Pɔ̀n Chɛ̀ Luu To-a La 10 - Ku̍o̍ Delee 1999

Jusu dbo̍ kòà-a kwela mɛ̀sɔɔ̌n jɔ̌ sɔɔ̌n

¹ Ɛ̀ la ɛ̍ wɔ̀-a nɛ-ɛɛ, wɛ̀ Joi tba̍ nyɔ̍-a kwela mɛ̀sɔɔ̌n jɔ̌ sɔɔ̌n (72) duuh chèɛ̀. Wlɔ̀ᵻ kɔn di̍i̍ i̍ ke tà kli̍hgbɛ̍ ɔ̍ chɛ̀-a mu̍-a i̍ mu̍-ɛ, wɛ̀ ɔ̍ dbo̍ u̍h-a sɔɔ̌n sɔɔ̌n nya̍.

² Iě ɔ̍ la̍a̍ dě u̍h we̍, “Klèᵻ la i̍h tìè i̍, jɛ i̍h-a chɛ̍n-nyɔ̍ se̍ i̍ tìè. Ɛ̍ tìh-ɛ, mɔ̀ wlu dě klè joi we̍ ɔ̍ iě kɔɔ chɛ̍n-nyɔ̍ dɔu nɔ̌ klè la dbo̍.

³ Mɔ̀ mu̍, ǎn dbo̍ mɔ̀ ka nyɔ̍-a dbo̍ blawɛ̌ᵻ nynuu̍ dě gbɛ̍n-nmi̍i̍ nynɛ̌ we̍-ɛ.

⁴ Mɔ̀ bɔ̌ pɔsɛ̍, àe̍e̍ gbèèkǔ, àe̍e̍ bu̍h-u po̍-dɛ̍ᵻ gba̍-a. Nɛ̀ mɔ̀ bɔ̌ i̍ nyna-a dǒ wìè-i nyɔ̍ nyinɔ̍ i̍ sà tìh.

⁵ Gbò mɔ̀-a mu̍-a di̍i̍ pa̍-ɛ, nɛ̀ mɔ̀ la̍a̍, ‘À sà-ɛ gbò la nǐ wɔ̍n o.’ Kǎ mɔ̀ iě dǎ sàì.

⁶ Nɛ̀ pò nyɔ̍ chɛ̀ nɛ deě-ɛ, nɛ̀ mɔ̀-a pɔ̀ìě-a mu̍ ɔ̍ we̍ sie. Jɛ pò ɛ̍ we̍ nyɔ̍ se̍ nɛ-ɛ, nɛ̀ mɔ̀ gbɛ̍n mɔ̀-a pɔ̀ìě i̍ dode̍.

⁷ Nɛ̀ mɔ̀ koe dě gbò-a taǐn laa̍ di̍i̍, mɔ̀ iě nǐ ke di̍-dɛ̍ u̍h-a mu̍-a mɔ̀ nyǐ-ɛ di̍. Dɛ̍nu̍ɛ, dbo̍ nu̍ nyɔ̍ kɔn ɔ̍ iě pɛ̌ɛ la jě. Jɛ mɔ̀ bɔ̌ gbòᵻ di̍i̍ i̍ ple̍-ɛ.

⁸ Pò mɔ̀ sǐ dǒ wlɔ̀ jɛ di̍i̍ i̍, wɛ̀ u̍h iě mɔ̀-a tìh i̍ gbɛ̍n-ɛ, nɛ̀ mɔ̀ di̍ dɛ̍-o-dɛ̍ u̍h-a mu̍-a mɔ̀ nyǐ-ɛ.

⁹ Nɛ̀ mɔ̀ pǔh-i poa-nyɔ̍ nɛ-a dǒ wlɔ̀ laa̍ di̍i̍-ɛ. Nɛ̀ mɔ̀ la̍a̍ dě wlɔ̀ nyɔ̍ kli̍hgbɛ̍ we̍, ‘Nyɔsoa-a kmɔ̌ wlu̍ i̍ kɔn-ɛ nɛ mɔ̀ i̍ wɛ̀.’

¹⁰ Jɛ pò mɔ̀ sǐ dǒ wlɔ̀ di̍i̍ i̍, iě u̍h se̍ mɔ̀-a tìh i̍ gbɛ̍n-ɛ, nɛ̀ mɔ̀ mu̍ dě gbale̍e̍ wèa̍, mɔ̀ la̍a̍,

¹¹ ‘Mɔ̀-a wlɔ̀-a blǔh-a chɛ̀ nɛ-a à bu̍hᵻ i̍-ɛ bo à gbàbo-a, wɛ̀ mɔ̀ iě ɛ̍ i̍ jě. Jɛ mɔ̀ bɔ̌ mǎle-ɛ ka Nyɔsoa-a kmɔ̌ wlu̍ i̍ kɔn-ɛ nɛ-a mɔ̀ i̍ wɛ̀-ɛ.’

¹² Ǎn sèàɛ̍ mɔ̀ wlùh, weɛ̍ kɔn di̍i̍ ɛ̍ mu̍-a sàwi̍h sì ti̍ nu̍-ɛ, Nyɔsoa-a mu̍ Sɔdɔm wlɔ̀ wɔɛ jě ɛ̍ iě wlɔ̀ laa̍ sìì.

Wlɔ̀ᵻ ìh se̍-a wlùh gbaɛ blě-ɛ

¹³ “Kɔwlasiin wlɔ̀, chlě dǒ ìn we̍. Bɛseida wlɔ̀, chlě dǒ ìn we̍ ke. Dɛ̍nu̍ɛ, jbaɛdih ìh dǔ-a poe-ɛ dě mɔ̀ di̍i̍ i̍-ɛ, pò i̍h poe-ɛ dě Taiɛ ke Saidɔn wlɔ̀ᵻ di̍i̍ de-ɛ, nɛ̀ nyɔ̍ nɛ-a dě i̍h di̍i̍-ɛ, u̍h-a mu̍ dlǐh jlii̍ pa̍ u̍h iě bii dlǔ po̍ de tɛin, wɛ̀ ɛ̍ iě ɛ̍ to ka u̍h bǐi-a i̍-ɛ.

¹⁴ Jɛ ti̍ ɛ̍ mu̍-a sàwi̍h sì ti̍ nu̍-ɛ, nɛ̀ Nyɔsoa-a mu̍ Taiɛ ke Saidɔn wlɔ̀ᵻ wɔɛ jě ɛ̍ iě mɔ̀ sìì.

¹⁵ Kepanium wlɔ̀, mɔ̀ bo ɔ̀ pɔ̀n wɔ̍n ku̍-ɛ i̍ ae? Iěe, àn mu̍ wlù ji̍ ìè dě kàn nɛ̍ di̍i̍ gbǎ.”

¹⁶ Jusu la̍a̍ dě ɔ̍ kòà we̍, “Nyɔ̍ ɔ̀ mu̍-a mɔ̀-a wlu̍ i̍ wɔ̌n-ɛ, nɛ̀ ǎn wlu̍ bo ɔ̍ wɔ̌n i̍. Nɛ̀ nyɔ̍ ɔ̀ mu̍-a mɔ̀ chla tba̍-aɛ, nɛ̀ mɔ̍ bo ɔ̍ tba̍ chla. Nyɔ̍ ɔ̀ tba̍-a ǐn chla-aɛ, nɛ̀ nyɔ̍ ɔ̀ dbo̍-a m-ɛ bo ɔ̍ tba̍ chla.”

Jusu-a kòà ji̍ de̍

¹⁷ Wɛ̀ kòà-a kwela mɛ̀sɔɔ̌n jɔ̌ sɔɔ̌n (72) laa̍ u̍h blě mɔna̍ nu̍-ɛ u̍h ji̍ de̍ka. Iě u̍h la̍a̍, “Joi, jeědih bei-a chɛ̀-a jě à dɛ̍ɛ̍ dǒ àn nynɛ̌ kɛ̍n wa.”

¹⁸ Wɛ̀ Jusu la̍a̍ dě u̍h we̍, “Ǐn jě Setɔn-a i̍ kà la̍, ka nǐ chlɛ jlǐh dě ja̍u̍n wlì-ɛ.

¹⁹ Gbɛ̀n-e, ǐn nyǐ mɔ̀ gbǐh mɔ̀ iě sɛ̍ᵻ ke kèǎnkèànᵻ kɛ̍n i̍ na, wɛ̀ mɔ̀ iě Setɔn-a gbǐh kli̍hgbɛ̍ wɔ̍n sìì, nɛ̀ dɛ̍ se̍ mɔ̀ nu̍ mu̍.

²⁰ Mɔ̀ bɔ̌ mɔna̍ nu̍-ɛ jeědih-a mɔ̀ dɛ̍ɛ̍ jě tìh. Jɛ mɔ̀ nu̍ mɔna̍ ka mɔ̀-a nynɛ̌ chlǐh-a wɛ̀ dě ja̍i̍wlɔ̀-ɛ.”

Jusu po̍ Nyɔsoa tlɔ̌

²¹ Dǒ ti̍ laa̍ di̍i̍-ɛ, nɛ̀ Jusu nmɔ-ɛ dě Nyɔsoa-a Sùù di̍i̍. Wɛ̀ ɔ̍ la̍a̍, “Baa, mɔ̀ ɔ̀ nu̍-a bloa̍ ke ja̍u̍n-a Joi-ɛ, ǐn po̍ ìn tlɔ̌. Dɛ̍nu̍ɛ, dɛ̍ᵻ ìn sìle-a flɔ̍nwlùh kɔn nyɔ̍ ke dɛ̍ juo nyɔ̍ jii̍-ɛ, i̍h bo ìn toe ka plǒai nyɔ̍. I̍i̍n, Baa, àn gbǐh po̍ dɛ̍ bo.

²² “Ǐn Baa nyǐ ǐn dɛ̍ᵻ kli̍hgbɛ̍ wɛ̀. Nyɔ̍ dɔɔ se̍ Jǔ juo. Jɛ Baa nɛ due kɔn tɛ̀ ǐn sà-o. Iě nyɔ̍ dɔɔ wɔ̍ se̍ Baa juo ke. Jɛ Jǔ nɛ due kɔn tɛ̀ ǐn sà-o, ɛ̍ ke nyɔ̍ Jǔ tba̍-a chèɛ̀ ɔ̍ iě-a Baa toe-ɛ ke.”

²³ Wɛ̀ Jusu bǐi dě ɔ̍ kòà we̍ i̍, iě ɔ̍ bla̍ u̍h slǎn. Ɔ̍ la̍a̍, “Jlǐh ìh-a jě-a dɛ̍ᵻ mɔ̀-a jě-aɛ, i̍h nmɔ i̍.

²⁴ Ǎn sèàɛ̍ mɔ̀ wlùh, ìh mɔ̀ jě-aɛ, Nyɔsoa-a tu̍owli po̍ nyɔ̍ dɔu ke blǔh baaᵻá pɔ̀n i̍h jě-ɛ i̍ de, jɛ u̍h se̍ i̍h jě. U̍h-a pɔ̀n ìh mɔ̀ wɔ̌n-aɛ wɔ̌n-ɛ i̍ de, jɛ u̍h se̍ i̍h wɔ̌n.”

Gblɛ̍n-ɛ nmɔ Sɛmewlea jǔ-a nɛnǎ

²⁵ Wɛ̀ telě nǎ poe nyɔ̍ nyna i̍ ɔ̍ iě Jusu i̍ tɛ̀n. Iě ɔ̍ la̍a̍, “Dlǔtu, dɛ̍ iě nu̍ wɛ̀ iě kmɔ̌ sie feɛ blě ɛ?”

²⁶ Iě Jusu la̍a̍ dě ɔ̍ we̍, “Ka Nyɔsoa-a wlu̍ dǎ ɛ? Ka ìn nu̍ ɛ̍-ɛ i̍ wɔ̌n-ɛ ɛ?”

²⁷ Iě ɔ̍ la̍a̍, “Ɛ̍ la̍a̍, ‘Jbɛɛ àn Joi Nyɔsoa-a dǒ àn pɔluh kli̍hgbɛ̍ we̍, dǒ àn kmɔ̌ kli̍hgbɛ̍ we̍, dǒ àn gbǐh kli̍hgbɛ̍ we̍, ɛ̍ ke àn wlùh kli̍hgbɛ̍ ke. Nɛ̀ ìn jbɛɛ ìn pònyɔ̍-ɔ ka àn chɛ̀-ɛ.’ ”

²⁸ Wɛ̀ Jusu la̍a̍ dě ɔ̍ we̍, “Ɛ̍ taǐn bo ìn sà-a. Nu̍ ìh la, nɛ̀ àn mu̍ kmɔ̌ sie feɛ blě.”

²⁹ Jɛ ɔ̍ pɔ̀n ɔ̍ iě ɛ̍ to ka ɔ̍ slɛ̌-a i̍-ɛ. Iě ɔ̍ la̍a̍ dě Jusu we̍, “Nyɔ̍we̍ bo ɔ̀ nu̍ ǐn pònyɔ̍ ɛ?”

³⁰ Wɛ̀ Jusu sà ɔ̍ wlu̍ pɔ̀n we̍. Ɔ̍ la̍a̍, “Jɔ̍gbau due bo ɔ̀ sɔ dǒ Juluslɛn iě ɔ̍ mu̍ dǒ Jɛwlekoo wlɔ̀ di̍i̍. Wɛ̀ jlǐ-nyɔ̍ gbɛ̍n ɔ̍, iě u̍h bla̍ ɔ̍, wɛ̀ u̍h chɛn-ɛ ɔ̍ gbaǎn. Wɛ̀ u̍h si̍e̍ ɔ̍ mɔ̀ kǔ mɔ̀ nyi̍ɔ̍ dǒ wìè-i.

³¹ Nɛ̀ Nyɔsoa-a slaǎ sà nyɔ̍-a gba̍ wìè laa̍ ke. Ɔ̍ jě-a jɔ̍gbau laa̍-ɛ, iě ɔ̍ blaɛ ɔ̍, ɔ̍ sì.

³² Wɛ̀ Liifaɛ jǔ ji̍ ke. Ɔ̍ nyni̍-a dǒ tà-a chɛ̀-ɛ, wɛ̀ ɔ̍ jě jɔ̍gbau laa̍, iě ɔ̍ blaɛ ɔ̍ ke.

³³ Jɛ Sɛmewlea jǔ ɔ̀ mu̍-a wìèlè-ɛ, ɔ̍ nyni̍-a dǒ jɔ̍gbau laa̍ we̍-ɛ, wɛ̀ ɔ̍ jě ɔ̍. Sɔ ɛ̍ po̍ ɔ̍ wɔɛ.

³⁴ Wɛ̀ ɔ̍ mu̍ dǒ ɔ̍ we̍, iě ɔ̍ po̍ ɔ̍ chìèᵻ chlǎn ke nmɔ̍ i̍. Wɛ̀ ɔ̍ sa̍n i̍h. Iě ɔ̍ po̍ ɔ̍ dǒ ɔ̍ chɛ̀-a soo̍pà kɛ̍n, wɛ̀ ɔ̍ gba̍ ɔ̍ dǒ dihwi̍h gbò di̍i̍, dǒ ɔ̍ gbɛ̀n-ɛ ɔ̍ we̍ i̍.

³⁵ Sɔ̀n sɛ̀n-aɛ, iě ɔ̍ sà-e sebla̍ wlǐ-a jɔ̌ sɔɔ̌n, wɛ̀ ɔ̍ nyǐ i̍h nyɔ̍ ɔ̀ gbɛ̀n-a dǒ gbò laa̍ we̍ i̍-ɛ. Wɛ̀ ɔ̍ la̍a̍, ‘Gbɛ̀n dǒ jɔ̍gbau la we̍ i̍ o. Dɛ̍ àn mu̍-a ple̍ dǒ i̍h de̍e̍-ɛ, ǐn ji̍ de̍ka-ɛ, nɛ̀ ǎn mu̍ ɛ̍ pɛ̌ɛ o.’

³⁶ “Dě àn chɛ̀ di̍i̍-ɛ, u̍h nɛ-a ta̍a̍n-ɛ, nyɔ̍we̍ bo ɔ̀ dǎɛ jɔ̍gbau la ɔ̀ jlǐ-nyɔ̍ bla̍-aɛ, ɔ̍ pònyɔ̍ ɛ?”

³⁷ Wɛ̀ telě nǎ poe nyɔ̍ la̍a̍, “Jɔ jě-a ɔ̍ wɔɛ-ɛ bo.” Wɛ̀ Jusu la̍a̍ dě ɔ̍ we̍, “Mu̍ ìè ɛ̍ ba̍ nu̍ ke.”

Jusu mu̍ dě Mata ke Mɛle we̍ i̍ nala

³⁸ Jusu ke ɔ̍ kòà-a mu̍-a Juluslɛn-ɛ, iě u̍h nyni̍ dǒ wlɔ̀ due di̍i̍. Wɛ̀ nynɔ̌ ɔ̀ kɔn nynɛ̌ nu̍-a Mata-ɛ ɔ̍ gba̍ Jusu gbò we̍.

³⁹ Ɔ̍ blě deǐ nynɔ̌gbaɔ, ɔ̍ nynɛ̌ bo Mɛle. Wɛ̀ ɔ̍ tè i̍ dǒ Joi jǔ ɔ̍ po̍ dě ɔ̍ nǎ po̍ wlu̍ we̍ dounᵻ.

⁴⁰ Jɛ dbo̍ dɔu Mata-a nu̍-aɛ, sɔ ɛ̍ feǎn dǒ ɔ̍ wlì. Iě ɔ̍ mu̍ dě Jusu we̍, wɛ̀ ɔ̍ la̍a̍, “Joi, ǐn deǐ si̍e̍-a ǐn nɛ due dbo̍ la kwa̍ i̍-ɛ, nɛ̀ jě ɛ̍ ae? Sèàɛ̍ ɔ̍ wlùh ɔ̍ iě ǐn we̍ gbǎ lě.”

⁴¹ Wɛ̀ Joi sà ɔ̍ wlu̍ pɔ̀n we̍. Ɔ̍ la̍a̍, “Mata, àn ku̍-a tlɛ̍-ɛ, iě sèò-a nu̍ m̀ dǒ dɛ̍ᵻ dɔu we̍.

⁴² Dɛ̍ due bo ɛ̀ kɔn ɛ̀ iě nɛ. Dɛ̍ ɛ̀ nmɔ-a jii̍-ɛ bo Mɛle tba̍ chèɛ̀ wɛ̀, ɛ̀ se̍-a ɔ̍ kwa̍a̍ sà-ɛ mu̍-ɛ.”