Pɔ̀n Chɛ̀ Luu To-a La 13 - Ku̍o̍ Delee 1999

Mɔ̀ bǐi i̍ mɔ̀-ɔ je̍e mɛ̌

¹ Nɛ̀ nyɔ̍ duuh nɛ dǒ tà-a chɛ̀ dǒ ti̍ laa̍ di̍i̍, wɛ̀ u̍h sèàɛ̍ Jusu wlùh ka Wloma nyɔ̍-a kɔ̀mla̍ Pale dbǎ-a Kaladii nynuu̍ ùh-a sà-a Nyɔsoa slaǎ-ɛ.

² Wɛ̀ Jusu sà u̍h-a wlu̍ pɔ̀n we̍. Ɔ̍ la̍a̍, “Mɔ̀ jajeɛ̍ Kaladii nynuu̍ laa̍ u̍h bo ùh nu̍ gblɛ̍n sɔ̀ɛ̀n nyɔ̍-a ìèke̍e̍ dǒ Kaladii nyɔ̍ kli̍hgbɛ̍ kɛ̍n de, ɛ̍ kɔn u̍h nu̍ la̍a̍n mɛ̌-ɛ ae?

³ Iěe, jɛ ǎn sèàɛ̍ mɔ̀ wlùh, pò mɔ̀ se̍ mɔ̀-a gblɛ̍n sɔ̀ɛ̀n kɛ̍n i̍ poe-ɛ, nɛ̀ kǎ mɔ̀-a mu̍ mɛ̌-ɛ nu̍ ke.

⁴ Nɛ̀ nyɔ̍-a pùè jɔ̌ mɛ̀ta̍a̍n ùh gbàsla gbǎ-a kɛ̍n dǒ Sailowɔun wlɔ̀ di̍i̍ wɛ̀ u̍h mɛ̌-aɛ, mɔ̀ jajeɛ̍ u̍h bo ùh nu̍ gblɛ̍n sɔ̀ɛ̀n nyɔ̍-a ìèke̍e̍ dǒ nyɔ̍ ùh tǐn-a dǒ Juluslɛn-ɛ kɛ̍n de ae?

⁵ Iěe, jɛ ǎn sèàɛ̍ mɔ̀ wlùh, pò mɔ̀ se̍ mɔ̀-a gblɛ̍n sɔ̀ɛ̀n kɛ̍n i̍ poe-ɛ, nɛ̀ kǎ mɔ̀-a mu̍ mɛ̌-ɛ nu̍ ke.”

Jusu po̍ fei-tu̍-a nɛnǎ

⁶ Wɛ̀ Jusu po̍ nɛnǎ la, ɔ̍ la̍a̍, “Jɔ̍gbau due bo ɔ̀ tù fei-tu̍ dě ɔ̍ tlo-tu̍ᵻá klè di̍i̍. Wɛ̀ ɔ̍ mu̍ ɛ̍ ja̍ i̍ gbèɛ̀ɛ̍n la̍ pò ɛ̍ tlo-e kɔ̌ɔ. Jɛ ɔ̍ se̍ ɛ̍ buǒ ja̍ jě.

⁷ Wɛ̀ ɔ̍ la̍a̍ dě ɔ̍ klè we̍ i̍ gbɛ̀n nyɔ̍ we̍, ‘Gbɛ̀n-e, sɔ̀nᵻ ta̍a̍n la ǐn dǔ-a fei-tu̍ la ja̍ i̍ gbèɛ̀ɛ̍n-ɛ bo ǐn blě-a. Jɛ nɛ̌ jɛɛ-e dɛ̍. Dba̍ ɛ̍, jɛ ɛ̍ bɔ̌ blǔh la chɔ̌n wɔ̀-ɛ bu̍ɛ̍i̍.’

⁸ Wɛ̀ klè we̍ i̍ gbɛ̀n nyɔ̍ la̍a̍, ‘Nyɔ̍ klaa, tǎli ɛ̍ i̍, nyǐ ɛ̍ sɔ̀n due ke̍ dɛ. Ǎn mu̍ ɛ̍ de̍e̍ i̍ blǔ wɛ̀ iě ɛ̍ kuo̍ blǔh de̍e̍ i̍ po̍.

⁹ Nɛ̀ pò ɛ̍ tlo sɔ̀n-a mu̍-a i̍ sǐ-ɛ, nɛ̀ jɛ nmɔ-a jii̍-ɛ bo. Jɛ pò ɛ̍ se̍ la̍a̍n nɛ-ɛ, nɛ̀ ìn dba̍ ɛ̍ la̍ sǔh.’ ”

Jusu pǔh-i i̍ kɔ̌-nynɔ̌gbaɔ dǒ wlè-weɛ̍ di̍i̍

¹⁰ Dǒ Juu nyɔ̍-a wlè-weɛ̍ due di̍i̍ wɛ̀ Jusu po̍ nyɔ̍ nǎ dě wɛɛ sà gbò due sɔ̀n.

¹¹ Nɛ̀ nynɔ̌ ɔ̀ jeědih nɛ-a de̍e̍ dǒ sɔ̀nᵻá pùè jɔ̌ mɛ̀ta̍a̍n di̍i̍-ɛ nɛ-o. Nɛ̀ ɔ̍ kbǔ-i, ɔ̍ se̍ i̍ slɛ̌-ɛ bɛ̌ɛ-a chɛ̀ kleǐn.

¹² Jusu jě-a ɔ̍-ɛ, iě ɔ̍ dǎ ɔ̍. Ɔ̍ la̍a̍, “Nynɔ̌ chɛ̀, ìn wa̍n àn wɛ̌ la wɔ̍i̍n wɛ̀.”

¹³ Wɛ̀ Jusu tè ɔ̍ sɔ̍n dlǔ, iě ɔ̍ slɛ̌ i̍ dǒ tàdùè laa̍, wɛ̀ ɔ̍ po̍ Nyɔsoa tlɔ̌.

¹⁴ Jɛ wɛɛ sà gbò-a dlǔtu gbǎ jlu̍h-u, dɛ̍nu̍ɛ, Jusu pǔh-i nyɔ̍ dǒ wlè-weɛ̍ di̍i̍. Wɛ̀ ɔ̍ la̍a̍ dě nyɔ̍ nɛ-a doǒ-ɛ we̍, “Wǐh mɛ̀o̍ bo à blě nyɔ̍ iě dbo̍ nui. Mɔ̀ ji̍ dǒ wǐh laa̍ i̍h-a due di̍i̍ mɔ̀ iě pǔh, jɛ ɛ̍ se̍ dǒ wlè-weɛ̍ di̍i̍.”

¹⁵ Wɛ̀ Joi sà ɔ̍ wlu̍ pɔ̀n we̍. Ɔ̍ la̍a̍, “Mɔ̀ɔ̍ mɛɔ sɔɔ̌n wɔ̍ɔ̍n nɛ nyɔ̍ la, mɔ̀-a nyɔ̍-ɔ se̍a ɔ̍ bli àe̍e̍ soo̍pà-a dbǔ pɔ̀ni dǒ wlè-weɛ̍ di̍i̍ wɛ̀ ɔ̍-ɔ se̍a ɛ̍ nǐ nǎ la̍ gba̍ ae?

¹⁶ Nɛ̀ɛ̍, Eblaɛɛn-a jǔ nynɔ̌gbaɔ la ɔ̀ Setɔn po̍-a gbèèɛ̀ dǒ sɔ̀nᵻá pùè jɔ̌ mɛ̀ta̍a̍n di̍i̍-ɛ, ɔ̍ bɔ̌ dě gbèèɛ̀ la di̍i̍ sɔ-ɛ dǒ wlè-weɛ̍ di̍i̍ ae?”

¹⁷ Ɔ̍ bla̍-a dɛ̍ la-ɛ, sɔ ɛ̍ po̍ ɔ̍ nyɛ̌-nyɔ̍ kli̍hgbɛ̍ tɛ̀n-ɛ. Wɛ̀ nyɔ̍ kli̍hgbɛ̍ nu̍ mɔna̍ dɛ̍blɔ dǒ nyɔ̍ wɔ̍n flɔn-ɛ dɛ̍ᵻ kli̍hgbɛ̍ ɔ̍ nu̍-aɛ we̍.

Jusu po̍ jě à dǎɛ majlɛkɛ jɔ̌-a nɛnǎ

¹⁸ Jusu la̍a̍, “Dɛ̍ Nyɔsoa-a kmɔ̌ wlu̍ i̍ kɔn-ɛ wɔ̀ ɛ? Nɛ̀ dɛ̍ we̍ bo iě ɛ̍ i̍ blaɛ ɛ?

¹⁹ Jɔ̍gbau due bo ɔ̀ po̍ jě à dǎɛ majlɛkɛ jɔɛ̍ dě ɔ̍ blǐ klè. Wɛ̀ ɛ̍ ku̍ iě ɛ̍ nu̍ tu̍, iě na̍wɛ̍ᵻ poe tlěᵻ dě ɛ̍ kàgblih nynɛ̌. Ɛ̍ bo Nyɔsoa-a kmɔ̌ wlu̍ i̍ kɔn-ɛ wɔ̀.”

Jusu po̍ blèe̍ fù-i dɛ̍ᵻá nɛnǎ

²⁰ Jusu la̍a̍ dɛ-ɛ, “Dɛ̍ we̍ bo iě Nyɔsoa-a kmɔ̌ wlu̍ i̍ kɔn-ɛ i̍ blaɛ ɛ?

²¹ Ɛ̍ wɔ̀ blèe̍ fù-i dɛ̍ᵻ ìh nynɔ̌ due dǔ-a iě ɔ̍ po̍-a i̍h blèe̍ pèbèè dɔu we̍-ɛ. Wɛ̀ ɔ̍ sìàɛ̍n i̍h-i, iě i̍h fù-i blèe̍ gbo̍-a chɛ̀.”

Gbò wɔ̍n sɔɔ̌sɔ we̍ jii-ɛ

²² Jusu blě nǎ po̍-ɛ iě ɔ̍ jii wlɔ̀ᵻ klaaᵻ ke plìh di̍i̍ i̍, iě ɔ̍ mu̍ Juluslɛn.

²³ Wɛ̀ nyɔ̍ due tèle ɔ̍ i̍, ɔ̍ la̍a̍, “Nyɔ̍ klaa, nyɔ̍ jɔ̌ wei bo ùh-a mu̍ pǔh ae?” Jusu la̍a̍ dě u̍h we̍,

²⁴ “Mɔ̀ fɔ̀n dɛ̍ we̍ mɔ̀ iě dě gbò wɔ̍n sɔɔ̌sɔ we̍ jii. Ǎn sèàɛ̍ mɔ̀ wlùh, nyɔ̍ dɔu-a mu̍ ɛ̍ we̍ jii-ɛ i̍ pɔ̀n, jɛ u̍h se̍ ɛ̍ bɛ̌ɛ mu̍.

²⁵ Pò gbò joi sɔ bloɔ̍ wɛ̀ ɔ̍ iě dǒ gbò wɔ̍i̍n ka̍n-ɛ, nɛ̀ mɔ̀-a mu̍ dǒ sɔ̀n i̍ nyna mɔ̀ iě gbaba bla̍ wɛ̀ mɔ̀ iě ka dǎ, ‘Nyɔ̍ klaa, pɔ̀ni à wɔ̍i̍n.’ Nɛ̀ ɔ̍ mu̍ ka dǎ dě mɔ̀ we̍, ‘Ǐn se̍ tà mɔ̀ sɔ-aɛ juo.’

²⁶ Nɛ̀ mɔ̀-a mu̍ ka dǎ, ‘Ìn ke à di̍ dɛ̍ iě à nǎ-ɛ tàdùè, wɛ̀ ìn po̍ nyɔ̍ nǎ à wlɔ̀ᵻ gbàɛ̀ di̍i̍ i̍.’

²⁷ Jɛ ɔ̍ mu̍ ka dǎ, ‘Ǐn se̍ tà mɔ̀ sɔ-aɛ juo tìhǎn wlu̍. Mɔ̀ sɔ da̍a ǐn we̍-e, mɔ̀ɔ̍ la mɔ̀ɔ̍ kà kɔn nyɔ̍ kli̍hgbɛ̍.’

²⁸ Mɔ̀-a mu̍ Eblaɛɛn ke, Ase ke, Jekɔ ke, Nyɔsoa-a tu̍owli po̍ nyɔ̍ kli̍hgbɛ̍ jě dě Nyɔsoa-a kmɔ̌ wlu̍ i̍ kɔn-ɛ di̍i̍ wɛ̀ mɔ̀ iě nɔ̌ sɔ̀n sie-ɛ. Dě mɔ̀-a mu̍ fìn-i, mɔ̀ iě nynɛ̌ di̍ kìàǎnkìàǎn.

²⁹ Nɛ̀ nyɔ̍ɔ-a mu̍ blǔh kàɛ̀n nɛ-a nyìɛ̍-ɛ we̍ i̍ sɔ, u̍h iě dǒ teble̍ gbɔ̀ gbèɛ̀ɛn dě Nyɔsoa-a kmɔ̌ wlu̍ i̍ kɔn-ɛ di̍i̍.

³⁰ Nɛ̀ nyɔ̍ ùh wɔ̀-a ka de̍-ɛ, u̍h-a mu̍ nya̍ wɔ̀, wɛ̀ ùh wɔ̀-a nya̍-ɛ, u̍h iě de̍ wɔ̀.”

Jusu jbɛɛ Juluslɛn-ɛ

³¹ Dǒ ti̍ laa̍ di̍i̍-ɛ, Fɛlesii nyɔ̍ duuh ji̍-i. Wɛ̀ u̍h la̍a̍ dě Jusu we̍, “Sɔ da̍a ìè tàdɔ̀ɔ̀ mu̍. Dɛ̍nu̍ɛ, Ɛlo-a pɔ̀n ìn dbǎ-a i̍.”

³² Wɛ̀ Jusu la̍a̍ dě u̍h we̍, “Mɔ̀ mu̍ mɔ̀ iě bɛ̌kɔ̀ laa̍ wlùh sèàɛ̍, kǎ mɔ̀ iě ka dǎ, ‘Ǎn sà nyɔ̍ jeědih de̍e̍ i̍, iě ǎn pǔh-i nyɔ̍ sèàn ke klàe̍, nɛ̀ pò dǒ wǐh ta̍a̍n naɛ di̍i̍-ɛ, nɛ̀ ǎn mu̍ ǎn dbo̍ i̍ wɔ̀.’

³³ Jɛ ǐn kɔn iě ǎn wìè kɛ̍n gbǎ sèàn ke klàe̍ ke sɛ̀ɛ̀n. Dɛ̍nu̍ɛ, ɛ̍ se̍ i̍ blaɛ Nyɔsoa-a tu̍owli po̍ nyɔ̍ iě tàdɔ̀ɔ̀ mɛ̌-ɛ. Dě Juluslɛn nɛ due bo ɔ̍ kɔn ɔ̍ iě mɛ̌-ɛ.

³⁴ “À, Juluslɛn, Juluslɛn, mɔ̀ bo ɔ̀ dbǎ Nyɔsoa-a tu̍owli po̍ nyɔ̍ wɛ̀ ìn tbaɛ nyɔ̍ ɔ̍ dbo̍-a dě ìn we̍-ɛ sɔɔ̌ᵻ i̍. Ti̍ kli̍hgbɛ̍ we̍ ǎn pɔ̀n àn nynuu̍ la tàdùè po̍-ɛ i̍, iě u̍h kɛ̍n kaɛn de ka gbàn-nynɔ̌ suuh-a flùì ɛ̍ nynuu̍ kɛ̍n-ɛ. Jɛ nɛ̀ wɔ̌ɛn ɛ̍-ɛ.

³⁵ Gbɛ̀n-e, mɔ̀-a gbò-a mu̍ fɔ̍ɔ̍ sie. Ǎn sèàɛ̍ ìn wlùh, mɔ̀ se̍ ǐn jě mu̍ te̍e̍ wɛ̀ ìè ka dǎ, ‘Nyɔ̍ ɔ̀ ji̍-a dǒ Joi-a nynɛ̌ kɛ̍n-ɛ, pɔ̀ìě dǒ ɔ̍ we̍.’ ”