Iblu 6 - Ku̍o̍ Delee 1999

¹ Nɛ̀ɛ̍, mɔ̀ à sà bu̍h de̍ à iě cheǎn-dɛ̍ᵻá bloɔ̍ i̍ bloɔ̍ i̍ jih tba̍-a dǒ Klai pùn i̍-ɛ de̍ poe, à iě ku̍ dě i̍h cheǎn-a di̍i̍. Mɔ̀ à bɔ̌ dɛ̍ᵻ à cheǎn-a sàì-ɛ i̍h nɛ due cheǎn-a sǔh, i̍h bo ìh nu̍-a pɔ̀ɔ̍pìe̍ dɛ̍ᵻ kɛ̍n i̍ poe-ɛ ke, Nyɔsoa wlùh gbaɛ ke,

² nǎ po̍-ɛ dǒ nǐ dlǔ po̍-ɛ gbɔ̍ᵻ gbɔ̍ᵻ we̍ ke, nyɔ̍ sɔ̍n dlǔ tè-ɛ ke, mɛ̌-nyɔ̍-ae wlǔh-ɛ ke, sàwi̍h sì-ɛ ɛ̀ se̍-a siee la̍ kɔn-ɛ ke.

³ Pò Nyɔsoa wɔ̌ɛn ɛ̍ kɛ̍n i̍-ɛ, nɛ̀ à mu̍ bu̍h de̍ sà.

⁴ Nyɔ̍ ùh sɔ-a dǒ Nyɔsoa-a wìè kɛ̍n-ɛ, nɛ̀ nyɔ̍ se̍ ɛ̍ nu̍-ɛ bɛ̌ɛ dɛ u̍h iě i̍ bǐi wɛ̀ u̍h iě u̍h-a gblɛ̍n sɔ̀ɛ̀n kɛ̍n i̍ poe. Dɛ̍nu̍ɛ, u̍h nɛ dě Nyɔsoa-a sɔ̀npli di̍i̍ sàì, iě u̍h juo dɛ̍ ɔ̍ nyǐ-a nyɔ̍-ɛ. U̍h jě ɔ̍ Sùù,

⁵ iě u̍h juo Nyɔsoa-a wɔ̍n nmɔ wlu̍. Wɛ̀ kmɔ̌ jɛ mu̍-a ji̍-ɛ, iě u̍h juo ɛ̍ gbǐh.

⁶ Wɛ̀ u̍h sɔ dǒ ɔ̍ wìè kɛ̍n, nɛ̀ nyɔ̍ se̍ ɛ̍ nu̍-ɛ bɛ̌ɛ dɛ u̍h iě i̍ bǐi. Dɛ̍nu̍ɛ, ɛ̍ wɔ̀ ka u̍h kɔ̍ Nyɔsoa-a Jǔ dǒ gbaɛ kɛ̍n i̍ tu̍ wlì dode̍ dǒ u̍h-a chɛ̀-a sɔ̍nᵻ we̍, iě u̍h po̍ ɔ̍ nynɛ̌ ja̍a̍i̍ dǒ wlɔ̀gbàɛ̀.

⁷ Nyɔsoa-a nyǐ blǔh ɛ̀ kɔn kɛ̍n nǐ-a dba̍-ɛa chɛ̍chɛ̍-ɛ pɔ̀ìě. Pò ɛ̍ pa̍ nǐ-ɛ, iě tù-dɛ̍ᵻá tlo dǒ ɛ̍ kɛ̍n, wɛ̀ i̍h-a gbǎ ùh tù-a i̍h-ɛ we̍.

⁸ Jɛ blǔh ɛ̀ kɔn kɛ̍n wiǎᵻ ke pei-a wlǔh-aɛ, nɛ̀ pɔ̀ɔ̍pìe̍ blǔh bo. Nɛ̀ ɛ̍ wlu̍we̍i̍ po̍-ɛ se̍ we̍ tɛn dɛ. Ɛ̍ mu̍ si̍n.

⁹ À tìh kma nyɔ̍, pò à jɛ ja ka wlu-ɛ nu̍-ɛ, nɛ̀ jii̍ nmɔ dɛ̍ᵻ ìh kɔ̍-a dǒ mɔ̀-a pǔh-ɛ kɛ̍n i̍-ɛ, à kui i̍h wlùh kɛ̍n i̍.

¹⁰ Nyɔsoa-a nu̍-dɛ̍ slɛ̌ i̍. Ɔ̍ se̍ mɔ̀-a nu̍-dɛ̍ᵻ we̍ mǎle. Mɔ̀ tù ɔ̍ tìh iě mɔ̀ gba̍ ɔ̍ nyɔ̍ jbɛɛ we̍ mɔ̀ iě u̍h we̍ gbǎ, iě mɔ̀-a gbǎ u̍h we̍ ke̍.

¹¹ Ɛ̍ tìh-ɛ, à pɔ̀n mɔ̀-a jɔ-ɛ, ɔ̍ iě ɛ̀ la gbǐh i̍ gbɛ̍n-ɛ te̍e̍ wɛ̀ ti̍ iě dlǔ i̍ chlà. Dɛ̍ mɔ̀ tba̍-a wlùh i̍-ɛ, nɛ̀ mɔ̀-a mu̍ ɛ̍ juo te̍kle̍e̍ ka mɔ̀-a mu̍-a ɛ̍ jě-ɛ.

¹² À se̍ pɔ̀n mɔ̀ iě plǔh nu̍. Jɛ nyɔ̍ ùh blě-a wlùh gbaɛ iě ùh gbɛ̍n-a wlùh i̍ ùh jě-a dɛ̍ kɔn wlu̍ Nyɔsoa po̍-a tɔ̀ma̍a̍-ɛ, u̍h kɔn wɔ̀ɔ̀ mɔ̀ iě-e i̍ sà.

Nyɔsoa-a tɔ̀ma̍a̍ wlu̍-a sǐ wìè-i

¹³ Ti̍ Nyɔsoa iě-a wlu̍ tɔ̀ma̍a̍ po̍ dǒ Eblaɛɛn we̍-ɛ, ɔ̍ slɛ̀ɛ̀n sasǎ ka ɔ̍ mu̍-a ɛ̍ nu̍-ɛ. Jɛ ka wɔ̍n ku̍ nyɔ̍ dɔɔ se̍-a dǒ ɔ̍ de̍e̍ nɛ-ɛ, ɛ̍ kɔn ɔ̍ slɛ̀ɛ̀n ɔ̍ chɛ̀-a nynɛ̌.

¹⁴ Ɔ̍ la̍a̍, “Ǎn mu̍ ìn pɔ̀ìě nyǐ gbɔ̀gbɔ̀, wɛ̀ iě ɛ̍ nu̍ ìè tloemlai dɔu blě.”

¹⁵ Sɔ Eblaɛɛn gbɛ̍n wlùh i̍. Ɛ̍ kɔn ɔ̍ jě dɛ̍ kɔn wlu̍ Nyɔsoa po̍-a tɔ̀ma̍a̍-ɛ.

¹⁶ Ɔ̀ ku̍-a wɔ̍n dǒ nyɔ̍ kɛ̍n-ɛ, ɔ̍ kɔn nynɛ̌ nyɔ̍-a slɛ̀ɛ̀n. Slɛ̀ɛ̀n-ɛ bo ɛ̀ chlà wɔ̍i̍n sà-a kli̍hgbɛ̍ dlǔ i̍.

¹⁷ Nyɔ̍ ùh kɔn tìh Nyɔsoa po̍-a wlu̍ tɔ̀ma̍a̍-ɛ, ka ɔ̍ se̍-a ɔ̍ wlùh i̍ bǐi mu̍-ɛ, ɔ̍ pɔ̀n ɛ̍ iě we̍i̍ flɔn kaa̍ ɛ̍ kɔn ɔ̍ slɛ̀ɛ̀n dɛ dǒ ɛ̍ de̍e̍.

¹⁸ Nyɔsoa-a tɔ̀ma̍a̍ wlu̍ ke ɔ̍ slɛ̀ɛ̀n-ɛ la i̍h se̍-e i̍ bǐi la̍ kɔn. I̍h bo Nyɔsoa to ka ɔ̍ se̍-a si̍h tmɔ̌-ɛ bɛ̌ɛ-ɛ. Sɔ nɛ̀ àɔ̀ juh à ple̍-a wɛ̀ à ji̍-a ɔ̍ we̍ ɔ̍ iě-a à we̍ gbǎ-ɛ, nɛ̀ ɛ̍ fùka à wlùh wɛ̀ kaa̍ à iě wlùh i̍ kɔ̍ dɛ̍ pɛ̌n-a dǒ à jǔ i̍-ɛ i̍ gbɛ̍n klìmàtàìn.

¹⁹ Wlùh i̍ kɔ̍ dɛ̍ la bo à blě iě à ku̍ i̍ kaa̍ ka niɔ̍ mɛɛ̍ po̍ du̍a̍ iě ɛ̍ ku̍ ja̍i̍-ɛ. Jusu bo ɔ̀ nu̍ wlùh i̍ kɔ̍ dɛ̍ la. Nyɔsoa-a slaǎ sà gbò nɛ-a dě ja̍i̍wlɔ̀-ɛ, ɔ̍-ɔ bo ɔ̀ pa̍ dě ɛ̍ gbòju di̍i̍ dě ɛ̍ gbò wɔ̍i̍n po̍ jliɛ̍ de̍e̍.

²⁰ Jusu mu̍ à jǔ iě ɔ̍ pa̍ dě gbòju laa̍ di̍i̍ dǒ à tàà. Wɛ̀ ɔ̍ nu̍ ka slaǎ sà nyɔ̍-a dlǔtu nɔ̌ kmɔ̌-a kmɔ̌, ka slaǎ sà nyɔ̍ Mɛokeslɛ-ɛ.