Chiin 4 - Ku̍o̍ Delee 1999

Mɔ̀ ja mɔ̀-a chɛ̀ wlù dǒ Nyɔsoa we̍

¹ Chɛ̀-ɛ ke fɔ̀n-ɛ nɛ-a dě mɔ̀ nynɛ̌-ɛ, tà ɛ̍ sɔ ɛ? Mɔ̀-a chɛ̀-a wlùh dɛ̍ᵻ bo ìh-a fɔ̀n dě mɔ̀ ku̍sɔ̀n.

² Mɔ̀-a pɔ̀n dɛ̍ i̍, jɛ mɔ̀-ɔ jě ɛ̍. Ɛ̍ kɔn mɔ̀-a pɔ̀n kǔ dbǎ-a i̍ wɛ̀ mɔ̀ iě ɛ̍ jě. Mɔ̀-a nui dɛ̍ wɛɛn i̍, jɛ mɔ̀-ɔ jě ɛ̍. Ɛ̍ kɔn mɔ̀-a nui ɛ̍ chɛ̀-ɛ ke fɔ̀n-ɛ. Ɛ̀ kɔn mɔ̀-ɔ jě-a dɛ̍ mɔ̀-a pɔ̀n-a i̍-ɛ, mɔ̀-ɔ jbǎ-ɛ ɛ̍ Nyɔsoa.

³ Dɛ̍ mɔ̀-a jbǎ-aɛ, mɔ̀-ɔ jě ɛ̍. Dɛ̍nu̍ɛ, mɔ̀-a jbǎ ɛ̍ sɔ̀nka mɔ̀ iě mɔ̀-a chɛ̀-a wlùh i̍ tè-e.

⁴ Mɔ̀ɔ̍ la ùh sɔ-a dǒ Nyɔsoa de̍e̍-ɛ, ka pò nyɔ̍ jbɛɛ kmɔ̌-ɛ, nɛ̀ ɔ̍ nu̍-a Nyɔsoa-a nyɛ̌-nyɔ̍-ɛ, mɔ̀ se̍ i̍h juo ae? Nyɔ̍ jɔ pɔ̀n-a kmɔ̌-a jbɛɛ nyɔ̍ nu̍-ɛ i̍-ɛ, nɛ̀ ɔ̍ nu̍ ɔ̍ chɛ̀ Nyɔsoa-a nyɛ̌-nyɔ̍ we̍i̍.

⁵ Nyɔsoa-a wlu̍ la̍a̍, “Ɔ̍ Sùù ɔ̍ po̍-a dě à ja̍a̍-ɛ, ɛ̍ pɔ̀n à iě dǒ ɛ̍ nɛ due we̍ kɔn kleǐnklein.” Mɔ̀ jajeɛ̍ ɔ̍ bla̍ wlu̍ la de bu̍ɛ̍i̍ ae?

⁶ Nyɔsoa nɛ blɛ dǒ à we̍ kaa̍, ɛ̍ kɔn ɔ̍ wlu̍ la̍a̍, “Nyɔsoa faɛn blɔ̌-nyɔ̍. Jɛ ɔ̍ nɛ blɛ dǒ ùh-a ja-a u̍h-a chɛ̀ wlù-ɛ we̍.”

⁷ Ɛ̍ tìh-ɛ, mɔ̀ ja mɔ̀-a chɛ̀ wlù dǒ Nyɔsoa we̍. Mɔ̀ tba̍ Kǔ bu̍h, nɛ̀ ɛ̍ mu̍ ple̍ ɛ̍ iě dǒ mɔ̀ we̍-e sɔ.

⁸ Mɔ̀ kɔǎɛn Nyɔsoa we̍ i̍, nɛ̀ ɔ̍ mu̍ mɔ̀ we̍ i̍ kɔǎɛn. Gblɛ̍n sɔ̀ɛ̀n nyɔ̍, mɔ̀ dle kwa̍. Wlùh sɔɔ̌n i̍ gbè-a nu̍-u nyɔ̍, mɔ̀ nu̍ mɔ̀-a wlùh-a wlaǎwla.

⁹ Mɔ̀ gbǎ wɔɛ mɔ̀ iě sùàɛ̀n pa̍. Mɔ̀ bǐi mɔ̀-a deɔ̌ i̍, ɛ̍ iě fìn-ɛ sàɛ̀. Mɔ̀ tǎli nmɔ-ɛ i̍, mɔ̀ iě seɔn gbǎ.

¹⁰ Mɔ̀ ja mɔ̀-a chɛ̀ wlù dǒ Joi jǔ, nɛ̀ ɔ̍ mu̍ mɔ̀ ja̍i̍ dǔ.

Bɔ̌ ìn ba̍ tìh we̍ gba̍-a

¹¹ Ǐn de̍di̍i̍ᵻ, mɔ̀ bɔ̌ mɔ̀ ba̍ᵻá wlu̍ wɔ̍i̍n nyni-ɛ. Nyɔ̍ jɔ nyni-a ɔ̍ ba̍ Nyɔsoa nyɔ̍-a wlu̍ wɔ̍i̍n, àe̍e̍ ɔ̍ tù-a ɔ̍ tìh pùn-ɛ, nɛ̀ telě-a wlu̍ bo ɔ̍ nyni wɔ̍i̍n, iě ɔ̍ tù ɛ̍ tìh pùn. Pò ìn ja telě tìh pùn tù-ɛ, nɛ̀ ìn se̍ ɛ̍ dɛ̍ɛ̍ jě nyɔ̍, jɛ nɛ̀ mɔ̀ ɛ̍ tìh pùn tù nyɔ̍.

¹² Nyɔsoa due gbài̍ ɔ̀ nu̍-a telě po̍ nyɔ̍-ɛ, ɔ̍-ɔ bo ɔ̀ iě nyɔ̍ tìh pùn tù. Ɔ̍ nɛ due bo ɔ̀ bɛ̌ɛ nyɔ̍ pǔh-iɛ, àe̍e̍ nyɔ̍-ɔ gbɔ̀lɔ-ɛ. Mɔ̀ɔ̍ àn nynɛ̌-ɛ ke iě àn tù ìn ba̍ tìh pùn ɛ?

Nyɔ̍-ɔ si̍e̍ Nyɔsoa de̍ nɛ̀ chɛ̍n wǐh

¹³ Ǐn de̍di̍i̍ᵻ, mɔ̀ɔ̍ ùh-a nu̍-a, “Sèàn àe̍e̍ klàe̍-ɛ à mu̍ dǒ tùgbàwlɔ̀ jɛla̍ di̍i̍ mu̍ à iě-o pɛlǔh po̍-e dǒ sɔ̀n gbàǐ di̍i̍ à iě wlǐ dɔu jě-ɛ,”

¹⁴ dɛ̍ mu̍-a mɔ̀ pùn nɛ-a chɛ̀ klàe̍-ɛ, mɔ̀ juo ɛ̍-ɛ ae? Mɔ̀ wɔ̀ chlùu̍n. Klàɛ̍we̍-ɛ, nɛ̀ ɛ̍ po̍-e slàà sǔh iě ɛ̍ gbà ja̍i̍.

¹⁵ Kǎ mɔ̀ iě ka dǎ, mɔ̀ la̍a̍, “Pò Joi wɔ̌n wɛ̀ à iě kmɔ̌ nɛ-ɛ, nɛ̀ à mu̍ jɛla̍ nu̍.”

¹⁶ Jɛ mɔ̀-a po̍ wɔ̍i̍n, iě mɔ̀-a blɔ̌. Wɔ̍i̍n po̍-ɛ kaɛn la i̍h kli̍hgbɛ̍ nu̍ dɛ̍ᵻ sɔ̀nᵻ.

¹⁷ Ɛ̍ tìh-ɛ, nyɔ̍ ɔ̀ juo-a dɛ̍ chɛ̀ ɔ̀ iě-a nu̍, wɛ̀ ɔ̍ se̍-a ɛ̍ nu̍-ɛ, nɛ̀ gblɛ̍n sɔ̀ɛ̀n nyɔ̍ bo.