Kelesea 5 - Ku̍o̍ Delee 1999

Klai sà à dě kèìe̍e̍

¹ Klai sèìe àɔ̀ wɛ̀, wɛ̀ à-a je̍e kèi̍ᵻ nu̍ dɛ. Ɛ̍ tìh-ɛ, mɔ̀ ku̍e̍i̍, wɛ̀ mɔ̀ɔ̍ je̍e kèi̍ᵻ wɔ̀ dɛ.

² Mɔ̀ po̍ dě ǐn we̍ dounᵻ. Mɔ̍ Pɔɔ, ǎn sèàɛ̍ mɔ̀ wlùh, pò mɔ̀ wɔ̌n wɛ̀ mɔ̀ iě plɔ̀n gbǎ-ɛ, nɛ̀ Klai se̍ dɛ̍ i̍ blaɛ dɛ dǒ mɔ̀ we̍.

³ Ǎn sèàɛ̍ nyɔ̍ kli̍hgbɛ̍ wlùh dɛ, nyɔ̍ jɔ mu̍-a wɔ̌n u̍h iě-a plɔ̀n po̍-ɛ, nɛ̀ ɔ̍ kɔn ɔ̍ iě telě kli̍hgbɛ̍ dɛ̍ɛ̍ jě.

⁴ Mɔ̀ɔ̍ ùh-a fɔ̀n-a dɛ̍ we̍ ùh iě-a i̍ slɛ̌ dǒ telě dɛ̍ɛ̍ jě-ɛ we̍-ɛ, dǒ mɔ̀ ke Klai nynɛ̌ chɛn i̍ wɛ̀. Mɔ̀ se̍ dě Nyɔsoa-a blɛ di̍i̍ nɛ dɛ.

⁵ Àɔ̀ nɔ̀ɔ̍, dɛ̍ à tè-a wlì-ɛ, ɛ̍ nu̍ Nyɔsoa-a mu̍ à i̍ slɛ̌-nyɔ̍ we̍i̍ nu̍. Ɛ̍ kɔn à fuo ɛ̍ kɛ̍ɛ̍n dǒ wlùh gbaɛ we̍ dě Nyɔsoa-a Sùù-a gbǐh di̍i̍.

⁶ Dě Jusu Klai ja̍a̍ nɔ̀ɔ̍, nyɔ̍ gbǎ plɔ̀n o, nyɔ̍ se̍ plɔ̀n gbǎ o, ɛ̍ se̍ tìh-a chɛ̀. Jɛ wlùh gbaɛ bo ɛ̀ iě jě-ɛ dě jbɛɛ di̍i̍ tìh kma.

⁷ Mɔ̀-a mu̍-a nya̍ de gbɛɛ-ɛ, nyɔ̍ bo ɔ̀ sà mɔ̀ wìè-i dǒ tìh-a taǐn dɛ̍ɛ̍ jě-ɛ we̍ ɛ?

⁸ Mɔ̀-a wìè-i sà-a la, Nyɔsoa jɔ dǎ-a mɔ̀-ɛ, ɛ̍ se̍ dě ɔ̍ we̍ sɔ-ɛ.

⁹ Mɔ̀ juo ka blèe̍-a fù-i dɛ̍-a dɛ̍ juwɛ bo ɛ̀ fù-ia blèe̍ gbo̍ gbà i̍-ɛ.

¹⁰ Ǐn tè Joi wlì dǒ mɔ̀ we̍, mɔ̀ se̍ flɔ̍nwlùh dɛɛ de̍e̍ gbǎ mu̍ wɛ̀ mɔ̀ iě-o naɛ̍ i̍ si̍e̍. Nɛ̀ nyɔ̍ jɔ bɛ̌ɛ-a mɔ̀ wɔ̍ɔ̍n i̍-ɛ, ka jɛ ɔ̍ nɛ-ɛ, ɔ̍ mu̍ kàn gbɛ̍n-ɛ.

¹¹ Ǐn de̍di̍i̍ᵻ, pò ǐn ja plɔ̀n gbǎ tìh bla̍-a dluwe̍ i̍ gba̍ wɛ̀ iě ka nu̍ ɛ̍ nmɔ jii̍-ɛ, nɛ̀ dɛ̍-ɛ tìh u̍h-a jě-e ǐn klě ɛ? Pò ɛ̍ nɛ la̍a̍n-ɛ, nɛ̀ tìh ǎn bla̍-a dǒ Klai-a gbàɛ̍ kɛ̍n i̍ tu̍ wlì mɛ̌ɛ dɛ we̍-ɛ, nɛ̀ ɛ̍ se̍ nyɔ̍ɔ wɔ̍i̍n nyaɛ mu̍ de.

¹² Ɛ̍ mu̍ ǐn gbǐh po̍, wɛ̀ nyɔ̍ ùh-a bɛ̌ɛ-a mɔ̀ wɔ̍ɔ̍n i̍-ɛ, u̍h iě u̍h-a chɛ̀ kɔlu̍-a poa-nyɔ̍ we̍i̍ nu̍ sǔh kleǐn.

¹³ Ǐn de̍di̍i̍ᵻ, mɔ̀ɔ̍ nɔ̀ɔ̍, mɔ̀ dǎ-ɛ mɔ̀ iě de̍e̍ i̍ flɔn. Jɛ mɔ̀ bɔ̌ mɔ̀-a de̍e̍ i̍ flɔn-ɛ dǔ-ɛ, wɛ̀ mɔ̀ bɔ̌ ɛ̍ gblɛ̍n sɔ̀ɛ̀n nui-ɛ. Jɛ jɔ-ɛ, nɛ̀ ɔ̍ dbee ɔ̍ ba̍ jǔ dě jbɛɛ di̍i̍.

¹⁴ Dɛ̍nu̍ɛ, telě kli̍hgbɛ̍ gbǎ dě telě due la di̍i̍, ɛ̍ la̍a̍, “Jbɛɛ ìn pònyɔ̍ ka àn chɛ̀-ɛ.”

¹⁵ Jɛ pò mɔ̀ ja we̍ gbe̍ɛ̍ɛn mɔ̀ iě kà nu̍-ɛ, nɛ̀ mɔ̀ tù ɛ̍ jlǐhɛ̍ o. Mɔ̀ se̍ nɛnɛ̌ nu̍-ɛ, nɛ̀ mɔ̀-a mu̍ we̍-e gbɔ̀lɔ o.

Sùù bo ɛ̀ iě àn kmɔ̌ wlu̍ i̍ kɔn

¹⁶ Jɛ dɛ̍ ǎn sà-aɛ, ɛ̍ nu̍ mɔ̀ naɛ dě Nyɔsoa-a Sùù di̍i̍, wɛ̀ mɔ̀ɔ̍ je̍e mɔ̀-a chɛ̀-a wlùh i̍ tè-e dǒ mɔ̀-a tu̍ ɛ̀ pɔ̀n-a gblɛ̍n sɔ̀ɛ̀n nu̍-ɛ i̍-ɛ we̍.

¹⁷ Dɛ̍nu̍ɛ, tu̍ laa̍ ɛ̍ pɔ̀n-dɛ̍ᵻá fɔ̀n Sùù naɛ we̍, wɛ̀ Sùù naɛ-a fɔ̀n à naɛ we̍. I̍h nɛ-a sɔɔ̌n-ɛ, i̍h-a se̍ jbɛɛ bo ɛ̀ nu̍ ɛ̍ iě dɛ̍ mɔ̀-a pɔ̀n-a nu̍ ɛ̍ i̍ de-ɛ, wɛ̀ mɔ̀-ɔ nu̍ ɛ̍.

¹⁸ Nɛ̀ pò mɔ̀ ja dě Nyɔsoa-a Sùù di̍i̍ naɛ-ɛ, nɛ̀ mɔ̀ se̍ dǒ telě sɔ̀n nɛ.

¹⁹ À gblɛ̍n sɔ̀ɛ̀n-a tu̍-a nu̍-dɛ̍ᵻ se̍ kàɛ̀n. I̍h bo ìh nu̍-a gbǎn nu̍-ɛ ke, sììjii̍ nu̍-ɛ ke, se̍i̍kɔɛn nu̍-ɛ ke,

²⁰ kwɛ̍i̍n gbo̍ᵻ wɛɛ sà-a ke wù po̍-ɛ. Ɛ̍ ke nyɔ̍-ɔ nyɛ̌-ɛ ke, fɔ̀n-ɛ ke, wlɛ̀n kɔn-ɛ ke, nyɔ̍ jlu̍h-u gbǎ-ɛ ke, klǎn kɔn-ɛ ke, wlu̍-a se̍ due nɛ ke, dɛ̍ɛ̍ i̍ gblè-ɛ ke,

²¹ se̍ nyɔ̍ dɔɔ-a dɛ̍ kɔn pɔ̀n ɛ̍ ke, chɛ̀ nmɔ̍ wlì sìèè-ɛ ke, sììjii̍ nu̍-ɛ peě kɛ̍n i̍ ke, iě diih nɛ-o ìh ke ìh la wɔ̀ɛ-ɛ. Ka ǐn nu̍-a mɔ̀ gbòɛ̀ɛ̀ sàǐtòò-ɛ, ɛ̍ bo ǎn nu̍ la̍ dɛ. Na̍ nyɔ̍ ùh-a nu̍-a ìh la-ɛ, u̍h se̍ fɔ̌ blě mu̍ dě Nyɔsoa-a kmɔ̌ wlu̍ i̍ kɔn-ɛ di̍i̍.

²² Jɛ Nyɔsoa-a Sùù naɛ tlo-ɛ nu̍ jbɛɛ-ɛ, nmɔ-ɛ, wlùh-a i̍ tè-ɛ, wlùh i̍ gbɛ̍n-ɛ, blɛ nɛ-ɛ, gblɛ̍n-ɛ nmɔ-ɛ, ɛ̍ ke wlu̍-a nɛ̀ gbǎ si̍h-i ke.

²³ Nɛ̀ diih nu̍ gba̍n gbɛ̍n-ɛ ke chɛ̀ i̍ gbɛ̍n-ɛ. Telě ɛ̀ iě-a ìh la-a nyɛ̌-ɛ, ɛ̍ se̍ nɛ.

²⁴ Nyɔ̍ ùh kɔn-a dǒ Jusu Klai we̍-ɛ, nɛ̀ u̍h dbǎ u̍h-a gblɛ̍n sɔ̀ɛ̀n-a ku̍ ke, ɛ̍ wlùh dɛ̍ᵻ ke, ɛ̍ pɔ̀n-dɛ̍ᵻ kli̍hgbɛ̍ wɛ̀.

²⁵ Ka à nɛ-ɛa Sùù kmɔ̌ wɛ̀-ɛ, nɛ̀ mɔ̀ à naɛ dě Sùù di̍i̍.

²⁶ Mɔ̀ à bɔ̌ à chɛ̀ i̍ bɛ̌-ɛ. Nɛ̀ mɔ̀ à bɔ̌ à ba̍ᵻ jlu̍h di̍i̍ i̍ po̍-ɛ, mɔ̀ à bɔ̌ wlɛ̀n we̍ nui-ɛ.