Kelesea 2 - Ku̍o̍ Delee 1999

Klai-a gba̍tòà wɔ̌n-ɛ Pɔɔ iě gba̍tòà nu̍ ke

¹ Sɔ̀nᵻá pùè jɔ̌ nyìɛ̍ sì-aɛ, wɛ̀ ǐn ke Banaba ke à mu̍ dǒ de̍ Juluslɛn wlɔ̀ di̍i̍. Iě ǐn gba̍ Taitɔ ke.

² Nyɔsoa jii ǐn dluwe̍ iě-e mu̍, ɛ̍ kɔn ǐn mu̍-e. Wɛ̀ pɔ̀n chɛ̀ kɔn tìh ǐn bla̍-a dě ùh se̍-a Juu nyɔ̍-ɛ we̍-ɛ, iě ǐn po̍ ɛ̍ dǒ chɔchi̍h-a nyɔ̍ klaaᵻ jǔ i̍ dě slǎn. Ǐn po̍ u̍h kunǎ, wɛ̀ ǎn dbo̍ jɛ ǐn nu̍-a wɛ̀-ɛ ke, iě jɛ ǎn nu̍-a ka-ɛ, i̍h-i je̍e bu̍ɛ̍i̍ nu̍.

³ Taitɔ ɔ̀ ke ǐn ke à na-aɛ, ɔ̍-ɔ Klii jǔ gbɛɛ, jɛ u̍h se̍ ɔ̍ kloǒ nu̍ u̍h iě ɔ̍ plɔ̀n po̍.

⁴ Nyɔ̍ ùh tba̍-o bu̍h sǔh-ɛ, ɛ̍ nu̍ de̍di̍i̍ᵻá si̍h naɛ ùh gbǎ-a à nynɛ̌ soɛɛ, iě u̍h-a klǎɛ à jlǐhɛ̍-ɛ. Wɛ̀ u̍h iě ka à nu̍-a sèìe-ɛ dě Jusu Klai ja̍a̍-ɛ we̍ i̍ ju̍o̍e. Wɛ̀ u̍h iě àɔ̀ telě-a kèi̍ we̍i̍ nu̍ dode̍.

⁵ Jɛ pɔ̀n chɛ̀ nu̍-a tìh-a taǐn-ɛ, ɛ̍ iě mɔ̀ we̍ sie tìh bo, ɛ̍ kɔn u̍h-a dɛ se̍ à beɛ mlǎ-a chɛ̀ i̍ tǐhlɔ fu̍u̍.

⁶ Jɛ nyɔ̍ u̍h-a dǎɛ-a nyɔ̍ klaaᵻɛ́, u̍h se̍ flɔ̍nwlùh delee dǒ naɛ̍ kɛ̍n po̍. Ka jɛ u̍h nɛ-a chɛ̀-ɛ, dɛ̍ ɛ̀ iě-a dǒ dɔɔ̌ nɛ dǒ ǐn we̍-ɛ, ɛ̍ se̍ nɛ dɛ̍nu̍ɛ, Nyɔsoa-a chlɛ̌-e nyɔ̍ i̍.

⁷ Jɛ ɛ̍ se̍-o siee, sɔ u̍h juo-o dɛ̍ i̍ ka Nyɔsoa nu̍-a Pitɛ i̍ nynaɛ-ɛ ɔ̍ iě-a pɔ̀n chɛ̀-a tìh bla̍ dě Juu nyɔ̍ we̍-ɛ, kǎ ɔ̍ nu̍ ǐn i̍ nynaɛ-ɛ ke iě pɔ̀n chɛ̀-a tìh bla̍ dě ùh se̍-a Juu nyɔ̍-ɛ we̍.

⁸ Ka Nyɔsoa nu̍-a Pitɛ gba̍tòà we̍i̍ nu̍-ɛ dǒ Juu nyɔ̍ we̍-ɛ, kǎ ɔ̍ nu̍ ǐn gba̍tòà we̍i̍ nu̍-ɛ ke dǒ ùh se̍-a Juu nyɔ̍-ɛ we̍.

⁹ Chiin ke, Pitɛ ke Chɔɔn u̍h-a dǎɛ-a gbo̍tu-ɛ, u̍h juo-o dɛ̍ i̍ ka Nyɔsoa nyǐ-a ǐn dbo̍ la-ɛ. Ɛ̍ kɔn tìh u̍h tǔh ǐn ke Banaba kwa̍, ɛ̍ iě ɛ̍ to-ɛ ka u̍h ke à nu̍-a dbo̍ due-ɛ. Iě u̍h wɔ̌n ǐn ke Banaba ke à iě dě ùh se̍-a Juu nyɔ̍-ɛ we̍ dbo̍ nui, wɛ̀ u̍h iě dě Juu nyɔ̍ we̍ dbo̍ nui ke.

¹⁰ Dɛ̍ due u̍h sèàɛ̍-a à wlùh à iě-a nu̍-ɛ, ɛ̍ nu̍ à iě nyɔ̍gbà nyɔ̍-a tìh jlǐhɛ̍ tù. Ɛ̍ bo ɛ̀ nu̍ ka ǎn wlùh-a jàjà iě nu̍.

Pɔɔ la̍ dɛ̍ Pitɛ nu̍-a dǒ Antiɔ-ɛ, ɛ̍ se̍ i̍ slɛ̌

¹¹ Jɛ ti̍ Pitɛ ji̍-a dǒ Antiɔ wlɔ̀ di̍i̍-ɛ, klǐ-dɛ̍ ɔ̍ nu̍-aɛ, iě ǐn po̍ ɛ̍ dě ɔ̍ jlǐh.

¹² Ti̍ Chiin iě-a nyɔ̍ dbo̍-ɛ, nɛ̀ Pitɛ ke ùh se̍-a Juu nyɔ̍ ùh nu̍-a Nyɔsoa nyɔ̍-ɛ, u̍h-a gbà-ɛ de dǒ dɛ̍ di̍ la̍. Jɛ ti̍ ɔ̍ jě-a nyɔ̍ Chiin dbo̍-aɛ, iě ɔ̍ sà u̍h sɔ̍nᵻ i̍. Sɔ ɔ̍ ke u̍h-u gbà dɛ, dɛ̍nu̍ɛ, ɔ̍ ple̍ nyɔ̍ ùh nɛ-a dě nyɔ̍ plɔ̀n po̍ dɛ di̍i̍-ɛ jǔ.

¹³ Sɔ à de̍di̍i̍ᵻ Juu nyɔ̍ duuh gbǎ ɔ̍ bu̍hᵻ sɔɔ̌n i̍ sǐ-iɛ laa̍ de̍e̍. Sɔ ɛ̍-ɛ laa̍ bo Banaba gbǎ dǒ de̍e̍ wɛ̀ ke sǔh.

¹⁴ Ti̍ ǐn juo-ao dɛ̍ i̍ ka u̍h-u naɛ-a dě pɔ̀n chɛ̀-a tìh-a taǐn di̍i̍-ɛ, wɛ̀ na̍a̍ dě Pitɛ we̍ dǒ u̍h kli̍hgbɛ̍ jlǐhwai, “Mɔ̀ Juu jǔ, jɛ àn nu̍ la̍ ùh se̍-a Juu nyɔ̍-ɛ u̍h-a gblɛ̍n, nɛ̀ nu̍ Juu gblɛ̍n dɛ. Ka ɛ̍ iě nu̍ wɛ̀ àn nɛ̌ ùh se̍-a Juu nyɔ̍-ɛ kɛ̍ɛ̍n u̍h iě Juu gblɛ̍n nu̍ ɛ?”

Juu nyɔ̍ ke ùh se̍-a Juu nyɔ̍-ɛ pǔh-i dǒ u̍h-a wlùh gbaɛ we̍

¹⁵ Àɔ̀ la àɔ̀ Juu nynuu̍, à se̍ ùh se̍-a Juu nyɔ̍ u̍h-a dǎɛ-a gblɛ̍n sɔ̀ɛ̀n nyɔ̍-ɛ.

¹⁶ À juo i̍h, telě dɛ̍ɛ̍ jě-ɛ, ɛ̍-ɛ slɛ̌-ɛ nyɔ̍ i̍ dě Nyɔsoa jlǐh. Jɛ Jusu Klai wlùh gbaɛ bo ɛ̀ slɛ̌-ɛ nyɔ̍ i̍ dě Nyɔsoa jlǐh. À chɛ̀ à gbaɛ Jusu Klai wlùh wɛ̀ ɛ̍ iě à i̍ slɛ̌-ɛ dě Nyɔsoa jlǐh. À Klai wlùh gbaɛ bo ɛ̀ nu̍ ɛ̍, ɛ̍ se̍ telě dɛ̍ɛ̍ jě tìh. Dɛ̍nu̍ɛ, nyɔ̍-ɔ slɛ̌ i̍ dě Nyɔsoa jlǐh dǒ telě dɛ̍ɛ̍ jě-ɛ we̍.

¹⁷ Ka à fɔ̀n-a dɛ̍ we̍ à iě-a i̍ slɛ̌ dě Nyɔsoa jlǐh dě Klai ja̍a̍-ɛ, wɛ̀ à iě gblɛ̍n sɔ̀ɛ̀n nyɔ̍ sàɛ̀-ɛ, nɛ̀ Klai bo ɔ̀ nu̍ gblɛ̍n sɔ̀ɛ̀n-a nya̍ sɔ̍nᵻ ae? Sakǒ, ɛ̍ se̍ la̍a̍n nɛ.

¹⁸ Pò ǐn sà telě dǒ wìè-i wɛ̀ iě ɛ̍ dǒ de̍ po̍-ɛ, nɛ̀ ɛ̍ flɔn-ɛ ɛ̍ we̍i̍ ka ǐn nu̍-a telě wa̍ nyɔ̍-ɛ.

¹⁹ Ǐn mɛ̌ wɛ̀ dǒ telě nɔ̀ɔ̍ we̍, wɛ̀ iě kmɔ̌ nɛ dǒ Nyɔsoa we̍. Ǐn mɛ̌ wɛ̀ dǒ Klai we̍ gbàɛ̍ kɛ̍n i̍ tu̍ wlì.

²⁰ Kaka la̍ ɛ̍ se̍ mɔ̍ ɔ̀ se̍ kmɔ̌ nɛ dɛ, jɛ Klai bo ɔ̀ nɛ kmɔ̌ wɛ̀ dě ǐn ja̍a̍. Kmɔ̌ ǐn nɛ-a ka-a dě ǎn nyi̍ɔ̍ku di̍i̍-ɛ, ǐn nɛ ɛ̍-ɛ dǒ Nyɔsoa-a Jǔ wlùh gbaɛ-ɛ we̍. Ɔ̍ bo ɔ̀ jbɛɛ m wɛ̀ ɔ̍ sà ɔ̍ feɛ kwlǎ ǎn tìh.

²¹ Ǐn se̍ Nyɔsoa-a blɛ chla tba̍. Dɛ̍nu̍ɛ, pò telě ja nyɔ̍ i̍ slɛ̌-ɛ de dě Nyɔsoa jlǐh-ɛ, nɛ̀ Klai-a mɛ̌ɛ se̍ dɛ̍ i̍ blaɛ de.