Iblu 8 - Ku̍o̍ Delee 1999

Jusu bo ɔ̀ nu̍ à Slaǎ Sà Nyɔ̍-a Dlǔtu

¹ Dɛ̍ à sà-a chɛ̀ gbe̍i̍n-ɛ, ɛ̍-ɛ la. Slaǎ Sà Nyɔ̍-a Dlǔtu kaɛn la bo à blě, wɛ̀ ɔ̍ tè i̍ dě ja̍i̍wlɔ̀ dǒ Tìh-a I̍ Bɛ̌ɛ Nyɔsoa-a nynɛ̌ gbalǎ-a di̍na̍ we̍.

² Ɔ̍-ɔ bo ɔ̀ dbee Nyɔsoa jǔ dě Nyɔsoa-a Wɛɛ Sà Gbò ɛ̀ nu̍-a wɛ̀ɛ̀ sɔ̍n wlù-a gblangbai̍ naɛ-ɛ sɔ̀n. Joi bo ɔ̀ po̍ ɛ̍, wlɔ̀ nyi̍ɔ̍ se̍ ɛ̍ po̍.

³ Slaǎ sà nyɔ̍-a dlǔtuᵻ kli̍hgbɛ̍ tba̍-ɛ chèɛ̀ u̍h iě nyǐ-dɛ̍ᵻ to-ɛ ke slaǎ sà dɛ nu̍ dǒ Nyɔsoa we̍. Ɛ̍ tìh-ɛ, à naɛ Slaǎ Sà Nyɔ̍-a Dlǔtu kɔn ɔ̍ iě dɛ̍ blě ke ɔ̍ iě to.

⁴ Pò ɔ̍ nɛ nɔ̌ bloɔ̍ de-ɛ, nɛ̀ ɔ̍ se̍ slaǎ sà nyɔ̍ nu̍ mu̍ de fu̍u̍. Slaǎ sà nyɔ̍ nɛ wɛ̀, iě u̍h-a to nyǐ-dɛ̍ᵻ ɛ̀ Mose-a telě la̍ u̍h iě-a nu̍-ɛ.

⁵ Tà u̍h-a dbee-a ka Nyɔsoa jǔ-ɛ, ɛ̍ wɔ̀ jɛ nɛ-a dě ja̍i̍wlɔ̀-ɛ. Jɛ i̍h se̍ due nɛ. Ɛ̍ kɔn ti̍ Mose-a ji̍-a wɛ̀ɛ̀ sɔ̍n wlù po̍ la̍-ɛ, wɛ̀ Nyɔsoa sèàɛ̍ ɔ̍ wlùh, ɔ̍ la̍a̍, “Ka ìn nu̍-a ɛ̍ jě-ɛ dě tlu̍h kɛ̍n-ɛ, kǎ ìè ɛ̍ nu̍.”

⁶ Nyɔsoa nu̍ Jusu slaǎ sà nyɔ̍ we̍i̍ ɔ̀ ku̍-a wɔ̍n ɔ̀ sìì-a slaǎ sà nyɔ̍ juh nɛ-a nɔ̌ bloɔ̍-ɛ. Kǎ ɛ̍ nɛ ke. Ku̍o̍ kɔn tùna̍-i-tu̍ Jusu nu̍-a ɛ̀ Nyɔsoa po̍-a dǒ ɔ̍ ke ɔ̍ nyɔ̍ nynɛ̌-ɛ, ɛ̍ nmɔ jii̍ ɛ̍ sìì ku̍o̍ ɛ̀ poe-a dě Mose ja̍a̍-ɛ. Dɛ̍nu̍ɛ, ɛ̍ tba̍ dǒ tɔ̀ma̍a̍ wlu̍ ɛ̀ nmɔ-a jii̍ ɛ̀ sìì-a sàì naɛ kɛ̍n i̍.

⁷ Pò klǐ-dɛ̍ se̍ dǒ ku̍o̍ ɛ̀ poe-a sàǐtòò-ɛ pùn nɛ de-ɛ, nɛ̀ sɔɔ̌n naɛ se̍ kɔn ɛ̍ iě dǒ ɛ̍ wɔ̀ɔ̀ gbǎ-ɛ de.

⁸ Jɛ Nyɔsoa jě ɔ̍ nyɔ̍ laa̍ klǐ-dɛ̍ pùn, ɛ̍ kɔn ɔ̍ la̍a̍, “Mɔ̍ Joi bo ɔ̀ wlu-a. Ɛ̍ mu̍ ti̍ kɔn, wɛ̀ iě ku̍o̍ delee po̍ dǒ ǐn ke Eslɔɛ nyɔ̍ nynɛ̌, ɛ̍ ke dǒ ǐn ke Juuda nyɔ̍ nynɛ̌ ke.

⁹ Ɛ̍ se̍ ku̍o̍ ǐn po̍-a dǒ u̍h baaᵻá baaᵻ we̍-ɛ wɔ̀ mu̍, ti̍ iě-a u̍h kwa̍ blě wɛ̀ iě-a u̍h dě Iche bloa̍ kɛ̍n sà-ɛ. Dɛ̍nu̍ɛ, ku̍o̍ ǐn po̍-a dǒ u̍h ke ǐn ke à nynɛ̌-ɛ, u̍h gblìh ɛ̍ kɛ̍n. Ɛ̍ tìh-ɛ, ǐn sà u̍h dounᵻ we̍ fanfǎn. Mɔ̍ Joi bo ɔ̀ wlu-a.

¹⁰ Ku̍o̍ la ǎn mu̍-a po̍ dě nya̍ dǒ ǐn ke Eslɔɛ nyɔ̍ nynɛ̌-ɛ, ɛ̍-ɛ la. Ǎn mu̍ ǎn telě dǒ u̍h wlùh kɛ̍n po̍, wɛ̀ iě i̍h chlǐh dǒ u̍h pɔluh kɛ̍n. Nɛ̀ ǎn mu̍ u̍h-a Nyɔsoa nu̍, wɛ̀ u̍h iě ǎn nyɔ̍ nu̍.

¹¹ Nɛ̀ nyɔ̍ se̍ ɔ̍ pònyɔ̍ àe̍e̍ ɔ̍ de̍di̍i̍ nǎ po̍ mu̍ dɛ ɔ̍ iě mɔ̍ nu̍-a Joi Nyɔsoa-ɛ juo. Dɛ̍nu̍ɛ, sɔ dě se̍ dɛ̍kɛ̍n gbǎ nyɔ̍ we̍ ìè dɛ̍kɛ̍n gbǎ nyɔ̍ jɛɛ, u̍h kli̍hgbɛ̍-a mu̍ ǐn juo.

¹² Ǎn mu̍ u̍h-a dɛ̍ sɔ̀n-a tìh i̍ tǎli, nɛ̀ u̍h-a gblɛ̍n sɔ̀ɛ̀n-a tìh se̍ dǒ ǐn wlì i̍ sǐ mu̍ dɛ kleǐnklein.”

¹³ Dǒ ku̍o̍ delee-a tìh i̍ sà la̍ bo Nyɔsoa nui sàì naɛ dɛ̍ soa we̍i̍. Nɛ̀ dɛ̍-o-dɛ̍ ɛ̀ gbǎ-a soa i̍ iě ɛ̀ wɛ̀-a wɔ̍n-ɛ, nɛ̀ ɛ̍ tìh-a mu̍ i̍ wɛ̀.