Biblia Todo Logo
Bìoball air-loidhne

- Sanasan -

Iblu 7 - Ku̍o̍ Delee 1999


Mɛokeslɛ nu̍ Nyɔsoa-a slaǎ sà nyɔ̍

1 Mɛokeslɛ la, blǔh baa bo dǒ Selɛn wlɔ̀ we̍, wɛ̀ ɔ̍ nu̍ slaǎ sà nyɔ̍ dǒ Sìì Nyɔ̍ Wɔ̍n Nyɔsoa we̍. Ti̍ Eblaɛɛn-a sɔ-a tu̍h we̍ tà ɔ̍ dbǎ-ɛa blǔh baaᵻ nyìɛ̍-ɛ, Mɛokeslɛ laa̍ bo ɔ̀ jǎɛ ɔ̍ i̍, wɛ̀ ɔ̍ sà-ɛ Eblaɛɛn nǐ wɔ̍n.

2 Wɛ̀ gbɛ̍n-dɛ̍ᵻ kli̍hgbɛ̍-a gbɔ̍ᵻ gbɔ̍ᵻ Eblaɛɛn sà-a dě tu̍h we̍-ɛ, jɛ po̍ i̍h-a pùè-ɛ, nɛ̀ ɔ̍ nyǐ ɛ̍ Mɛokeslɛ. (Mɛokeslɛ-a nynɛ̌ la, ɛ̍ gbɔ̀ nu̍ I̍ Slɛ̌-ɛ Blǔh Baa. Ɔ̍ nynɛ̌ dɛɛ nu̍ Kmɔ̌ I̍ Gbe̍ɛ̍ɛn Blǔh Baa. Dɛ̍nu̍ɛ, ɔ̍ nu̍ Selɛn-a Blǔh Baa. Selɛn-a gbɔ̀ nu̍ Kmɔ̌ I̍ Gbe̍ɛ̍ɛn.)

3 Nyɔ̍ se̍ ɔ̍ de̍ ke ɔ̍ baa ke ɔ̍ wloa̍ nyɔ̍ kli̍hgbɛ̍-a dɛ̍ i̍ juo. Nyɔ̍ wɔ̍ se̍ ɔ̍ wlǔh weɛ̍ ke ɔ̍ mɛ̌ɛ weɛ̍ juo ke. Ɔ̍ wɔ̀ Nyɔsoa-a Jǔ, ɔ̍ nu̍ slaǎ sà nyɔ̍ nɔ̌ kmɔ̌-a kmɔ̌.

4 Jě ka Mɛokeslɛ nu̍-a wɔ̍n ku̍-ɛɛ. Eblaɛɛn jɔ nu̍-a à blǔh baa-ɛ, ɔ̍-ɔ bo ɔ̀ nyǐ ɔ̍ dɛ̍ᵻ kli̍hgbɛ̍ ɔ̍ sà-a dě tu̍h we̍-ɛ i̍h-a pùè naɛ.

5 Liifaɛ-a nynuu̍ ùh nu̍-a slaǎ sà nyɔ̍-ɛ, Nyɔsoa-a telě sèàɛ̍ u̍h wlùh u̍h iě Eslɔɛ nyɔ̍ ùh nu̍-a u̍h-a chɛ̀-a blǐ nyɔ̍-ɛ, u̍h-a dɛ̍ᵻ kli̍hgbɛ̍-a pùè naɛ i̍ gbɛ̍n. Kǎ ɛ̍ nɛ sǔh, jɛ u̍h kli̍hgbɛ̍ nu̍ Eblaɛɛn-a nynuu̍.

6 Mɛokeslɛ se̍ Liifaɛ-a chɛǐ jǔ, jɛ ɔ̍ gbɛ̍n dɛ̍ᵻá pùè naɛ i̍ dě Eblaɛɛn jɔ jě-a Nyɔsoa-a tɔ̀ma̍a̍ wlu̍-ɛ we̍. Wɛ̀ ɔ̍ sà-ɛ Eblaɛɛn nǐ wɔ̍n.

7 Ɛ̍ nɔ̀ɔ̍, tìh-a taǐn bo, nyɔ̍ ɔ̀ nyǐ-a nyɔ̍ pɔ̀ìě-ɛ, nɛ̀ ɔ̍-ɔ bo ɔ̀ ku̍ wɔ̍n dǒ nyɔ̍ ɔ̍ nyǐ-a pɔ̀ìě-ɛ kɛ̍n.

8 Liifaɛ-a nynuu̍ ùh nu̍-a slaǎ sà nyɔ̍ ùh-a gbɛ̍n-a dɛ̍ᵻá pùè naɛ i̍-ɛ, u̍h nɔ̀ɔ̍, u̍h-a mɛ̌-ɛ. Jɛ ɛ̍ chlǐh-ɛ ka Mɛokeslɛ ɔ̀ gbɛ̍n-a dɛ̍ᵻá pùè naɛ i̍ ke-ɛ, ɔ̍ nɔ̀ɔ̍, ɔ̍ nɛ kmɔ̌ ke̍.

9 Nɛ̀ kǎ nyɔ̍-a mu̍ ka dǎ, Liifaɛ-a chɛ̀ ɔ̀ kɔn nynuu̍-a gbɛ̍n-a ka dɛ̍ᵻá pùè naɛ i̍-ɛ, ka Eblaɛɛn to-a i̍h dě Mɛokeslɛ we̍ tɛin-ɛ, nɛ̀ Liifaɛ to i̍h wɛ̀ bo ke.

10 Dɛ̍nu̍ɛ, Mɛokeslɛ ke Eblaɛɛn jiěe sasǎ wɛ̀ Liifaɛ dǔ wlǔh-ɛ dě ɔ̍ baa Eblaɛɛn-a chɛǐ.

11 Dǒ slaǎ sà nyɔ̍ ùh nu̍-a Liifaɛ-a nynuu̍-ɛ dɛ kɛ̍n bo Nyɔsoa poe telě dě Eslɔɛ nyɔ̍ we̍. Nɛ̀ pò slaǎ sà nyɔ̍ ùh nu̍-a Liifaɛ-a nynuu̍-ɛ, pò u̍h-a nu̍-dɛ̍ bɛ̌ɛ nyɔ̍ i̍ slɛ̌-ɛ de-ɛ, nɛ̀ slaǎ sà nyɔ̍ kaɛn dɔɔ ɔ̀ wɔ̀-a Mɛokeslɛ iě ɔ̀ se̍-a Ewlɔn wɔ̀-ɛ, ɔ̍ se̍ kɔn ɔ̍ iě ji̍ dɛ de.

12 Nɛ̀ pò slaǎ sà nyɔ̍ ja la̍-a i̍ bǐi-ɛ, nɛ̀ telě kɔn ɛ̍ iě i̍ bǐi ke.

13 À Joi kɔn tìh Nyɔsoa-a wlu̍ bla̍-aɛ, ɔ̍ nu̍ slaǎ sà nyɔ̍ ka Mɛokeslɛ-ɛ. Ɔ̍ se̍ dě Liifaɛ-a chɛǐ sɔ. Ɔ̍ sɔ dě chɛ̌tu ùh kɔn nyɔ̍-ɔ se̍a slaǎ sà nyɔ̍ nu̍ sàǐtòò-ɛ di̍i̍.

14 Dɛ̍nu̍ɛ, ɛ̍ flɔn we̍i̍ ka à Joi sɔ-a dě Juuda-a chɛǐ-ɛ. Mose se̍ dɛ̍-ɛ sà ke dǒ Juuda-a chɛ̌tu la pùn ti̍ ɔ̍ sà-a slaǎ sà nyɔ̍-a tìh i̍-ɛ.


Slaǎ sà nyɔ̍ dɔɔ wɔ̀ Mɛokeslɛ

15 Ɛ̍ flɔn we̍i̍ ka slaǎ sà nyɔ̍-a nu̍-dɛ̍ se̍-a nyɔ̍ i̍ slɛ̌-ɛ bɛ̌ɛ-ɛ. Slaǎ sà nyɔ̍ dɔɔ ɔ̀ wɔ̀-a Mɛokeslɛ-ɛ, ɔ̍ bo ɔ̀ ji̍.

16 Slaǎ sà nyɔ̍ ɔ̍ nu̍-a ka-ɛ, ɛ̍ se̍ ɔ̍ tè-o telě ɛ̀ la̍ nyɔ̍ iě-a slaǎ sà nyɔ̍-a tloemlai nu̍-ɛ tìh. Jɛ ɔ̍ nui-ɛ slaǎ sà nyɔ̍, dɛ̍nu̍ɛ, gbǐh ɔ̍ blě-aɛ, ɛ̍ sɔ dě feɛ ɛ̀ se̍-a dlǔ i̍ chla la̍ kɔn-ɛ di̍i̍.

17 Ɛ̍ kɔn Nyɔsoa-a wlu̍ la̍a̍, “Mɔ̀ slaǎ sà nyɔ̍ nɔ̌ kmɔ̌-a kmɔ̌, ka slaǎ sà nyɔ̍ Mɛokeslɛ-ɛ.”

18 Telě soa nɔ̀ɔ̍, ɛ̍ sà-aɛ dǒ wìè-i wɛ̀. Dɛ̍nu̍ɛ, ɛ̍ wɛ̀ wɔ̍n iě ɛ̍ se̍ dɛ̍ i̍ blaɛ dɛ.

19 Dɛ̍nu̍ɛ, Mose-a telě se̍ nyɔ̍ i̍ slɛ̌-ɛ bɛ̌ɛ. Jɛ ɔ̀ nu̍-a à wlùh i̍ kɔ̍ dɛ̍ ɔ̀ sìì-a telě-ɛ ɔ̍ wlǔh tà wɛ̀. Ɔ̍-ɔ bo ɔ̀ nɛ kmɔ̌ wɛ̀ à kɔǎɛn ka Nyɔsoa we̍ i̍.

20 Ɛ̍ se̍-o siee, Jusu-a slaǎ sà nyɔ̍ nu̍ dɛ la nɔ̀ɔ̍, Nyɔsoa slɛ̀ɛ̀n dǒ ɛ̍ we̍. Ɔ̍ se̍ ka slɛ̀ɛ̀n-ɛ nu̍ dǒ nyɔ̍ duuh-a slaǎ sà nyɔ̍ nu̍ la̍-a.

21 Jɛ Jusu nɔ̀ɔ̍, slɛ̀ɛ̀n-ɛ nɛ dǒ ɔ̍ slaǎ sà nyɔ̍ nu̍ dɛ de̍e̍. Ɛ̍ kɔn Nyɔsoa la̍a̍ dě ɔ̍ we̍, “Mɔ̍ Joi, ǐn wɔ̀ slɛ̀ɛ̀n wɛ̀, na̍a̍, ‘Mɔ̀ slaǎ sà nyɔ̍ nɔ̌ kmɔ̌-a kmɔ̌.’ Ǐn se̍ wlu̍ gbààn sàɛ̀ mu̍.”

22 Slɛ̀ɛ̀n-ɛ bo ɛ̀ nu̍ ɛ̍ wɛ̀ Jusu to ɛ̍ ka à blě-a ku̍o̍ ɛ̀ sìì-a soa naɛ-ɛ.

23 Slaǎ sà nyɔ̍ nɔ̀ɔ̍-ɛ, u̍h-a mɛ̌-ɛ, ɛ̍ kɔn u̍h-u sie dbo̍ laa̍ kɛ̍n. Ɛ̍-ɛ bo ɛ̀ nu̍ ɛ̍ wɛ̀ u̍h tìè i̍.

24 Jɛ Jusu naɛ slaǎ sà nyɔ̍ nu̍-ɛ nɔ̀ɔ̍, ɛ̍-ɛ sɔ ɔ̍ kwa̍a̍, dɛ̍nu̍ɛ, ɔ̍ nɛ kmɔ̌ kleǐnklein.

25 Ɛ̍ tìh-ɛ, nyɔ̍ ùh-a ji̍-a Nyɔsoa we̍ dě ɔ̍ ja̍a̍-ɛ, ɔ̍ bɛ̌ɛ u̍h pǔh-iɛ kaka ke ti̍ kli̍hgbɛ̍ we̍. Dɛ̍nu̍ɛ, ɔ̍ nɛ kmɔ̌ kleǐnklein ɔ̍ iě Nyɔsoa gbòɛ̀ i̍ bla̍-ɛ dǒ u̍h-a tàà.

26 Jusu laa̍ bo ɔ̀ nu̍ ka Slaǎ Sà Nyɔ̍-a Dlǔtu à kɔn à iě blě. Ɔ̍ wɛ̀ nɛi̍. Nyɔ̍ se̍ ɔ̍ kɔ̌-ɛ nynɛ̌ blě, ɔ̍ se̍ gblɛ̍n sɔ̀ɛ̀n nu̍. Ɔ̍ tè-ɛ pɔ̌ dě gblɛ̍n sɔ̀ɛ̀n nyɔ̍ nynɛ̌, iě ɔ̍ dǔ-iɛ ja̍i̍ dě ja̍i̍wlɔ̀.

27 Ɔ̍ se̍ slaǎ sà nyɔ̍-a dlǔtuᵻ duuh wɔ̀. Ɔ̍ nɔ̀ɔ̍, ka sɔ̀n-a sɛ̀n-aɛ, ɔ̍ se̍ kɔn ɔ̍ iě slaǎ-a sà. Ka juh laa̍ u̍h-a sà-a u̍h-a chɛ̀-a gblɛ̍n sɔ̀ɛ̀n-a slaǎ sasǎ iě u̍h-a sà-a nyɔ̍ duuh naɛ-ɛ, ɔ̍-ɔ nu̍ la̍a̍n. Jɛ ɔ̍ nɔ̀ɔ̍, slaǎ due bo ɔ̍ sà sǔh kleǐn, ɛ̍-ɛ bo ɛ̀ nu̍-a ɔ̍ chɛ̀ ɔ̍ to-a.

28 Telě-a tba̍ wlɔ̀ nyɔ̍ ùh kɔn gbǐh-a nu̍-a sɔɔn-ɛ chèɛ̀ u̍h iě slaǎ sà nyɔ̍-a dlǔtuᵻ nu̍. Jɛ Nyɔsoa-a slɛ̀ɛ̀n wlu̍ ji̍-a telě kɛ̍n i̍-ɛ, ɛ̍ tba̍ Jǔ ɔ̀ bɛ̌ɛ-a Nyɔsoa-a wlùh nu̍-ɛ nɔ̌ kmɔ̌-a kmɔ̌-ɛ chèɛ̀, ɔ̍ iě Slaǎ Sà Nyɔ̍-a Dlǔtu nu̍.

The New Testament in Western Krahn published as KU̍O̍ DELEE © The Bible Society in Liberia, 1999.

Bible Society in Liberia
Lean sinn:



Sanasan