Kalase 4 - Ku̍o̍ Delee 1999

¹ Dlǔtuᵻ, mɔ̀ nu̍ mɔ̀-a kèi̍ᵻá sɛ̍sɛ̍, mɔ̀ iě i̍ slɛ̌-dɛ̍ nu̍ dǒ u̍h we̍. Dɛ̍nu̍ɛ, mɔ̀ juo ɛ̍ ka mɔ̀ blě-a Dlǔtu ke dě ja̍i̍wlɔ̀-ɛ.

Slɛ̌ chèɛ̀ i̍ po̍ wlu̍ la

² Mɔ̀ bɔ̌ ba̍le-ɛa plǔh nu̍-ɛ, nɛ̀ mɔ̀ sà nyinɔ̍ jlǐh mɔ̀ iě Nyɔsoa tlɔ̌ po̍ dǒ ba̍le la̍.

³ Nɛ̀ mɔ̀ ba̍le dǒ à tàà ke, wɛ̀ Nyɔsoa iě wìè wɔ̍n flɔn-ɛ dǒ tu̍owli à mu̍-a po̍-ɛ we̍. Wɛ̀ à iě sìle dɛ̍ ɛ̀ tba̍-a dǒ Klai pùn i̍-ɛ bla̍. Sìle dɛ̍ la ɛ̍ bla̍-a tìh bo ǐn nɛ nɔ̌ kasoo.

⁴ Mɔ̀ ba̍le wɛ̀ dɛ̍ ǎn mu̍-a bla̍-a ɛ̍ iě we̍i̍ flɔn.

⁵ Nyɔ̍ ùh se̍-a Nyɔsoa nyɔ̍-ɛ, flɔ̍nwlùh bo mɔ̀ iě u̍h we̍ blě-e. Pò mɔ̀ jě flɔn la̍ mɔ̀ iě tu̍owli po̍ dě u̍h we̍-ɛ, nɛ̀ mɔ̀ nu̍ ɛ̍ sùo̍o̍ chɛ̀ka.

⁶ Mɔ̀ nu̍ ɛ̍ mɔ̀-a wlu̍ iě dě nyɔ̍ dounᵻ i̍ nmɔ ti̍ kli̍hgbɛ̍ we̍. Nɛ̀ mɔ̀ kɔn mɔ̀ iě nyɔ̍ kli̍hgbɛ̍-a wlu̍ pɔ̀n we̍ sà-a juo.

Nyinɔ̍ i̍ sà-a bɔ̌ɛ-o naɛ la

⁷ À tìh kma de̍di̍i̍ Tekikɔ, ɔ̀ nu̍-a ǐn ba̍ pòi̍ju à tè-a wlì dě Joi-a dbo̍ nu̍-ɛ di̍i̍-ɛ, ɔ̍ bo ɔ̀ mu̍ mɔ̀ pɔ̀n kli̍hgbɛ̍ kɔ̍-a dǒ ǐn pùn i̍-ɛ wlùh sèàɛ̍.

⁸ Ɛ̍ kɔn tìh ǎn dbo̍ ɔ̍ dě mɔ̀ we̍, wɛ̀ ka à nɛ-a nɔ̀ɔ̍-ɛ, ɔ̍ iě ɛ̍ mɔ̀ wlùh sèàɛ̍, wɛ̀ ɛ̍ iě mɔ̀-a wlùh fùka.

⁹ Ɔ̍ ke Onɛsemɔ-a ji̍. Mɔ̀-a chɛ̀-a nyɔ̍ due bo, à de̍di̍i̍ kɔn tìh à kma-a iě à tè-a wlì-ɛ bo. U̍hɔ̍ɔ̍ bo ùh-a mu̍ mɔ̀ dɛ̍ᵻ kli̍hgbɛ̍ ìh-a gbǎ-a nɔ̀ɔ̍-ɛ wlùh sèàɛ̍.

¹⁰ Awleslakɔ ɔ̀ nu̍-a ǐn ba̍ gbɛ̍n-nyɔ̍-ɛ, ɔ̍ la̍ ɔ̍ sà mɔ̀ nyinɔ̍ i̍. Kǎ Maɛ dǎ ke, ɔ̀ ke Banaba nu̍-a de̍di̍i̍ ji̍ nyɔ̍-a nynuu̍-ɛ. (Ɔ̀ kɔn tìh à sèàɛ̍ mɔ̀ wlùh se̍e̍-ɛ, pò ɔ̍ ji̍ dě mɔ̀ we̍-ɛ, mɔ̀ iě ɔ̍ tìh i̍ gbɛ̍n.)

¹¹ Jusu u̍h-a dǎɛ-a Jɔslu-ɛ, ɔ̍ la̍ ɔ̍ sà mɔ̀ nyinɔ̍ i̍ ke. U̍h nɛ-a ta̍a̍n-ɛ, u̍h nɛ due bo ùh nu̍ Juu nynuu̍ ùh ke à nu̍ Nyɔsoa-a kmɔ̌ wlu̍ i̍ kɔn dɛ-a dbo̍. U̍h-a naɛ-a ǐn sɔ̍nᵻ we̍ i̍ sǔh-ɛ, ɛ̍ se̍ dɛ̍ka nɛ.

¹² Ipafla ɔ̀ nu̍-a mɔ̀-a chɛ̀-a nyɔ̍ due ɔ̀ nu̍-a Jusu Klai-a pòi̍ju-ɛ, ɔ̍ la̍ ɔ̍ sà mɔ̀ nyinɔ̍ i̍. Ɔ̍ po̍-e gbǐh, ɔ̍ ba̍le Nyɔsoa dǒ mɔ̀-a tàà te̍e̍ ɔ̍ iě mɔ̀ i̍ kui. Wɛ̀ mɔ̀ iě Nyɔsoa-a wlùh dɛ̍ᵻ kli̍hgbɛ̍ juo, iě mɔ̀ iě ɛ̍ nu̍ te̍kle̍e̍.

¹³ Mɔ̀ɔ̍ ke nyɔ̍ ùh nɛ-a dǒ Leodesia wlɔ̀-ɛ ke Ɛwlapole wlɔ̀ di̍i̍-ɛ, ɔ̍ po̍-e mɔ̀-a tìh-a gbǐh kaa̍. Ǎn chɛ̀ bo ɔ̀ nu̍ ɔ̍ sàànsi̍i̍h.

¹⁴ À tìh kma nyɔ̍ Luu ɔ̀ nu̍-a à kwɛ̍i̍n sà nyɔ̍-ɛ, ɔ̍ ke Dima la̍ u̍h sà mɔ̀ nyinɔ̍ i̍.

¹⁵ Nɛ̀ mɔ̍ sà de̍di̍i̍ᵻ nɛ-a dǒ Leodesia wlɔ̀ di̍i̍-ɛ nyinɔ̍ i̍, ɛ̍ ke Nyɛfa ke nyɔ̍ ùh-a pa̍-a chɔchi̍h-i dě ɔ̍ blǐ gbò-ɛ ke.

¹⁶ Pò chlǐh-dɛ̍ la ɛ̍ wɔ̀ slè-eɛ dě mɔ̀ we̍-ɛ, nɛ̀ mɔ̀ nu̍ ɛ̍, ɛ̍ iě slè-ɛ ke dě chɔchi̍h nɛ-a dǒ Leodesia-a we̍. Nɛ̀ chlǐh-dɛ̍ ɛ̀ mu̍-a Leodesia sɔ-ɛ, nɛ̀ mɔ̀ slè ɛ̍ ke.

¹⁷ Mɔ̀ sèàɛ̍ Achipo wlùh dbo̍ Joi nyǐ-a ɔ̍ ɔ̍ iě-a nu̍-ɛ, ɔ̍ iě ɛ̍ i̍ wɔ̀.

¹⁸ Mɔ̍ Pɔɔ, ǎn chɛ̀-a sɔ̍n bo ǎn chlǐh i̍ nyinɔ̍ i̍ sà wlu̍ la. Mɔ̀ bɔ̌ ǎn kasoo nɛ tìh we̍ mǎle-ɛ o. Ǎn sà nǐ wɔ̍n Nyɔsoa-a blɛ iě mɔ̀ we̍ nɛ.