Iblu 3 - Ku̍o̍ Delee 1999

Jusu-a wɔ̍n ku̍-ɛ sìì Mose naɛ

¹ Nɛ̀ɛ̍, ǐn de̍di̍i̍ᵻ, mɔ̀ɔ̍ Nyɔsoa dǎ-a dě ɔ̍ dɛ di̍i̍ iě ɔ̍ tè-ea pɔ̌-ɛ, mɔ̀ fèàɛ̀ mɔ̀-a wlùh dě Jusu we̍. Ɔ̍-ɔ bo ɔ̀ nu̍ Gba̍tòà ke Slaǎ Sà Nyɔ̍-a Dlǔtu ɔ̀ gbǎ-a à we̍ dě à wlùh gbaɛ blě-ɛ di̍i̍-ɛ.

² Jusu nu̍ wlì tè nyɔ̍ dǒ Nyɔsoa ɔ̀ tba̍-a ɔ̍ chèɛ̀-ɛ we̍, ɛ̀ kɔn ba̍ Mose nu̍-a wlì tè nyɔ̍ nu̍-ɛ dě Nyɔsoa nyɔ̍ nynɛ̌-ɛ.

³ Nyɔ̍ ɔ̀ po̍-a gbò-ɛ, ɔ̍ bo ɔ̀ po̍-eɛ tìhwe̍ ɛ̀ sìì gbò-a chɛ̀. Ɛ̍ kɔn ba̍ bo ke, nyɔ̍ɔ kɔn u̍h iě Jusu-a nynɛ̌ i̍ bɛ̌-ɛ ɛ̍ iě Mose naɛ sìì.

⁴ Kǎ ɛ̍ nɛ, gbò jɛ-ɛ nɛ̀ ɛ̍ kɔn po̍-nyɔ̍. Jɛ dɛ̍ᵻ kli̍hgbɛ̍ Nyɔsoa bo ɔ̀ po̍ i̍h nɔ̌ kmɔ̌.

⁵ Mose bo ɔ̀ nu̍ wlì tè nyɔ̍ dě ɔ̍ pòi̍ju nu̍-ɛ di̍i̍ dě Nyɔsoa nyɔ̍ kli̍hgbɛ̍ nynɛ̌. Wɛ̀ dɛ̍ᵻ ìh Nyɔsoa-a mu̍-a bla̍ dě nya̍-ɛ, wɛ̀ Mose iě i̍h-i sà.

⁶ Jɛ Klai bo ɔ̀ nu̍ Nyɔsoa-a wlì tè Jǔ, iě ɔ̍ nu̍ Nyɔsoa nyɔ̍-a Dlǔtu. Pò à gbɛ̍n-ɛ à di̍i̍ i̍ ku̍-ɛ sɔ̍nᵻ sɔɔ̌n i̍, wɛ̀ à iě à wlùh i̍ kɔ̍ dɛ̍-a bu̍hᵻ wlù i̍ po̍-ɛ, nɛ̀ àɔ̀ bo à nu̍ Nyɔsoa-a nyɔ̍.

Nyɔsoa nyɔ̍-a mu̍ fɔ

⁷ Nɛ̀ɛ̍, kǎ Nyɔsoa-a Sùù dǎ ka, ɛ̍ la̍a̍, “Pò mɔ̀ wɔ̌n Nyɔsoa-a wlu̍ sèàn-ɛ,

⁸ nɛ̀ mɔ̀ bɔ̌ mɔ̀ baaᵻá dɛ̍ nu̍-ɛ. Mɔ̀ bɔ̌ dlǔ ku̍-ɛ. U̍h tbaɛ Nyɔsoa bu̍hᵻ i̍ tɛin dě kwlǎslò we̍, iě u̍h tɛ̀n ɔ̍ i̍ dǒ weɛ̍ laa̍ di̍i̍.

⁹ Nyɔsoa la̍a̍, ‘Dě u̍h tɛ̀n-ɛ m, u̍h iě dě ǐn de̍e̍ i̍ jě. Jɛ nɛ̀ kǎ u̍h-a jě dɛ̍ᵻ ǎn nu̍-aɛ ke sǔh dǒ sɔ̀nᵻá kwela nyìɛ̍ (40) di̍i̍.

¹⁰ Ɛ̍ kɔn ǐn gbǎ-ɛ nyɔ̍ la jlu̍h-u, wɛ̀ na̍a̍, “U̍h-a nu̍ klǐ-dɛ̍ᵻ ma̍u̍, iě u̍h-u nu̍ ǎn wlùh.”

¹¹ Ǐn gbǎ jlu̍h-u wɛ̀ ǐn slɛ̀ɛ̀n, na̍a̍, “U̍h se̍ gba̍ dě fɔla ǐn nyǐ-a u̍h-ɛ i̍ sǐ.” ’ ”

¹² Nɛ̀ɛ̍, ǐn de̍di̍i̍ᵻ, mɔ̀ nu̍ nɛnɛ̌ mɔ̀-a nyɔ̍ je̍e wlùh sɔ̀n blě wɛ̀ ɔ̍-ɔ se̍-e wlùh gbaɛ blě, ɔ̍-ɔ je̍e dǒ kmɔ̌ nɛ Nyɔsoa-a wìè kɛ̍n sɔ.

¹³ Jɛ ka sɔ̀n-a sɛ̀n-aɛ kǎ mɔ̀ iě wlùh we̍ fùka-ɛ ka ɛ̍ nu̍-a sèàn ke̍-ɛ, wɛ̀ gblɛ̍n sɔ̀ɛ̀n je̍e mɔ̀-a nyɔ̍ i̍ boe, iě ɔ̍-ɔ je̍e dlǔ ku̍.

¹⁴ Pò di̍i̍ i̍ ku̍-ɛ due à blě-a sɔ dǒ ti̍ à gbaɛ-a Klai wlùh-ɛ we̍-ɛ, pò à gbɛ̍n ɛ̍ i̍ klìmàtàìn te̍e̍ wɛ̀ à kmɔ̌ iě dlǔ i̍ chla-ɛ, nɛ̀ à ke Klai-a nu̍ dbo̍ due.

¹⁵ Kǎ Nyɔsoa-a wlu̍ dǎ ka, ɛ̍ la̍a̍, “Pò mɔ̀ wɔ̌n Nyɔsoa-a wlu̍ sèàn-ɛ, nɛ̀ mɔ̀ bɔ̌ mɔ̀ baaᵻá dɛ̍ nu̍-ɛ. Mɔ̀ bɔ̌ dlǔ ku̍-ɛ. U̍h tbaɛ Nyɔsoa bu̍hᵻ i̍ tɛin.”

¹⁶ Nyɔ̍ bo ùh wɔ̌n Nyɔsoa-a wlu̍ wɛ̀ ùh tbaɛ ɔ̍ bu̍hᵻ i̍ ɛ? Nyɔ̍ kli̍hgbɛ̍ ùh Mose sà-a dě Iche bloa̍ kɛ̍n-ɛ bo.

¹⁷ Nyɔ̍ bo Nyɔsoa gbǎ-ɛ jlu̍h dǒ sɔ̀nᵻá kwela nyìɛ̍ (40) di̍i̍ ɛ? Ùh nu̍-a gblɛ̍n sɔ̀ɛ̀n-ɛ bo, iě u̍h mɛ̌ dě kwlǎslò we̍.

¹⁸ Nyɔ̍ kɔn tìh bo Nyɔsoa slɛ̀ɛ̀n wɛ̀ ɔ̍ la̍ u̍h se̍ gba̍ dě fɔla ɔ̍ nyǐ-a u̍h-ɛ i̍ sǐ mu̍ ɛ? Ùh se̍-a ɔ̍ wlu̍ nu̍-ɛ bo.

¹⁹ Ka u̍h se̍-a deě i̍ sǐ-ɛ bɛ̌ɛ-ɛ, à jě ɛ̍ wɛ̀, dɛ̍nu̍ɛ, u̍h se̍ wlùh gbaɛ blě.