Ɛfɛsɔ 3 - Ku̍o̍ Delee 1999

Pɔɔ nu̍ Nyɔsoa-a pòi̍ju dǒ ùh se̍-a Juu nyɔ̍-ɛ we̍

¹ Dɛ̍ laa̍ ɛ̀ Nyɔsoa nu̍-a, ɛ̍ kɔn tìh ǎn ba̍le ɔ̍. Mɔ̀ɔ̍ ùh se̍-a Juu nyɔ̍-ɛ mɔ̀-a tìh bo wɛ̀ ǐn nu̍ Jusu Klai-a pòi̍ju, iě ǐn nu̍ ka gbɛ̍n-nyɔ̍.

² Ǐn juo ɛ̍-ɛ mɔ̀ wɔ̌n i̍h wɛ̀, Nyɔsoa-a blɛ nɛ-ɛ bo ɛ̀ nu̍ ɛ̍ wɛ̀ ɔ̍ nyǐ ǐn dbo̍ la iě ɛ̍ nu̍ dǒ mɔ̀ we̍.

³ Dɛ̍ ɛ̀ Nyɔsoa sìle-aɛ, ɛ̍ bo ɔ̍ toe m iě ɛ̍ juo. Kǎ ǐn nu̍ ɛ̍ dɛ̍ tile wɛ chlǐh-ɛ ke.

⁴ Nɛ̀ pò mɔ̀ slè ɛ̍-ɛ, ka ǐn nu̍-a sìle dɛ̍ ɛ̀ tba̍-a dǒ Klai pùn i̍-ɛ we̍ i̍ wɔ̌n-ɛ, nɛ̀ mɔ̀-a mu̍ ɛ̍ juo.

⁵ Sìle dɛ̍ la nyɔ̍ se̍ ɛ̍ juo de tɛin, jɛ ɛ̍-ɛ bo Nyɔsoa-a Sùù toe ɔ̍ gba̍tòà ke ɔ̍ tu̍owli po̍ nyɔ̍ ɔ̍ tè-ea pɔ̌-ɛ wɛ̀.

⁶ Ɛ̀ nu̍-a sìle dɛ̍-a chɛ̀-ɛ, ɛ̍ nu̍ Jusu Klai ke ùh se̍-a Juu nyɔ̍-ɛ nɛ due dě pɔ̀n chɛ̀ di̍i̍. Ɛ̍ bo ɛ̀ nu̍ ɛ̍ iě u̍h blě ka fɔ̌ wɛ̀ dǒ dɛ̍ᵻ Nyɔsoa tè-a i̍ dǒ Juu nyɔ̍ we̍-ɛ we̍. Ɛ̍-ɛ due laa̍ bo ɛ̀ nu̍ ɛ̍ iě u̍h ke Juu nyɔ̍ nu̍ nyɔ̍ due wɛ̀, iě u̍h kɔn dɛ̍ ɛ̀ kɔn wlu̍ Nyɔsoa po̍-a tɔ̀ma̍a̍-a ke.

⁷ Nyɔsoa-a gbǐh-a nu̍ dbo̍, ɛ̍ kɔn ɔ̍ blɛ nɛ-ɛ nui ǐn pòi̍ju dǒ pɔ̀n chɛ̀ la we̍.

⁸ Kǎ ɛ̍ nɛ gbɛɛ, mɔ̍ Nyɔsoa nyɔ̍ kli̍hgbɛ̍-a konynǐ. Jɛ Nyɔsoa tè-e ǐn dbo̍ la kwa̍ iě pɔ̀ìě klaa ɛ̀ Klai-a nyǐ-a nyɔ̍-ɛ, ɛ̍ tìh we̍i̍ bla̍ dě ùh se̍-a Juu nyɔ̍-ɛ we̍.

⁹ Wɛ̀ iě dɛ̍ ɛ̀ Nyɔsoa ɔ̀ nu̍-a dɛ̍ᵻ kli̍hgbɛ̍-ɛ ɔ̍ sìle-a de tɛin-ɛ, ɛ̍ tìh we̍i̍ flɔn-ɛ ke dě nyɔ̍ kli̍hgbɛ̍ we̍.

¹⁰ Nyɔsoa nu̍ ìh la iě chɔchi̍h iě ɛ̍ nu̍ wɛ̀ nyɔ̍-a wlu̍ kwa̍ blě nyɔ̍ ke, gbǐh nɛ-a dě ja̍i̍wlɔ̀-ɛ i̍h iě Nyɔsoa-a flɔ̍nwlùh kli̍hgbɛ̍ la juo kaka.

¹¹ Nɛ̀ Nyɔsoa-a di̍i̍chì la ɔ̍ chɛ̍n-a wɛ̀ kmɔ̌ iě-a nui-ɛ dǔ-ɛ, ka ɔ̍ nu̍-a ɛ̍ dɛ plǐn-ɛɛ, kǎ ɔ̍ nu̍ ɛ̍ nu̍-ɛ dě à Joi Jusu Klai ja̍a̍.

¹² Nɛ̀ ka à ke Klai nɛ-a due iě à gbaɛ-a ɔ̍ wlùh-ɛ, nɛ̀ à bɛ̌ wlì i̍ wɛ̀. Nɛ̀ dɛ̍ se̍ à i̍ ka̍n dɛ dǒ Nyɔsoa wlì mu̍ la̍.

¹³ Ɛ̍ tìh-ɛ, ǐn gbɛ̍n mɔ̀-a bu̍hᵻ i̍, mɔ̀-a wlùh bɔ̌ dě de̍ i̍ gbǎ-a ka ǎn sàɛ̀-a jua̍i̍ mɔ̀-a tìh-ɛ. Ɛ̍ bo ɛ̀ mu̍-o mɔ̀-a dɛ̍ po̍.

Pɔɔ ba̍le dǒ Ɛfɛsɔ nyɔ̍-a tàà

¹⁴ Dɛ̍ Baa Nyɔsoa nu̍-aɛ, ɛ̍ tìh bo ǐn po̍ kɔlu̍ᵻ wlù dǒ ɔ̍ jǔ.

¹⁵ Ɔ̍-ɔ bo ɔ̀ nyǐ nyɔ̍ kli̍hgbɛ̍ nɛ-a dě ja̍i̍wlɔ̀-ɛ ke nɔ̌ bloɔ̍-ɛ feɛ.

¹⁶ Ǎn ba̍le ɔ̍-ɛ, ɔ̍ tìh-a i̍ bɛ̌-ɛ ɛ̀ ku̍-a wɔ̍n kaa̍-ɛ, ɔ̍ iě ɛ̍ mɔ̀-a wlùh fùka-ɛ dě ɔ̍ Sùù di̍i̍.

¹⁷ Wɛ̀ Klai iě dě mɔ̀ wlùh di̍i̍ tǐn dǒ mɔ̀-a wlùh gbaɛ blě-ɛ we̍. Ǎn ba̍le Nyɔsoa wɛ̀ jbɛɛ iě mɔ̀-a blǔh nu̍ mɔ̀ iě ɛ̍ sɛ̌n kɛ̍n poe, wɛ̀ mɔ̀ iě i̍ ku̍.

¹⁸ Wɛ̀ mɔ̀ ke Nyɔsoa-a nyɔ̍ kli̍hgbɛ̍ iě gbǐh blě, mɔ̀ iě Klai-a mɔ̀ɔ̍ jbɛɛ ɛ̀ se̍-a sie-e la̍ kɔn-ɛ we̍ i̍ ju̍o̍e.

¹⁹ Wɛ̀ mɔ̀ iě ɛ̍ juo ka Klai jbɛɛ-a mɔ̀ɔ̍-ɛ. Nyɔ̍ se̍ ɔ̍ mɔ̀ɔ̍ jbɛɛ we̍ i̍ ju̍o̍e-ɛ bɛ̌ɛ kleǐnklein. Nɛ̀ ɔ̍ jbɛɛ-a mu̍ ɛ̍ nu̍ Nyɔsoa-a nɛ ka̍ iě mɔ̀ɔ̍ i̍ jǐi.

²⁰ Nyɔsoa ɔ̀ kɔn gbǐh-a nu̍-a dbo̍ dě à ja̍a̍-ɛ, ɔ̍ bɛ̌ɛ dɛ̍ᵻ dɔu nu̍-ɛɛ ɛ̍ iě à jbǎ-a dɛ̍ᵻ ke wlùh i̍ naɛ dɛ̍ᵻ kli̍hgbɛ̍ sìì.

²¹ Nɛ̀ɛ̍, ɔ̍ nynɛ̌ bo ɛ̀ iě i̍ bɛ̌-ɛ dě chɔchi̍h ke dě Jusu Klai ja̍a̍ ti̍ kli̍hgbɛ̍ we̍ nɔ̌ kmɔ̌-a kmɔ̌. Kǎ ɛ̍-ɛ nɛ.