Pɔ̀n Chɛ̀ Luu To-a La 12 - Ku̍o̍ Delee 1999

Jusu tù ɔ̍ kòà slɛ̌n

¹ Ti̍ nyɔ̍ɔ-a wlǔ-a wlǔ gbǎ-a tàdùè-ɛ, nɛ̀ u̍h-a gboǎɛ la̍ wlè. Wɛ̀ Jusu tè wlu-ɛ gbɔ̀ dě ɔ̍ kòà we̍ sàǐtòò. Ɔ̍ la̍a̍, “Mɔ̀ tù mɔ̀-a chɛ̀ jlǐhɛ̍, mɔ̀ nu̍ nɛnɛ̌ dǒ Fɛlesii nyɔ̍-a blèe̍ fù-i dɛ̍ᵻ we̍, ɛ̀ nu̍-a u̍h-a mɛɔ sɔɔ̌n wɔ̍ɔ̍n nɛ-ɛɛ.

² Dɛ̍ ɛ̀ sìle-aɛ, ɛ̍ mu̍ tà wlǔh. Nɛ̀ dɛ̍ nyɔ̍ sà-a dě slǎn-aɛ, ɛ̍ mu̍ dǒ gbaɛ̍we̍ ji̍.

³ Ɛ̍ tìh-ɛ, dɛ̍-o-dɛ̍ mɔ̀ sà-a dě kwile-ɛ, ɛ̍ mu̍-u wɔ̌n-ɛ sɔ̀n sɛ̀n bla. Nɛ̀ dɛ̍ mɔ̀ pa̍-ɛa slǎn dě gbòju di̍i̍-ɛ, ɛ̍ wlu̍-a mu̍ dě gbò tɔ̀u̍n we̍ wlǔh-i.

Nyɔsoa-a faɔn bo ìè ple̍

⁴ “Ǐn ba̍ᵻ, ǎn sèàɛ̍ mɔ̀ wlùh, nyɔ̍ ùh wɔ̀ nyɔ̍-a nyi̍ɔ̍tu dbǎ-aɛ, nɛ̀ u̍h se̍-a dɛ̍ dɛɛ blě dɛ u̍h iě-a nu̍-ɛ, mɔ̀ bɔ̌ u̍h jǔ ple̍-ɛ.

⁵ Jɛ nyɔ̍ mɔ̀ iě-a jǔ ple̍-ɛ, ǎn mu̍ ɔ̍ mɔ̀ toe. Nyɔsoa wɔ̀ nyɔ̍ dbǎ-aɛ, nɛ̀ ɔ̍ blě gbǐh ɔ̍ iě nyɔ̍ laa̍ dě kàn nɛ̍ di̍i̍ po̍ dɛ. Ǎn sèàɛ̍ mɔ̀ wlùh, ɔ̍ bo mɔ̀ iě jǔ ple̍.

⁶ “Ɛ̍ se̍ kèlǎᵻ m̀m̌ bo ìh se̍ kaba̍ jɔ̌ sɔɔ̌n po̍ ae? Jɛ i̍h-a due-a chɛ̀ bo Nyɔsoa-a mǎle we̍.

⁷ Mɔ̀-a mǐ jɔ̌-a chɛ̀ nɛ-a dǒ mɔ̀ dlǔ-ɛ, ɔ̍ juo ka i̍h tìè-aɛ. Ɛ̍ tìh-ɛ, mɔ̀ bɔ̌ faɔn ple̍-ɛ, mɔ̀ gbǎ dɛ̍kɛ̍n mɔ̀ sìì kèlǎᵻ dɔu.

Jusu-a tìh i̍ wɔ̌ɛn ke chla tba̍-a

⁸ “Ǎn sèàɛ̍ mɔ̀ wlùh, nyɔ̍ ɔ̀ mu̍-a jlǔh nyna wɛ̀ ɔ̀ iě-a ǎn tìh i̍ wɔ̌ɛn-ɛ, nɛ̀ Nyi̍ɔ̍-a Jǔ-a mu̍ jlǔh nyna ke dǒ Nyɔsoa-a ǐnchɔ̀ jǔ wɛ̀ ɔ̍ iě ɔ̍ tìh i̍ wɔ̌ɛn ke.

⁹ Jɛ nyɔ̍ ɔ̀ mu̍-a jlǔh nyna wɛ̀ ɔ̀ iě-a ǐn chla tba̍-ɛ, nɛ̀ Nyi̍ɔ̍-a Jǔ-a mu̍ jlǔh nyna ke dǒ Nyɔsoa-a ǐnchɔ̀ jǔ wɛ̀ ɔ̍ iě ɔ̍ chla tba̍.

¹⁰ “Nyɔ̍ ɔ̀ mu̍-a Nyi̍ɔ̍-a Jǔ wlu̍ sɔ̀n pùn po̍-ɛ, ɔ̍ gblɛ̍n sɔ̀ɛ̀n-a tìh-a mu̍ i̍ tǎli-ɛ. Jɛ nyɔ̍ ɔ̀ mu̍-a Nyɔsoa-a Sùù wɔ̍n blaɛ-ɛ, nɛ̀ ɔ̍ gblɛ̍n sɔ̀ɛ̀n-a tìh se̍ i̍ tǎli la̍ kɔn.

¹¹ “Pò u̍h gba̍ mɔ̀ dě Juu nyɔ̍-a wɛɛ sà gbò sɔ̀n, àe̍e̍ dǒ kɔ̀mla̍ ke blǔh baaᵻ jǔ-ɛ, nɛ̀ ka mɔ̀-a mu̍-a u̍h-a wlu̍ pùn we̍ sà-a nu̍-ɛ ke dɛ̍ mɔ̀-a mu̍-a bla̍-ɛ, i̍h-a sèò bɔ̌ mɔ̀ nu̍-ɛ.

¹² Dɛ̍nu̍ɛ, Nyɔsoa-a Sùù-a mu̍ mɔ̀ nǎ po̍ dǒ dɛ̍ mɔ̀ iě-a bla̍ dǒ ti̍ laa̍ di̍i̍-ɛ.”

Jusu po̍ pàn-a jɔ̍gbau due-a nɛnǎ

¹³ Jɔ̍gbau due nɛ-a dě nyɔ̍ tlùgbei̍ nynɛ̌-ɛ, wɛ̀ ɔ̍ la̍a̍ dě Jusu we̍, “Dlǔtu, sèàɛ̍ ǐn de̍di̍i̍ wlùh kɔn-dɛ̍ᵻ à baa sie-e àɔ̀-ɛ, ɔ̍ iě naɛ m nyǐ.”

¹⁴ Iě Jusu la̍a̍ dě ɔ̍ we̍, “Jɔ̍gbau chɛ̀, nyɔ̍ bo ɔ̀ nu̍ ǐn mɔ̀-a taɔ àe̍e̍ mɔ̀-a dɛ̍ gblè nyɔ̍ we̍i̍ ɛ?”

¹⁵ Wɛ̀ Jusu la̍a̍ dě nyɔ̍ kli̍hgbɛ̍ we̍, “Mɔ̀ nu̍ nɛnɛ̌, nɛ̀ mɔ̀ tù mɔ̀-a chɛ̀ jlǐhɛ̍ dǒ klǎn kɔn dɛ we̍. Dɛ̍nu̍ɛ, nyi̍ɔ̍-a feɛ se̍ kɔn-dɛ̍ᵻ tìèwe̍ ɔ̍ blě-aɛ i̍ bǎ.”

¹⁶ Wɛ̀ Jusu po̍ nɛnǎ dě u̍h we̍. Ɔ̍ la̍a̍, “Pàn-a jɔ̍gbau due-a blǔh bo ɛ̀ nmɔ, iě ɔ̍ blě di̍-dɛ̍ᵻ dɔu.

¹⁷ Iě ɔ̍ la̍a̍ dě ɔ̍ chɛ̀ we̍, ‘Dɛ̍ iě nu̍-ɛ wèè? Dɛ̍nu̍ɛ, ǐn se̍ tà blě iě ǎn di̍-dɛ̍ᵻ la po̍.’

¹⁸ Wɛ̀ ɔ̍ la̍a̍, ‘Kǎ ǎn mu̍ ka nu̍. Ǎn mu̍ ǎn gbùlòᵻ la wlǎ, wɛ̀ iě klaaᵻ naɛ po̍. Nɛ̀ dě-e bo ǎn mu̍ ǎn di̍-dɛ̍ᵻ ke ǎn kɔn-dɛ̍ᵻ kli̍hgbɛ̍ po̍.

¹⁹ Nɛ̀ ǎn mu̍ ka dǎ dě ǎn chɛ̀ we̍, “Mla̍ jɔ̍gbau, ìn blě kɔn-dɛ̍ᵻ chɛ̀ dǒ sɔ̀nᵻ dɔu we̍. Nu̍ kmɔ̌-a pɛ̍pɛ̍, di̍ dɛ̍ ìè nǎ, ìè kmɔ̌ nu̍.” ’

²⁰ Jɛ Nyɔsoa la̍a̍ dě ɔ̍ we̍, ‘Bo-nyɔ̍, wìɔ̍ wlù la, àn feɛ-a mu̍ ìn kwa̍a̍ sà-ɛ. Nɛ̀ dɛ̍ᵻ ìn po̍-a gba̍a̍ dǒ àn chɛ̀ we̍-ɛ, nyɔ̍ mu̍ i̍h kɔn ɛ?’

²¹ “Kǎ ɛ̍ nu̍ nɛ-ɛ dǒ nyɔ̍ ɔ̀ tè-a pàn-dɛ̍ᵻ i̍ dǒ ɔ̍ chɛ̀ we̍-ɛ, jɛ nɛ̀ ɛ̍ se̍ Nyɔsoa naɛ pàn-a.”

Tè Nyɔsoa wlì

²² Wɛ̀ Jusu la̍a̍ dě ɔ̍ kòà we̍, “Ɛ̍ tìh-ɛ, ǎn sèàɛ̍ mɔ̀ wlùh, sèò bɔ̌ mɔ̀ nu̍-ɛ dǒ mɔ̀-a feɛ-a tìh we̍, ɛ̍ ke dɛ̍ mɔ̀-a mu̍-a di̍-ɛ ke dɛ̍ mɔ̀-a mu̍-a dǒ pùn tù-ɛ we̍.

²³ Dɛ̍nu̍ɛ, feɛ-a tìh kma-ɛ ɛ̍ sìì di̍-dɛ̍, iě ku̍-a tìh kma ɛ̍ sìì jlii̍.

²⁴ Mɔ̀ gbɛ̀n na̍wɛ̍ᵻ la ja, i̍h-i nu̍ klèᵻ wɛ̀ i̍h iě i̍h chɛ̍n. I̍h se̍ di̍-dɛ̍ᵻá gbùlòᵻ blě, jɛ Nyɔsoa-a nyǐ i̍h di̍-dɛ̍. Nɛ̀ mɔ̀ɔ̍ juh gbǎ-a dɛ̍kɛ̍n kaa̍ ùh sìì-a na̍wɛ̍ᵻɛ́, à ji̍ mɔ̀ jě.

²⁵ Mɔ̀-a nyɔ̍we̍ bo ɔ̀ bɛ̌ɛ ɔ̍ chɛ̀-a wǐh kɛ̍n poe-ɛ dǒ sèò-a sǔh we̍ ɛ?

²⁶ Ka mɔ̀ se̍-a dɛ̍ juwɛ la nu̍-ɛ bɛ̌ɛ-ɛ, nɛ̀ dɛ̍ nu̍ jih sie-a dǒ de̍-ɛ i̍h-a sèò-a nu̍ mɔ̀ ɛ?

²⁷ Mɔ̀ gbɛ̀n pei-a fɔ̀ài̍n la ja̍ mɔ̀ iě ka i̍h-a nu̍-a ku̍-ɛ jě. I̍h-i nu̍ dbo̍, i̍h wɔ̍-ɔ nu̍ jlii̍ dǒ i̍h-a chɛ̀ we̍ ke. Jɛ bɔ̌ ǐn sèàɛ̍ mɔ̀ wlùh, Blǔh Baa Sɔlɔma-a chɛ̀ ɔ̀ blě-a pàn-dɛ̍ᵻ kli̍hgbɛ̍-ɛ, ɔ̍ jlii̍ ɔ̍ pa̍-aɛ, i̍h-a jii̍ nmɔ-ɛ se̍ pei la i̍h-a fɔ̀ài̍n due sìì.

²⁸ Pei pò ìh wlǔh sèàn-a nɛ̀ i̍h wlɔ̍-a klàe̍-ɛ, nɛ̀ u̍h fɔ̍n-a i̍h-ɛ, i̍h bo Nyɔsoa-a nu̍ ka pɛ̀ɛ̀-o, jɛ nɛ̀ mɔ̀ɔ̍ bo ɔ̍ se̍ dɛ̍-ɛ pa̍-ɛ mu̍ ae? Dɛ̍nu̍ mɔ̀-a wlùh gbaɛ-ɛ se̍ i̍ ku̍ ka ɛ?

²⁹ “Di̍-dɛ̍ ke nǎ-dɛ̍ i̍ pɔ̀n sèò bɔ̌ mɔ̀ nu̍-ɛ.

³⁰ Nyɔ̍ ùh se̍-a Nyɔsoa juo-ɛ, u̍h bo ìh la i̍h-a sèò-a nu̍. Jɛ mɔ̀ Baa juo i̍h ka mɔ̀ kɔn mɔ̀ iě-a i̍h blě-ɛ.

³¹ Jɛ pɔ̀n Nyɔsoa-a kmɔ̌ wlu̍ i̍ kɔn-ɛ i̍. Nɛ̀ ɔ̍ chɛ̀-a mu̍ mɔ̀ ìh la kwlǎ sà-ɛ.

Pàn-a nɛ-a dě ja̍i̍wlɔ̀-ɛ la

³² “Mɔ̀ɔ̍ wei la, mɔ̀ bɔ̌ faɔn ple̍-ɛ. Dɛ̍nu̍ɛ, ɛ̍ nu̍ mɔ̀ Baa-a wlùh dɛ̍ mɔ̀ ke ɔ̍ iě ɔ̍ kmɔ̌ wlu̍ i̍ kɔn.

³³ Mɔ̀ ple̍ mɔ̀-a kɔn-dɛ̍ᵻ mɔ̀ iě i̍h nyɔ̍gbà nyɔ̍ nyǐ. Pɔsɛ̍ ɛ̀ se̍a sɔ̀n la̍ kɔn-ɛ, mɔ̀ pɔ̀n ɛ̍ i̍ dǒ mɔ̀-a chɛ̀ we̍. Nɛ̀ mɔ̀ tè mɔ̀-a pàn-dɛ̍ᵻ i̍ dě ja̍i̍wlɔ̀, tà i̍h se̍a i̍ wɛ̀ mu̍-ɛ. Dɛ̍nu̍ɛ, jlǐ-nyɔ̍ se̍-e mu̍-ɛ bɛ̌ɛ, iě dǐkàsè se̍ i̍h-i gbɔ̀lɔ-ɛ bɛ̌ɛ ke.

³⁴ Dɛ̍nu̍ɛ, tà àn pàn-dɛ̍ᵻ nɛ-aɛ, nɛ̀ dě àn wlùh-a mu̍ nɛ ke.

Gbàɛ̀ Joi-a ji̍-i tìh

³⁵ “Mɔ̀ chlìì kɛ̍n dǒ dɛ̍-o-dɛ̍ ɛ̀ mu̍-a nɛ-ɛ we̍. Mɔ̀-a nape̍ wa̍n,

³⁶ mɔ̀ iě pòi̍nynuu̍ ùh-a fuo-a u̍h-a dlǔtu kɛ̍ɛ̍n-ɛ wɔ̀. Pò ɔ̍ sɔ dě nynɔ̌ peě kɛ̍n, ɔ̍ bla̍ gbaba-ɛ, wɛ̀ u̍h iě ɔ̍ wɔ̍i̍n pɔ̀ni suei̍.

³⁷ Pòi̍nynuu̍ ùh kɔn dlǔtu ji̍-a wɛ̀ ɔ̍ se̍-a u̍h nyinɔ̍ i̍ jɛɛ-ɛ, nɛ̀ u̍h nmɔ i̍. Tìh-a taǐn ǎn sèàɛ̍ mɔ̀ wlùh, nɛ̀ ɔ̍ mu̍ ɔ̍ dɛ̍wlo̍o̍ i̍ sà chɛ̀gbɛɛ, wɛ̀ ɔ̍ iě u̍h dǒ teble̍ gbɔ̀ gba̍, ɔ̍ iě u̍h-a dɛ̍i̍ nu̍.

³⁸ Pò ɔ̍ ji̍ tòloo àe̍e̍ sɔ̀nwɔ̍i̍n wɛ̀ ɔ̍ se̍ u̍h nyinɔ̍ i̍ jɛɛ-ɛ, nɛ̀ pòi̍nynuu̍ laa̍ u̍h nmɔ i̍.

³⁹ Jɛ dɛ̍ mɔ̀ iě-a juo-ɛ, ɛ̍ nu̍ pò gbò joi juo dɛ̍ i̍ de ti̍ jlǐ-nyɔ̍-a mu̍-a dě ɔ̍ we̍ gbò ji̍-ɛ, nɛ̀ ɔ̍ se̍ wɔ̌n mu̍ de jlǐ-nyɔ̍ iě pa̍.

⁴⁰ Mɔ̀ po̍ mɔ̀-a chɛ̀ gba̍a̍. Dɛ̍nu̍ɛ, ti̍ mɔ̀ se̍-a Nyi̍ɔ̍-a Jǔ-a tìh gbàɛ̀-ɛ, dǒ ɔ̍ mu̍ ji̍-i.”

Pòi̍ju kɔn ɔ̍ iě ɔ̍ dlǔtu-a wlu̍ nu̍

⁴¹ Pitɛ la̍a̍, “Joi, dě àɔ̀ we̍ bo àn poe nɛnǎ la ɛɛ, àe̍e̍ dě nyɔ̍ kli̍hgbɛ̍ we̍ bo ae?”

⁴² Wɛ̀ Joi la̍a̍, “Nyɔ̍we̍ bo ɔ̀ nu̍ wlì tè pòi̍ju wɛ̀ ɔ̀ flɔn di̍i̍ ɛ? Ɔ̍ kɔn kwa̍a̍ bo ɔ̍ dlǔtu si̍e̍ ɔ̍ gbò, wɛ̀ ɔ̍ iě ɔ̍ ba̍ᵻ pòi̍nynuu̍ di̍-dɛ̍ nyǐ pò ti̍ blaɛ i̍-ɛ.

⁴³ Nɛ̀ ti̍ ɔ̍ dlǔtu-a mu̍-a de̍ ji̍ wɛ̀ ɔ̍ iě ɔ̍ dbo̍ chɛ̀ nu̍ la̍ jɛɛ-ɛ, nɛ̀ pòi̍ju laa̍ ɔ̍ nmɔ i̍.

⁴⁴ Tìh-a taǐn ǎn sèàɛ̍ mɔ̀ wlùh, nɛ̀ ɔ̍ dlǔtu-a mu̍ ɔ̍ dǒ ɔ̍ kɔn-dɛ̍ᵻ kli̍hgbɛ̍ dlǔwèàì po̍.

⁴⁵ Jɛ pò pòi̍ju laa̍ ɔ̍ dǎ ka dě ɔ̍ chɛ̀ we̍, ‘Ǎn dlǔtu la ɔ̍ wlè-o ji̍ la̍-a.’ Wɛ̀ ɔ̍ iě ɔ̍ ba̍ᵻ jɔ̍gbauᵻ ke nynɔ̌gbaɔᵻ ùh nu̍-a pòi̍nynuu̍-ɛ bla̍, ɔ̍ iě-e dɛ̍ i̍ di̍, ɔ̍ iě nǎ, nmɔ̍ iě ɔ̍ nu̍-ɛ,

⁴⁶ nɛ̀ weɛ̍ ɔ̍ se̍-a gbàɛ̀-ɛ, dǒ ɔ̍ dlǔtu-a mu̍ ji̍-i, ɛ̍ ke ti̍ ɔ̍ se̍-a wlùh kɛ̍n tè-ɛ ke. Nɛ̀ ɔ̍ dlǔtu-a mu̍ ɔ̍ dě kàn gbèèɛ̀ po̍, wɛ̀ ɔ̍ iě ɔ̍ dě se̍ wlùh gbaɛ blě nyɔ̍ nynɛ̌ po̍.

⁴⁷ “Pòi̍ju ɔ̀ juo-a dɛ̍ ɔ̍ dlǔtu-a pɔ̀n-a, wɛ̀ ɔ̀ se̍-a ɛ̍ nu̍-tìh gbɔ̀ po̍-ɛ, nɛ̀ ɔ̍ mu̍ bla̍-ɛ kaa̍.

⁴⁸ Jɛ pòi̍ju jɔ se̍-a dɛ̍ ɔ̍ dlǔtu se̍-a pɔ̀n ɔ̍ iě-a nu̍-ɛ juo wɛ̀ ɔ̀ nu̍-a ɛ̍-ɛ, nɛ̀ ɔ̍ se̍ bla̍-ɛ mu̍ dɛ̍ dɔu. Nyɔ̍ ɔ̀ nyǐ-ia dɛ̍ dɔu-ɛ, dě ɔ̍ kwa̍a̍ bo dɛ̍ dɔu-a mu̍ jbǎ-ɛ. Nɛ̀ nyɔ̍ ɔ̀ tèè-a dɛ̍ tlùgbei̍ kwa̍-ɛ, nɛ̀ dě ɔ̍ kwa̍a̍ bo dɛ̍ tlùgbei̍-a mu̍ jbǎ-ɛ.

Jusu ja i̍-i gblè-ɛ

⁴⁹ “Ǐn ji̍-i iě blǔh la nɛ̍ kɛ̍n po̍. Pò ɛ̍ nɛ wɛ̀ de-ɛ, nɛ̀ ɛ̍ po̍ ǐn gbǐh.

⁵⁰ Klě jě nǐ ǎn mu̍-a dlǔ po̍-ɛ, ǎn wlùh-a nu̍ wàànwààn te̍e̍ wɛ̀ ɛ̍ iě dlǔ i̍ chlà-a dǔ.

⁵¹ Mɔ̀ jajeɛ̍, ǐn ji̍-i iě kmɔ̌ i̍ gbe̍ɛ̍ɛn nɔ̌ kmɔ̌ la we̍ ja de ae? Iěe, ɛ̍ se̍ la̍a̍n nɛ, jɛ dɛ̍-ɛ i̍ gblè-ɛ bo ǐn ja.

⁵² Sɔ da̍a sèàn blǐ nyɔ̍ m̀m̌ nɛ-a dě chɛǐ-ɛ, u̍h-a mu̍-e i̍ gblè-ɛ. Ta̍a̍n-a mu̍ sɔɔ̌n faɛn, wɛ̀ sɔɔ̌n iě ta̍a̍n faɛn.

⁵³ Baaᵻá mu̍ u̍h-a jɔ̍gbauᵻ nynuu̍ faɛn, wɛ̀ jɔ̍gbauᵻ nynuu̍ iě u̍h baaᵻ faɛn. De̍ᵻá mu̍ u̍h-a nynɔ̌gbaɔᵻ nynuu̍ faɛn, wɛ̀ nynɔ̌gbaɔᵻ nynuu̍ iě u̍h de̍ᵻ faɛn. Nynuu̍ nynɔ̌gbaɔᵻá mu̍ u̍h-a kɔan de̍ᵻ faɛn, iě kɔan de̍ᵻ iě u̍h-a nynuu̍-a nynɔ̌gbaɔᵻ faɛn.”

Jusu tù nyɔ̍ slɛ̌n

⁵⁴ Jusu la̍a̍ dě nyɔ̍ tlùgbei̍ laa̍ we̍ ke, “Pò mɔ̀ jě nǐ ɛ̍ ja dě ja̍a̍i̍ tù dě tà jlǔh-a gbǎ-aɛ, nɛ̀ dǒ mɔ̀ nyna mɔ̀ la̍ nǐ-a mu̍ dba̍, nɛ̀ ɛ̍ dba̍-ɛ.

⁵⁵ Nɛ̀ pò mɔ̀ jě poɔ ɛ̍ sɔ-ɛ dě di̍na̍ we̍ ɛ̍ ja ji̍-ɛ, nɛ̀ mɔ̀ la̍ fuun-a mu̍ ji̍, nɛ̀ ɛ̍ ji̍-i.

⁵⁶ Mɔ̀ɔ̍ la ùh nɛ-a mɛɔ sɔɔ̌n wɔ̍ɔ̍n-ɛ, pò mɔ̀ gbɛ̀n blǔh ke ja̍u̍n ja-ɛ, nɛ̀ mɔ̀ juo ka i̍h-a mu̍-a nɛ-ɛ. Jɛ dɛ̍nu̍ mɔ̀ se̍ dɛ̍ᵻ ìh-a nɛ-a da̍a ti̍laa kmɔ̌ la di̍i̍-ɛ we̍ i̍ sèàɛ̍ juo ɛ?

Jusu po̍ wlu̍ i̍ wɔɛ̌ɛn-a nǎ

⁵⁷ “Dɛ̍nu̍ mɔ̀-ɔ pu̍e̍e i̍ slɛ̌ dɛ̍ nu̍ tìh dǒ mɔ̀-a chɛ̀ wlì ɛ?

⁵⁸ Pò nyɔ̍-o-nyɔ̍ pɔ̌ɛ mɔ̀-a nyɔ̍-ɛ, nɛ̀ ɔ̍ fɔ̀n dɛ̍ we̍ ɔ̍ iě wlu̍ we̍ i̍ sèàɛ̍ dǒ koti̍ mu̍ la̍, wɛ̀ ɔ̍-ɔ je̍e ɔ̍ dě taɔ kwa̍a̍ po̍, wɛ̀ taɔ je̍e ɔ̍ dě fledlǔ kwa̍a̍ po̍, iě fledlǔ je̍e ɔ̍ kasoo po̍.

⁵⁹ Ǎn sèàɛ̍ mɔ̀ wlùh, pò ɔ̍ se̍ la̍a̍n nu̍ wɛ̀ u̍h iě ɔ̍ dě kasoo laa̍ po̍-ɛ, nɛ̀ ɔ̍ se̍-e sɔ mu̍ te̍e̍ wɛ̀ ɔ̍ iě wlǐ u̍h po̍-a ɔ̍ dlǔ-ɛ pɛ̌ɛ wɔ̀. I̍h-a falǐ jɔɛ̍-a chɛ̀ bo ɛ̀ se̍ dě ɔ̍ di̍i̍ sie mu̍.”