Chiin 5 - Ku̍o̍ Delee 1999

Pàn-dɛ̍ᵻá tìh-a mu̍ i̍ sì

¹ Pàn-nyɔ̍, mɔ̀ tba̍ dounᵻ i̍. Mɔ̀ fìn mɔ̀ iě dlǔgba we̍ we̍le dǒ tìh jě-ɛ ɛ̀ ji̍-a la̍ dǒ mɔ̀ dlǔ-ɛ we̍.

² Mɔ̀-a pàn-dɛ̍ᵻá sɔ̀n la̍-ɛ, iě dǐkàsè-a di̍ mɔ̀-a jlii̍.

³ Mɔ̀-a kòo̍ ke sebla̍ wlǐ gbɛ̍n kǐh wɛ̀. I̍h-a kǐh bo ìh-a mu̍ mɔ̀ tìh gbɛ̍n-ɛ, wɛ̀ i̍h iě mɔ̀-a plǎᵻ di̍ ka nɛ̍ fɔ̍n nyɔ̍-ɛ. Mɔ̀-a tè pàn-dɛ̍ᵻ i̍ nɔ̌ bɔ̌ɛ-o wǐh la di̍i̍.

⁴ Gbɛ̀n-e, nyɔ̍ ùh nu̍-a dbo̍ dě mɔ̀ blǐ klè wɛ̀ mɔ̀ se̍-a pɛ̌ɛ-ɛ, u̍h-a fìn-i mɔ̀ dlǔ i̍. Joi Ɔ̀ Blě-a Gbǐh Kli̍hgbɛ̍-ɛ, nyɔ̍ ùh-a chɛ̍n-a mɔ̀-a klè-ɛ, u̍h-a fìn-wlu̍-a gbǎ la̍ dě ɔ̍ dounᵻ.

⁵ Mɔ̀ tǐn nɔ̌ bloɔ̍ dě kmɔ̌-a gbà ja̍, mɔ̀-a wlùh-a tè i̍. Mɔ̀ wɔ̀ nɛadɛᵻ bɔbɔ ìh kɔn plùn sɔ̀n chɛ̍n weɛ̍ nyni-aɛ.

⁶ Nyɔ̍ ɔ̀ se̍-a dɛ̍ sɔ̀n nu̍-ɛ, mɔ̀-a sà ɔ̍ kɛ̀n, iě mɔ̀-a dbǎ ɔ̍. Ɔ̍ wɔ̍ se̍ mɔ̀ bu̍hᵻ tbaɛ ke.

Wlùh i̍ gbɛ̍n-ɛ ke Nyɔsoa ba̍le-ɛ gbǎ dɛ̍kɛ̍n

⁷ Ǐn de̍di̍i̍ᵻ, mɔ̀ gbɛ̍n wlùh i̍ te̍e̍ wɛ̀ Joi iě ji̍. Ka fòɔ̀ nu̍ nyɔ̍-a nu̍-a ɔ̍ klè kɛ̍ɛ̍n fuo-ɛ te̍e̍ iě ɛ̍ sàni-aɛ, ɛ̍-ɛ bo mɔ̀ iě ja̍ gbɛ̀n. Ɔ̍ gbɛ̍n wlùh i̍ iě ɔ̍ chlì-o i̍, wɛ̀ tèwe nǐ ke bɔ̌ɛ-o nǐ-a dba̍.

⁸ Ɛ̍ tìh-ɛ, gbɛ̍n wlùh i̍ ke. Ku̍ wlì la̍ sǔh, dɛ̍nu̍ɛ, Joi-a ji̍-ɛ kɔǎn we̍ wɛ̀.

⁹ Ǐn de̍di̍i̍ᵻ, mɔ̀ bɔ̌ dɛ̍ᵻ jlǐh we̍ i̍ gba̍-a dě mɔ̀-a chɛ̀ nynɛ̌, wɛ̀ Nyɔsoa-a je̍e mɔ̀ tìh gbɛ̍n-ɛ. Tìh-a taɔ nynaɛ gbò wɔ̍n wɛ̀ ɔ̍ iě gbò pa̍.

¹⁰ Ǐn de̍di̍i̍ᵻ, Nyɔsoa-a tu̍owli po̍ nyɔ̍ ùh sàɛ̀-a jua̍i̍ iě ùh gbɛ̍n-a wlùh i̍, ùh po̍-a tu̍owli dǒ Joi-a nynɛ̌ kɛ̍n-ɛ, u̍h kɔn wɔ̀ɔ̀ bo mɔ̀ iě-e i̍ sà.

¹¹ Ɛ̍ kɔn à la̍ u̍h nmɔ i̍, dɛ̍nu̍ɛ, u̍h ku̍-e klì i̍. Ka Joo nu̍-a wlùh i̍ gbɛ̍n-ɛɛ, mɔ̀ wɔ̌n i̍h. Joi pe̍ɛ-ɛ ɔ̍ pɔluh dode̍, dɛ̍nu̍ɛ, Joi nmɔ gblɛ̍n-ɛ iě ɔ̍ kɔn wɔɛ.

¹² Ǐn de̍di̍i̍ᵻ, ɛ̀ gbǎ-a dɛ̍kɛ̍n dǒ ìh kli̍hgbɛ̍ la kɛ̍n-ɛ, ɛ̍ nu̍ pò mɔ̀ ja wlu̍ tɔ̀ma̍a̍ po̍-ɛ, nɛ̀ mɔ̀ bɔ̌ slɛ̀ɛ̀n-ɛ. Mɔ̀ bɔ̌ blǔh àe̍e̍ ja̍i̍wlɔ̀ slɛ̀ɛ̀n-ɛ, ɛ̍ ke dɛ̍ dɛɛ-a chɛ̀ ke. Jɛ pò mɔ̀ la̍ i̍i̍n-ɛ, nɛ̀ ɛ̍ nu̍ “I̍i̍n.” Iě pò mɔ̀ la̍ iěe-ɛ, nɛ̀ ɛ̍ nu̍ “Iěe,” wɛ̀ Nyɔsoa-a je̍e mɔ̀ kɛ̀n sà.

¹³ Nyɔ̍-a sàɛ̀ jua̍i̍ dě mɔ̀ nynɛ̌ ae? Nɛ̀ ɔ̍ ba̍le Nyɔsoa. Nyɔ̍ gbǎ mɔna̍-a dě mɔ̀ nynɛ̌ ae? Nɛ̀ ɔ̍ ble̍-e Nyɔsoa we̍ i̍.

¹⁴ Nyɔ̍-a poa-ɛ dě mɔ̀ nynɛ̌ ae? Nɛ̀ ɔ̍ dǎ chɔchi̍h-a nyɔ̍ klaaᵻ u̍h iě dǒ ɔ̍ tàà ba̍le. Nɛ̀ u̍h tli̍ ɔ̍ chlǎn dlǔ i̍ dǒ Joi-a nynɛ̌ kɛ̍n.

¹⁵ Nɛ̀ wlu̍ u̍h-a mu̍-aa ba̍le dě wlùh gbaɛ di̍i̍-ɛ, ɛ̍ bo ɛ̀ mu̍ poa-nyɔ̍ laa̍ pǔh-i, wɛ̀ Joi iě ɔ̍ bloɔ̍-ɔ sà. Nɛ̀ pò ɔ̍ nu̍ gblɛ̍n sɔ̀ɛ̀n-ɛ, nɛ̀ i̍h-a tìh-a mu̍ i̍ tǎli-ɛ.

¹⁶ Ɛ̍ tìh-ɛ, mɔ̀-a jɔ-ɛ nɛ̀ ɔ̍ sà ɔ̍ gblɛ̍n sɔ̀ɛ̀n gbɔ̀ i̍ dě ɔ̍ ba̍ we̍, wɛ̀ mɔ̀ iě-o we̍ tàà ba̍le, nɛ̀ mɔ̀-a mu̍ pǔh. I̍ slɛ̌-nyɔ̍-a ba̍le wlu̍ blě wɔ̍n ku̍ gbǐh, iě ɛ̍ po̍ dɛ̍ gbǐh we̍.

¹⁷ Ilaɛja nu̍ nyi̍ɔ̍ ke de ka à nɛ-aɛ. Ɔ̍ ba̍le-e kloklǒ nǐ-i je̍e dba̍, iě nǐ se̍ blǔh tǔh dǒ sɔ̀nᵻ ta̍a̍n gbɔ̀tìlè di̍i̍.

¹⁸ Wɛ̀ ɔ̍ ba̍le dɛ, iě nǐ dlɔ̍ dě ja̍u̍n wlì, wɛ̀ di̍-dɛ̍ᵻ nmɔ dode̍.

¹⁹ Ǐn de̍di̍i̍ᵻ, pò mɔ̀-a nyɔ̍ due sɔ dǒ tìh-a taǐn wìè kɛ̍n wɛ̀ ɔ̍ ba̍ iě ɔ̍ wìè-e po̍ dode̍-ɛ,

²⁰ nɛ̀ ɔ̍ juo ka pò nyɔ̍-o-nyɔ̍ po̍ gblɛ̍n sɔ̀ɛ̀n nyɔ̍ wìè-eɛ, nɛ̀ ɔ̍ sèìe gblɛ̍n sɔ̀ɛ̀n nyɔ̍-a sùù dě mɛ̌ɛ di̍i̍. Nɛ̀ Nyɔsoa-a mu̍ ɔ̍ gblɛ̍n sɔ̀ɛ̀n dɔu-a tìh i̍ tǎli.