Ɛfɛsɔ 5 - Ku̍o̍ Delee 1999

Mɔ̀ tǐn dě sɔ̀npli di̍i̍

¹ Ka mɔ̀ nu̍-a Nyɔsoa-a tìh kma nynuu̍-ɛ, nɛ̀ ɔ̍ wɔ̀ɔ̀ bo mɔ̀ iě-e i̍ sà.

² Mɔ̀ na-ɛ dě jbɛɛ di̍i̍, ɛ̀ kɔn ba̍ Klai nu̍-a à-a jbɛɛ-ɛ, wɛ̀ ɔ̍ sà-a ɔ̍ feɛ kwlǎ à tìh-ɛ. Ɔ̍ wɔ̀ nyǐ-dɛ̍ ɛ̀ nmɔ-a nɔ̌-ɛ ke slaǎ sà dɛ̍ ɛ̀ po̍-a Nyɔsoa gbǐh-ɛ.

³ Jɛ gbǎn nu̍ dɛ ke, sììjii̍ nu̍-ɛ ke, klǎn kɔn dɛ bɔ̌ dě mɔ̀ nynɛ̌-a chɛ̀ gbǎ-a. Dɛ̍nu̍ɛ, i̍h se̍ dě Nyɔsoa nyɔ̍ nynɛ̌ i̍ nmɔ.

⁴ Nɛ̀ mɔ̀ bɔ̌ chlèwli̍ po̍-ɛ ke, se̍o̍nɛ sà-a ke kòàdih sɔ̀ɛ̀n nu̍-ɛ. Dɛ̍nu̍ɛ, i̍h nyni-o tà i̍. Jɛ Nyɔsoa tlɔ̌ po̍ wlu̍ bo ɛ̀ iě dě mɔ̀ wɔ̍ɔ̍n nɛ.

⁵ Ɛ̍ tìh-ɛ, mɔ̀ tù ɛ̍ jlǐhɛ̍ ka gbǎn nu̍ nyɔ̍ ke, sììjii̍ nu̍ nyɔ̍ ke, klǎn kɔn nyɔ̍ ùh nu̍-a kwɛ̍i̍n gbo̍ᵻ wɛɛ sà nyɔ̍-ɛ, u̍h se̍ dɛ̍ jě mu̍ dě Klai ke Nyɔsoa-a kmɔ̌ wlu̍ i̍ kɔn-ɛ di̍i̍.

⁶ Bɔ̌ wɔ̌n-ɛ nyɔ̍ bɔ̌ mɔ̀ i̍ boe-ɛ dǒ si̍h tmɔ̌-ɛ we̍. Dɛ̍ᵻ sɔ̀nᵻ la bo ìh-a mu̍ ɛ̍ nu̍ wɛ̀ Nyɔsoa iě nyɔ̍ ùh se̍-a ɔ̍ wlu̍ nu̍-ɛ jlu̍h-u gbǎ-ɛ.

⁷ Ɛ̍ tìh-ɛ, nyɔ̍ kaɛn laa̍ u̍h ke mɔ̀ bɔ̌ we̍ nɛ̍aɛ.

⁸ Mɔ̀ nɛ dě kwile-e de sàǐtòò, jɛ kaka la̍ mɔ̀ nɛ dě sɔ̀npli di̍i̍ wɛ̀ ka mɔ̀ kɔn-a dǒ Joi we̍-ɛ. Mɔ̀ na dě sɔ̀npli di̍i̍ nɛ nyɔ̍-a dɛ la̍ sǔh.

⁹ Dɛ̍nu̍ɛ, sɔ̀npli naɛ tlo-buǒᵻ nu̍ dɛ̍ᵻ kli̍hgbɛ̍ ìh nu̍-a dɛ̍ᵻ chɛ̀ ìh slɛ̌-a i̍-ɛ ke ìh nu̍-a tìh-a taǐn-ɛ.

¹⁰ Mɔ̀ fɔ̀n dɛ̍ we̍ mɔ̀ iě dɛ̍ ɛ̀ tè-ea Joi-a wlùh i̍-ɛ cheǎn.

¹¹ Dɛ̍ᵻ ìh-i po̍-ao nyɔ̍ dɛ̍ ìh kɔn-a dǒ kwile we̍-ɛ, mɔ̀ sà i̍h sɔ̍n we̍. Jɛ mɔ̀ nu̍ ɛ̍ i̍h iě gbɔ̀ wlǔh dǒ sɔ̀npli we̍. (

¹² Dɛ̍ᵻ u̍h-a nui-a dě kwile-eɛ, i̍h-a sà-aa chɛ̀ nɛ tɛ̀n-ɛ.)

¹³ Jɛ dɛ̍-o-dɛ̍ ɛ̀ wlǔh-a gbɔ̀ dǒ sɔ̀npli we̍-ɛ, nɛ̀ ɛ̍ jě-eɛ chɛ̀ɛ̌chɛ̀, iě nyɔ̍-a ju̍o̍e ɛ̍ we̍ i̍.

¹⁴ Dɛ̍nu̍ɛ, dɛ̍ ɛ̀ sà-a dɛ̍ tà te̍gbe̍i̍n-ɛ, nɛ̀ sɔ̀npli bo. Ɛ̍ kɔn wlu̍ la ɛ̍ la̍a̍, “Mɛ̌-nyɔ̍, wlǔh-e ìè bloɔ̍ sɔ, wɛ̀ Klai-a sɔ̀npli iě ìn kɛ̍n i̍ fa̍n-ɛ.”

¹⁵ Ɛ̍ tìh-ɛ, mɔ̀ tù mɔ̀-a na-a bu̍hᵻ jlǐhɛ̍. Mɔ̀ bɔ̌ na-a ka se̍ di̍i̍ flɔn nyɔ̍-ɛ, jɛ mɔ̀ na di̍i̍ i̍ flɔn dɛ.

¹⁶ Flɔn la̍ kli̍hgbɛ̍ mɔ̀-a mu̍-a jě-ɛ, mɔ̀ nui i̍h dɛ̍ chɛ̀, dɛ̍nu̍ɛ, ti̍laa kmɔ̌ la ɛ̍ nyni jii̍.

¹⁷ Ɛ̍ tìh-ɛ, mɔ̀ bɔ̌ we̍i̍ bo-ɛ, jɛ dɛ̍ nu̍-a Joi Nyɔsoa-a wlùh-ɛ bo mɔ̀ iě we̍ i̍ ju̍o̍e.

¹⁸ Mɔ̀ bɔ̌ mɔ̀-a chɛ̀ nmɔ̍ wlì sìèè-ɛ, nɛ̀ ɛ̍ mu̍ mɔ̀-ɔ gbɔ̀lɔ. Jɛ Nyɔsoa-a Sùù bo ɛ̀ iě mɔ̀-ɔ i̍ jǐi.

¹⁹ Mɔ̀-a sɔ̀ìn chɛ̍n-ɛ kɔn i̍h iě duǐh ìh sɔ-a dě Duǐh Chlǐh-dɛ̍ di̍i̍-ɛ ke Nyɔsoa-a tìhwe̍ po̍ duǐh ke duǐh ɔ̍ Sùù-a nyǐ-a nyɔ̍-ɛ nu̍. Mɔ̀ ble̍ mɔ̀ iě klɛ̀n-ɛ dǒ Joi we̍ dǒ mɔ̀-a wlùh kli̍hgbɛ̍ we̍.

²⁰ Baa Nyɔsoa bo mɔ̀ iě tlɔ̌ po̍ ma̍u̍ dǒ dɛ̍ᵻ kli̍hgbɛ̍ we̍ dǒ à Joi Jusu Klai-a nynɛ̌ kɛ̍n.

Kǎ nynɔ̌ ke kɔan iě ka tǐn-ɛ nu̍

²¹ Mɔ̀ tù Klai dɛ̍ɛ̍ jě tìh mɔ̀ iě mɔ̀-a chɛ̀ wlù ja dě mɔ̀-a chɛ̀ nynɛ̌.

²² Nynɔ̌gbaɔᵻ, ka mɔ̀-a nu̍-a mɔ̀-a chɛ̀ wlù ja-a dǒ Joi Nyɔsoa we̍-ɛ, kǎ mɔ̀ iě nu̍ ke dǒ mɔ̀-a kɔanᵻ we̍.

²³ Dɛ̍nu̍ɛ, chɔchi̍h nu̍ Klai-a ku̍, iě ɔ̍ nu̍ ka ɛ̍ Sèìe Nyɔ̍ ke ɛ̍ dlǔ. Kǎ kɔan nu̍ ɔ̍ nynɔ̌-a dlǔtu nu̍-ɛ ke.

²⁴ Ɛ̍ tìh-ɛ, ka chɔchi̍h-a nu̍-a ɛ̍ chɛ̀ wlù ja-a dǒ Klai we̍-ɛ, kǎ nynɔ̌gbaɔᵻ kɔn u̍h iě u̍h-a chɛ̀ wlù ja-a nu̍ ke dǒ u̍h-a kɔanᵻ we̍ dǒ dɛ̍ᵻ kli̍hgbɛ̍ we̍.

²⁵ Kɔanᵻ, ka Klai nu̍-a chɔchi̍h-i jbɛɛ-ɛ, kǎ mɔ̀ iě mɔ̀-a nynɔ̌gbaɔᵻ jbɛɛ nu̍ ke. Ɔ̍ sà ɔ̍ feɛ kwlǎ dǒ chɔchi̍h we̍

²⁶ ɔ̍ iě ɛ̍ pɔ̌ tè dǒ Nyɔsoa we̍. Ɛ̍ kɔn ɔ̍ nu̍ nǐ ke wlu̍ wɛ̀ ɔ̍ wɔ̍lɔ ɛ̍, iě ɛ̍ wɛ̀ flɛ̀n i̍.

²⁷ Ɔ̍ nu̍ ɛ̍-ɛ wɛ̀ chɔchi̍h iě dǒ ɔ̍ we̍ i̍ wɔ̀ wɛ̀ ɛ̍ iě maloo nɛ. Ɛ̍ ku̍ se̍ tlǎ, iě ɛ̍ fɛ̍nɛ. Dɛ̍wɛ dɛɛ-a chɛ̀ se̍ ɛ̍ i̍ nɛ ke. Ɛ̍ wɛ̀ nɛi̍ iě ɛ̍ nynɛ̌ se̍ kɔ̌.

²⁸ Kɔanᵻ, ka mɔ̀ nu̍-a mɔ̀-a chɛ̀-a ku̍-u jbɛɛ-ɛ, kǎ mɔ̀ iě mɔ̀-a nynɔ̌gbaɔᵻ jbɛɛ nu̍ ke. Kɔan jɔ jbɛɛ-a ɔ̍ nynɔ̌-ɛ, nɛ̀ ɔ̍ wɔ̀ ɔ̍ chɛ̀-ɛ jbɛɛ wɛ̀. (

²⁹ Nyɔ̍-ɔ se̍a ɔ̍ chɛ̀-a ku̍ faɛn, ɛ̍ kɔn ɔ̍ po̍ ɛ̍ nǐ i̍ iě ɔ̍ gbɛ̀n dǒ ɛ̍ we̍ i̍. Kǎ Klai nu̍ chɔchi̍h-a tìh ke,

³⁰ dɛ̍nu̍ɛ, ɔ̍ ke à ke à nɛ due.)

³¹ Ɛ̍ kɔn Nyɔsoa-a wlu̍ la̍a̍, “Ɛ̍ tìh-ɛ, jɔ̍gbau-a mu̍ dǒ ɔ̍ de̍ ke ɔ̍ baa we̍-e sɔ, wɛ̀ ɔ̍ ke ɔ̍ nynɔ̌ iě i̍ tùi. Nɛ̀ u̍h nɛ-a sɔɔ̌n-ɛ, u̍h-a mu̍ nyɔ̍ due nu̍.”

³² Sìle dɛ̍ klaa la ɛ̀ wlǔh-a tà dě Nyɔsoa-a wlu̍ la di̍i̍-ɛ, Klai ke chɔchi̍h bo ǎn dǎ.

³³ Jɛ ɛ̍ bǎ mɔ̀ i̍ ke. Kɔan jɔ-ɛ, ka ɔ̍ nu̍-a ɔ̍ chɛ̀-ɛ jbɛɛ-ɛ, kǎ ɔ̍ iě ɔ̍ nynɔ̌-ɔ jbɛɛ nu̍ ke. Nɛ̀ nynɔ̌ kɔn ɔ̍ iě ɔ̍ kɔan dɛ̍ɛ̍ jě ke.