Iblu 4 - Ku̍o̍ Delee 1999

¹ Kaka la̍, Nyɔsoa po̍ wlu̍ tɔ̀ma̍a̍ à iě dě fɔla ɔ̍ mu̍-a à nyǐ-ɛ nyni̍. Ɛ̍ tìh-ɛ, mɔ̀ à nu̍ nɛnɛ̌ wɛ̀ mɔ̀-a nyɔ̍-ɔ se̍-e i̍ sǐ.

² Ka à nu̍-a Nyɔsoa-a pɔ̀n chɛ̀ wɔ̌n-ɛɛ, kǎ à baaᵻ nu̍ ɛ̍ wɔ̌n-ɛ ke de. Jɛ ɛ̍ se̍ dɛ̍ chɛ̀ nu̍ dǒ u̍h we̍, dɛ̍nu̍ɛ, u̍h wɔ̌n-a tu̍owli la-ɛ, iě u̍h se̍ ɛ̍ wlùh gbaɛ i̍ gbɛ̍n-ɛ.

³ Àɔ̀ juh blě-a wlùh gbaɛ-ɛ, à mu̍ dě fɔla laa̍ i̍ sǐ. Dɛ̍ Nyɔsoa bla̍-aɛ, ɛ̍-ɛ la. Ɔ̍ la̍a̍, “Ǐn gbǎ jlu̍h-u wɛ̀ ǐn slɛ̀ɛ̀n, na̍a̍, ‘U̍h se̍ gba̍ dě fɔla ǐn nyǐ-a u̍h-ɛ i̍ sǐ.’ ” Ɔ̍ bla̍ ɛ̀ la nɔ̀ɔ̍ gbɛɛ, jɛ nɛ̀ ɔ̍ wɔ̀ dɛ̍ᵻ kli̍hgbɛ̍ gba̍a̍ po̍-ɛ wɛ̀ sɔ dǒ ti̍ ɔ̍ nu̍-a kmɔ̌ la-a we̍.

⁴ Kǎ ɛ̍ nu̍ ka chlǐh-ɛ dě Nyɔsoa-a wlu̍ di̍i̍ dǒ weɛ̍ ɛ̀ po̍-a mɛ̀sɔɔ̌n-ɛ pùn, ɛ̍ la̍a̍, “Nyɔsoa nu̍ ɔ̍ dbo̍ kli̍hgbɛ̍, wɛ̀ ɔ̍ fɔ dǒ weɛ̍ ɛ̀ po̍-a mɛ̀sɔɔ̌n-ɛ di̍i̍.”

⁵ Kǎ ɛ̍ dǎ ka dɛ, ɛ̍ la̍a̍, “U̍h se̍ gba̍ dě fɔla ǐn nyǐ-a u̍h-ɛ i̍ sǐ.”

⁶ À baaᵻ wɔ̌n pɔ̀n chɛ̀ laa̍ de, jɛ u̍h-a se̍ Nyɔsoa-a wlu̍ nu̍ bo ɛ̀ nu̍ ɛ̍ iě u̍h se̍ dě fɔla laa̍ i̍ sǐ. Jɛ nyɔ̍ duuh nɛ-o u̍h-a mu̍ deě i̍ sǐ.

⁷ Nyɔsoa tba̍ ti̍ dɛɛ chèɛ̀ dode̍ ɛ̀ ɔ̍ dǎɛ-a “Sèàn-ɛ.” Sɔ̀nᵻ dɔu sì-aɛ, iě ɔ̍ la̍a̍ dě ɔ̍ tu̍owli po̍ nyɔ̍ Depe ja̍a̍, “Pò mɔ̀ wɔ̌n Nyɔsoa-a wlu̍ sèàn-ɛ, nɛ̀ mɔ̀ bɔ̌ mɔ̀ baaᵻá dɛ̍ nu̍-ɛ. Mɔ̀ bɔ̌ dlǔ ku̍-ɛ.”

⁸ Dě fɔla laa̍, pò ɛ̍ tù-e mɔ Jasua iě nyɔ̍ laa̍ gba̍ de-ɛ, nɛ̀ Nyɔsoa se̍ ti̍ dɛɛ-a tìh i̍ sà mu̍ dɛ de.

⁹ Nɛ̀ɛ̍, fɔla nɛ-ɛ ke̍ kleǐn dǒ Nyɔsoa-a nyɔ̍ we̍. Ɛ̍ ke fɔ-weɛ̍ Nyɔsoa-a fɔ-ɛa wɔ̀ɛ.

¹⁰ Nyɔ̍ jɔ mu̍-a dě fɔla Nyɔsoa-a nyǐ-a nyɔ̍-ɛ i̍ sǐ-ɛ, nɛ̀ ka Nyɔsoa nu̍-a fɔ-ɛ dǒ ɔ̍ dbo̍ i̍ wɔ̀ la̍-aɛ, nɛ̀ kǎ ɔ̍ mu̍ nu̍ ke.

¹¹ Ɛ̍ tìh-ɛ, mɔ̀ à po̍-e gbǐh à iě dě fɔla laa̍ i̍ sǐ, wɛ̀ à-a je̍e se̍ Nyɔsoa-a wlu̍ nu̍ nyɔ̍-a dɛ̍ nu̍, à-a je̍e dǒ Nyɔsoa-a wìè kɛ̍n sɔ.

¹² Nyɔsoa-a wlu̍ tè kmɔ̌ i̍, iě ɛ̍ nu̍ dɛ̍ᵻ i̍. Ɛ̍ nmǎ-ɛ ɛ̍ sìì plàn chlɛ̀n. Ɛ̍ juo nyɔ̍-a wlùh kli̍hgbɛ̍ we̍ i̍ ka plàn chlɛ̀n tba̍ dě nyɔ̍ di̍i̍-ɛ. Ɛ̍ bo ɛ̀ chlɛ̌ nyi̍ɔ̍-a wlùh-a pɔ̀n-dɛ̍ᵻ ke wlùh i̍ naɛ dɛ̍ᵻ we̍ i̍.

¹³ Dɛ̍ᵻ kli̍hgbɛ̍ nɛ-a da̍a kmɔ̌ la we̍-ɛ, i̍h-a dɛ̍ se̍ Nyɔsoa jii̍ sìle. Dɛ̍ᵻ kli̍hgbɛ̍ flɔn kɛ̍n i̍ te̍gbe̍i̍n dǒ Nyɔsoa jlǐhwai ɔ̀ kɔn jǔ à mu̍-a à chɛ̀-a tìh we̍ i̍ sèàɛ̍-ɛ.

Jusu nu̍ Slaǎ Sà Nyɔ̍-a Dlǔtu

¹⁴ Wlùh gbaɛ blě tìh à sà-aɛ, mɔ̀ à gbɛ̍n ɛ̍ i̍ klìmàtàìn, dɛ̍nu̍ɛ, à blě Slaǎ Sà Nyɔ̍-a Dlǔtu ɔ̀ ku̍-a wɔ̍n-ɛ. Nyɔsoa-a Jǔ Jusu ɔ̀ mu̍-a dě ja̍i̍wlɔ̀ wɛ̀-ɛ bo.

¹⁵ Slaǎ Sà Nyɔ̍-a Dlǔtu à blě-aɛ, pò à gbǐh ja sɔɔn nu̍-ɛ, nɛ̀ ɛ̍ chlɛ̌n-ɛ ɔ̍ wlùh. Dɛ̍nu̍ɛ, ka Kǔ-a nu̍-a à blu̍ja̍a̍ po̍-ɛɛ, kǎ ɛ̍ nu̍ ɔ̍ blu̍ja̍a̍ po̍-ɛ i̍ pɔ̀n-ɛ ke de tà kli̍hgbɛ̍. Jɛ ɔ̍ se̍ gblɛ̍n sɔ̀ɛ̀n dɛ̍wɛ-a chɛ̀ nu̍.

¹⁶ Ka ɛ̍ nɛ-a ka-ɛ, mɔ̀ à ku̍ di̍i̍ i̍ à iě Nyɔsoa ɔ̀ nɛ-a blɛ-ɛ, ɔ̍ nynɛ̌ gbalǎ wlì mu̍. Wɛ̀ ɔ̍ iě à wɔɛ jě ɔ̍ iě blɛ nɛ dǒ à we̍, wɛ̀ ɛ̍ iě à we̍ gbǎ pò à nɛ we̍ gbǎ ka̍-ɛ.