Ɛfɛsɔ 2 - Ku̍o̍ Delee 1999

À nɛ kmɔ̌ wɛ̀ dě Klai ja̍a̍

¹ Ti̍ mɔ̀-a nu̍-a gblɛ̍n sɔ̀ɛ̀n mɔ̀-a wa̍-a Nyɔsoa-a telě-ɛ, nɛ̀ mɔ̀ mɛ̌ wlɔ̀ i̍ de.

² Ɛ̍ ti̍ laa̍ nɛ̀ mɔ̀ wɔ̀ dǒ kmɔ̌-a dɛ̍ᵻ sɔ̀nᵻ de̍e̍. Nɛ̀ ɛ̀ kɔn-a jeědih wlu̍ i̍ dě ja̍u̍n wlì-ɛ, ɛ̍ bo mɔ̀-a jě dɛ̍ɛ̍. Nyɔ̍ ùh se̍-a Nyɔsoa-a wlu̍ nu̍-ɛ, nɛ̀ ɛ̀ kɔn-a jeědih wlu̍ i̍-ɛ bo ɛ̀ kɔn u̍h wlu̍ kɛ̍ɛ̍n wɛ̀ ke.

³ Ka u̍h nɛ-aɛ, kǎ à nɛ ke de. Dɛ̍ᵻ à gblɛ̍n sɔ̀ɛ̀n ku̍ ke, à wlùh ke à nyi̍ɔ̍ku-a pɔ̀n-aɛ, i̍h bo à nu̍. Ka nyɔ̍ kli̍hgbɛ̍ nɛ-aɛ, kǎ à nɛ de, iě Nyɔsoa-a mu̍ à kli̍hgbɛ̍ jlu̍h po̍-e ke de à gblɛ̍n sɔ̀ɛ̀n-a tìh.

⁴ Jɛ Nyɔsoa-a wɔɛ bo ɛ̀ tìè i̍, iě ɔ̍ àɔ̀ jbɛɛ ku̍ wɔ̍n.

⁵ Ɛ̍ kɔn ti̍ à mɛ̌-a dě à telě wa̍-a di̍i̍-ɛ, wɛ̀ ɔ̍ nu̍ ɛ̍ iě à ke Klai wlǔh-e dǒ tàdùè. Nyɔsoa-a blɛ nɛ-ɛ bo ɛ̀ pǔh-i mɔ̀ wɛ̀.

⁶ À ke Jusu Klai-a due nɛ-ɛ bo ɛ̀ nu̍ ɛ̍ iě ɔ̍ sà-ae à ke Klai, wɛ̀ à ke ɔ̍ iě dě ja̍i̍wlɔ̀ wlu̍ i̍ kɔn.

⁷ Ɔ̍ nu̍ ɛ̀ la wɛ̀ ɔ̍ iě ɔ̍ blɛ to dě nyɔ̍ɔ we̍ dǒ ti̍ ɛ̀ se̍a sie la̍ kɔn-ɛ we̍. Ɔ̍ blɛ nɛ-ɛ la ɛ̍ ku̍ wɔ̍n kaa̍ ɛ̍ sìì-o dɛ̍ i̍. Ɛ̍ jii dě ɔ̍ gblɛ̍n-ɛ nmɔ-ɛ di̍i̍. Ɛ̍-ɛ bo ɛ̀ nu̍ ɛ̍ iě ɔ̍ dbo̍ Jusu Klai nɔ̌ à we̍.

⁸ Nyɔsoa-a blɛ nɛ-ɛ bo ɛ̀ pǔh-i mɔ̀ wɛ̀. Mɔ̀-a ɔ̍ wlùh gbaɛ bo ɛ̀ nu̍ ɛ̍. Ɛ̍ se̍ mɔ̀-a chɛ̀-a nu̍-dɛ̍, Nyɔsoa-a nyǐ-dɛ̍ bo.

⁹ Ɛ̍ se̍ mɔ̀-a chɛ̀-a nu̍-dɛ̍ᵻá tìh, sɔ nɛ̀ nyɔ̍ bɔ̌ ɛ̍ tìh-a wɔ̍n i̍ po̍-ɛ.

¹⁰ Nyɔsoa nu̍ àɔ̀ iě ɔ̍ nyǐ àɔ̀ feɛ delee. Jusu Klai bo ɔ̀ nu̍ ɛ̍ iě à nu̍ dbo̍ chɛ̀, ìh Nyɔsoa po̍-a gba̍a̍ se̍e̍ à iě-a nu̍-ɛ.

À nɛ due wɛ̀ dě Klai ja̍a̍

¹¹ Mɔ̀ɔ̍ ùh se̍-a Juu nyɔ̍-a wlǔh-i nynuu̍-ɛ, mɔ̀ nu̍ ka mɔ̀ nɛ-a tɛin-ɛ wlùh we̍. Tɛin-ɛ, Juu nyɔ̍ ùh-a dǎɛ-a u̍h-a chɛ̀ plɔ̀n gbǎ nyɔ̍ ɛ̀ nyi̍ɔ̍-a sɔ̍n-a nu̍-a dǒ jɔ̍gbauᵻá ku̍ pùn-ɛ, u̍h-a dǎɛ mɔ̀ se̍ plɔ̀n gbǎ nyɔ̍.

¹² Ɛ̍ ti̍ laa̍ nɛ̀ mɔ̀ nɛ-ɛ fɔ̌ i̍ dǒ Klai we̍. Nɛ̀ mɔ̀ ke Nyɔsoa-a chèɛ̀ tba̍ nyɔ̍ se̍ nɔ̌ i̍ nɛ-ɛɛ. Ku̍o̍ ìh Nyɔsoa po̍-a dǒ ɔ̍ tɔ̀ma̍a̍ wlu̍ kɛ̍n-ɛ, nɛ̀ mɔ̀ nu̍ dakɔ̍ pàɔ̀n dǒ i̍h we̍. Nɛ̀ mɔ̀ se̍ wlùh i̍ kɔ̍ dɛ̍ blě, iě mɔ̀ se̍ Nyɔsoa dɛ i̍ juo nɔ̌ kmɔ̌ we̍.

¹³ Jɛ mɔ̀ɔ̍ ùh ti̍ɛ̍ɛn-a Nyɔsoa we̍ i̍ de-ɛ, mɔ̀ ke Jusu Klai-a due nɛ-ɛ bo ɛ̀ ja ka mɔ̀ de̍ kɛklɛɛ dě ɔ̍ nymɔ̍-a i̍ wlǎ-a di̍i̍.

¹⁴ Klai-a chɛ̀ bo ɔ̀ nu̍ ɛ̍ iě mɔ̀ɔ̍ ùh se̍-a Juu nyɔ̍-ɛ iě mɔ̀ ke Juu nyɔ̍-a wɔ̌ɛn ka wlu̍ i̍. Wɛ̀ nyeɛ̍ɛn-a chɛna̍ nɛ-a dǒ à nynɛ̌ de-ɛ, iě ɔ̍ wa̍ ɛ̍ dě ɔ̍ nyi̍ɔ̍ku di̍i̍. Wɛ̀ ɔ̍ nu̍ àɔ̀ nyɔ̍ due we̍i̍.

¹⁵ Ɔ̍ sà telě Nyɔsoa nyǐ-a Mose-ɛ ke telě diih Juu nyɔ̍ blě-a dǒ wìè-i. Ɔ̍ nu̍ ɛ̍-ɛ wɛ̀ u̍h-a gbɔ̍ᵻ nɛ-a sɔɔ̌n-ɛ, ɔ̍ iě u̍h nyɔ̍ delee we̍i̍ nu̍ u̍h iě due nɛ dě ɔ̍ chɛ̀ ja̍a̍. Wɛ̀ ɔ̍ nu̍ ɛ̍ iě u̍h-a wɔ̌ɛn ka wlu̍ i̍.

¹⁶ Ɔ̍ nu̍ àɔ̀ nyɔ̍ due we̍i̍, wɛ̀ ɔ̍ dǒ gbàɛ̍ kɛ̍n i̍ tu̍ wlì mɛ̌ɛ nu̍ ɛ̍ iě àɔ̀ ke Nyɔsoa gbe̍ɛ̍ɛn kɛ̍n i̍. Wɛ̀ ɛ̍ chlà nyeɛ̍ɛn-a tu̍h nɛ-a dǒ à nynɛ̌ we̍ de-ɛ.

¹⁷ Klai ji̍-aɛ, wɛ̀ ɔ̍ bla̍ kmɔ̌ i̍ gbe̍ɛ̍ɛn pɔ̀n chɛ̀-a tìh we̍i̍ dě mɔ̀ɔ̍ ùh se̍-a Juu nyɔ̍ ùh ti̍ɛ̍ɛn-a Nyɔsoa we̍ i̍ de-ɛ we̍. Iě ɔ̍ bla̍ ɛ̍ dě Juu nyɔ̍ juh kɔǎn-ɛa ɔ̍ we̍ i̍-ɛ we̍ ke.

¹⁸ Dě Klai ja̍a̍ bo à jii wɛ̀ à wìè flɔn ka wɔ̍n dě Baa Nyɔsoa we̍ dǒ ɔ̍ Sùù-a à we̍ gbǎ-a we̍.

¹⁹ Nɛ̀ sɔ da̍a sèàn blǐ-ɛ, mɔ̀ se̍ dakɔ̍ nynuu̍ ke dihwi̍hᵻ dɛ fu̍u̍. Mɔ̀ɔ̍ blǔh nynuu̍ wɛ̀ dě Nyɔsoa-a nyɔ̍ nynɛ̌, mɔ̀ɔ̍ ɔ̍ gbò nynuu̍ wɛ̀.

²⁰ Mɔ̀ɔ̍ bo ùh nu̍ gbò. Klai-a gba̍tòà ke Nyɔsoa-a tu̍owli po̍ nyɔ̍ bo ùh nu̍ gbò-a gbo̍tu, wɛ̀ Jusu Klai-a chɛ̀-a gbǎ nu̍ ɛ̍ sìtù.

²¹ Ɔ̍-ɔ bo ɔ̀ gbe̍ɛ̍ɛn gbò gbàǐ laa̍ i̍ iě ɛ̍ ku̍ i̍ wɛ̀ ɛ̍ nu̍ ka slaǎ sà gbò ɛ̀ tè-a pɔ̌ dǒ Joi we̍-ɛ.

²² Mɔ̀ɔ̍ bo ùh nu̍ gbò ɛ̀ poe-a la̍ ke dě mɔ̀ ke ɔ̍ due nɛ-ɛ di̍i̍ tà Nyɔsoa-a Sùù tǐn-a.