Iblu 11 - Ku̍o̍ Delee 1999

Mɔ̀ à blě wlùh gbaɛ

¹ Pò à blě wlùh gbaɛ-ɛ, nɛ̀ à mu̍ dɛ̍ᵻ à tba̍-a wlùh i̍-ɛ wlùh kɛ̍n tè. À mu̍ dɛ̍ᵻ à-a se̍a jě-ɛ tìh chɛ̀ po̍ ke chɛ̀ɛ̌chɛ̀.

² Wlùh gbaɛ blě-ɛ bo ɛ̀ nɛ kmɔ̌ wɛ̀ Nyɔsoa wɔ̌ɛn tɛin nyɔ̍-a tìh i̍.

³ À wlùh gbaɛ blě-ɛ bo ɛ̀ nu̍ ɛ̍ iě à juo ɛ̍ ka Nyɔsoa-a wɔ̍i̍n wlu̍ bo ɛ̀ nu̍-a kmɔ̌ la-ɛ. Sɔ jɛ ɛ̀ nyɔ̍-a jě-aɛ, ɛ̍-ɛ bo ɛ̀ nui-ɛ dě jɛ nyɔ̍-ɔ jě-aɛ ja̍a̍.

⁴ Ebɛ-a wlùh gbaɛ blě-ɛ bo ɛ̀ nu̍ ɛ̍ iě ɔ̍ sà slaǎ chɛ̀ ɛ̍ sìì Kein naɛ. Ebɛ-a wlùh gbaɛ blě-ɛ bo ɛ̀ nu̍ ɛ̍ iě Nyɔsoa po̍ ɔ̍ i̍ slɛ̌-ɛ tìh-a kòò dǒ ti̍ ɔ̍ gbɛ̍n-a ɔ̍ nyǐ-dɛ̍ᵻ i̍-ɛ we̍. Ɔ̍ mɛ̌-ɛ nɔ̀ɔ̍, jɛ à cheǎn-ɛ ɔ̍ wlùh gbaɛ blě-ɛ dɛ̍ we̍ ke̍.

⁵ Inɔ-a wlùh gbaɛ blě-ɛ bo ɛ̀ nu̍ ɛ̍ iě ɔ̍ se̍ mɛ̌ wɛ̀ ɔ̍ dǔ-iɛ ja̍i̍. Nyɔ̍ se̍ ɔ̍ jě dɛ, dɛ̍nu̍ɛ, Nyɔsoa bo ɔ̀ dǔ ɔ̍ ja̍i̍. Ɔ̍ iě-a ja̍i̍ dǔ-iɛɛ, Nyɔsoa la̍ Inɔ tè-e ɔ̍ wlùh i̍.

⁶ Nyɔ̍ se̍ wlùh gbaɛ blě-ɛ nɛ̀ ɔ̍ se̍ Nyɔsoa-a wlùh i̍ tè-eɛ bɛ̌ɛ. Nyɔ̍ jɔ ji̍-a Nyɔsoa we̍-ɛ, nɛ̀ ɔ̍ kɔn ɔ̍ iě ɛ̍ tìh chɛ̀ po̍ ka Nyɔsoa nɛ-a kmɔ̌ iě nyɔ̍ ùh-a pɔ̀n-a ɔ̍ kwlǐh i̍-ɛ, ɔ̍ nyǐ-a u̍h dɛ̍-ɛ.

⁷ Nɔa-a wlùh gbaɛ blě-ɛ bo ɛ̀ nu̍ ɛ̍ iě ɔ̍ wɔ̌n Nyɔsoa-a gbòɛ̀ wlu̍ i̍ dǒ dɛ̍ᵻ ɔ̍-ɔ se̍a jě ìh-a mu̍-a gbǎ-ɛ we̍. Wɛ̀ ɔ̍ wɔ̌n Nyɔsoa-a wlu̍ i̍ iě ɔ̍ kɔ̍ blǎgbè klaa ɛ̍ iě ɔ̍ ke ɔ̍ chɛ̌ pǔh-i. Dɛ̍ᵻ ɔ̍ nu̍-a bo ìh sà kmɔ̌ la kɛ̀n, wɛ̀ Nyɔsoa nyǐ ɔ̍ i̍ slɛ̌-ɛ ɛ̀ jii-a dě wlùh gbaɛ di̍i̍-ɛ.

⁸ Eblaɛɛn-a wlùh gbaɛ blě-ɛ bo ɛ̀ nu̍ ɛ̍ wɛ̀ ɔ̍ mu̍ blǔh dɛɛ kɛ̍n ɛ̀ Nyɔsoa dǎ ɔ̍ ɔ̍ iě-a kɛ̍n mu̍ ɔ̍ iě-a kɔn-ɛ. Wɛ̀ ɔ̍ nu̍ ɔ̍ wlu̍, iě ɔ̍ mu̍ tà ɔ̍ se̍-a juo-ɛ.

⁹ Eblaɛɛn-a wlùh gbaɛ blě-ɛ bo ɛ̀ nu̍ ɛ̍ iě ɔ̍ tǐn dě blǔh kɔn wlu̍ Nyɔsoa po̍-a tɔ̀ma̍a̍-ɛ kɛ̍n ka dihwi̍h-ɛ. Ɔ̍ tǐn dě wɛ̀ɛ̀ sɔ̍n wlù di̍i̍, kǎ Ase ke Jekɔ nu̍ ke, u̍h bo ùh-a mu̍ Nyɔsoa-a tɔ̀ma̍a̍ wlu̍ dɛ̍ we̍ jě ke.

¹⁰ Nɛ̀ Eblaɛɛn-a fuo ti̍ ɔ̍ iě dǒ tùgbàwlɔ̀ ɛ̀ Nyɔsoa po̍-a ɛ̀ se̍-a wlǎ la̍ kɔn-ɛ di̍i̍ mu̍.

¹¹ Selɔ ɔ̀ sie-a slàmàɛ̀ wɛ̀ de-ɛ, ɔ̍ wlùh gbaɛ blě-ɛ bo ɛ̀ nu̍ ɛ̍ iě ɔ̍ nɛ kwlǐ. Nɛ̀ ɔ̍ nɛ̍ wɛ̀ de, jɛ dɛ̍ ɔ̍ tè-a wlì-ɛ, ɛ̍ nu̍ Nyɔsoa-a gblìh tɔ̀ma̍a̍ wlu̍ kɛ̍n.

¹² Ɛ̍ tìh-ɛ, Eblaɛɛn ɔ̀ kɔǎɛn-a mɛ̌ɛ i̍ wɛ̀ de-ɛ, dě ɔ̍ ja̍a̍ bo tloemlai dɔu la u̍h sɔ-ɔ. Iě nyɔ̍ se̍ u̍h slè-ɛ bɛ̌ɛ, ka nyɔ̍ jě chǔhtlɛ̀n ke jbǒ penɔ̍ɔ̍-ɛ.

¹³ Ùh kli̍hgbɛ̍ la dě u̍h-a wlùh gbaɛ blě-ɛ di̍i̍ bo u̍h mɛ̌-ɛ. U̍h se̍ dɛ̍ kɔn wlu̍ Nyɔsoa po̍-a tɔ̀ma̍a̍-ɛ jě, jɛ u̍h jě ɛ̍ dě nya̍ wɛ̀ u̍h nu̍ ɛ̍ dɛ̍i̍. Ka u̍h nu̍-a dakɔ̍ pàɔ̀n nɔ̌ bloɔ̍-ɛ, u̍h juo ɛ̍ i̍, iě u̍h sà ɛ̍-ɛ.

¹⁴ Nɛ̀ nyɔ̍ ùh-a sà-a u̍h-a chɛ̀-a dakɔ̍ pàɔ̀n nu̍ tìh i̍-ɛ, nɛ̀ u̍h flɔn-ɛ ɛ̍ we̍i̍ ka u̍h-a pɔ̀n-a dǒ u̍h-a chɛ̀-a blǐ blǔh kɛ̍n nɛ-ɛ i̍-ɛ.

¹⁵ Blǔh kɔn kɛ̍n u̍h sɔ-a pò u̍h ja ɛ̍ tìh wlùh i̍ naɛ de-ɛ, nɛ̀ u̍h-a mu̍ flɔn la̍ i̍ pɔ̀n u̍h iě-e de̍ mu̍ de.

¹⁶ Jɛ ka ɛ̍ nɛ-a ka-ɛ, nɛ̀ bloa̍ chɛ̀ ɛ̀ nu̍-a ja̍i̍wlɔ̀-ɛ bo ɛ̀ kɔn tɔ̌n-a nu̍ u̍h. Ɛ̍ tìh-ɛ, Nyɔsoa se̍ tɛ̀n ple̍ u̍h iě ɔ̍ u̍h-a Nyɔsoa dǎɛ-ɛ. Ɛ̍ kɔn ɔ̍ po̍ tùgbàwlɔ̀ gba̍a̍ dǒ u̍h we̍.

^17-18 Ti̍ Nyɔsoa tɛ̀n-a Eblaɛɛn i̍-ɛ, Eblaɛɛn-a wlùh gbaɛ blě-ɛ bo ɛ̀ nu̍ ɛ̍ iě ɔ̍ to Ase de ɔ̍ iě slaǎ sà-ɛ dɛ̍ nu̍. Dě Eblaɛɛn we̍ bo Nyɔsoa poe wlu̍ tɔ̀ma̍a̍. Ɔ̍ la̍ dě Ase ja̍a̍ bo Eblaɛɛn-a tloemlai-a mu̍ jii. Jɛ ɔ̀ nu̍-a Eblaɛɛn-a jǔ jɔɛ̍ due gbài̍-ɛ bo Eblaɛɛn dǔ-u wɛ̀ de ɔ̍ iě slaǎ sà-ɛ.

¹⁹ Jɛ ɔ̍ juo ɛ̍-ɛ ka Nyɔsoa bɛ̌ɛ-a Ase dě-e sà-aɛ. Sɔ nɛ̀ kǎ à mu̍ la̍ ka dǎ, Ase wlǔh-e, iě Eblaɛɛn jě ɔ̍ jǔ dode̍.

²⁰ Ase-a wlùh gbaɛ blě-ɛ bo ɛ̀ nu̍ ɛ̍ iě ɔ̍ sà-ɛ Jekɔ ke Isɔ nǐ wɔ̍n Nyɔsoa iě u̍h pɔ̀ìě nyǐ dě nya̍.

²¹ Jekɔ-a wlùh gbaɛ blě-ɛ bo ɛ̀ nu̍ ɛ̍ iě ti̍ ɔ̍ mu̍-a mɛ̌-ɛ wɛ̀ ɔ̍ tba̍ ɔ̍ kɔu̍ i̍ iě ɔ̍ nyna i̍. Wɛ̀ ɔ̍ sà-ɛ Josɛ-a jɔ̍gbauᵻ nynuu̍ kli̍hgbɛ̍ nǐ wɔ̍n iě ɔ̍ sà Nyɔsoa wɛɛ.

²² Josɛ-a wlùh gbaɛ blě-ɛ bo ɛ̀ nu̍ ɛ̍ wɛ̀ ti̍ ɔ̍ mu̍-a la̍ mɛ̌-ɛ, iě ɔ̍ sà Eslɔɛ nyɔ̍-a dǒ Iche bloa̍ kɛ̍n sɔ tìh i̍. Wɛ̀ ɔ̍ sèàɛ̍ u̍h wlùh u̍h iě ɔ̍ kǔ gba̍ pò u̍h ja dǒ Iche sɔ-ɛ.

²³ Mose de̍ ke ɔ̍ baa-a wlùh gbaɛ blě-ɛ bo ɛ̀ nu̍ ɛ̍ ti̍ ɔ̍ wlǔh-aɛ, iě u̍h sìle ɔ̍ dǒ chǔhᵻ ta̍a̍n di̍i̍. U̍h gbɛ̀n-a Mose ja-ɛ, ɔ̍ jii̍ nmɔ-ɛ bo ɛ̀ nu̍ ɛ̍, iě u̍h se̍ Iche nyɔ̍-a blǔh baa-a nyɔ̍ slǔh po̍ wlu̍ jǔ ple̍ ke.

²⁴ Mose-a wlùh gbaɛ blě-ɛ bo ɛ̀ nu̍ ɛ̍ wɛ̀ ti̍ ɔ̍ bɛ̌-a i̍-ɛ iě ɔ̍ se̍ pɔ̀n nyɔ̍ iě ɔ̍ Fewlo-a jǔ nynɔ̌gbaɔ-a jǔ dǎɛ.

²⁵ Sɔ nɛ̀ poe dě Nyɔsoa-a nyɔ̍ we̍ kɛ̍n wɛ̀ u̍h nu̍ ìn tìh i̍ bo ɔ̍ tba̍ chèɛ̀ ɛ̍ sìì nu̍ kmɔ̌ dě gblɛ̍n sɔ̀ɛ̀n di̍i̍ dǒ ti̍ gbɔ̍ di̍i̍.

²⁶ Mose la̍ u̍h-a ɔ̍ chlèe-ɛ Nyɔsoa-a Chèɛ̀ Tba̍ju-a tìh gbǎ dɛ̍kɛ̍n ɛ̍ sìì Iche bloa̍-a pàn-dɛ̍ᵻ. Dɛ̍nu̍ɛ, jě-dɛ̍ nɛ-a dě nya̍-ɛ, ɛ̍-ɛ bo ɔ̍ gbɛ̀n ja̍.

²⁷ Mose-a wlùh gbaɛ blě-ɛ bo ɛ̀ nu̍ ɛ̍ iě ɔ̍ se̍ blǔh baa-a jlu̍h jua̍a̍ jǔ ple̍ wɛ̀ ɔ̍ sɔ dǒ Iche bloa̍ kɛ̍n. Ti̍ ɔ̍ sɔ-a Iche-ɛ, dɛ̍ ɛ̀ ku̍ i̍-a ɔ̍ dě klì i̍-ɛ, ɛ̍ nu̍ ka nyɔ̍ la̍ ɔ̍ jě Nyɔsoa ɔ̀ nyɔ̍-ɔ jě-aɛ o-ɛ.

²⁸ Mose-a wlùh gbaɛ blě-ɛ bo ɛ̀ nu̍ ɛ̍ iě ɔ̍ tè Sììkɛ̍n Peě dɛ gbɔ̀, wɛ̀ ɔ̍ fùn i̍ Eslɔɛ nyɔ̍-a gbabaᵻ nymɔ̍ kɛ̍n i̍ wɛ̀ ɔ̀ gbɔ̀lɔ-a nyɔ̍-a sàǐtòò jɔ̍gbau jǔ-uɛ, ɔ̍-ɔ je̍e u̍h-a nynuu̍ dbǎ.

²⁹ Eslɔɛ nyɔ̍-a wlùh gbaɛ blě-ɛ bo ɛ̀ nu̍ ɛ̍ iě u̍h tàn Jbǒ Sàɛ̀n ka nyɔ̍-a na-ɛ dǒ tlu̍h kɛ̍n-ɛ. Jɛ Iche nyɔ̍ mu̍-a ɛ̍ nu̍ la̍ ke-ɛ, sɔ u̍h sie niɔ̍.

³⁰ Eslɔɛ nyɔ̍-a wlùh gbaɛ blě-ɛ bo ɛ̀ nu̍ ɛ̍ iě Jɛwlekoo wlɔ̀-a saǎn blu̍, dɛ̍nu̍ɛ, u̍h bǎ-ɛ iě u̍h dlɛ̌ ɛ̍ dǒ wǐh mɛ̀sɔɔ̌n di̍i̍.

³¹ Kàìà nynɔ̌ Wleaa-a wlùh gbaɛ blě-ɛ bo ɛ̀ nu̍ ɛ̍ iě ɔ̍ ke se̍ Nyɔsoa-a wlu̍ nu̍ nyɔ̍ se̍ tàdùè dbǎ-ɛ. Dɛ̍nu̍ɛ, ɔ̍ nu̍ nyɔ̍ ùh ji̍-a pɛ̀ la̍-aɛ, u̍h-a dɛ̍i̍.

³² Ǐn mu̍ nya̍ ke̍ sǔh ae? Ǐn se̍ ti̍ blě kaa̍ka wɛ̀ iě Kediɔn ke, Bewla ke, Saunsih ke, Jɛfa ke, Depe ke, Samio ke Nyɔsoa-a tu̍owli po̍ nyɔ̍-a tìh i̍ sà.

³³ U̍h bo ùh jii dě wlùh gbaɛ di̍i̍ wɛ̀ u̍h sà bloa̍ klà, wɛ̀ u̍h nu̍ dɛ̍ ɛ̀ slɛ̌-a i̍-ɛ. Iě u̍h jě dɛ̍ kɔn wlu̍ Nyɔsoa po̍-a tɔ̀ma̍a̍-ɛ. Iě u̍h sà gbòlò-a wɔ̍n klèɛ̍-ɛ.

³⁴ Iě u̍h mɔ̌-ɛ nɛ̍ ɛ̀ nɛ-a jojǒ-ɛ, wɛ̀ u̍h wa̍n plàn chlɛ̀n wɔ̍i̍n iě ɛ̍ se̍ u̍h dbǎ, wɛ̀ u̍h-a gbǐh-a sɔɔn nu̍-ɛ sàɛ̀ kmu-ɛ. U̍h-a wlùh gbaɛ blě-ɛ bo ɛ̀ kmu i̍ u̍h dě tu̍h, iě u̍h sà dakɔ̍ pàɔ̀n-a fledlǔ klà.

³⁵ U̍h-a wlùh gbaɛ blě-ɛ bo ɛ̀ sà-e nynɔ̌gbaɔᵻ duuh-a nyɔ̍ ùh mɛ̌-aɛ, wɛ̀ u̍h jě u̍h de̍. Duuh la̍ u̍h se̍ sèìe tìh i̍ wɔ̌ɛn, iě u̍h mɛ̌-ɛ dě tìh jě-ɛ di̍i̍, wɛ̀ u̍h iě-e wlǔh dě kmɔ̌ chɛ̀ di̍i̍ dě nya̍.

³⁶ Nyɔ̍ɔ nui u̍h-a duuh jlii̍h kɛ̍n i̍, wɛ̀ u̍h bla̍ u̍h, u̍h sa̍n-ɛ u̍h jɔɔdbǔᵻ, iě u̍h poe-ɛ kasoo.

³⁷ U̍h tbaɛ duuh sɔɔ̌ᵻ i̍ iě u̍h mɛ̌. Wɛ̀ u̍h sà duuh fɔ̌ᵻ sɔɔ̌n, u̍h dbǎ-ɛ duuh plàn chlɛ̀n i̍. Blawɛ̌ᵻ ke gbàdɔ̍ᵻ ku̍ᵻ bo u̍h-a gbà iě u̍h-a na wlɔ̀ i̍. U̍h pa̍ nyɔ̍gbà, u̍h jě-ɛ klě, iě u̍h nui-ɛ tìh i̍.

³⁸ Dɛ̍ᵻ sɔ̀nᵻ nu̍ kmɔ̌ la ɛ̍ se̍ i̍ blaɛ dǒ ùh chɛ̀ la we̍. U̍h-a na-ɛ dě pòɛ̍ɛ̍ ke tlu̍hᵻ kɛ̍n ka kwlǎ gbǎ kèi̍ᵻɛ́, iě u̍h-a na-ɛ dě wɔ̍ᵻ ke biěᵻ di̍i̍ dě wlù.

³⁹ Ùh kli̍hgbɛ̍ la u̍h-a wlùh gbaɛ blě-ɛ bo ɛ̀ nɛ kmɔ̌ wɛ̀ Nyɔsoa wɔ̌ɛn u̍h-a tìh i̍. Jɛ u̍h-a nyɔ̍ se̍ dɛ̍ kɔn wlu̍ Nyɔsoa po̍-a tɔ̀ma̍a̍-ɛ jě.

⁴⁰ Dɛ̍nu̍ɛ, Nyɔsoa chɛ̍n dɛ̍ chɛ̀-a di̍i̍chì chɛ̀ dǒ à we̍. Dɛ̍ ɔ̍ pɔ̀n-aɛ, ɛ̍ nu̍ nyɔ̍ la u̍h ke à nɛi̍ wɛ̀-ɛ iě kwlǎ wɛ̀ tàdùè.