Iblu 2 - Ku̍o̍ Delee 1999

Nu̍ nɛnɛ̌ nɛ̀ je̍e tàmlain gbǎ-ɛ

¹ Nɛ̀ɛ̍, dɛ̍ à wɔ̌n-aɛ, mɔ̀ à gbɛ̍n-ɛ ɛ̍ sɔ̍nᵻ sɔɔ̌n i̍ wɛ̀ à-a je̍e tàmlain gbǎ-ɛ.

² Tu̍owli ɛ̀ Nyɔsoa-a ǐnchɔ̀ ja-a tɛin-ɛ, ɛ̍ nu̍ gblangbai̍. Nɛ̀ nyɔ̍-o-nyɔ̍ ɔ̀ nu̍-a gblɛ̍n sɔ̀ɛ̀n, àe̍e̍ ɔ̀ se̍-a telě dɛɛ jě-ɛ, ɔ̍ gbɛ̍n-ɛ kàn.

³ Nɛ̀ɛ̍, Nyɔsoa-a nyɔ̍ pǔh-iɛ ɛ̀ ku̍-a wɔ̍n-ɛ, pò à sà ɛ̍ dounᵻɛ́, nɛ̀ ka à mu̍-o tàn-a nu̍ ɛ? Joi-a chɛ̀ bo ɔ̀ nu̍ sàǐtòò nyɔ̍ ɔ̀ po̍ pǔh-ɛa tu̍owli la. Wɛ̀ nyɔ̍ ùh wɔ̌n-a ɔ̍ wlu̍-ɛ, iě u̍h to ɛ̍ àɔ̀ i̍ ka ɛ̍ nu̍-a gblangbai̍-ɛ.

⁴ Wɛ̀ nyɔ̍ wɔ̍n flɔn-ɛ dɛ̍ᵻ ke jbaɛdih kaɛn Nyɔsoa po̍-a, i̍h nu̍ ɛ̍ sàànsi̍i̍h. Iě ɔ̍ nyǐ nyɔ̍ɔ ɔ̍ Sùù ke ka ɔ̍ wlùh-a pɔ̀n-a ɔ̍ iě-a nu̍-ɛ.

Jusu bo ɔ̀ pǔh-i nyɔ̍

⁵ Kmɔ̌ kɔn tìh à sà-a ɛ̀ mu̍-a ji̍-ɛ, ɛ̍ se̍ ǐnchɔ̀ Nyɔsoa se̍ chèɛ̀ tba̍ ìh iě ɛ̍ wlu̍ i̍ kɔn.

⁶ Jɛ kǎ ɛ̍ nu̍ ka chlǐh-ɛ dě Nyɔsoa-a wlu̍ di̍i̍, ɛ̍ la̍a̍, “Nyɔsoa, dɛ̍nu̍ nyɔ̍-a sèò-a nu̍ m̀ ɛ? Dɛ̍nu̍ ìn kma nyɔ̍-a tìh ɛ?

⁷ Ìn ja ɔ̍ wlù dǒ ti̍ gbɔ̍ di̍i̍ ɛ̍ sìì àn ǐnchɔ̀. Jɛ kaka la̍ ìn tèè ɔ̍ tìh-a i̍ bɛ̌-ɛ ke ja̍ tè-ɛa blawɛ̌,

⁸ wɛ̀ ìn nu̍ ɛ̍ iě ɔ̍ kɔn dɛ̍ᵻ kli̍hgbɛ̍ wlu̍ i̍.” Nyɔsoa nyǐ ɔ̍ dɛ̍ᵻ kli̍hgbɛ̍ ɔ̍ iě wlu̍ i̍ kɔn. Dɛ̍ dɛɛ se̍ nɛ ɛ̀ ɔ̍ se̍-a wlu̍ i̍ kɔn-ɛ. Jɛ kaka la̍, à-a se̍a ɔ̍ dɛ̍ᵻ kli̍hgbɛ̍ wlu̍ i̍ kɔn-ɛ jě ke̍.

⁹ Jɛ à jě Jusu, ɔ̀ Nyɔsoa ja-a wlù ɛ̍ sìì-a ǐnchɔ̀ dǒ ti̍ gbɔ̍ di̍i̍-ɛ. Wɛ̀ dě Nyɔsoa-a blɛ nɛ-ɛ di̍i̍-ɛ, ɔ̍ iě mɛ̌ dǒ nyɔ̍ kli̍hgbɛ̍-a tàà. Ɔ̍-ɔ bo ɔ̀ tèè-a ka tìh-a i̍ bɛ̌-ɛ ke ja̍ tè-ɛa blawɛ̌ kaka, dɛ̍nu̍ɛ, ɔ̍ sàɛ̀ jua̍i̍ dǒ ɔ̍ mɛ̌ la̍-a.

¹⁰ Ɛ̍ slɛ̌ i̍ kleǐn wɛ̀ Nyɔsoa ɔ̀ nu̍-a dɛ̍ᵻ kli̍hgbɛ̍ iě i̍h kɔn-a dǒ ɔ̍ we̍-ɛ, wɛ̀ ɔ̍ wɔ̀ Jusu nɛi̍ dě jua̍i̍ sàɛ̀ di̍i̍. Ɛ̍ iě kmɔ̌ nɛ wɛ̀ nynuu̍ dɔu iě tìh-a i̍ bɛ̌-ɛ blě. Jusu bo ɔ̀ gba̍ u̍h iě u̍h-a pǔh.

¹¹ Nyɔ̍ jɔ tè-ea nyɔ̍ pɔ̌ dǒ Nyɔsoa we̍-ɛ ke juh ɔ̍ tè-ea pɔ̌-ɛ, u̍h sɔ dě chɛ̌tu due i̍. Ɛ̍ kɔn Jusu se̍ tɛ̀n ple̍ ɔ̍ iě u̍h de̍di̍i̍ᵻ dǎɛ.

¹² Ɛ̍ kɔn ɔ̍ la̍a̍, “Nyɔsoa, ǎn mu̍ àn tìh i̍ sà dě ǐn de̍di̍i̍ᵻ we̍. Pò u̍h gbòe i̍ u̍h iě ìn wɛɛ sà-ɛ, nɛ̀ ǎn mu̍ ìn tìhwe̍ po̍ dě u̍h nynɛ̌.”

¹³ Nɛ̀ dode̍-ɛ, ɔ̍ la̍a̍, “Ǎn mu̍ Nyɔsoa wlì tè.” Iě ɔ̍ la̍a̍ dɛ, “Mɔ̍ la da̍a ɛ̍ ke nynuu̍ ùh Nyɔsoa nyǐ-a m-ɛ ke.”

¹⁴ Ka ùh ɔ̍ dǎɛ-a ka nynuu̍-ɛ, u̍h blě-a ku̍ ke nymɔ̍-ɛ, ɛ̍ kɔn ɔ̍ gbǎ dě u̍h-a tu̍ di̍i̍ ke. Wɛ̀ ɔ̍ mɛ̌ iě ɛ̍ iě Kǔ jɛ blě-a gbǐh dǒ mɛ̌ɛ we̍-ɛ gbɔ̀lɔ.

¹⁵ Nyɔ̍ ùh nɛ-a dě kèìe̍e̍ de kleǐnklein mɛ̌ɛ jǔ ple̍ tìh-ɛ, wɛ̀ ɔ̍ sèìe u̍h.

¹⁶ À juo i̍h, ɛ̍ se̍ Nyɔsoa-a ǐnchɔ̀ ɔ̍ se̍ we̍ gbǎ la̍-a ji̍. Eblaɛɛn-a tloemlai bo ɔ̍ ji̍ we̍ gbǎ la̍-a.

¹⁷ Ɛ̍ kɔn ka ɔ̍ de̍di̍i̍ᵻ nɛ-aɛ, nɛ̀ ɔ̍ kɔn ɔ̍ iě laǎn nɛ ke tà kli̍hgbɛ̍. Ɔ̍ nu̍ ɛ̍-ɛ, wɛ̀ ɔ̍ iě u̍h-a Slaǎ Sà Nyɔ̍-a Dlǔtu nu̍ ɔ̀ kɔn-a wɔɛ iě ɔ̀ nu̍-a wlì tè nyɔ̍ dě Nyɔsoa jǔ dbee dɛ di̍i̍-ɛ. Wɛ̀ ɔ̍ nu̍ ɛ̍ iě nyɔ̍ɔ-a gblɛ̍n sɔ̀ɛ̀n-a tìh tǎli-ɛ i̍.

¹⁸ Nyɔ̍ ùh Kǔ-a pɔ̀n-a blu̍ja̍a̍ po̍-ɛ i̍-ɛ, ɔ̍ bɛ̌ɛ u̍h we̍ gbǎ-a. Dɛ̍nu̍ɛ, ɔ̍ chɛ̀ sàɛ̀ jua̍i̍ iě Kǔ-a pɔ̀n ɔ̍ blu̍ja̍a̍ po̍-ɛ i̍ ke de.