Iblu 5 - Ku̍o̍ Delee 1999

¹ Slaǎ sà nyɔ̍-a dlǔtu-a tba̍-ɛ chèɛ̀ dě ɔ̍ blǐ nyɔ̍ nynɛ̌ ɔ̍ iě Nyɔsoa jǔ dbee dǒ u̍h-a tàà. Wɛ̀ ɔ̍ to nyǐ-dɛ̍ᵻ, iě ɔ̍ sà slaǎ dǒ gblɛ̍n sɔ̀ɛ̀n-a tìh i̍ tǎli-ɛ we̍.

² Ka dɛ̍ᵻ dɔu-a nu̍-a ɔ̍ gbǐh-a sɔɔn ke-ɛ, nɛ̀ ɔ̍ bɛ̌ɛ gba̍n gbɛ̍n-ɛ sǔh dǒ nyɔ̍ ùh se̍-a dɛ̍ jlǐh juo ùh-a nu̍-a klǐ-dɛ̍ᵻɛ́ we̍.

³ Ka ɔ̍ gbǐh-a nu̍-a sɔɔn-ɛ, nɛ̀ ɛ̍ se̍ nyɔ̍ duuh-a gblɛ̍n sɔ̀ɛ̀n-a tìh nɛ due ɔ̍ se̍ slaǎ sà. Jɛ nɛ̀ ɔ̍ chɛ̀ naɛ-a tìh bo ɔ̍ kɔn ɔ̍ iě slaǎ sà ke.

⁴ Nyɔ̍-ɔ dǔ nyɔ̍-a chɛ̀-ɛ, wɛ̀ nɛ̀ nu̍ àn chɛ̀ slaǎ sà nyɔ̍-a dlǔtu ɔ̀ kɔn nynɛ̌ bɛ̌-ɛa i̍-ɛ we̍i̍. Nyɔsoa due gbài̍ ɔ̀ dǎ nyɔ̍-ɛ, wɛ̀ nyɔ̍-a nu̍ dlǔtu, ɛ̍-ɛ bo ɛ̀ nɛ-a Ewlɔn pùn.

⁵ Kǎ ɛ̍ nu̍ nɛ-ɛ ke dǒ Klai we̍. Ɔ̍ se̍ ɔ̍ chɛ̀ ja̍i̍ dǔ ɔ̍ iě slaǎ sà nyɔ̍-a dlǔtu nu̍. Jɛ Nyɔsoa bo ɔ̀ la̍a̍ dě ɔ̍ we̍, “Mɔ̀ ǎn Jǔ, sɔ da̍a sèàn blǐ mɔ̍ ìn Baa wɛ̀.”

⁶ Kǎ Nyɔsoa dǎ ka dɛ, ɔ̍ la̍a̍, “Mɔ̀ slaǎ sà nyɔ̍ nɔ̌ kmɔ̌-a kmɔ̌, ka slaǎ sà nyɔ̍ Mɛokeslɛ-ɛ.”

⁷ Ti̍ Jusu nɛ-a nɔ̌ bloɔ̍-ɛ ɔ̍ ba̍le-e, iě ɔ̍ wǐ ɔ̍ tèle Nyɔsoa i̍ dǒ fìn-wlu̍ we̍. Dɛ̍nu̍ɛ, Nyɔsoa bo ɔ̀ bɛ̌ɛ ɔ̍ mɛ̌ɛ wɔ̍i̍n sèìe-ɛ. Nyɔsoa wɔ̌n ɔ̍ wlu̍, dɛ̍nu̍ɛ, ɔ̍ ja ɔ̍ chɛ̀ wlù iě ɔ̍ fòè ɔ̍ we̍.

⁸ Nyɔsoa-a Jǔ bo nɔ̀ɔ̍ gbɛɛ, jɛ dě jua̍i̍ sàɛ̀ di̍i̍ bo ɔ̍ cheǎn-ɛ Nyɔsoa-a wlu̍ nu̍-ɛ.

⁹ Ti̍ ɔ̍ wɛ̀-a nɛi̍ dě jua̍i̍ sàɛ̀ di̍i̍-ɛ, iě ɔ̍ dǔ ka nyɔ̍ ɔ̀ pǔh-ia nyɔ̍ iě ɔ̀ nyǐ-a nyɔ̍ kmɔ̌ sie feɛ-ɛ nu̍-ɛɛ dǒ nyɔ̍ kli̍hgbɛ̍ ùh-a nu̍-a ɔ̍ wlu̍-ɛ we̍.

¹⁰ Wɛ̀ Nyɔsoa la̍a̍, “Mɔ̀ slaǎ sà nyɔ̍-a dlǔtu ka Mɛokeslɛ-ɛ.”

Mɔ̀ bɔ̌ mɔ̀-a wlùh gbaɛ i̍ tǎli-ɛ

¹¹ À blě dɛ̍ dɔu à iě-e sà dǒ slaǎ sà nyɔ̍-a dlǔtu nu̍ dɛ la pùn. Jɛ mɔ̀ slɛ̍nbo dounᵻ i̍, nɛ̀ ɛ̍ kma we̍ i̍ sèàɛ̍-ɛ.

¹² Ti̍ nɛ-o wɛ̀ ke de mɔ̀ iě nǎ po̍ nyɔ̍ nu̍, jɛ nyɔ̍ kɔn u̍h iě mɔ̀ Nyɔsoa-a wlu̍-a bloɔ̍ i̍ bloɔ̍ i̍ naɛ toe ke̍. Mɔ̀ nɛ dǒ di̍-dɛ̍ᵻ klaklǎ di̍ la̍-a wɛ̀ de, jɛ mɔ̀ kɔn mɔ̀ iě nyɛnɛ nyǎ ke̍.

¹³ Nyɔ̍-o-nyɔ̍ ɔ̀ nyǎ-a nyɛnɛ-ɛ, nɛ̀ jǔpliɛ bo ke̍. Nɛ̀ ɔ̍ se̍ dɛ̍ ɛ̀ slɛ̌-a i̍-ɛ juo.

¹⁴ Di̍-dɛ̍ᵻ klaklǎ kɔn dǒ nyɔ̍ klaaᵻ ùh ju̍o̍e-a dɛ̍ chɛ̀ ke dɛ̍ sɔ̀n-a sèàɛ̀gbàà we̍ i̍-ɛ we̍.