Kelesea 4 - Ku̍o̍ Delee 1999

¹ Dɛ̍ ǎn dǎ-aɛ, ɛ̍ nu̍ jǔ ɔ̀ mu̍-a dǒ ɔ̍ baa-a gbaa kɛ̍n sie-ɛ, nɛ̀ ɔ̍ wɔ̀ kèi̍ dě ɔ̍ jǔwɛ blǐ. Kǎ ɛ̍ nɛ nɔ̀ɔ̍, ɔ̍ bo ɔ̀ kɔn ɔ̍ baa-a kɔn-dɛ̍ᵻ kli̍hgbɛ̍.

² Jɛ nɛ̀ nyɔ̍-a gbɛ̀n dǒ ɔ̍ ke ɔ̍ baa-a kɔn-dɛ̍ᵻ we̍ i̍ te̍e̍ wɛ̀ ti̍ ɔ̍ baa tba̍-aɛ, ɛ̍ nyni̍-o.

³ Ka ɛ̍ nɛ ke, ti̍ à se̍-a jlǐh flɔn ke̍-ɛ, nɛ̀ gbǐh jih kɔn-a kmɔ̌ la wlu̍ i̍-ɛ, nɛ̀ àɔ̀ i̍h-a kèi̍ᵻ.

⁴ Jɛ ti̍-a taǐn nyni̍-a wɛ̀-ɛ, iě Nyɔsoa dbo̍ ɔ̍ Jǔ jɔ̍gbau. Nynɔ̌gbaɔ bo ɔ̀ wlǔh-i ɔ̍, iě ɔ̍ nɛ dǒ telě sɔ̀n,

⁵ wɛ̀ ɔ̍ iě nyɔ̍ ùh nɛ-a dǒ telě sɔ̀n-ɛ kɛ̍ɛ̍n pùhbɔ, wɛ̀ à iě Nyɔsoa-a chɛǐ nynuu̍ nu̍.

⁶ Mɔ̀ɔ̍ Nyɔsoa-a chɛǐ nynuu̍ dɛbo, ɛ̍ kɔn ɔ̍ dbo̍ ɔ̍ Jǔ-a Sùù dě à wlùh di̍i̍. Iě ɛ̍ sèàɛ̍ àɔ̀ wlùh ka Nyɔsoa bo ɔ̀ nu̍-a à Baa-ɛ.

⁷ Ɛ̍ tìh-ɛ, mɔ̀ se̍ kèi̍ᵻ dɛ, mɔ̀ɔ̍ ɔ̍ chɛǐ nynuu̍ wɛ̀. Nɛ̀ɛ̍, ka ìn nu̍-a chɛǐ jǔ wɛ̀-ɛ, Nyɔsoa-a mu̍ la̍ ìn dǒ gbaa kɛ̍n sie.

Kelesea nyɔ̍-a sèò-a nu̍ Pɔɔ

⁸ Mɔ̀ se̍ Nyɔsoa juo de tɛin, ɛ̍ kɔn mɔ̀ nu̍ kèi̍ᵻ dǒ nyɔsoa-a si̍h naɛ we̍.

⁹ Jɛ kaka la̍ mɔ̀-a juo la̍ Nyɔsoa. Jɛ chɛ̀ɛ̌chɛ̀-ɛ, Nyɔsoa bo ɔ̀ juo la̍ mɔ̀. Dɛ̍nu̍ mɔ̀-a pɔ̀n dě nyɔsoa-a si̍h naɛ ìh se̍-a gbǐh kɔn, ìh se̍-a dɛ̍ i̍ blaɛ-ɛ we̍ mu̍-ɛ i̍ dode̍ ɛ? Mɔ̀-a pɔ̀n mɔ̀ iě i̍h-a kèi̍ᵻ nu̍ dɛ ae?

¹⁰ Wǐh ke, chǔhᵻ ke, nɔɔᵻ ke sɔ̀nᵻá nɛnɛ̌ bo mɔ̀-a nu̍.

¹¹ Mɔ̀-a faɔn-a nu̍ m, wɛ̀ dbo̍ ǐn nu̍-a dǒ mɔ̀ we̍-ɛ, ɛ̍-ɛ je̍e bu̍ɛ̍i̍ nu̍.

¹² Ǐn de̍di̍i̍ᵻ, ǎn ba̍le mɔ̀ɔ̍-ɛ, kǎ ǐn nɛ-aɛ mɔ̀ iě laǎn nɛ. Dɛ̍nu̍ɛ, ka mɔ̀ nɛ-aɛ, kǎ ǐn nɛ. Mɔ̀ se̍ ǐn dɛ̍ sɔ̀n pùn nu̍.

¹³ Mɔ̀-a chɛ̀ juo ɛ̍-ɛ, ǎn poa-a bo ɛ̀ nɛ kmɔ̌ iě ǐn bla̍ pɔ̀n chɛ̀ dě mɔ̀ we̍ sàǐtòò.

¹⁴ Ǎn poa-a sàɛ̀ mɔ̀ jua̍i̍ kaa̍, jɛ mɔ̀ se̍ ǐn faɛn, iě mɔ̀ wɔ̍ se̍ ǐn chla tba̍ ke. Wɛ̀ ka mɔ̀ iě-a Nyɔsoa-a ǐnchɔ̀ ke Jusu Klai-a tìh i̍ gbɛ̍n-ɛ nu̍-ɛ, iě mɔ̀ nu̍ la̍a̍n ǎn tìh i̍ gbɛ̍n-ɛ.

¹⁵ Dɛ̍ bo ɛ̀ po̍ ka mɔ̀-a mɔna̍ cha̍n we̍ ɛ? Ǐn wɔ̌ɛn mɔ̀-a tìh i̍, pò mɔ̀ bɛ̌ɛ-ɛ mɔ̀-a jlǐh-a chɛ̀ kɔ̌n-ɔ sà-a de-ɛ, nɛ̀ mɔ̀-a mu̍ i̍h kɔ̌n-ɔ sà mɔ̀ iě i̍h ǐn nyǐ de.

¹⁶ Dɛ̍-ɛ ɛ? Mɔ̀-a tìh-a taǐn wlùh sèàɛ̍ tìh iě ǐn mɔ̀-a nyɛ̌-nyɔ̍ we̍i̍ nu̍ ae?

¹⁷ Nyɔ̍ la u̍h-a nu̍ mɔ̀-a dɛ̍i̍, jɛ ɛ̍ se̍ mɔ̀-a tìh kma-a. Dɛ̍ u̍h-a pɔ̀n-a i̍-ɛ, ɛ̍ nu̍ mɔ̀ ke ǐn ke à iě i̍ che̍ɛ̍ɛn, wɛ̀ u̍h iě mɔ̀ chlì dě u̍h we̍ ka.

¹⁸ Ɛ̍ nmɔ jii mɔ̀ iě nyɔ̍ tìh-a wlì bla̍ ti̍ kli̍hgbɛ̍ we̍, pò ɛ̍ kɔ̍ dǒ dɛ̍ chɛ̀ kɛ̍n i̍-ɛ. Jɛ ɛ̍ se̍ iě dǒ mɔ̀ we̍ nɛ gbɔ̀.

¹⁹ Ǎn nynuu̍, ka kwlǐ nynɔ̌ gbǔh we̍-a nu̍-a chlɛ̌n-ɛ dǒ gbàɔ̀n sà la̍-ɛ, kǎ ǎn ku̍-a nu̍ chlɛ̌n-ɛ ke mɔ̀-a tìh. Kǎ ɛ̍ mu̍ nɛ te̍e̍ wɛ̀ mɔ̀ iě Klai wɔ̀ dě mɔ̀-a kmɔ̌ di̍i̍.

²⁰ Ǎn pɔ̀n iě dě mɔ̀ we̍ nɛ kaka wɛ̀ iě wlu̍ i̍ bǐi. Ka iě-a mɔ̀-a tìh nu̍-ɛ, ǐn se̍ ɛ̍ juo dɛ.

Ɛ̀ la bo ɛ̀ nu̍ Selɔ ke Eka-a blaiɛ̍

²¹ Mɔ̀ɔ̍ ùh-a pɔ̀n-a dǒ telě sɔ̀n nɛ-ɛ i̍-ɛ, ǎn mu̍ mɔ̀ i̍ tèle. Mɔ̀ se̍ dɛ̍ telě sà-a wɔ̌n ae?

²² Ɛ̍ la̍ Eblaɛɛn wlǔh-i jɔ̍gbauᵻ nynuu̍ sɔɔ̌n. Ɔ̍ ke kèi̍ nynɔ̌ wlǔh-i due, wɛ̀ ɔ̍ ke jɔ se̍-a kèi̍-ɛ wlǔh-i due.

²³ Jǔ jɔ ɔ̍ ke kèi̍ nynɔ̌ wlǔh-iaɛ, ɔ̍ wlǔh-i plǒai ka. Jɛ ɔ̍ jǔ jɔ ɔ̍ ke jɔ se̍-a kèi̍-ɛ wlǔh-iaɛ, ɔ̍ wlǔh-i dǒ Nyɔsoa-a tɔ̀ma̍a̍ wlu̍ kɛ̍n.

²⁴ Nynɔ̌gbaɔᵻ sɔɔ̌n la à mu̍ u̍h dɛ̍ i̍ blaɛ. Ku̍o̍ sɔɔ̌n bo u̍h wɔ̀. Due sɔ Saɛnaɛ Tlu̍h kɛ̍n, iě ɔ̍ wlǔh-i ɔ̍ nynuu̍ dě kèìe̍e̍. Ɔ̍-ɔ bo ɔ̀ nu̍-a Eka.

²⁵ Eka bo ɔ̀ nu̍ Saɛnaɛ Tlu̍h dě Awlebia bloa̍ kɛ̍n, iě ɔ̍ wɔ̀ Juluslɛn wlɔ̀ ɛ̀ nɛ-a kaka-ɛ. Dɛ̍nu̍ɛ, ɔ̍ ke ɔ̍ nynuu̍ nɛ dě kèìe̍e̍.

²⁶ Jɛ Juluslɛn jɛ nɛ-a dě à dlǔwèàì-ɛ, ɛ̍ se̍-e kèìe̍e̍ nɛ, iě ɛ̍ nu̍ à de̍.

²⁷ Ɛ̍ kɔn Nyɔsoa-a wlu̍ la̍a̍, “Mɔ̀ nynɔ̌gbaɔ ɔ̀ sie slàmàɛ̀ kwlǐ-i se̍-a nu̍-ɛ, nɛ̀ ìn wǐi i̍ ìè mɔna̍ slɛ̀ po̍. Nynɔ̌ ɔ̀ kɔan bɔ̌-aɛ, ɔ̍ mu̍ nynuu̍ dɔu blě ɛ̍ iě jɔ kɔan se̍-a bɔ̌-ɛ sìì.”

²⁸ Nɛ̀ɛ̍, kaka la̍ ǐn de̍di̍i̍ᵻ, mɔ̀ɔ̍ Nyɔsoa-a nynuu̍ wɛ̀ dǒ ɔ̍ tɔ̀ma̍a̍ wlu̍ kɛ̍n ka Ase-ɛ.

²⁹ Dǒ ti̍ laa̍ di̍i̍-ɛ, jǔ ɔ̀ wlǔh-a plǒai ka-ɛ, ɔ̍ jě-e jɔ wlǔh-ia dě Sùù di̍i̍-ɛ klě. Ɛ̍ kɔn ba̍ bo ɛ̀ nɛ kaka.

³⁰ Jɛ ka Nyɔsoa-a wlu̍ dǎ ɛ? Ɛ̍ la̍a̍, “Tǎli kèi̍ nynɔ̌ ke ɔ̍ jǔ i̍. Dɛ̍nu̍ɛ, kèi̍ nynɔ̌-a jǔ ke jɔ se̍-a kèi̍-ɛ ɔ̍ jǔ se̍ kɔn-dɛ̍ᵻ gblè mu̍.”

³¹ Nɛ̀ɛ̍, ǐn de̍di̍i̍ᵻ, à se̍ kèi̍ nynɔ̌-a nynuu̍, jɛ àɔ̀ jɔ se̍-a kèi̍-ɛ, ɔ̍ nynuu̍.