Pɔ̀n Chɛ̀ Luu To-a La 11 - Ku̍o̍ Delee 1999

Jusu toe ɔ̍ kòà ba̍le-ɛ

¹ Dǒ weɛ̍ due di̍i̍ Jusu wɔ̀-a ba̍le-ɛ, iě ɔ̍ kòà-a due la̍a̍ dě ɔ̍ we̍, “Joi, toe àɔ̀ ba̍le-ɛ, ka Chɔɔn nu̍-a ɔ̍ kòà ba̍le-ɛ toe-ɛ.”

² Wɛ̀ Jusu la̍a̍ dě u̍h we̍, “Pò mɔ̀ ja ba̍le-ɛ, nɛ̀ mɔ̀ la̍a̍, ‘Baa, àn nynɛ̌ bo nyɔ̍ iě ja̍ tè. Àn kmɔ̌ wlu̍ i̍ kɔn-ɛ iě ji̍.

³ Weɛ̍ jɛ-ɛ, nɛ̀ ìn nyǐ ɛ̍ di̍-dɛ̍ àɔ̀.

⁴ Tǎli à gblɛ̍n sɔ̀ɛ̀n-a tìh i̍, ka à nu̍-a gblɛ̍n sɔ̀ɛ̀n nyɔ̍ kli̍hgbɛ̍ nu̍-a à pùn-ɛ i̍ tǎli-ɛ. Bɔ̌ à blu̍ja̍a̍ gbǎ tìh i̍ wɔ̌ɛn.’ ”

⁵ Wɛ̀ Jusu la̍a̍ dě u̍h we̍, “Pò mɔ̀-a nyɔ̍ blě ba̍ wɛ̀ ɔ̍ iě dě ɔ̍ we̍ mu̍ tòloo, ɔ̍ iě ka nu̍, ‘Ǐn ba̍, po̍ ǐn blèe̍ gba̍nᵻ ta̍a̍n-a gba̍-a lě.

⁶ Dɛ̍nu̍ɛ, ǐn ba̍-a mu̍ wìèlè, wɛ̀ ɔ̍ paɛ dě ǐn we̍ gbò. Jɛ ǐn se̍ di̍-dɛ̍ blě iě ɔ̍ nyǐ.’

⁷ Nɛ̀ pò ìn ba̍ nɛ dě gbò wɛ̀ ɔ̍ iě ka dǎ, ‘Bɔ̌ ǐn wɔ̍ɔ̍n i̍ bɛ̌ɛ, dǒ gbò wɔ̍i̍n ka̍n-ɛ wɛ̀. Ǐn ke ǎn nynuu̍ ke à mɔ̌ la̍-ɛ, ǐn se̍ bloɔ̍ sɔ mu̍ dɛ iě ìn dɛ̍-o-dɛ̍ nyǐ.’

⁸ Ǎn sèàɛ̍ mɔ̀ wlùh, ɔ̍ se̍ bloɔ̍ sɔ mu̍-a chɛ̀ gbɛɛ ɔ̍ àn ba̍ nu̍ tìh ɔ̍ iě ìn dɛ̍-o-dɛ̍ nyǐ. Jɛ ka ìn se̍-a ɔ̍ ja̍i̍ ple̍-e dǒ ɔ̍ kɛ̍ɛ̍n nɛ̌-ɛ we̍-ɛ, nɛ̀ ɔ̍ mu̍ bloɔ̍ sɔ ɔ̍ iě ìn dɛ̍ àn pɔ̀n-aɛ nyǐ.

⁹ Ǎn sèàɛ̍ mɔ̀ wlùh, mɔ̀ jbǎ dɛ̍, nɛ̀ ɛ̍ mu̍ mɔ̀ kwa̍a̍ gbǎ. Mɔ̀ pɔ̀n dɛ̍ i̍, nɛ̀ mɔ̀-a mu̍ ɛ̍ jě. Mɔ̀ bla̍ gbaba, nɛ̀ ɛ̍ mu̍ pɔ̀ni dǒ mɔ̀ we̍.

¹⁰ Dɛ̍nu̍ɛ, nyɔ̍ jɔ jbǎ-a dɛ̍-ɛ, nɛ̀ ɛ̍ gbǎ ɔ̍ kwa̍a̍. Nɛ̀ nyɔ̍ ɔ̀ pɔ̀n-a dɛ̍ i̍-ɛ, nɛ̀ ɔ̍ jě ɛ̍. Nɛ̀ nyɔ̍ ɔ̀ bla̍-a gbaba-ɛ, nɛ̀ ɛ̍ mu̍ pɔ̀ni dǒ ɔ̍ we̍.

¹¹ Baa jɔwe̍ bo ɔ̀ nɛ dě mɔ̀ nynɛ̌ ɔ̀ kɔn jǔ jɔ̍gbau jbǎ-ɛ ɔ̍ smìɛ̍-ɛ, wɛ̀ ɔ̍ se̍ ɔ̍ smìɛ̍ nyǐ iě ɔ̍ nyǐ ɔ̍ sɛ̌ ɛ?

¹² Àe̍e̍, pò ɔ̍ jbǎ-ɛ ɔ̍ dɛ̍ kèɛ̍n-ɛ, nɛ̀ ɔ̍ mu̍ ɔ̍ kèǎnkèàn nyǐ ae?

¹³ Mɔ̀ɔ̍ juh kɔn gblɛ̍n nyni-a jii̍-ɛ, pò mɔ̀ juo mɔ̀-a nynuu̍ dɛ̍ᵻ chɛ̀ nyǐ-ɛɛ, jɛ nɛ̀ mɔ̀ Baa Nyɔsoa nɛ-a dě ja̍i̍wlɔ̀-ɛ, ɔ̍ bo ɔ̀ se̍ nyɔ̍ jbǎ-ɛa ɔ̍ Sùù-ɛ nyǐ mu̍ ae?”

Telě nǎ poe nyɔ̍ la̍ Biɛsibo nyǐ Jusu gbǐh

¹⁴ Jeědih ɛ̀ nɛ dǒ nyɔ̍ de̍e̍-ɛ wɛ̀ ɔ̍-ɔ wlu-aɛ, nɛ̀ ɛ̍-ɛ bo Jusu-a sà dǒ jɔ̍gbau due de̍e̍. Ɛ̍ sɔ-a dǒ ɔ̍ de̍e̍-ɛ, sɔ ɔ̍ wlu la̍-ɛ sǔh. Sɔ ɛ̍ flɔn-ɛ nyɔ̍ tlùgbei̍ laa̍ wɔ̍n.

¹⁵ Jɛ nyɔ̍ duuh la̍a̍, “Biɛsibo ɛ̀ nu̍-a jeědih-a dlǔtu-ɛ, ɛ̍ bo ɛ̀ nyǐ ɔ̍ gbǐh wɛ̀ ɔ̍ sà nyɔ̍ jeědih de̍e̍ i̍.”

¹⁶ Wɛ̀ nyɔ̍ duuh-a pɔ̀n Jusu i̍ tɛ̀n-ɛ i̍. Iě u̍h tèle ɔ̍ i̍ ɔ̍ iě jbaɛdih sɔ-a dě Nyɔsoa we̍-ɛ po̍.

¹⁷ Jɛ ɔ̍ juo dɛ̍ nɛ-a dě u̍h wlùh di̍i̍-ɛ. Iě ɔ̍ la̍a̍ dě u̍h we̍, “Pò blǔh nyɔ̍-a sǔh ja fɔ̀n-ɛ, nɛ̀ blǔh laa̍ ɛ̍ mu̍ wa̍. Nɛ̀ pò gbò nyɔ̍-a sǔh ja fɔ̀n-ɛ, nɛ̀ gbò laa̍ ɛ̍ mu̍ wa̍.

¹⁸ Ɛ̍ tìh-ɛ, pò Setɔn ja ɛ̍ chɛ̀ we̍ fɔ̀n-ɛ, nɛ̀ ɛ̍ gblè-e ɛ̍ chɛ̀ i̍ wɛ̀ bo. Nɛ̀ ɛ̍ bloa̍ se̍ i̍ tè mu̍. Dɛ̍nu̍ɛ, mɔ̀ la̍ Biɛsibo ɛ̀ nu̍-a jeědih-a dlǔtu-ɛ, ɛ̍ bo ɛ̀ nyǐ ǐn gbǐh wɛ̀ ǎn sà nyɔ̍ jeědih de̍e̍ i̍.

¹⁹ Nɛ̀ pò ɛ̍ tù Biɛsibo iě jeědih i̍ nu̍-iɛ, nɛ̀ nyɔ̍we̍ bo ɔ̀ nyǐ mɔ̀ naɛ nyɔ̍ gbǐh ke wɛ̀ u̍h-a nu̍ jeědih i̍ ɛ? Ka ɛ̍ nɛ-a ka-ɛ, mɔ̀-a chɛ̀-a nyɔ̍ bo ùh-a mu̍ tìh-a chɛ̀ i̍ chɛ̍n.

²⁰ Jɛ pò ɛ̍ tù Nyɔsoa-a gbǐh iě jeědih i̍ nu̍-iɛ, nɛ̀ mɔ̀ juo ɛ̍ ka Nyɔsoa-a kmɔ̌ wlu̍ i̍ kɔn-ɛ nɛ-a da̍a mɔ̀ we̍ wɛ̀-ɛ.

²¹ “Kmu-nyɔ̍ ɔ̀ blě-a ɔ̍ fɔ̀n-dɛ̍ᵻ kli̍hgbɛ̍-ɛ, pò ɔ̍ gbɛ̀n dǒ ɔ̍ chɛ̀-a gbò we̍ i̍-ɛ, nɛ̀ ɔ̍ kɔn-dɛ̍ᵻ kli̍hgbɛ̍-a gbɛ̍n gba̍n.

²² Jɛ pò nyɔ̍ ɔ̀ kmu-a ɔ̀ sìì-a ɔ̍-ɛ pa̍ ɔ̍ we̍, wɛ̀ ɔ̍ iě ɔ̍ klà sà-ɛ, nɛ̀ ɔ̍ sà ɔ̍ fɔ̀n-dɛ̍ᵻ ɔ̍ tè-a wlì-ɛ kwa̍a̍, wɛ̀ ɔ̍ iě ɔ̍ gbɛ̍n-dɛ̍ᵻ laa̍ gblè.

²³ “Nyɔ̍ jɔ se̍-a ǎn dɛ kɛ̍n nɛ-ɛ, nɛ̀ ɔ̍ tbaɛ ǐn bu̍hᵻ i̍. Nɛ̀ nyɔ̍ ɔ̀ se̍-a ǐn we̍ gbǎ à iě-a dɛ̍ tàdùè po̍-ɛ, nɛ̀ ɔ̍ gbà dɛ̍ ja̍i̍.”

Jeědih ji̍ de̍ka

²⁴ Jusu la̍a̍, “Pò jeědih sɔ dǒ nyɔ̍ de̍e̍ wɛ̀ ɛ̍ iě tǐn la̍ i̍ pɔ̀n la̍ mu̍ dě pòɛ̍ɛ̍ kɛ̍n wɛ̀ ɛ̍ se̍-e tǐn la̍ jě-eɛ, nɛ̀ ɛ̍ mu̍ ka dǎ, ‘Gbò kɔn di̍i̍ ǐn sɔ-aɛ, ǎn mu̍-e de̍ mu̍.’

²⁵ Ɛ̍ iě-a de̍ mu̍-ɛ, nɛ̀ dě gbò-a chɛ̀ wo̍lo-ɛ i̍, dɛ̍ᵻ kli̍hgbɛ̍ po̍-eɛ gba̍a̍.

²⁶ Wɛ̀ ɛ̍ mu̍ iě ɛ̍ ja jeědih mɛ̀sɔɔ̌n diih ìh kɔn gblɛ̍n nyni-a jii̍ ìh sìì-a ɛ̍ chɛ̀-ɛ. Wɛ̀ i̍h mu̍ iě i̍h tǐn deě. Sɔ tu̍ jɔ̍gbau laa̍ ɔ̍ bɔ̌ɛ-a dě di̍i̍ nɛ-ɛɛ, ɛ̍ nyni jii̍ ɛ̍ sìì sàì naɛ.”

Nmɔ-ɛa chɛ̀ naɛ

²⁷ Jusu wlu-a dɛ̍ la-ɛ, iě nynɔ̌ due wǐ dě nyɔ̍ tlùgbei̍ laa̍ nynɛ̌. Ɔ̍ la̍a̍ dě Jusu we̍, “Nynɔ̌ ɔ̀ wlǔh-ia m̀ wɛ̀ ɔ̀ nyǎ-ɛa m̀-ɛ, ɔ̍ nmɔ i̍.”

²⁸ Jɛ Jusu la̍a̍, “I̍i̍n, jɛ nyɔ̍ ùh wɔ̌n-a Nyɔsoa-a wlu̍ iě ùh nu̍-a ɛ̍-ɛ, u̍h bo ùh nmɔ i̍ kaa̍.”

Jusu se̍ jbaɛdih po̍ tìh i̍ wɔ̌ɛn

²⁹ Nyɔ̍gbei-a tìè-a la̍ i̍-ɛ, iě Jusu la̍a̍, “Ti̍laa nyɔ̍ la u̍h nyni gblɛ̍n-ɛ. U̍h-a pɔ̀n jbaɛdih i̍, jɛ i̍h se̍ poe-ɛ mu̍. Jbaɛdih u̍h-a mu̍-a jě sǔh-ɛ, i̍h bo ìh nɛ-a Jona pùn.

³⁰ Ka Jona bo ɔ̀ nu̍-a juola dǒ Ninifa nyɔ̍ we̍-ɛ, kǎ Nyi̍ɔ̍-a Jǔ-a mu̍ juola nu̍-ɛ nu̍ ke dǒ ti̍laa nyɔ̍ we̍.

³¹ Ti̍ ɛ̍ mu̍-a sàwi̍h sì ti̍ nu̍-ɛ, nynɔ̌ ɔ̀ kɔn-a Siba bloa̍ wlu̍ i̍-ɛ, nɛ̀ ɔ̍ mu̍ i̍ nyna ɔ̍ iě ti̍laa nyɔ̍ la tìh dlǔ po̍. Dɛ̍nu̍ɛ, ɔ̍ sɔ dě bloa̍-a kɔ̍ la̍-a, wɛ̀ ɔ̍ ji̍ blǔh baa Sɔlɔma-a flɔ̍nwlùh dounᵻ we̍ po̍ la̍. Jɛ kaka la̍, dɛ̍ ɛ̀ ku̍-a wɔ̍n ɛ̀ sìì-a Sɔlɔma-a, ɛ̍ nɛ da̍a wɛ̀.

³² Ti̍ ɛ̍ mu̍-a sàwi̍h sì ti̍ nu̍-ɛ, nɛ̀ Ninifa nyɔ̍-a mu̍ i̍ nyna u̍h iě ti̍laa nyɔ̍ la tìh dlǔ po̍. Dɛ̍nu̍ɛ, u̍h nɔ̀ɔ̍, ti̍ Jona bla̍-a tìh dě u̍h we̍-ɛ, wɛ̀ u̍h bǐi i̍. Jɛ kaka la̍, dɛ̍ ɛ̀ ku̍-a wɔ̍n ɛ̀ sìì-a Jona-a, ɛ̍ nɛ da̍a wɛ̀.

Jlǐh nu̍ ku̍-a sɔ̀npli

³³ “Nyɔ̍-ɔ tba̍ nape̍ wɛ̀ nɛ̀ sìle ɛ̍, àe̍e̍ wɛ̀ nɛ̀ bǎɛ ɛ̍ jawih kɛ̍n. Jɛ nyɔ̍-a pèle ɛ̍ ja̍i̍, wɛ̀ nyɔ̍ ùh-a pa̍-a dě gbò-ɛ, iě u̍h-a jě i̍.

³⁴ Àn jlǐh bo ìh nu̍ nape̍ dǒ àn ku̍ pùn. Ɛ̍ tìh pò àn jlǐh nɛ blee-ɛ, nɛ̀ àn ku̍ kli̍hgbɛ̍-a mu̍ sɔ̀npli nu̍. Jɛ pò àn jlǐh se̍ blee nɛ-ɛ, nɛ̀ àn ku̍ kli̍hgbɛ̍-a mu̍ dě kwile-e nɛ.

³⁵ Ɛ̍ tìh-ɛ, chlɛ̌ àn chɛ̀ i̍ pò sɔ̀npli nɛ-a dě ìn ja̍a̍-ɛ, ɛ̍ se̍ kwile-ɛ.

³⁶ Pò àn ku̍ kli̍hgbɛ̍ nu̍ sɔ̀npli ɛ̍ dɛ̍ se̍ dě kwile-e nɛ-ɛ, nɛ̀ àn ku̍ kli̍hgbɛ̍-a mu̍ fa̍n ka nape̍-a wa̍n-ɛ.”

Jusu sà Fɛlesii nyɔ̍ ke telě nǎ poe nyɔ̍ kɛ̀n

³⁷ Jusu wɔ̀-a wlu-ɛ, iě Fɛlesii jǔ due dǎ ɔ̍, ɔ̍ ke ɔ̍ iě dɛ̍ tàdùè di̍ i̍. Wɛ̀ Jusu mu̍ dě ɔ̍ blǐ gbò, iě ɔ̍ tè i̍ ɔ̍ iě dɛ̍ di̍.

³⁸ Fɛlesii jǔ jě-a Jusu-ɛ, sɔ ɛ̍ kèle ɔ̍ i̍. Dɛ̍nu̍ɛ, ɔ̍ se̍ i̍ dle wɛ̀ ɔ̍ di̍ dɛ̍.

³⁹ Wɛ̀ Joi la̍a̍ dě ɔ̍ we̍, “Mɔ̀ɔ̍ Fɛlesii nyɔ̍, mɔ̀-a wɔ̍lɔ dǒ mɔ̀-a kàu̍n ke plɛ̌ɛ kɛ̍n i̍, jɛ nɛ̀ dě i̍h di̍i̍ jǐ-i dǒ flɛ̀n we̍. Kǎ dɛ̍ᵻá kloǒ nu̍-ɛ ke kà kɔn-ɛ nu̍ dě mɔ̀ di̍i̍ jǐ-ɛ.

⁴⁰ Mɔ̀ɔ̍ bo-nyɔ̍ la, ɛ̍ se̍ nyɔ̍ ɔ̀ nu̍-a dě di̍i̍ ka-ɛ ɔ̀ se̍ nɔ̌ kɛ̍n ka nu̍ ke ae?

⁴¹ Jɛ dɛ̍ᵻ ìh nɛ-a dě mɔ̀-a kàu̍nᵻ ke plɛ̌ɛᵻ di̍i̍-ɛ, mɔ̀ nmɔ-ɛ i̍h wlùh dě nyɔ̍gbà nyɔ̍ we̍, nɛ̀ dɛ̍ᵻ kli̍hgbɛ̍-a mu̍ wlihwlǐh nɛ dǒ mɔ̀ we̍.

⁴² “Jɛ Fɛlesii nyɔ̍, chlě dǒ mɔ̀ we̍. Dɛ̍nu̍ɛ, dɛ̍ᵻ pùè mɔ̀-a jě-aɛ, mɔ̀-a sà-o due dǒ Nyɔsoa we̍, ìh nu̍-a dɛ̍ᵻ plìh plìh ìh-a chɛn-a smǎ-ɛ, iě mɔ̀-a tǎli i̍ slɛ̌-ɛ ke Nyɔsoa-a jbɛɛ i̍. Mɔ̀ kɔn mɔ̀ iě i̍h nu̍ gbɛɛ, jɛ nɛ̀ mɔ̀ bɔ̌ jih sie-a dǒ de̍-ɛ i̍ tǎli-ɛ.

⁴³ “Chlě dǒ mɔ̀ we̍ Fɛlesii nyɔ̍. Dɛ̍nu̍ɛ, mɔ̀ jbɛɛ tà chɛ̀ i̍ tè-ɛ dě Juu nyɔ̍-a wɛɛ sà gbòᵻ sɔ̀n i̍, ɛ̍ ke mɔ̀-a ja̍ tè-ɛ dǒ mɔ̀ nyinɔ̍ i̍ sà la̍ dě dɔɔ̌ gbale̍e̍ ke.

⁴⁴ Chlě dǒ mɔ̀ we̍, dɛ̍nu̍ɛ, mɔ̀ wɔ̀ gbàlɔ̍ biěᵻ ìh se̍-a juola tù-iɛ iě nyɔ̍ se̍-a juo u̍h-a na-a kɛ̍n i̍-ɛ.”

⁴⁵ Wɛ̀ telě nǎ poe nyɔ̍ due sà ɔ̍ wlu̍ pɔ̀n we̍, ɔ̍ la̍a̍, “Dlǔtu, ɛ̀ àn bla̍-aɛ, nɛ̀ àn po̍ àɔ̀ wlu̍ pùn i̍ bo ke wa.”

⁴⁶ Jusu la̍a̍, “Chlě dǒ mɔ̀ we̍ ke, telě nǎ poe nyɔ̍. Dɛ̍nu̍ɛ, gbɛ̀ᵻ ìh ku-a kwa̍-aɛ bo mɔ̀-a po̍ dǒ nyɔ̍ duuh kleǐ. Jɛ nɛ̀ mɔ̀-a chɛ̀-ɛ wɔ̌ɛn u̍h sɔ̍n we̍ po̍ tìh i̍.

⁴⁷ Chlě dǒ mɔ̀ we̍, dɛ̍nu̍ɛ, Nyɔsoa-a tu̍owli po̍ nyɔ̍ mɔ̀ baaᵻ dbǎ-aɛ, mɔ̀ɔ̍ bo ùh pɛ̀ɛ̀ u̍h-a gbàlɔ̍ biěᵻ.

⁴⁸ Ɛ̍ tìh-ɛ, mɔ̀ɔ̍ bo ùh nu̍ sàànsi̍i̍h, iě mɔ̀ wɔ̌ɛn mɔ̀ baaᵻá nu̍-dɛ̍ᵻá tìh i̍. U̍h dbǎ Nyɔsoa-a tu̍owli po̍ nyɔ̍ iě mɔ̀ pɛ̀ɛ̀ u̍h-a gbàlɔ̍ biěᵻ.

⁴⁹ Ɛ̍ tìh-ɛ, Nyɔsoa-a flɔ̍nwlùh la̍a̍ ke-ɛ, ‘Ǎn mu̍ ǎn tu̍owli po̍ nyɔ̍ ke gba̍tòà dě u̍h we̍ dbo̍, nɛ̀ u̍h-a mu̍ u̍h-a duuh dbǎ, wɛ̀ u̍h iě duuh klě jě-e.’

⁵⁰ Wɛ̀ Nyɔsoa-a tu̍owli po̍ nyɔ̍ kli̍hgbɛ̍ ùh dǔ-aa dbǎ-ɛ sɔ dě kmɔ̌-a gbɔ̀ tè la̍-ɛ, u̍h-a nymɔ̍ wlǎ-a i̍-ɛ, ɛ̍ tìh iě dǒ ti̍laa nyɔ̍ dlǔ i̍ tè,

⁵¹ sɔ dě Ebɛ-a nymɔ̍ we̍ wɛ̀ ìè Sɛɛkewlaɛɔ jɔ u̍h dbǎ-ɛa dǒ gblǒ ke Nyɔsoa-a slaǎ sà gbò nynɛ̌-ɛ, ìè ɔ̍ naɛ jɛɛ-ɛ. I̍i̍n, ǎn sèàɛ̍ mɔ̀ wlùh, u̍h-a tìh-a mu̍ dǒ ti̍laa nyɔ̍ dlǔ i̍ tè.

⁵² “Chlě dǒ mɔ̀ we̍ telě nǎ poe nyɔ̍. Dɛ̍nu̍ɛ, mɔ̀ sà tɔɔ-a gbò kɔɛ̍n wɔ̍n. Mɔ̀-a chɛ̀-ɛ pa̍-e, iě ùh-a pɔ̀n-a deě pa̍-a i̍-ɛ, mɔ̀ ka̍n u̍h-a wìè.”

⁵³ Jusu sɔ-a doǒ-ɛ, wɛ̀ telě nǎ poe nyɔ̍ ke Fɛlesii nyɔ̍-a po̍ ɔ̍ pàwe̍i̍ dɛ̍blɔ dɛ, iě u̍h-a tèle ɔ̍ dɛ̍ᵻ dɔu dɔu i̍.

⁵⁴ U̍h-a nu̍ ɛ̍-ɛ dǒ gbɛ̀ɛ̀ tè-ɛ we̍, wɛ̀ pò ɔ̍ po̍ wlu̍ sɔ̀n-ɛ, u̍h iě ɔ̍ gbɛ̍n.