò mɔ̀-a nyɔ̍ ja pɔ̀n ɔ̍ iě gbàsla klaa po̍-ɛ, nɛ̀ ɔ̍ tè i̍ ke̍ sàǐtòò ɔ̍ iě dɛ̍ tìèwe̍ ɛ̍ mu̍-a po̍-ɛ slè pò ɔ̍ blě ɛ̍ wlǐ ɔ̍ iě ɛ̍ i̍ wɔ̀-ɛ.

²⁹ Pò ɔ̍ se̍ la̍a̍n nu̍ wɛ̀ ɔ̍ iě ɛ̍ wlù i̍ po̍, iě ɔ̍ se̍ ɛ̍ i̍ wɔ̀-ɛ, nɛ̀ nyɔ̍ kli̍hgbɛ̍ ùh-a mu̍-a ɛ̍ jě-ɛ, u̍h-a mu̍ ɔ̍ kǐhlɛ.

³⁰ Nɛ̀ u̍h-a mu̍ ka dǎ, ‘Jɔ̍gbau la ɔ̍ tè ɔ̍ gbàsla po̍-ɛ gbɔ̀, jɛ ɔ̍ se̍ ɛ̍ i̍ wɔ̀-ɛ bɛ̌ɛ.’

³¹ Pò blǔh baa ja ɔ̍ ba̍ dɔɔ tu̍h we̍ pa̍-ɛ i̍ pɔ̀n-ɛ, nɛ̀ ɔ̍ tè i̍ ke̍ sàǐtòò ɔ̍ iě ɛ̍ pu̍e̍e pò ɔ̍ nyɔ̍-a wlǔ pùè (10,000) bɛ̌ɛ ɔ̍ ba̍-a nyɔ̍-a wlǔ-a kwela sɔɔ̌n (20,000) we̍ fɔ̀n-ɛɛ.

³² Pò ɔ̍ se̍ ɛ̍ bɛ̌ɛ-ɛ, nɛ̀ ɔ̍ dbo̍ nyɔ̍ dě blǔh baa jɔ laa̍ we̍ ɔ̍ iě tòɛ̀ i̍ po̍ ka ɔ̍ tɛn-a we̍ ke̍-ɛ.

³³ Kǎ ɛ̍ nɛ ke, pò mɔ̀-a nyɔ̍ se̍ ɔ̍ blě-dɛ̍ᵻ kli̍hgbɛ̍ i̍ tǎli-ɛ, nɛ̀ ɔ̍ se̍ ǎn kòà nu̍-ɛ bɛ̌ɛ.

Tɔ̌n ɛ̀ se̍-a dɛ̍kɛ̍n gbǎ-ɛ

³⁴ “Tɔ̌n nmɔ jii̍, jɛ pò ɛ̍ wɛ̀ wɔ̍n-ɛ, nɛ̀ nyɔ̍ se̍ ɛ̍ wɔ̍n nmɔ-ɛ bɛ̌ɛ dɛ.

³⁵ Nɛ̀ ɛ̍ se̍ jii̍ nmɔ dɛ dǒ blǔh ke tù-dɛ̍ᵻ nmɔ-ɛ dɛ̍ᵻ we̍. Nɛ̀ nyɔ̍-a po̍ la̍ ɛ̍ de̍ sǔh. Nyɔ̍ flɔn-a dounᵻɛ́, nɛ̀ ɔ̍ po̍-e dounᵻ.”