Chɔɔn 10 - Ku̍o̍ Delee 1999

Jusu po̍ blawɛ̌ᵻ we̍ i̍ gbɛ̀n nyɔ̍-a nɛnǎ

¹ Jusu la̍a̍, “Tìh-a taǐn ǎn sèàɛ̍ mɔ̀ wlùh, nyɔ̍ jɔ mu̍-a dě blawɛ̌ᵻá kòò di̍i̍ wɛ̀ ɔ̍ se̍-a dǒ ɛ̍ wɔ̍n we̍ jii, iě ɔ̍ jii-a tàdɔ̀ɔ̀-ɛ, nɛ̀ jlǐ-nyɔ̍ bo.

² Jɛ nyɔ̍ ɔ̀ jii-a dǒ ɛ̍ wɔ̍n we̍-ɛ, nɛ̀ i̍h-a we̍ i̍ gbɛ̀n nyɔ̍ bo.

³ Nɛ̀ i̍h-a kòò jlǐhɛ̍ tù nyɔ̍-a pɔ̀ni ɔ̍ wɔ̍i̍n. Nɛ̀ pò ɔ̍ ja ɔ̍ kɔn-ɔ blawɛ̌ᵻá nynɛ̌ dǎ-ɛ, nɛ̀ i̍h-a juo ɔ̍ wlu̍ i̍, wɛ̀ ɔ̍ sǐ-i i̍h sɔ̀n.

⁴ Pò ɔ̍ sǐ-i i̍h sɔ̀n-ɛ, nɛ̀ ɔ̍ gbǎ dǒ i̍h jǔ wɛ̀ i̍h-a wɔ̀ dǒ ɔ̍ de̍e̍, dɛ̍nu̍ɛ, i̍h juo ɔ̍ wlu̍ i̍.

⁵ Ɛ̍ tù dihwi̍h-ɛ, nɛ̀ i̍h-a mu̍ ɔ̍ kwa̍ kwlǎ gbǎ-ɛ. I̍h se̍ dǒ ɔ̍ de̍e̍ wɔ̀ mu̍, dɛ̍nu̍ɛ, i̍h se̍ ɔ̍ wlu̍ i̍ juo.”

⁶ Jusu sèàɛ̍ u̍h dɛ̍ wlùh dě nɛnǎ la di̍i̍. Jɛ dɛ̍ ɔ̍ sà-a dě u̍h we̍-ɛ, u̍h se̍ ɛ̍-ɛ i̍ wɔ̌n.

Jusu bo ɔ̀ nu̍ blawɛ̌ᵻ we̍ i̍ gbɛ̀n nyɔ̍ chɛ̀

⁷ Ɛ̍ kɔn Jusu wlu dɛ dě u̍h we̍, ɔ̍ la̍a̍, “Tìh-a taǐn ǎn sèàɛ̍ mɔ̀ wlùh, mɔ̍ bo ɔ̀ nu̍ kòò-a wɔ̍n dǒ blawɛ̌ᵻ we̍.

⁸ Juh kli̍hgbɛ̍ ji̍-a ǐn jǔ-ɛ, jlǐ-nyɔ̍ bo, sɔ blawɛ̌ᵻá dounᵻ se̍ dě u̍h we̍ nɛ.

⁹ Mɔ̍ bo ɔ̀ nu̍ kòò-a wɔ̍n. Nyɔ̍ jɔ mu̍-a ǐn we̍ jii-ɛ, nɛ̀ ɔ̍ mu̍ pǔh. Nɛ̀ ɔ̍ mu̍ pa̍ sǐ sɔ̀n nu̍, wɛ̀ ɔ̍ iě di̍-dɛ̍ jě.

¹⁰ Jlǐ-nyɔ̍ nɔ̀ɔ̍, ɔ̍ ji̍-i ɔ̍ iě nyɔ̍ dbǎ, ɔ̍ iě jlǐ, ɔ̍ iě dɛ̍-ɛ gbɔ̀lɔ. Jɛ mɔ̍ɔ, ǐn ji̍-i wɛ̀ nyɔ̍-a feɛ-a tùlɛ̀ iě wɛ̀n i̍ tba̍-ɛ.

¹¹ “Mɔ̍ bo ɔ̀ nu̍ blawɛ̌ᵻ we̍ i̍ gbɛ̀n nyɔ̍ chɛ̀. Blawɛ̌ᵻ we̍ i̍ gbɛ̀n nyɔ̍ chɛ̀ bo ɔ̀ sà ɔ̍ feɛ kwlǎ dǒ blawɛ̌ᵻ we̍.

¹² Jɛ nyɔ̍ jɔ se̍-a blawɛ̌ᵻ kɔn wɛ̀ u̍h pɛ̌ɛ-a ɔ̍ ɔ̍ iě-a dǒ i̍h we̍ i̍ gbɛ̀n-ɛ, nɛ̀ ɔ̍ se̍ blawɛ̌ᵻ we̍ i̍ gbɛ̀n nyɔ̍ chɛ̀ɛ̌chɛ̀. Pò ɔ̍ jě gbɛ̍n-nmi̍ɛ̍ ja ji̍-ɛ, nɛ̀ ɔ̍ ple̍-e ɔ̍ sɔ dǒ blawɛ̌ᵻ we̍. Nɛ̀ pò ɛ̍ flǎ i̍h-a dɛ̍-ɛ, nɛ̀ i̍h gbà ja̍i̍.

¹³ Ɔ̍ ple̍-e ɔ̍ sɔ dǒ blawɛ̌ᵻ laa̍ we̍-e, dɛ̍nu̍ɛ, ɔ̍ nu̍ dbo̍ pɛ̌ɛ la tìh, jɛ ɔ̍ se̍ i̍h-a ti̍ blě.

¹⁴ Mɔ̍ blawɛ̌ᵻ we̍ i̍ gbɛ̀n nyɔ̍ chɛ̀. Ǐn juo ǎn blawɛ̌ᵻ iě ǎn blawɛ̌ᵻ juo m.

¹⁵ Ka ǐn Baa nu̍-a ǐn juo-ɛɛ, kǎ ǐn nu̍ ɔ̍ juo-ɛ ke. Ǎn sà ǎn feɛ kwlǎ dǒ blawɛ̌ᵻ we̍.

¹⁶ Ǎn blawɛ̌ᵻ diih ìh se̍-a nɔ̌ kòò la di̍i̍ nɛ-ɛ ǐn kɔn iě i̍h ja ke, nɛ̀ i̍h-a mu̍ ǎn wlu̍-u i̍ wɔ̌n. Wɛ̀ i̍h iě blawɛ̌ᵻ gbà due nu̍ dǒ i̍h-a we̍ i̍ gbɛ̀n nyɔ̍ due sɔ̀n.

¹⁷ “Ɛ̀ kɔn tìh ǐn Baa jbɛɛ-a m-ɛ, ɛ̍ nu̍, ǎn sà ǎn feɛ kwlǎ wɛ̀ ǎn dǔ ɛ̍-ɛ dode̍.

¹⁸ Nyɔ̍-ɔ sà ɛ̍ ǐn kwa̍a̍, ǎn wlùh-a pɛ̌n i̍ iě ǎn sà ɛ̍ kwlǎ. Nɛ̀ ǐn blě gbǐh iě ɛ̍ kwlǎ sà, iě ǐn blě gbǐh iě ɛ̍-ɛ dǔ dode̍. Ɛ̍ bo ǐn Baa poe ǐn slǔh iě nu̍.”

¹⁹ Ìh ɔ̍ bla̍-aɛ, sɔ ɛ̍ nu̍ ɛ̍ iě nyɔ̍ɔ-a wlu̍ se̍ due nɛ dɛ.

²⁰ U̍h-a dɔu la̍a̍, “Jeědih nɛ ɔ̍ de̍e̍, ɔ̍ chɛ̀ kèkwlǎ-a nu̍ ɔ̍-ɛ. Ɔ̍ se̍ jɔ nyɔ̍-a po̍-a dounᵻ we̍-ɛ.”

²¹ Duuh la̍a̍, “Jeědih-a de̍e̍ nɛ nyɔ̍-ɔ nu̍ ka sɔ̀ìn chɛ̍n-ɛ. Jeědih-a de̍e̍ nɛ nyɔ̍ nɔ̀ɔ̍, ɔ̍ pɔ̀ni dɔ̌-nyɔ̍-a jlǐh ke ae?”

Nyɔ̍gbei tba̍ Jusu chla

²² Wɛ̀ Nyɔsoa-a Slaǎ Sà Gbò Kwlǎ Sà-a Peě tù ti̍ nyni̍ dǒ Juluslɛn. Nɛ̀ ɛ̍ nu̍ wìla̍ wlè ti̍.

²³ Nɛ̀ slaǎ sà gbò-a fùnǐ u̍h-a dǎɛ-a Sɔlɔma-a Fùnǐ-ɛ, dǒ ɛ̍ sɔ̀n bo Jusu-a na i̍.

²⁴ Wɛ̀ nyɔ̍ɔ mu̍ iě u̍h dlɛ̌ ɔ̍ tlììh, wɛ̀ u̍h la̍a̍, “Àn mu̍ dě à di̍i̍ i̍ gbè-e ke̍ sǔh ae? Pò ìn tù Nyɔsoa-a Chèɛ̀ Tba̍ju-ɛ, nɛ̀ ìn sèàɛ̍ àɔ̀ wlùh sǔh kleǐn.”

²⁵ Jusu la̍a̍, “Ǐn sèàɛ̍ mɔ̀ wlùh de, jɛ mɔ̀ se̍ ɛ̍ tìh dǎɛ. Dbo̍ ǎn nu̍-a dǒ ǐn Baa-a nynɛ̌ kɛ̍n-ɛ, i̍h bo ìh nu̍ ǎn sàànsi̍i̍h.

²⁶ Jɛ mɔ̀ se̍ ɛ̍ tìh chɛ̀ po̍, dɛ̍nu̍ɛ, mɔ̀ se̍ ǎn blawɛ̌ᵻ.

²⁷ Ǐn juo ǎn blawɛ̌ᵻ i̍, nɛ̀ i̍h-a wɔ̌n ǎn wlu̍-u i̍, iě i̍h-a wɔ̀ dǒ ǐn de̍e̍.

²⁸ Wɛ̀ ǐn nyǐ i̍h kmɔ̌ sie feɛ, i̍h se̍ gba̍ mɛ̌. Nyɔ̍-o-nyɔ̍ se̍ i̍h ǐn kwa̍a̍ flǎ-a bɛ̌ɛ.

²⁹ Ǐn Baa ɔ̀ nyǐ-a i̍h m-ɛ, ɔ̍ ku̍ wɔ̍n ɔ̍ sìì dɛ̍ᵻ kli̍hgbɛ̍. Nyɔ̍-o-nyɔ̍ se̍ i̍h dě ǐn Baa kwa̍a̍ flǎ-a bɛ̌ɛ.

³⁰ Ǐn ke ǐn Baa ke à nɛ due.”

³¹ Wɛ̀ nyɔ̍ɔ dǔ sɔɔ̌ᵻ dɛ u̍h iě ɔ̍ i̍ tbaɛ.

³² Wɛ̀ Jusu la̍a̍ dě u̍h we̍, “Dbo̍ chɛ̀ dɔu ǐn Baa nyǐ-a m iě-a nu̍-ɛ, ǐn nu̍ i̍h iě mɔ̀ jě i̍h. I̍h-a jɛwe̍ kɔn tìh mɔ̀-a pɔ̀n ǐn sɔɔ̌ᵻ i̍ tbaɛ-ɛ i̍ ɛ?”

³³ Iě u̍h la̍a̍, “Ɛ̍ se̍ àn dbo̍ chɛ̀ nu̍ tìh à se̍ ìn sɔɔ̌ᵻ i̍ tbaɛ-ɛ i̍ pɔ̀n, jɛ àn Nyɔsoa wɔ̍n blaɛ tìh bo. Ɛ̀wɛ̀ ìn nu̍ wlɔ̀ nyi̍ɔ̍ fɔ̍ɔ̍, iě àn nu̍ àn chɛ̀ Nyɔsoa we̍i̍, ɛ̍ kɔn à pɔ̀n ìn sɔɔ̌ᵻ i̍ tbaɛ-ɛ i̍.”

³⁴ Jusu la̍a̍, “Wlu̍ la Nyɔsoa bla̍-a, wɛ̀ ɔ̍ la̍a̍, ‘Mɔ̀ɔ̍ nyɔsoaᵻ,’ ɛ̍ se̍ chlǐh-ɛ dě mɔ̀-a telě chlǐh-dɛ̍ di̍i̍ ae?

³⁵ Nyɔsoa-a wlu̍ se̍ dǒ wìè-i sà-ɛɛ mu̍. Nyɔ̍ ùh Nyɔsoa-a tu̍owli-a ji̍-a nɔ̌ we̍-ɛ, u̍h bo Nyɔsoa-a chɛ̀-a dǎɛ la̍ nyɔsoaᵻ.

³⁶ Jɛ nɛ̀ mɔ̍ jɔ Baa Nyɔsoa tè-a tɛ̌n wɛ̀ ɔ̍ dbo̍-a nɔ̌ kmɔ̌ we̍-ɛ, nɛ̀ pò na̍ mɔ̍ ɔ̍ Jǔ-ɛ, nɛ̀ dɛ̍ bo ɛ̀ nu̍ ɔ̍ wɔ̍n blaɛ dɛ ǐn nu̍ ɛ?

³⁷ Pò ǐn se̍ ǐn Baa-a dbo̍ nu̍-ɛ, nɛ̀ mɔ̀ bɔ̌ ǐn tìh chɛ̀ po̍-ɛ.

³⁸ Mɔ̀ se̍ ǎn wlu̍ tìh chɛ̀ po̍ gbɛɛ-ɛ, jɛ dbo̍ jɛ ǎn nu̍-aɛ nɔ̀ɔ̍, ɛ̍ bo mɔ̀ kɔn mɔ̀ iě tìh chɛ̀ po̍. Mɔ̀ iě ɛ̍-ɛ i̍ wɔ̌n, wɛ̀ mɔ̀ iě-o dɛ̍ i̍ juo ka ǐn Baa nɛ-a m wɛ̀ ǐn nɛ-a ǐn Baa ke-ɛ.”

³⁹ Sɔ u̍h-a fɔ̀n la̍ dɛ̍ we̍ dɛ u̍h iě ɔ̍ gbɛ̍n. Jɛ Jusu wa̍n dě u̍h kwa̍a̍ i̍.

⁴⁰ Wɛ̀ Jusu mu̍ dě de̍ Jɔɔdɛn nǐ de̍e̍ tà Chɔɔn sàɛ̀-a nyɔ̍ nǐ dlǔ po̍-ɛ i̍-ɛ, dě ɔ̍ tè i̍.

⁴¹ Iě nyɔ̍ dɔu mu̍ dě ɔ̍ we̍. Wɛ̀ u̍h la̍a̍, “Chɔɔn se̍ jbaɛdih po̍ gbɛɛ o, jɛ dɛ̍ᵻ kli̍hgbɛ̍ ɔ̍ sà-a dǒ jɔ̍gbau la pùn-ɛ, tìh-a taǐn bo o.”

⁴² Sɔ nyɔ̍ dɔu gbaɛ ɔ̍ wlùh deě.