Ɛfɛsɔ 4 - Ku̍o̍ Delee 1999

Mɔ̀ gbe̍ɛ̍ɛn kɛ̍n i̍ dě Klai ja̍a̍

¹ Nɛ̀ɛ̍, mɔ̍ ɔ̀ tù-a Joi tìh wɛ̀ ɔ̀ nu̍-a gbɛ̍n-nyɔ̍-ɛ, ǐn gbɛ̍n mɔ̀-a bu̍hᵻ i̍, mɔ̀ iě dě kmɔ̌ ɛ̀ kɔn tìh Nyɔsoa dǎ-a mɔ̀-ɛ di̍i̍ nɛ.

² Mɔ̀ ja mɔ̀-a chɛ̀ wlù, mɔ̀ iě gba̍n gbɛ̍n. Mɔ̀ gbɛ̍n wlùh i̍, mɔ̀-a jbɛɛ iě ɛ̍ nu̍ mɔ̀ɔ̍ je̍e feǎn wlì kɔn.

³ Mɔ̀ po̍-e gbǐh mɔ̀-a kɛ̍n i̍ gbe̍ɛ̍ɛn iě ɛ̍ nu̍ wɛ̀ mɔ̀-a due nɛ-ɛ ɛ̀ Nyɔsoa-a Sùù nyǐ-a mɔ̀-ɛ ɛ̍ iě tɔ̀ɔ̀n we̍ na.

⁴ Mɔ̀ɔ̍ ku̍ due ɛ̀ kɔn-a dǒ Klai we̍-ɛ, iě mɔ̀ blě Nyɔsoa-a Sùù ɛ̀ nɛ-a due-ɛ ke. Wɛ̀ Nyɔsoa dǎ mɔ̀ mɔ̀ iě wlùh kɛ̍n i̍ kɔ̍ dɛ̍ due blě.

⁵ À blě Joi due, wlùh gbaɛ due ke nǐ dlǔ po̍-ɛ due.

⁶ Nɛ̀ à blě Nyɔsoa due ɔ̀ nu̍-a Baa dǒ à kli̍hgbɛ̍ we̍-ɛ. Ɔ̍ nɛ dǒ nyɔ̍ kli̍hgbɛ̍ dlǔwèàì. Ɔ̍ jii nyɔ̍ kli̍hgbɛ̍-ɛ, iě ɔ̍ nɛ nyɔ̍ kli̍hgbɛ̍-ɛ.

⁷ Nyǐ-dɛ̍ᵻ Klai nyǐ-a àɔ̀ blɛ ka-ɛ, ka ɔ̍ pɔ̀n-a i̍h iě-a nɛ-ɛ nu̍-ɛ kǎ ɔ̍ nu̍ i̍h gblè-ɛ.

⁸ Ɛ̍ kɔn Nyɔsoa-a wlu̍ la̍a̍, “Ɔ̍ wɔ̌an dě ja̍i̍-a ja̍i̍ mu̍ tìh-ɛ, ɔ̍ gba̍ gbɛ̍n-nyɔ̍ dɔu. Iě ɔ̍ nyǐ nyɔ̍ nyǐ-dɛ̍ᵻ.”

⁹ Nɛ̀ɛ̍, ɔ̍ mu̍ dě ja̍i̍-a ja̍i̍ dɛ la, ɛ̍ gbɔ̀-a nynɛ̌ ɛ? Ɛ̍ gbɔ̀ nu̍ ɔ̍ iě-a dě ja̍i̍ mu̍-ɛ, ɔ̍ ji̍ nɔ̌ sɔ̀n nɔ̌ bloɔ̍ sasǎ.

¹⁰ Ɔ̍-ɔ due ji̍-a nɔ̌ bloɔ̍-ɛ, ɔ̍-ɔ due laa̍ bo ɔ̀ mu̍ ja̍i̍ dě ja̍u̍n dlǔwèàì-a dlǔwèàì. Ɔ̍ nu̍ ɛ̍-ɛ wɛ̀ ɔ̍ iě kmɔ̌ kli̍hgbɛ̍-ɛ i̍ jǐi.

¹¹ Ɔ̍-ɔ bo ɔ̀ nyǐ nyɔ̍ɔ nyǐ-dɛ̍ᵻ. U̍h-a nyɔ̍ duuh nu̍ ɔ̍ gba̍tòà, iě duuh nu̍ tu̍owli po̍ nyɔ̍, wɛ̀ duuh nu̍ pɔ̀n chɛ̀ nya̍ naɛ nyɔ̍, iě duuh nu̍ pǎslɔ̀ ke nǎ po̍ nyɔ̍.

¹² Ɔ̍ nu̍ ɛ̍-ɛ wɛ̀ ɔ̍ iě Nyɔsoa-a nyɔ̍ gba̍a̍ po̍ dǒ Nyɔsoa-a dbo̍ u̍h-a mu̍-a nu̍-ɛ we̍. Wɛ̀ u̍h iě ɔ̍ nyɔ̍ ùh nu̍-a ɔ̍ ku̍-ɛ dǒ ta̍i̍ po̍.

¹³ U̍h-a mu̍ ɛ̍ nu̍ te̍e̍ wɛ̀ à kli̍hgbɛ̍ à wlùh gbaɛ blě-ɛ ke à Nyɔsoa-a Jǔ juo-ɛ iě ɛ̍ nu̍ wɛ̀ à iě nyɔ̍ due nu̍. Nɛ̀ à mu̍ ku̍ dě Nyɔsoa dɛ di̍i̍ wɛ̀ à iě gblɛ̍ja̍i̍ wɛ̀ slèěslè ka Klai nɛ-aɛ.

¹⁴ Nɛ̀ à se̍ nynuu̍plìh wɔ̀ mu̍ dɛ dode̍, wɛ̀ nyɔ̍ i̍ boe nyɔ̍-a nǎ po̍ wlu̍-a poɔ-ɔ je̍e à gba̍. Nɛ̀ à se̍ mu̍-ɔn ji̍-ɔn nu̍ mu̍ dǒ u̍h-a gblàa̍ ɛ̀ po̍-a nyɔ̍ chǔh we̍ niɔ̍-ɛ pùn.

¹⁵ Jɛ pò à ja la̍ tìh-a taǐn sà dě jbɛɛ di̍i̍-ɛ, nɛ̀ à mu̍ ku̍ tà kli̍hgbɛ̍ wɛ̀ à iě Klai wɔ̀ ɔ̀ nu̍-a chɔchi̍h-a dlǔ-ɛ.

¹⁶ Dě ɔ̍ ja̍a̍ bo ku̍ kli̍hgbɛ̍ tùi i̍ iě ɛ̍ gbe̍ɛ̍ɛn i̍, wɛ̀ ɛ̍ poe-ɛ nǐ i̍. Pò ka ɛ̍ fɔ̌ᵻ nu̍-a nɛ-ɛ i̍h ja laan dbo̍ nu̍-ɛ nu̍-ɛ, nɛ̀ ku̍-a chɛ̀ ɛ̍ mu̍ ku̍ wɛ̀ ɛ̍ iě ɛ̍ chɛ̀ dǒ ta̍i̍ po̍ dě jbɛɛ di̍i̍.

Dě Nyɔsoa-a kmɔ̌ di̍i̍ bo à iě nɛ

¹⁷ Nɛ̀ɛ̍, ǐn gbɛ̍n mɔ̀-a bu̍hᵻ i̍ dǒ Joi-a nynɛ̌ kɛ̍n, mɔ̀ bɔ̌ kmɔ̌ nɛ-ɛ dɛ ka se̍ Nyɔsoa juo nyɔ̍-ɛ. Dɛ̍nu̍ɛ, u̍h nɔ̀ɔ̍, pɔ̀ɔ̍pìe̍ dɛ̍ᵻ bo u̍h-a slè-e wlùh i̍.

¹⁸ U̍h-a wlùh gbe kɛ̍n i̍ dǒ dɛ̍ɛ̍ i̍ wɔ̌n la̍-a, sɔ u̍h nɛ-ɛ fɔ̌ i̍ dǒ kmɔ̌ Nyɔsoa nyǐ-a àɔ̀-ɛ we̍. Dɛ̍nu̍ɛ, u̍h-a se̍ dɛ̍ jlǐh juo ke u̍h-a dlǔ ku̍-ɛ bo ɛ̀ nu̍ ɛ̍.

¹⁹ U̍h-a wlùh gbǎ gbǎ i̍ iě u̍h sà u̍h-a chɛ̀ kwlǎ dǒ se̍i̍kɔɛn nu̍-ɛ we̍, wɛ̀ u̍h kɔn klǎn dǒ sììjii̍ kli̍hgbɛ̍ nu̍-ɛ we̍.

²⁰ Ɛ̍ se̍ ìh la mɔ̀ se̍ cheǎn dǒ Klai pùn.

²¹ Ǐn juo ɛ̍-ɛ mɔ̀ wɔ̌n ɔ̍ dɛ-a pɔ̀n wɛ̀, iě mɔ̀ poe-ɛ nǎ wɛ̀ ke dǒ tìh-a taǐn ɛ̀ nɛ-a dě ɔ̍ ja̍a̍-ɛ we̍.

²² Mɔ̀-a tu̍ soa mɔ̀ nɛ-a dě di̍i̍ de ɛ̀ kɔn-a dǒ mɔ̀-a kmɔ̌ soa we̍-ɛ, mɔ̀ sɔ dě ɛ̍ di̍i̍. Ɛ̍ nyni i̍ mɔ̀ jii̍ dǒ mɔ̀-a chɛ̀-a wlùh dɛ̍ᵻ ìh-a boe-a mɔ̀ i̍-ɛ we̍.

²³ Mɔ̀-a pɔluh ke mɔ̀-a wlùh kɔn i̍h iě delee nu̍,

²⁴ mɔ̀ iě dě tu̍ delee ɛ̀ Nyɔsoa nu̍-a dě ɔ̍ chɛ̀-a tu̍ di̍i̍-ɛ gbǎ, ɛ̀ slɛ̌-a i̍ iě ɛ̀ wɛ̀-a nɛi̍ slèěslè-ɛ.

²⁵ Ɛ̍ tìh-ɛ, mɔ̀ tǎli si̍h tmɔ̌ dɛ̍ i̍. Nyɔ̍ kli̍hgbɛ̍ sà tìh-a taǐn la̍ sǔh dě u̍h pònyɔ̍ we̍. Dɛ̍nu̍ɛ, à kli̍hgbɛ̍ à nɛ due wɛ̀.

²⁶ Pò nyɔ̍ gbǎ jlu̍h-ɛ, ɔ̍ bɔ̌ wɔ̌n-ɛ ɔ̍ jlu̍h bɔ̌ ɔ̍ gblɛ̍n sɔ̀ɛ̀n we̍ gba̍-a. Bɔ̌ wɔ̍n-ɛ wlù bɔ̌ àn jlu̍h kɛ̍n i̍ wɔ̀-ɛɛ.

²⁷ Mɔ̀ bɔ̌ Kǔ flɔn la̍ nyǐ-ɛ wɛ̀ ɛ̍-ɛ je̍e mɔ̀ blu̍ja̍a̍ po̍.

²⁸ Nyɔ̍ ɔ̀ jlǐ-aɛ, ɔ̍ bɔ̌ jlǐ-ɛ dɛ. Jɛ ɔ̍ nu̍ dbo̍ ɛ̀ slɛ̌-a i̍-ɛ. Nɛ̀ ɔ̍ mu̍ la̍ dɛ̍ blě ke, wɛ̀ ɔ̍ iě nyɔ̍gbà nyɔ̍ we̍ gbǎ-a bɛ̌ɛ.

²⁹ Mɔ̀ bɔ̌ wɔ̌n-ɛ wlu̍ sɔ̀n bɔ̌ dě mɔ̀ wɔ̍ɔ̍n sɔ-ɛ, jɛ wlu̍ ɛ̀ iě-a u̍h dǒ ta̍i̍ po̍ ɛ̀ blaɛ-a i̍ dǒ ti̍ laa̍ di̍i̍ ɛ̀ iě-a u̍h we̍ gbǎ-a, ɛ̍-ɛ bo mɔ̀ iě bla̍. Wɛ̀ nyɔ̍ ùh-a mu̍-a ɛ̍ dounᵻ we̍ po̍-ɛ, ɛ̍ iě-o u̍h-a dɛ̍ po̍.

³⁰ Mɔ̀ bɔ̌ Nyɔsoa-a Sùù-a wlùh seɔn po̍-ɛ. Dɛ̍nu̍ɛ, ɛ̍ bo ɛ̀ nu̍ mɔ̀ naɛ juola dǒ weɛ̍ mɔ̀-a mu̍-a sèìe-ɛ di̍i̍.

³¹ Mɔ̀ tǎli wɔ̍n nyni gblɛ̍n kli̍hgbɛ̍ ke, nyɔ̍ɔ nyɛ̌-ɛ ke, jlu̍h ke, i̍-i wǐi-ɛ ke, nyɔ̍-a wlu̍ wɔ̍i̍n i̍ nyni-ɛ ke kà kɔn-ɛ i̍.

³² Jɛ mɔ̀ nmɔ-ɛ we̍ gblɛ̍n-ɛ, mɔ̀ jiěe we̍ wɔɛ. Nɛ̀ mɔ̀ tǎli mɔ̀ ba̍ᵻá dɛ̍ sɔ̀n-a tìh i̍, ka Nyɔsoa nu̍-a mɔ̀-a gblɛ̍n sɔ̀ɛ̀n-a tìh i̍ tǎli-ɛ dě Klai ja̍a̍-ɛ.